၇၇
၁ ၵဝ်တၵ်းပွႆႇသဵင်ၵဝ်လႄႈ ႁွင်ႉသႅၼ်ႇႁႃၽြႃးပဵၼ်ၸဝ်ႈဢေႃႈ။ၵဝ်တၵ်းပွႆႇသဵင်ၵဝ်ၸူးၵႃႈတီႈၽြႃးပဵၼ်ၸဝ်ႈလႄႈ ၸဝ်ႈႁဝ်းၶႅၼ်းတေႃႈ ထွမ်ႇငိၼ်းသေၵမ်းတီႈ ၶႃႈ။
၂ ၼႂ်းမိူဝ်ႈဝၼ်းဢၼ်ၽေးႁွတ်ႈထိုင်ၼၼ်ႉၵဝ်လႆႈႁႃၸဝ်ႈၽြႃးဢေႃႈ။ၶိင်ႇၵၢင်ၶိုၼ်းၵေႃႈၵဝ်လႆႈယဵတ်ႇ မိုဝ်းၸူးယူႇဢေႃႈ။
၃ ဝိၺိၺ်ႇၵဝ်ထဵင်ပႅတ်ႈတၢင်းဢၼ်သၢၵ်ႈသႃႇဢေႃႈ။ၵဝ်ၶုၵ်းၸႂ်လႆႈၶႆႈၸႂ်ထူပ်းၽြႃးပဵၼ်ၸဝ်ႈလႄႈ မီးတၢင်းဢၼ်ၶင်းၶီၶင်းၽၢၼ်ယူႇဢေႃႈ။ၵဝ်ၶႆႈၸႂ်ဝူၼ်ႉၸႂ်လႄႈ ႁွတ်ႈတၢင်းဢၼ်ၸႂ်လူႉဢေႃႈ။ၸေႇလႃႇ။
၄ ၸဝ်ႈႁဝ်း ယိပ်းၵႅမ်ႈတႃၶႃႈၸဝ်ႈသေလႄႈ ႁႂ်ႈၽုၺ်ႇဝႆႉတင်းၶိုၼ်းတီႈၶႃႈဢေႃႈ။ၵဝ်မီးတၢင်းဢၼ်ယၢပ်ႇၸႂ်ယုင်ႈၸႂ်ယူႇထၼ်ႈပေႃး ဢမ်ႇမွၵ်ႇလၢတ်ႈလႆႈယဝ်ႉ။
၅ ၵဝ်ၶုၵ်းၸႂ်လႆႈၶႆႈၸႂ်ထူပ်း ဝၼ်းမိူဝ်ႈၵွၼ်ႇဢွၼ်ၼႆႉၼၼ်ႉဢိၵ်ႇတင်း ၶူပ်ႇၼီႈပီႊမိူင်းဢၼ်ပူၼ်ႉမႃးႁိုင်ၼႃႇၼၼ်ႉ ဢေႃႈ။
၆ ၶိင်ႇၵၢင်ၶိုၼ်းၵေႃႈၵဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ် ႁဵတ်းၵႂၢမ်းၵဝ်ၼၼ်ႉယူႇလႄႈ ၵဝ်တွင်ႈထၢမ်လၢတ်ႈၸႃၵၼ်တင်းႁူဝ်ၸႂ်ၵဝ်လႄႈ ဝိၺိၺ်ႇၵဝ်ႁဵတ်းတၢင်းဢၼ် ၸႅတ်ႈထၢမ်ၸႅတ်ႈတူၺ်းၼႃႇ လူင်လၢင်ဢေႃႈ။
၇ ၸဝ်ႈၽြႃးတၵ်းၸုၼ်ႉပႅတ်ႈသေႇသေႇႁိုဝ်။ၵမ်းလိုၼ်းမၼ်းၸဝ်ႈယင်းဢမ်ႇႁဵတ်းၵျေးၸူး လႃးလႃးလႄႈတၵ်းယူႇႁိုဝ်။
