၁၄၄
၁ ႁႂ်ႈမၢၵ်ႇႁိၼ်မၢၵ်ႇၽႃထႃႇဝရႃႉၽြႃး ဢၼ်သွၼ်ပၼ်ႁႂ်ႈမိုဝ်းၵဝ်မေႃတိုၵ်းသိုၵ်းလႄႈၼိဝ်ႉမိုဝ်းၵဝ်ၶတ်းၸႂ်လူၺ်ႈဢမူႉသိုၵ်းၼၼ်ႉ မီးမင်ႇၵလႃႇသေၵမ်းလူၺ်ႈ။
၂ မၼ်းၸဝ်ႈပဵၼ်ၸဝ်ႈဢၼ်ဢိတ်းလူၵဝ်၊ လမ်းဝဵင်းၵဝ်၊တိူၵ်ႈတီႈတိုၵ်းသိုၵ်းၵဝ်၊ ၸဝ်ႈဢၼ်ၵႄႇသႄႇဢဝ်ၵဝ်လွတ်ႈ၊ၶိူင်ႁႄႉလၢၵ်ႈၼၢၵ်ႈၵဝ်၊ ၸဝ်ႈဢၼ်ၵဝ်သွၼ်ႈပိုင်ႈ၊ၸဝ်ႈဢၼ်ဢဝ်ၵူၼ်းမဵဝ်းၵဝ်တင်းလၢႆ ၶျႃးဝႆႉၵႃႈတႂ်ႈၵဝ်ၼၼ်ႉဢေႃႈ။
၃ ထႃႇဝရႃႉၽြႃးတီႈၶႃႈ၊ ၵူၼ်းၸိုင်၊ ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းမၢတ်ႈတွင်းမၼ်းဝႆႉတီႈၶႃႈ။လုၵ်ႈၵူၼ်းၸိုင် ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၶုၵ်းၸႂ် လႆႈၶႆႈၸႂ်လူၺ်ႈလွင်ႈမၼ်းတီႈၶႃႈ။
၄ ၵူၼ်းၸိုင်မိူၼ်ၸိူဝ်ႉၼင်ႇဢၢႆၵႂၼ်းၼၼ်ႉတီႈၶႃႈဢေႃႈ။မိူဝ်ႉဝၼ်းမၼ်းတင်းလၢႆပဵၼ်ၸိူဝ်ႉၼင်ႇႁူမ်ႊငဝ်းဢၼ်ပူၼ်ႉၵႂႃႇၼၼ်ႉ တီႈၶႃႈ ဢေႃႈ။
၅ ထႃႇဝရႃႉၽြႃးတီႈၶႃႈ၊ၶႅၼ်းတေႃႈၼူပ်ႈၽႃႉၵၢင်ႁၢဝ်ၸဝ်ႈႁဝ်းသေလႄႈ လူင်းမႃးသေၵမ်းတီႈၶႃႈ။ၶႅၼ်းတေႃႈတိူဝ်ႉသႂ်ႇလွႆတင်းလၢႆသေၵမ်းတီႈၶႃႈ။ၶဝ် တၵ်းဢွၼ်ၵၼ်ဢွၵ်ႇၵွၼ်းၽႆး တီႈၶႃႈဢေႃႈ။
၆ ၶႅၼ်းတေႃႈႁႂ်ႈၽႃႉမႅပ်ႈၸဝ်ႈႁဝ်းမႅပ်ႈလႄႈ ႁႂ်ႈၶဝ်ၽူင်ႉၽၢင်ႉမိူဝ်မႃၵႂႃႇသေၵမ်းတီႈၶႃႈ။ၶႅၼ်းတေႃႈပိုတ်းယိုဝ်းပိုၼ်ၵၢင်ႇၸဝ်ႈႁဝ်းၸိူဝ်းၼၼ်ႉလႄႈ ၼိၵ်ႈၸၢၵ်ႈငႅၼ်းသေး ၶဝ်သေၵမ်းတီႈၶႃႈ။
၇ ၶႅၼ်းတေႃႈယူႇၵႃႈၼိူဝ်သေယဝ်ႉယဵတ်ႇယိုၼ်းမိုဝ်းၸဝ်ႈႁဝ်းသေလႄႈ ၵႄႇသႄႇဢဝ်ၶႃႈၸဝ်ႈလွတ်ႈလႄႈ ၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းၼမ်ႉဢၼ်ယႂ်ႇၼႃႇၼမ်ၼႃႇ ဢိၵ်ႇတင်းၵႃႈၼႂ်းမိုဝ်းၵူၼ်းတၢင်ႇ ဝၢၼ်ႈတၢင်ႇမိူင်းၸိူဝ်းၼၼ်ႉသေၵမ်းတီႈ ၶႃႈ။
၈ သူပ်းၶဝ်ၼၼ်ႉၸၢင်ႊလၢတ်ႈၵႂၢမ်းမူႉသႃႇလႄႈမိုဝ်းၶွၼ်ၶႂႃၶဝ်ၼၼ်ႉ ပဵၼ်မိုဝ်းဢၼ်ၸၢင်ႊပႅတ်ႉၸၢင်ႊလႅၼ် တီႈၶႃႈဢေႃႈ။
