၅
၁ ထႃႇဝရႃႉၽြႃးတီႈၶႃႈ၊ၶႅၼ်းတေႃႈထွမ်ႇဢဝ်ၵႂၢမ်းၶႃႈၸဝ်ႈလႄႈ ႁူႉႁၼ်တၢင်းဢၼ်ၶႃႈၸဝ်ႈၶႆႈၸႂ်ဝူၼ်ႉ ၸႂ်ယူၼၼ်ႉသေၵမ်းတီႈၶႃႈ။
၂ ၶုၼ်ႁေႃၶမ်းၵဝ်ၶႃႈ၊ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ပိူဝ်ႈဢၼ်ၶႃႈၸဝ်ႈသူးတွင်းတီႈၸဝ်ႈႁဝ်းလႄႈ ၶႅၼ်းတေႃႈထွမ်ႇဢဝ်သဵင်တၢင်းဢၼ်ၶႃႈၸဝ်ႈႁွင်ႉသႅၼ်ႇၼၼ်ႉ သေၵမ်းတီႈၶႃႈ။
၃ ထႃႇဝရႃႉၽြႃးတီႈၶႃႈ၊ ၶိင်ႇၵၢင်ၼႂ်ၸဝ်ႈႁဝ်းငိၼ်းသဵင်ၵႂၢမ်းၶႃႈၸဝ်ႈယူႇတီႈၶႃႈဢေႃႈ။ၶိင်ႇၵၢင်ၼႂ် ၶႃႈၸဝ်ႈဢဝ်တင်းတၢင်းဢၼ်သူးတွင်းပထၼႃႇ ႁႅၼ်းသိုဝ်ႈၼႃႈတၼ်းတႃၸဝ်ႈႁဝ်းလႄႈ မုင်ထႃႈမွင်းထႃႈယူႇ တီႈၶႃႈဢေႃႈ။
၄ ၸဝ်ႈႁဝ်းပဵၼ်ၽြႃးဢၼ်ထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ဢမ်ႇတြႃးၼၼ်ႉဢမ်ႇၸႂ်ႈ။ၶဝ်ၸိူဝ်းဢၼ်ႁၢႆႉဢၼ်ႁုၵ်းၼၼ်ႉ ဢမ်ႇမီးဢၶႂၢင်ႉဢၼ်လႆႈ ယူႇသဝ်းလူၺ်ႈၵၼ်တင်းၸဝ်ႈႁဝ်းၼၼ်ႉတီႈၶႃႈ။
၅ ၶဝ်ၸိူဝ်းဢၼ်မိူၵ်ႈဢၼ်ယုတ်ႈၼၼ်ႉ ဢမ်ႇလႆႈၸုၵ်းယူႇၵႃႈၼႂ်းဢထၢမ်ႇၸဝ်ႈ။ၸဝ်ႈႁဝ်းၸင်းၶဝ်ၸိူဝ်းဢၼ်ႁဵတ်းဢၼ်ဢမ်ႇတြႃးတင်းသဵင်ႈတင်းလူင်ၼၼ်ႉ တီႈ ၶႃႈဢေႃႈ။
၆ ၸဝ်ႈႁဝ်းယႃႉပႅတ်ႈၶဝ်ၸိူဝ်းဢၼ်လၢတ်ႈၵႂၢမ်းမူႉသႃႇၼၼ်ႉတီႈၶႃႈဢေႃႈ။ထႃႇဝရႃႉၽြႃးလီႁင်ႈဢဵတ်ႇသဵတ်ႇ ၶဝ်ၸိူဝ်းဢၼ်ၸၢင်ႊဢဝ်ဢသၢၵ်ႈၵူၼ်းတၢႆ ဢိၵ်ႇတင်း ၶဝ်ၸိူဝ်းဢၼ်ၸၢင်ႊပႅတ်ႉၸၢင်ႊ လႅၼ်ၸိူဝ်းၼၼ်ႉ တီႈၶႃႈဢေႃႈ။
၇ ၶႃႈၸဝ်ႈၸမ်းတၵ်းႁွတ်ႈထိုင်ၵႃႈၼႂ်းႁိူၼ်းၸဝ်ႈႁဝ်းၵွပ်ႈပိူဝ်ႈဢၼ်ၶႃႈၸဝ်ႈလႆႈၶၢမ်ႇဢဝ်ၵျေးၸူးၸဝ်ႈ ၼမ်ၼႃႇလူင်လၢင်ၼၼ်ႉလႄႈ တၵ်းမီးၸႂ်ဢၼ်ရူဝ်ႇသေႇၵူဝ်ယမ်ၸဝ်ႈႁဝ်းယူႇသေလႄႈ ၵူဝ်းၵႂၢႆႇၸူးၵႃႈတီႈပိၵ်ႉမၢၼ်ႇၸဝ်ႈ ႁဝ်းဢၼ်မူတ်းၸၢင်ႇၼၼ်ႉတီႈၶႃႈဢေႃႈ။