၈ ၵရူႉၼႃႇမၼ်းၸဝ်ႈတၵ်းလူႉယူႇၶိင်ႇၵႃႇလႃႉသိုပ်ႇသိုပ်ႇတၢမ်ႈတၢမ်ႈႁိုဝ်။ၽြႃးပဵၼ်ၸဝ်ႈ လူင်ႈလိုမ်းလွင်ႈဢၼ်တၵ်းလႆႈဢိတ်းလူ ၼၼ်ႉယဝ်ႉႁိုဝ်။
၉ မၼ်းၸဝ်ႈၸႂ်မႆႈၶႂ်ႈၸႃႉသေလႄႈမၼ်းၸဝ်ႈၶျူၵ်ႈဝႆႉၵရူႉၼႃႇ တၢင်းဢၼ်ႁၵ်ႉပႅင်းၼၼ်ႉယဝ်ႉႁိုဝ်။ၸေႇလႃႇ။
၁၀ ၵဝ်ဝႃႈၸမ်း တၢင်းၶႆႈတၢင်းပဵၼ်ၵဝ်ၼႆႉ၊ ပဵၼ်ၶူပ်ႇၼီႈပီႊမိူင်းမိုဝ်းၶွၼ်ၶႂႃၽြႃး ဢၼ်သုင်ၼႃႇသေပိူၼ်ႈၼၼ်ႉ ဢေႃႈ။
၁၁ ၵဝ်တၵ်းဢဝ်ဢမူႉထႃႇဝရႃႉၽြႃးတင်းလၢႆမွၵ်ႇလၢတ်ႈလႄႈ ၶႃႈၸဝ်ႈ တၵ်းၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်လီဢၢမ်း ဢၼ်ၸဝ်ႈႁဝ်းယၢမ်ႈႁဵတ်းမိူဝ်ႈၵွၼ်ႇဢွၼ်ၼႆႉၼၼ်ႉၸိူဝ်းၼၼ်ႉတီႈၶႃႈဢေႃႈ။
၁၂ ၶႃႈၸဝ်ႈ တၵ်းၶႆႈၸႂ်လူၺ်ႈလွင်ႈတၢင်းဢၼ်ၸဝ်ႈႁဝ်းႁဵတ်းၵႃႈမီးၼၼ်ႉလႄႈတွင်ႈထၢမ်လၢတ်ႈၸႃၵၼ်တင်းတူဝ်ၸဝ်ႈၵဝ်ႇ လူၺ်ႈလွင်ႈတၢင်းဢၼ်ၸဝ်ႈႁဝ်းၸီႇယၢင်ႇႁဵတ်းဝႆႉၸိူဝ်းၼၼ်ႉတီႈၶႃႈဢေႃႈ။
၁၃ ၽြႃးပဵၼ်ၸဝ်ႈတီႈၶႃႈ၊ သဵၼ်ႈတၢင်းၸဝ်ႈႁဝ်းပဵၼ်ဢၼ်မူတ်းၸၢင်ႇတီႈၶႃႈဢေႃႈ။ၽြႃးဢၼ် လႂ်ယႂ်ႇမျၢတ်ႈမိူၼ်ၸိူဝ်ႉၼင်ႇၽြႃးပဵၼ်ၸဝ်ႈၼၼ်ႉတီႈၶႃႈ။
၁၄ ၸဝ်ႈႁဝ်း ပဵၼ်ၽြႃးဢၼ်ၸၢင်ႊႁဵတ်း လွင်ႈတၢင်းဢၼ်လီဢၢမ်းတင်းလၢႆလႄႈၼႄပျႃးတၼ်းၶူဝ်း ၸဝ်ႈႁဝ်းၵႃႈၼႂ်းမဵဝ်းၵူၼ်းတင်းလၢႆတီႈၶႃႈယဝ်ႉ။
