၁၀၉
၁ ၽြႃးပဵၼ်ၸဝ်ႈ ဢၼ်ၶႃႈၸဝ်ႈယွင်ႈယေႃးၼၼ်ႉတီႈၶႃႈဢိူၺ်း၊ ယႃႇပေယူႇတဵတ်ႇတဵတ်ႇယဵၼ်ယဵၼ်ယူႇ သေၵမ်းတီႈၶႃႈ။
၂ ၶဝ်ယူႇၽၢႆႇၼိုင်ႈတင်းၶႃႈၸဝ်ႈလႄႈၽုၺ်ႇသူပ်းဢၼ်ဢမ်ႇတြႃး ဢိၵ်ႇတင်းသူပ်းဢၼ်သႅတ်ႈၸႃႇလူႉၼၼ်ႉသေယဝ်ႉ ဢဝ်တင်းလိၼ်ႉဢၼ်မီး မူႉသႃႇၼၼ်ႉလၢတ်ႈတီႈၶႃႈၸဝ်ႈတီႈၶႃႈဢေႃႈ။
၃ ၶဝ်ဢွၼ်ၵၼ်ပႃးဢဝ်တင်း ၵႂၢမ်းတၢင်းဢၼ်ဢမ်ႇၼႃႇလူဝ်ႇၼၼ်ႉလွမ်ႉႁွပ်ႈၶႃႈၸဝ်ႈဝႆႉသေလႄႈ လွင်ႈမၼ်း ယင်းဢမ်ႇမီးလႄႈ ၶဝ်တိုၵ်းတေႃးၶႃႈၸဝ်ႈတီႈၶႃႈဢေႃႈ။
၄ ၵွပ်ႈပိူဝ်ႈမႅတ်ႈတႃႇၶႃႈၸဝ်ႈလႄႈၶဝ်ဢွၼ်ၵၼ်ႁဵတ်းၶတ်းၵၼ်တင်းၶႃႈၸဝ်ႈတီႈၶႃႈဢေႃႈ။ၶႃႈၸဝ်ႈ ၸမ်းႁဵတ်းပထၼႃႇယူႇတီႈၶႃႈဢေႃႈ။
၅ ၶဝ်ဢွၼ်ၵၼ်ဢဝ်ဢပျႅတ်ႈ ဢၼ်ဢမ်ႇလီဢမ်ႇငၢမ်းလႄႈ တွပ်ႇတႅၼ်းပုၼ်ႈၵျေးၸူး တၢင်းဢၼ်ၶႃႈၸဝ်ႈႁဵတ်းၼၼ်ႉဢမ်ႇၵႃးဢဝ်တၢင်းၸင်း တွပ်ႇတႅၼ်းပုၼ်ႈတၢင်းႁၵ်ႉ မႅတ်ႈတႃႇၶႃႈၸဝ်ႈတီႈၶႃႈဢေႃႈ။
၆ ၶႅၼ်းတေႃႈၶၢၼ်းဝႆႉၵူၼ်းဢၼ်ဢမ်ႇတြႃး ၵႃႈၼိူဝ်ၵူၼ်းၸိူဝ်ႉၼင်ႇၼၼ်ၼၼ်ႉသေလႄႈ ႁႂ်ႈရၢၼ်ႇသူႇၸုၵ်းယူႇၵႃႈတီႈႁိမ်းမိုဝ်း ၶွၼ်ၶႂႃမၼ်းၼၼ်ႉသေၵမ်းလူၺ်ႈ။
၇ ၼႂ်းမိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၸီႇယၢင်ႇတြႃးၼၼ်ႉ ႁႂ်ႈမၼ်းလႆႈၶၢမ်ႇတၢင်းသုမ်းသေၵမ်းလူၺ်ႈ။ႁႂ်ႈပထၼႃႇဢၼ်မၼ်းႁဵတ်းၼၼ်ႉ ပဵၼ်တၢင်းဢၼ်တၢင်ႇဢပျႅတ်ႈမၼ်း သေၵမ်းလူၺ်ႈ။
၈ ႁႂ်ႈမိူဝ်ႉဝၼ်းမၼ်းပွတ်းသေၵမ်းလူၺ်ႈ။ဢရႃႇမၼ်းၵေႃႈႁႂ်ႈပိူၼ်ႈတၢင်ႇၵေႃႉ လႆႈသေၵမ်းလူၺ်ႈ။
