၆၁
၁ ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈ ထွမ်ႇငိၼ်းတၢင်းဢၼ်ၶႃႈၸဝ်ႈႁွင်ႉသႅၼ်ႇၼၼ်ႉလႄႈ မၢတ်ႈတွင်းဢဝ် ၵႂၢမ်းပထၼႃႇၶႃႈၸဝ်ႈသေၵမ်းတီႈၶႃႈ။
၂ ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်း ၸႃႉၸဵမ်တီႈသုတ်းလိၼ်မိူင်းပုၼ်ႉ ၼႂ်းမိူဝ်ႈဢၼ်ႁူဝ်ၸႂ်ႁဵဝ်ႇၸွပ်ႈၼၼ်ႉလႄႈ ၸဝ်ႈႁဝ်းတၵ်းဢဝ်ၶႃႈၸဝ်ႈ သူင်ႇႁွတ်ႈထိုင်ၵႃႈတီႈမၢၵ်ႇ ႁိၼ်ဢၼ်သုင်သေၶႃႈၸဝ်ႈၼၼ်ႉတီႈၶႃႈဢေႃႈ။
၃ ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈသွၼ်ႈပိုင်ႈ ပဵၼ်တိူၵ်ႈတီႈတိုၵ်းသိုၵ်းဢၼ်မၼ်ႈၶိူင်ႇ ၵႃႈတီႈၽၢႆႇၼႃႈရၢၼ်ႇသူႇ ၶႃႈၸဝ်ႈတင်းလၢႆၼၼ်ႉတီႈၶႃႈဢေႃႈ။
၄ ၶႃႈၸဝ်ႈတၵ်းယူႇၵႃႈၼႂ်းသုမ်ႉထဵင်ၸဝ်ႈႁဝ်းတႃႇသေႇလႄႈ တၵ်းသွၼ်ႈပိုင်ႈယူႇၵႃႈၼႂ်းတီႈဢၼ်ပိၵ်ႇၸဝ်ႈႁဝ်း ႁူမ်ႇသုမ်ႇဝႆႉၼၼ်ႉတီႈၶႃႈဢေႃႈ။ၸေႇလႃႇ။
၅ ၽြႃးပဵၼ်ၸဝ်ႈတီႈၶႃႈ၊ ၸဝ်ႈႁဝ်းငိၼ်းၵႂၢမ်းၵတိသႅတ်ႈၸႃႇဢၼ်ၶႃႈၸဝ်ႈႁဵတ်းၸိူဝ်းၼၼ်ႉလႄႈ ၸဝ်ႈႁဝ်းဢဝ်ဢမူၺ်ႇ ၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉပၼ်တီႈၶႃႈၸဝ်ႈတီႈၶႃႈ ဢေႃႈ။
၆ ၸဝ်ႈႁဝ်းတၵ်းႁႂ်ႈဢသၢၵ်ႈၶုၼ်ႁေႃၶမ်းယိုၼ်းယၢဝ်းလႄႈ ၶူပ်ႇပီႊမိူင်းၸဝ်ႈႁဝ်းၼၼ်ႉတၵ်းတႄႇယူႇ ၵူႈၸူဝ်ၵူႈပၢၼ်တီႈၶႃႈဢေႃႈ။
၇ မၼ်းၸဝ်ႈတၵ်းၼင်ႈယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ ၼိၵ်ႉၸႃႉထႃႇဝရႃႉတီႈၶႃႈဢေႃႈ။ၶႅၼ်းတေႃႈၸီႇယၢင်ႇႁႂ်ႈၵရူႉၼႃႇၶႃႈၸဝ်ႈဢိၵ်ႇတင်းသႅတ်ႈၸႃႇၸဝ်ႈ ပႂ်ႉၸွႆႈပႂ်ႉထႅမ်မၼ်း ၸဝ်ႈယူႇသေၵမ်းတီႈၶႃႈ။
၈ ၼင်ႇၼၼ်လႄႈၶႃႈၸဝ်ႈတၵ်းႁဵတ်းၵႂၢမ်းထေႃးပၼႃႇတီႈၼႃႇမႃႉၸိုဝ်ႈသဵင်ၸဝ်ႈႁဝ်း တႃႇသေႇဢမ်ႇထၢတ်ႇ ႁႂ်ႈလႆႈၽေႇဝၢတ်ႈသႅတ်ႈၸႃႇၵူႈမိူဝ်ႉၵူႈဝၼ်းတီႈၶႃႈဢေႃႈ။