၁၅ ၸဝ်ႈႁဝ်းဢဝ်ၶႅၼ်ၸဝ်ႈႁဝ်း ထူတ်ႇဢဝ် ၵူၼ်းၸဝ်ႈႁဝ်းဢၼ်ဝႃႈမဵဝ်းယႃႇၵုပ်ႉ ဢိၵ်ႇတင်း မဵဝ်းယုဝ်းသႅပ်ႉၸိူဝ်းၼၼ်ႉတီႈၶႃႈယဝ်ႉ။ၸေႇလႃႇ။
၁၆ ၽြႃးပဵၼ်ၸဝ်ႈတီႈၶႃႈ၊ ၼမ်ႉတင်းလၢႆ ႁၼ်ၸဝ်ႈႁဝ်းတီႈၶႃႈဢေႃႈ။ၼမ်ႉတင်းလၢႆႁၼ်ၸဝ်ႈႁဝ်းလႄႈရူဝ်ႇသေႇၵူဝ်ယမ်တီႈၶႃႈဢေႃႈ။ၼမ်ႉတီႈဢၼ်လိုၵ်ႉဢၼ်လမ်ႇၸိူဝ်းၼၼ်ႉၵေႃႈ တူင်ႉၼိုင်ၶွၼ်းၶဝ်ႇယူႇတီႈၶႃႈ ဢေႃႈ။
၁၇ ၽႃႉၽူၼ်တင်းလၢႆၼၼ်ႉထွၵ်ႇႁိုဝ်ႈၼမ်ႉလႄႈၽႃႉၵၢင်ႁၢဝ်ၵေႃႈ ႁဵတ်းသဵင်ဢၼ်ႁုၼ်ႉႁၼ်ဢူၼ်ဢဵၼ်မေႃးမႄးယူႇတီႈၶႃႈဢေႃႈ။ပိုၼ်ၵၢင်ႇၸဝ်ႈႁဝ်းတင်းလၢႆၵေႃႈ ၸွတ်ႇတူဝ်ၵႂႃႇၵူႈတီႈၵူႈလႅၼ်တီႈၶႃႈဢေႃႈ။
၁၈ သဵင်ၽႃႉၽႃႇၸဝ်ႈႁဝ်းၼၼ်ႉ ပႃးမႃးၼႂ်းလူမ်းၽိဝ်ႁူင်လႄႈ ၽႃႉမႅပ်ႈၸိူဝ်းၼၼ်ႉႁႂ်ႈလေႃးၵႃႉၼႆႉလႅင်းတီႈၶႃႈဢေႃႈ။လိၼ်မိူင်းၵေႃႈသၼ်ႇဝႆလႄႈတူင်ႉၼိုင်ယူႇတီႈ ၶႃႈဢေႃႈ။
၁၉ ပဵၵ်ႉသမ်ႉႁွႆးတိၼ်ၸဝ်ႈႁဝ်းတူၺ်းဢမ်ႇႁၼ်လႆႈသေၵေႃႈ သဵၼ်ႈတၢင်းၸဝ်ႈႁဝ်းမီးယူႇၵႃႈၼႂ်းၼမ်ႉသမ်ႇမုၵ်ႉတြႃႇလႄႈတၢင်းဢၼ်ၸဝ်ႈႁဝ်းၵႂႃႇၸိူဝ်းၼၼ်ႉ မီးယူႇၵႃႈၼႂ်းၼမ်ႉဢၼ်ယႂ်ႇၵႂၢင်ႈၼႃႇၼၼ်ႉတီႈ ၶႃႈဢေႃႈ။
၂၀ ၸဝ်ႈႁဝ်းဢဝ်တင်းမိုဝ်းမုဝ်းသေႇဢိၵ်ႇတင်းဢႃႇရုၼ်ႇသေလႄႈ ဢဝ်ၵူၼ်းၸဝ်ႈႁဝ်းတင်းလၢႆသူင်ႇၵႂႃႇမိူၼ်ၸိူဝ်ႉၼင်ႇၽုင်သူဝ်းၼၼ်ႉတီႈၶႃႈဢေႃႈ။