၉ ႁႂ်ႈလုၵ်ႈမၼ်းလၢင်းမၼ်း ပဵၼ်လုၵ်ႈၽၢၼ်ပေႃႈလႄႈႁႂ်ႈမေးမၼ်းပဵၼ်မေႈမုၵ်ႉမေႈမၢႆႈသေၵမ်းလူၺ်ႈ။ႁႂ်ႈလုၵ်ႈမၼ်းလၢင်းမၼ်း လႆႈလႄႇၵႂႃႇၵူႈတီႈၵူႈလႅၼ်လႄႈ ပဵၼ်ၵူၼ်းဢၼ်ယွၼ်းပိူၼ်ႈၵိၼ်သေၵမ်းလူၺ်ႈ။
၁၀ ႁႂ်ႈၶဝ်လႆႈၶၢမ်ႇ တၢင်းဢၼ်ႁေႃႈဢွၵ်ႇသေၵႃႈတီႈတီႈယူႇတီႈသဝ်းၶဝ်ဢၼ်လူႉလႅဝ်ၸိူဝ်းၼၼ်ႉ သေၵမ်းလူၺ်ႈ။
၁၁ ႁႂ်ႈၸဝ်ႈၼီႈၸဝ်ႈၶွတ်ႇသိမ်းဢဝ်ၵႃႈဢၼ်မၼ်းမီးၼၼ်ႉလႄႈ ႁႂ်ႈၵူၼ်းတၢင်ႇဝၢၼ်ႈတၢင်ႇမိူင်းႁိမ်ႁူင်ႇဢဝ်ဢုၵ်ႉၸႃႇဢၼ်မၼ်းႁဵတ်းလႄႈ လႆႈမႃးၼၼ်ႉသေၵမ်း လူၺ်ႈ။
၁၂ ယႃႇပေႁႂ်ႈမီးၵေႃႉဢၼ်ႁဵတ်းၵျေးၸူးတီႈမၼ်းၵေႃႉဢၼ်ဢိတ်းလူၸွႆႈထႅမ် လုၵ်ႈၽၢၼ်ပေႃႈမၼ်း ၸိူဝ်းၼၼ်ႉ။
၁၃ ႁႂ်ႈၸိူဝ်ႉၶိူဝ်းမၼ်းၶၢတ်ႇၵႂႃႇလႄႈႁႂ်ႈၸိုဝ်သဵင်မၼ်းမီးတၢင်းဢၼ်မွတ်ႇႁၢႆၵႂႃႇ ၼႂ်းသိုပ်ႇလိုၼ်း မၼ်းၵမ်းလဵဝ်သေၵမ်းလူၺ်ႈ။
၁၄ ႁႂ်ႈထႃႇဝရႃႉၽြႃးၶုၵ်းၸႂ်ႈလႆႈၶႆႈၸႂ်ထူပ်း တူႉၸရိူၵ်ႈပူႇမွၼ်ႇမၼ်းၼၼ်ႉလႄႈယႃႇပေႁႂ်ႈဢပျႅတ်ႈ မေႈမၼ်းမီးတၢင်းဢၼ်မွတ်ႇႁၢႆ။
၁၅ ႁႂ်ႈဢပျႅတ်ႈမၼ်း ထၢင်ႇသႃးၵႃႈတီႈ ၽၢႆႇၼႃႈထႃႇဝရႃႉၽြႃးသေႇသေႇလႄႈ ႁႂ်ႈမၼ်းၸဝ်ႈပႄႇၽဵဝ်ႈတၢင်းဢၼ်တၵ်းၶုၵ်းၸႂ်လႆႈၶဝ်ၼၼ်ႉ ႁၢႆပႅတ်ႈသေၵႃႈၼိူဝ်လိၼ်မိူင်းၼႆႉမူတ်းမူတ်းသဵင်ႈသဵင်ႈ သေၵမ်းလူၺ်ႈ။
၁၆ လွင်ႈမၼ်းၸမ်း မၼ်းဢမ်ႇၶႆႈၸႂ်ႁႂ်ႈလႆႈဢိတ်းလူၸွႆႈထႅမ်လႄႈ မၼ်းၼိၵ်ႈၸၢၵ်ႈငႅၼ်းသေးၵေႃႉဢၼ်ယၢၵ်ႈဢၼ်ၽၢၼ် ၵေႃႉဢၼ်ၸုတ်ႈဢၼ်လုတ်ႈ ၵေႃႉဢၼ်ႁူဝ်ၸႂ်တႅၵ်ႇလႅဝ်ၼၼ်ႉတေႃႇထိုင်ႁွတ်ႈထၼ်ႈပေႃး ဢဝ်တၢႆယဝ်ႉ။
