၁၆
၁ ၽြႃးတီႈၶႃႈဢိူၺ်း၊ ပႂ်ႉၸွႆႈထႅမ်ၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇတီႈၶႃႈဢေႃႈ။ၶႃႈၸဝ်ႈ သင်ႇလၢတ်ႈတီႈထႃႇဝရႃႉၽြႃးလႄႈဝႃႈ၊-ၸဝ်ႈႁဝ်းပဵၼ်ၸဝ်ႈၵဝ်ၶႃႈတီႈၶႃႈယဝ်ႉ၊ ဝႃႈၼင်ႇၼႆ တီႈၶႃႈဢေႃႈ။
၂ ၼွၵ်ႈသေၵျေးၸူးၸဝ်ႈႁဝ်းၼၼ်ႉတီႈၶႃႈၸဝ်ႈၼႆႉ ဢမ်ႇမီးမင်ႇၵလႃႇတၢင်ႇၸိူဝ်ႉတၢင်ႇဢၼ် တီႈၶႃႈ။
၃ ၼႂ်းၶဝ်ၸိူဝ်းဢၼ်မူတ်းၸၢင်ႇဢၼ်ယူႇၵႃႈၼႂ်းမိူင်းၸဝ်ႈ ဢိၵ်ႇတင်းၶဝ်ၸိူဝ်းဢၼ်မျၢတ်ႈလီလိူဝ်တွၼ်းၼၼ်ႉၵူၺ်း ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶႃႈၸဝ်ႈ တင်းသဵင်ႈတင်းမူတ်းတီႈၶႃႈဢေႃႈ။
၄ ၶဝ်ၸိူဝ်းဢၼ်ၼႅတ်ႈၸွမ်းလင်ၽြႃးတၢင်ႇသူႇတၢင်ႇပႃးၼၼ်ႉ တၵ်းလႆႈတုၵ်ႉၶႃႉတၢင်းၽၢၼ်ၼမ်ၼႃႇဢေႃႈ။ၵဝ်ဢမ်ႇထွၵ်ႇဢမ်ႇသွၼ်း လိူတ်ႈတၢင်းပုၵ်ႉၸေႃႇ ဢၼ်ၶဝ်သွၼ်းလေႃႇၼၼ်ႉ။ၼႃႇမႃႉၸိုဝ်ႈသဵင်ၶဝ်ၼၼ်ႉၵေႃႈ ၵဝ်ဢမ်ႇလၢတ်ႈဢွၵ်ႇသူပ်းဢွၵ်ႇပၢၵ်ႇ။
၅ ထႃႇဝရႃႉၽြႃးပဵၼ်ပုၼ်ႈဢၼ်ၵဝ်ၶၢမ်ႇဢမူၺ်ႇ ပုၼ်ႈၵွၵ်းဢၼ်ၵဝ်ၵိၼ်ဢေႃႈ။ၸဝ်ႈႁဝ်းပႂ်ႉလူႈဢမူၺ်ႇၶႃႈၸဝ်ႈဢၼ် တူၵ်းၸႃႇၵွၵ်ႈၼၼ်ႉယူႇတီႈၶႃႈဢေႃႈ။
၆ ၶွပ်ႇၼမ်ႉလႅၼ်လိၼ် ဢၼ်ၵဝ်ထိူၵ်ႈပိူင်ႇၸိူဝ်းၼၼ်ႉ တူၵ်းတီႈဢၼ်သႃႇယႃႇလီငၢမ်းလႄႈ၊ၵဝ်လႆႈၶၢမ်ႇဢဝ်ဢမူၺ်ႇ ဢၼ်လီဢၼ်ငၢမ်းယဝ်ႉ။
၇ ၵဝ်တၵ်းယွင်ႈယေႃးထႃႇဝရႃႉၽြႃး ဢၼ်ပၼ်တၢင်းၵျၢမ်ႇတၢင်းပွင်တီႈၵဝ်ၼၼ်ႉဢေႃႈ။ၼႂ်းၶိင်ႇၵၢင်ၶိုၼ်းၵေႃႈမၢၵ်ႇႁူဝ်ၸႂ်ၵဝ်တိုၵ်းယူင်းၵဝ်ယူႇဢေႃႈ။
၈ ၵဝ်ဢဝ်ထႃႇဝရႃႉၽြႃး ဝႆႉသိုဝ်ႈၼႃႈသိုဝ်ႈတႃၵဝ်ယူႇသေႇသေႇဢေႃႈ။လွင်ႈမၼ်းၸမ်း ပိူဝ်ႈဢၼ်မၼ်းၸဝ်ႈမီးယူႇၵႃႈတီႈၽၢႆႇၶႂႃၵဝ်လႄႈ ၵဝ်ဢမ်ႇလႆႈမီး တၢင်းဢၼ်တူင်ႉဢၼ်ၶွၼ်း။
၉ ပိူဝ်ႈၼႆလႄႈ ႁူဝ်ၸႂ်ၵဝ်ပၢင်ႇၸိုၼ်ႈဢေႃႈ။ဝိၺိၺ်ႇၵဝ်ၵေႃႈမီးတၢင်းဢၼ်သႂၢင်ႇသိူဝ်းဢေႃႈ။လိူဝ်သေၼၼ်ႉတူဝ်ၵဝ်ၵေႃႈတၵ်းမုင် ထႃႈမွင်းထႃႈသေလႄႈ ၵိင်းဝၢပ်ႈယူႇဢေႃႈ။
၁၀ လွင်ႈမၼ်းၸမ်း ၸဝ်ႈႁဝ်းတၵ်းဢမ်ႇပႅတ်ႈဝိၺိၺ်ႇၶႃႈၸဝ်ႈဝႆႉၵႃႈတီႈၼႂ်းမိူင်းမႃႇရၼႃႉတီႈၶႃႈ။တီႈၵူၼ်းဢၼ်မူတ်းၸၢင်ႇၸဝ်ႈႁဝ်းၵေႃႈ ၸဝ်ႈႁဝ်းတၵ်းဢမ်ႇပၼ် ႁႂ်ႈႁွတ်ႈထိုင်တၢင်းဢၼ်တူႇဢၼ်ၼဝ်ႈတီႈၶႃႈ။
၁၁ ၸဝ်ႈႁဝ်းတၵ်းၼႄပျႃးတီႈၶႃႈၸဝ်ႈသဵၼ်ႈတၢင်းဢၼ်ႁွတ်ႈထိုင်တီႈဢၼ်ဢသၢၵ်ႈလိပ်းၼၼ်ႉ တီႈၶႃႈဢေႃႈ။ၵႃႈတီႈၽၢႆႇၼႃႈၸဝ်ႈႁဝ်းၼၼ်ႉ မီးဢၶႂၢင်ႉဢၼ်လႆႈၸေးၸုမ်ႇတဵမ်ဝႆႉတင်းတၢင်းဢၼ်ၸူမ်းသိူဝ်းလႄႈ ၵႃႈတီႈႁိမ်းၽၢႆႇၶႂႃၸဝ်ႈႁဝ်းၼၼ်ႉ မီးဢၶႂၢင်ႉဢၼ်လႆႈသႃႇယႃႇမူၼ်ႈပျေႃႇယူႇသေႇသေႇ တီႈၶႃႈဢေႃႈ။