၈ ထႃႇဝရႃႉၽြႃးတီႈၶႃႈ၊ၵွပ်ႈပိူဝ်ႈ ရၢၼ်ႇသူႇၶႃႈၸဝ်ႈၸိူဝ်းၼၼ်ႉလႄႈ ၶႅၼ်းတေႃႈဢဝ်ၶႃႈၸဝ်ႈ သူင်ႇၵႃႈၼႂ်းသဵၼ်ႈတၢင်းတြႃးဢၼ်သိုဝ်ႈတေႃႇၸဝ်ႈႁဝ်းၼၼ်ႉ သေၵမ်းတီႈၶႃႈ။ၶႅၼ်းတေႃႈႁႂ်ႈသဵၼ်ႈတၢင်းၸဝ်ႈႁဝ်းသိုဝ်ႈလီ ၵႃႈတီႈၽၢႆႇၼႃႈၶႃႈၸဝ်ႈသေၵမ်းတီႈၶႃႈ။
၉ ၵႃႈၼႂ်းသူပ်းၶဝ်ၼၼ်ႉဢမ်ႇမီးသႅတ်ႈၸႃႇတီႈၶႃႈ။ၽၢႆႇတၢင်းၼႂ်းၶဝ်ၼၼ်ႉ ႁၢႆႉယုတ်ႈၼႃႇလူင်လၢင် တီႈၶႃႈဢေႃႈ။ၵူင်ၶေႃးၶဝ်ၼၼ်ႉ ပဵၼ်ၶုမ်ပႃႇႁဵဝ်ႈဢၼ်ၽုၺ်ႇဝႆႉၼၼ်ႉတီႈၶႃႈဢေႃႈ။ၶဝ်ၼၼ်ႉၸၢင်ႊဢဝ်လိၼ်ႉၶဝ်ၶျေႃး လဝ်ႇတီႈၶႃႈဢေႃႈ။
၁၀ ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈႁႂ်ႈဢပျႅတ်ႈ ႁွတ်ႈထိုင်ၵႃႈၼိူဝ်ၶဝ်ၼၼ်ႉသေၵမ်းတီႈၶႃႈ။ၶႅၼ်းတေႃႈႁႂ်ႈၶဝ်လူမ်ႉတူၵ်းလူၺ်ႈတၢင်းဢၼ်ၶဝ်ၵျၢမ်ႇပွင်ၼၼ်ႉသေၵမ်းတီႈၶႃႈ။ၶႅၼ်းတေႃႈႁေႃႈၶဝ်ဢွၵ်ႇပႅတ်ႈၵွပ်ႈပိူဝ်ႈဢပျႅတ်ႈ ဢၼ်ၶဝ်ၽိတ်းပိူင်ႈၼမ်ၼႃႇၼၼ်ႉသေၵမ်းတီႈၶႃႈ။လွင်ႈမၼ်းၸမ်း ၶဝ်ဢွၼ်ၵၼ်ပုင်ႇၵၢၼ်ႇၸဝ်ႈႁဝ်းတီႈၶႃႈယဝ်ႉ။
၁၁ ၶဝ်ၸိူဝ်းဢၼ်သွၼ်ႈပိုင်ႈၸဝ်ႈႁဝ်းယူႇၼၼ်ႉၸမ်းတၵ်းလႆႈမီးတၢင်းဢၼ်ၸူမ်းသိူဝ်းတီႈၶႃႈဢေႃႈ။ၶဝ်တၵ်းလႆႈမီးတၢင်းဢၼ်ၸူမ်းသိူဝ်းသေလႄႈ ႁွင်ႉသႅၼ်ႇႁွင်ႉၵိဝ်ယူႇသေႇသေႇ ၵွပ်ႈပိူဝ်ႈဢၼ်ၸဝ်ႈႁဝ်းပႂ်ႉလူႈပႂ်ႉတူၺ်းၶဝ်ယူႇၼၼ်ႉတီႈၶႃႈဢေႃႈ။ၶဝ်ၸိူဝ်းဢၼ်ႁၵ်ႉၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉ တၵ်းလႆႈမီးတၢင်းဢၼ်ၸူမ်း သိူဝ်းသႂၢင်ႇၸႂ်ယူႇၼႂ်းၸဝ်ႈႁဝ်းတီႈၶႃႈဢေႃႈ။
၁၂ ၸဝ်ႈႁဝ်း တၵ်းပၼ်တၢင်းလီတီႈ ၵေႃႉဢၼ်သိုဝ်ႈတေႃႇၼၼ်ႉလႄႈထႃႇဝရႃႉၽြႃးတီႈၶႃႈ၊ ၸဝ်ႈႁဝ်းတၵ်းဢဝ်တင်းၵျေးၸူးၸဝ်ႈႁဝ်းႁႄႉၵင်ႈႁႄႉလပ်ႉၶဝ်ဝႆႉ မိူၼ်ၸိူဝ်ႉၼင်ႇၶိူင်ႈႁႄႉလၢၵ်ႈၼၢၵ်ႈၼၼ်ႉတီႈၶႃႈဢေႃႈ။