၁၇ မၼ်းထုၵ်ႇၸႂ်ၵျိူၵ်ႈၸႂ်တၢင်းဢၼ်ၵိၼ်ႇဢၼ်ဝႃႈၼၼ်ႉလႄႈ ႁႂ်ႈတၢင်းဢၼ်ၵိၼ်ႇဢၼ်ဝႃႈၼၼ်ႉႁွတ်ႈထိုင်ၵႃႈၼိူဝ်မၼ်းသေၵမ်းလူၺ်ႈ။မၼ်းဢမ်ႇထုၵ်ႇၸႂ်ၵျိူၵ်ႈၸႂ်တၢင်းလီမင်ႇၵလႃႇလႄႈ ႁႂ်ႈ တၢင်းလီမင်ႇၵလႃႇၼၼ်ႉ ၵႆၵၼ်တင်းမၼ်းသေၵမ်းလူၺ်ႈ။
၁၈ မၼ်းဢဝ်တၢင်းဢၼ်ၵိၼ်ႇဢၼ်ဝႃႈၼုင်ႈမႆႊမိူၼ်ၸိူဝ်ႉၼင်ႇၶူဝ်းၼုင်ႈၼၼ်ႉလႄႈ ဢၼ်ၼၼ်ႉၶဝ်ႈၵႂႃႇၵႃႈၼႂ်းတွင်ႉမၼ်း မိူၼ်ၸိူဝ်ႉၼင်ႇၼမ်ႉမၼ်းၼၼ်ႉ ဢေႃႈ။
၁၉ ႁႂ်ႈဢၼ်ၼၼ်ႉပဵၼ်ၸိူဝ်ႉၼင်ႇၽႃႈဢၼ်မၼ်းဢဝ်မႆႊယူႇၵႃႈတီႈတူဝ်မၼ်းၼၼ်ႉ ဢိၵ်ႇတင်း ပဵၼ်ၸိူဝ်ႉၼင်ႇသၢႆႁတ်ႉဢႅဝ် ဢၼ်မၼ်းဢဝ်ႁတ်ႉဢႅဝ်မၼ်း ယူႇသေႇသေႇၼၼ်ႉသေၵမ်းလူၺ်ႈ။
၂၀ ႁႂ်ႈဢၼ်ၼၼ်ႉပဵၼ်တၢင်းဢၼ်ထႃႇဝရႃႉၽြႃးပၼ် ၵႃႈတီႈရၢၼ်ႇသူႇၵဝ် ဢိၵ်ႇတင်း ၶဝ်ၸိူဝ်းဢၼ်လၢတ်ႈၵႂၢမ်းဢၼ်ဢမ်ႇလီဢမ်ႇငၢမ်း ဢၼ်ယူႇၽၢႆႇၼိုင်ႈတင်းဝိၺိၺ်ႇၵဝ်ၸိူဝ်းၼၼ်ႉသေၵမ်းလူၺ်ႈ။
၂၁ ၸဝ်ႈၽြႃးထႃႇဝရႃႉတီႈၶႃႈ၊ၶႅၼ်းတေႃႈပႂ်ႉဢမူႉၶႃႈၸဝ်ႈ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈႁဝ်း သေၵမ်းတီႈၶႃႈ။ၶႅၼ်းတေႃႈၵႄႇသႄႇၼုၵ်ႈဢဝ်ၶႃႈၸဝ်ႈၵွပ်ႈပိူဝ်ႈဢၼ်ၵရူႉၼႃႇၸဝ်ႈႁဝ်းလီၼႃႇၼၼ်ႉ သေၵမ်းတီႈ ၶႃႈ။
၂၂ ၶႃႈၸဝ်ႈယၢၵ်ႈၽၢၼ်လႄႈၸုတ်ႈလုတ်ႈယူႇတီႈၶႃႈဢေႃႈ။ႁူဝ်ၸႂ်ၶႃႈၸဝ်ႈၸဵပ်းယူႇၵႃႈၼႂ်းၶႃႈၸဝ်ႈ တီႈၶႃႈဢေႃႈ။
၂၃ ၶႃႈၸဝ်ႈသုတ်ႉၶၢႆႉၵႂႃႇယူႇမိူၼ်ၸိူဝ်ႉၼင်ႇႁူမ်ႊငဝ်းတၢမ်းၶမ်ႈၼၼ်ႉယူႇတီႈၶႃႈဢေႃႈ။ၶႃႈၸဝ်ႈမီးတၢင်းဢၼ်ႁေႃႈၶိုၼ်ႈႁေႃႈလူင်းယူႇ မိူၼ်ၸိူဝ်ႉၼင်ႇ မႅင်းၵႅင်းၼၼ်ႉတီႈၶႃႈဢေႃႈ။
၂၄ ႁူဝ်ၶဝ်ႇၶႃႈၸဝ်ႈဢူၼ်ႈၵႂႃႇထွပ်ႉထီႉထွပ်ႉထႅပ်ႉယူႇ ၵွပ်ႈပိူဝ်ႈဢမ်ႇၵိၼ်တၢင်းၵိၼ်တၢင်းၶူပ်းလႄႈ ၼိူဝ်ႉၶႃႈၸဝ်ႈ ယင်းဢမ်ႇမီးတၢင်းဢၼ်ပီးဢၼ်မၼ်းလႄႈယွမ်ၵႂႃႇယူႇ တီႈၶႃႈဢေႃႈ။
