၁၄၁
၁ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈၸဵဝ်းမႃးတီႈၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈထွမ်ႇငိၼ်းသဵင်ၶႃႈၸဝ်ႈမိူဝ်ႈဢၼ်ၶႃႈၸဝ်ႈ ႁွင်ႉသႅၼ်ႇႁွင်ႉႁႃၸဝ်ႈႁဝ်းၼၼ်ႉသေ ၵမ်းတီႈၶႃႈ။
၂ ၶႅၼ်းတေႃႈႁႂ်ႈထေႃးပၼႃႇၶႃႈၸဝ်ႈမီးတၢင်းဢၼ်မႄးႁႅၼ်းဝႆႉမိူၼ်ၸိူဝ်ႉၼင်ႇၼၢမ်ႇသႃႇဢၼ်တုတ်ႇၽႆးၼၼ်ႉဢိၵ်ႇတင်း တၢင်းဢၼ်ယုၵ်ႉမိုဝ်းၶႃႈၸဝ်ႈမီးတၢင်းဢၼ်ႁႅၼ်းဝႆႉ မိူၼ်ၸိူဝ်ႉၼင်ႇၶိူင်ႈပုၵ်ႉၸေႃႇၶိင်ႇႁူဝ်ၶမ်ႈၼၼ်ႉ ၵႃႈတီႈၽၢႆႇၼႃႈၸဝ်ႈႁဝ်း သေၵမ်းတီႈၶႃႈ။
၃ ထႃႇဝရႃႉၽြႃးတီႈၶႃႈ၊ၶႅၼ်းတေႃႈထိင်းသူပ်းၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈပႂ်ႉၽၵ်း တူသီႇသူပ်းၶႃႈၸဝ်ႈယူႇသေၵမ်းတီႈၶႃႈ။
၄ ၶႅၼ်းတေႃႈယႃႇပေႁႂ်ႈႁူဝ်ၸႂ်ၶႃႈၸဝ်ႈဢူၼ်ႈၼူပ်ႈၵွမ်းၸူး လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉလႄႈ ယႃႇပေႁႂ်ႈၶႃႈၸဝ်ႈလႆႈပႃးလူၺ်ႈၵၼ်တင်း ၶဝ်ၸိူဝ်းဢၼ်ႁဵတ်းတူႉၸရိူၵ်ႈၼၼ်ႉလႄႈၵႂႃႇမႃးယူႇၼႂ်းဢမူႉ လွင်ႈတၢင်းဢၼ်ဢမ်ႇတြႃးတင်းလၢႆၼၼ်ႉ သေၵမ်းတီႈၶႃႈ။ယႃႇပေပၼ်ႁႂ်ႈၶႃႈၸဝ်ႈလႆႈၵိၼ်တၢင်းၵိၼ်ဢၼ်ဝၢၼ်ဢၼ်မၼ်းၶဝ်ၼၼ်ႉ သေၵမ်းတီႈၶႃႈ။
၅ ႁႂ်ႈၵေႃႉဢၼ်သိုဝ်ႈတေႃႇၼၼ်ႉ ပေႃႉယႅၼ်ႉၶႃႈၸဝ်ႈသေၵမ်းလူၺ်ႈ။တၵ်းပဵၼ်ၵျေးၸူးတီႈၶႃႈဢေႃႈ။ႁႂ်ႈမၼ်းသင်ႇသွၼ်သုင်းမႃႉၶႃႈၸဝ်ႈသေၵမ်းလူၺ်ႈ။တၵ်းပဵၼ်ၼမ်ႉမၼ်းဢၼ်တႃးႁူဝ်ၶႃႈၸဝ်ႈတီႈၶႃႈဢေႃႈ။ယႃႇႁႂ်ႈႁူဝ်ၶႃႈၸဝ်ႈတွပ်ႇထဵင်ပႅတ်ႈမၼ်း သေၵမ်းလူၺ်ႈ။တေႃႈလဵဝ်ၼႆႉၸမ်းၶႃႈၸဝ်ႈလႆႈ ယူႇၽၢႆႇၼိုင်ႈတင်းလွင်ႈတၢင်းဢၼ် ၶဝ်ႁဵတ်းဢႃႉထမ်ႇမႃႉၼၼ်ႉသေ လႄႈသူးတွင်းယူႇတီႈၶႃႈဢေႃႈ။
၆ ၵူၼ်းလူင်ဢၼ်ၸီႇယၢင်ႇတြႃးၶဝ်ၼၼ်ႉ လႆႈၶၢမ်ႇတၢင်းဢၼ်ပွႆႇတူၵ်းသႂ်ႇၵႃႈတီႈမၢၵ်ႇႁိၼ်မၢၵ်ႇၽႃလႄႈ ၶဝ်လႆႈငိၼ်းၵႂၢမ်းၶႃႈၸဝ်ႈတီႈၶႃႈဢေႃႈ။ၵႂၢမ်းၼၼ်ႉၵေႃႈ ပဵၼ်ဢၼ်ဝၢၼ်တီႈၶႃႈဢေႃႈ။
၇ ၸိူဝ်ႉၼင်ႇဢၼ်ထႆလႄႈပိုတ်ႇၵီႈလိၼ်ဝႆႉၼၼ်ႉ လုပ်ႇၶႃႈၸဝ်ႈႁဝ်းၶဝ်မီးတၢင်းဢၼ်မၢၵ်ႇမိူဝ်ဝႆႉယူႇၵႃႈတီႈႁူးၽၵ်းတူမိူင်းမႃႇရၼႃႉ တီႈၶႃႈဢေႃႈ။
၈ ၸဝ်ႈၽြႃးထႃႇဝရႃႉၽြႃးတီႈၶႃႈ မၢၵ်ႇတႃၶႃႈၸဝ်ႈႁႅၼ်တူၺ်းတီႈၸဝ်ႁဝ်းယူႇတီႈၶႃႈဢေႃႈ။ၶႃႈၸဝ်ႈသွၼ်ႈပိုင်ႈတီႈၸဝ်ႈႁဝ်းယူႇတီႈၶႃႈဢေႃႈ။ၶႅၼ်းတေႃႈယႃႇပထွေၵ်ႇဢသၢၵ်ႈၶႃႈၸဝ်ႈပႅတ်ႈ သေၵမ်းတီႈၶႃႈ။
၉ ၶႅၼ်းတေႃႈႁႂ်ႈၶႃႈၸဝ်ႈ ၵၢင်းလွတ်ႈသေၵႃႈတီႈတူင်ႇႁဵဝ်ႉဢၼ်ၶဝ်ၵၢင်ဝႆႉပုၼ်ႈၶႃႈၸဝ်ႈ၊ ဢိၵ်ႇတင်းၵႃႈတီႈတူင်ႇၶိုမ်းၶဝ်ၸိူဝ်းဢၼ်ႁဵတ်းတူႉၸရိူၵ်ႈၼၼ်ႉ သေၵမ်း တီႈၶႃႈ။
၁၀ မိူဝ်ႈဢၼ်ၶႃႈၸဝ်ႈပူၼ်ႉၵႂႃႇသေၸိူဝ်ႉၼင်ႇၼၼ်ယဝ်ႉၼၼ်ႉၸိုင် ႁႂ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉတူၵ်းသႂ်ႇၵႃႈၼႂ်းတူင်ႇႁဵဝ်ႉၶဝ်ၼၼ်ႉသေၵမ်းလူၺ်ႈ။