၉ ၽြႃးပဵၼ်ၸဝ်ႈတီႈၶႃႈ၊ ၶႃႈၸဝ်ႈတၵ်းႁဵတ်းၵႂၢမ်းဢၼ်မႂ်ႇတီႈၸဝ်ႈႁဝ်းတီႈၶႃႈဢေႃႈ။ၶႃႈၸဝ်ႈတၵ်းဢဝ်တူႇရီ့ယႃႇဢၼ်မီးသၢႆသိပ်းသဵၼ်ႈၼၼ်ႉ ႁဵတ်းၵႂၢမ်းထေႃးပၼႃႇတီႈၸဝ်ႈႁဝ်းတီႈၶႃႈ ဢေႃႈ။
၁၀ မၼ်းၸဝ်ႈပၼ်ဢၶႂၢင်ႉဢၼ်လႆႈႁဵတ်းပႄႉႁဵတ်းၼႅင်ႇၼၼ်ႉ တီႈၶုၼ်ႁေႃၶမ်းတင်းလၢႆလႄႈ ႁႂ်ႈၶႃႈမၼ်းၸဝ်ႈ တႃႇဝိတ်ႉ လွတ်ႈၵၢင်းတင်းၽေးလၢပ်ႇ ၽေးလႅဝ်းဢၼ်ႁၢႆႉဢေႃႈ။
၁၁ ၶႅၼ်းတေႃႈၵႄႇသႄႇဢဝ်ၶႃႈၸဝ်ႈလွတ်ႈလႄႈ ၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းမိုဝ်း ၵူၼ်းတၢင်ႇဝၢၼ်ႈတၢင်ႇမိူင်းၸိူဝ်းၼၼ်ႉသေၵမ်းတီႈၶႃႈ။သူပ်းၶဝ်ၼၼ်ႉၸၢင်ႊလၢတ်ႈၵႂၢမ်းမူႉသႃႇလႄႈ မိုဝ်းၶွၼ်ၶႂႃၶဝ်ၼၼ်ႉပဵၼ်မိုဝ်းဢၼ်ၸၢင်ႊပႅတ်ႉ ၸၢင်ႊလႅၼ်တီႈၶႃႈဢေႃႈ။
၁၂ မိူဝ်ႈဢၼ်လုၵ်ႈၸၢႆးၶႃႈၸဝ်ႈႁဝ်းၶဝ်တင်းလၢႆ ပဵၼ်ၸိူဝ်ႉၼင်ႇတူၼ်ႈဢၼ်ယႂ်ႇမႃးယူႇၼႂ်းမိူဝ်ႈဢၼ်ဢသၢၵ်ႈယင်းၼုမ်ႇယင်းၵမ်လုၵ်ႈယိင်းၶႃႈၸဝ်ႈႁဝ်းၶဝ်တင်းလၢႆ ပဵၼ်ၸိူဝ်ႉၼင်ႇသဝ်ႁိၼ်ၸဵင်ႇတိူၵ်ႈဢၼ်တွင်ႈႁဵတ်းၶႅၵ်းႁဵတ်းဝႆႉ ပုၼ်ႈ ဢၼ်တၵ်းႁဵတ်းပိၵ်ႉမၢၼ်ႇၸဝ်ႈ
၁၃ ႁိူၼ်းယေးၶႃႈၸဝ်ႈႁဝ်းၶဝ်တဵမ်ဝႆႉတင်း တၢင်းဢၼ်သုင်းဢၼ်သွင်ႇတၢင်းၵိၼ်တၢင်းၶူပ်းၵူႈၸိူဝ်ႉၵူႈပိူင် ၸူဝ်ႈၶႃႈၸဝ်ႈႁဝ်းၶဝ်တင်းလၢႆ ၵိူတ်ႇလဵင်ႉမႃးၵႃႈတီႈၼွၵ်ႈတီႈပၢင်ႇ ပဵၼ်ႁဵင်ပဵၼ် မိုၼ်ႇဝူဝ်းၶႃႈၸဝ်ႈတင်းလၢႆ
၁၄ လႆႈၶၢမ်ႇတၢင်းဢၼ်တၢင်ႇသႂ်ႇၶူဝ်းၼမ်ၼႃႇ ဢမ်ႇမီးတၢင်းဢၼ်ႁဵတ်းပႄႉႁဵတ်းၼႅင်ႇၶဝ်ႈၶဝ်ႈဢွၵ်ႇဢွၵ်ႇဢမ်ႇမီးတၢင်းဢၼ်ႁွင်ႉသႅၼ်ႇပွင်ႉၶင်း ၵႃႈတီႈၵၢင်တႃႈၵၢင်တၢင်းၶႃႈၸဝ်ႈ ႁဝ်းၶဝ်ၼၼ်ႉၸိုင် မဵဝ်းၵူၼ်းဢၼ်လႆႈယူႇၸိူဝ်ႉၼင်ႇၼၼ်ၼၼ်ႉမီးမင်ႇၵလႃႇတီႈၶႃႈဢေႃႈ။
၁၅ မဵဝ်းၵူၼ်းဢၼ်ထႃႇဝရႃႉၽြႃးပဵၼ် ၽြႃးပဵၼ်ၸဝ်ႈၶဝ်ၼၼ်ႉ မီးမင်ႇၵလႃႇတီႈၶႃႈဢေႃႈ။