၂၅ ၶႃႈၸဝ်ႈလႆႈ ပဵၼ်တီႈဢၼ်ပိူၼ်ႈတၢင်ႇၵေႃႉသေႉသွမ်းလႄႈ မိူဝ်ႈဢၼ်ၶဝ်ႁၼ်ၶႃႈၸဝ်ႈၼၼ်ႉၸိုင် ၶဝ်ဢွၼ် ၵၼ်ႁဵတ်းတၢင်းဢၼ်ငွၵ်းႁူဝ်ၸူးတီႈၶႃႈဢေႃႈ။
၂၆ ထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈၸွႆႈထႅမ်ၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ ၸွမ်းၵႃႈၼင်ႇဢၼ်ၵရူႉၼႃႇ ၸဝ်ႈႁဝ်းမီးၼၼ်ႉသေၵမ်းတီႈၶႃႈ။
၂၇ ႁႂ်ႈၶဝ်ႁူႉလွင်ႈဢၼ်ဝႃႈၸဝ်ႈႁဝ်းထႃႇဝရႃႉၽြႃး ဢဝ်မိုဝ်းၸဝ်ႈၸီႇယၢင်ႇ ႁဵတ်းဝႆႉဢမူႉၸိူဝ်းၼႆႉၼၼ်ႉသေၵမ်းတီႈၶႃႈ။
၂၈ ပဵၵ်ႉသမ်ႉၶဝ်ၵိၼ်ႇလႃႇၵိၼ်ႇဝႃႈသေၵေႃႈ ၸဝ်ႈႁဝ်းၶႅၼ်းတေႃႈပၼ်တၢင်းလီမင်ႇၵလႃႇသေၵမ်းတီႈၶႃႈ။မိူဝ်ႈဢၼ်ၶဝ်လုၵ်ႉၼၼ်ႉ ၶဝ်တၵ်းလႆႈ ၶၢမ်ႇတၢင်းဢၼ်ဢူၵ်းဢၼ်ဢၢႆတီႈၶႃႈဢေႃႈ။ၶႃႈၸဝ်ႈႁဝ်းၸမ်းတၵ်းၸူမ်း သိူဝ်းတီႈၶႃႈဢေႃႈ။
၂၉ ရၢၼ်ႇသူႇၶႃႈၸဝ်ႈၸိူဝ်းၼၼ်ႉတၵ်းဢွၼ်ၵၼ် ဢဝ်တၢင်းဢၼ်သုၵ်ႉၸႂ်ၵႂင်ၸႂ်ၼုင်ႈမႆႊလႄႈ ဢဝ်တၢင်းဢၼ်ဢူၵ်းဢၼ်ဢၢႆ ႁူမ်ႇသုမ်ႇတူဝ်ၸဝ်ႈၵဝ်ႇ မိူၼ်ၸိူဝ်ႉၼင်ႇၽႃႈၸွင်ႇၽႃႈမႆႊၼၼ်ႉ တီႈၶႃႈဢေႃႈ။
၃၀ ၶႃႈၸဝ်ႈတၵ်းဢဝ်သူပ်းၶႃႈၸဝ်ႈယွင်ႈယေႃးၵျေးၸူးထႃႇဝရႃႉၽြႃးၼႃႇၼႃႇ တီႈၶႃႈဢေႃႈ။ၶႃႈၸဝ်ႈ တၵ်းယွင်ႈယေႃးမၼ်းၸဝ်ႈ ၵႃႈၼႂ်းၵၢင် ၵူၼ်းၼမ်ၼႃႇၼၼ်ႉ တီႈၶႃႈဢေႃႈ။
၃၁ လွင်ႈမၼ်းၸမ်းမၼ်းၸဝ်ႈၸုၵ်းယူႇၵႃႈတီႈႁိမ်းမိုဝ်းၽၢႆႇၶႂႃ ၵေႃႉဢၼ်ၸုတ်ႈဢၼ်လုတ်ႈၼၼ်ႉလႄႈ ႁႂ်ႈလႆႈၵႄႇသႄႇၶျွတ်ႈဢဝ်မၼ်းဢွၵ်ႇသေၵႃႈၼႂ်းမိုဝ်း ၶဝ်ၸိူဝ်းဢၼ်တၢင်ႇဢပျႅတ်ႈတီႈမၼ်းၼၼ်ႉဢေႃႈ။