၁၇
၁ ထႃႇဝရႃႉၽြႃးတီႈၶႃႈ ၶႅၼ်းတေႃႈယူႇၽၢႆႇဢၼ်တြႃးသေလႄႈ မၢတ်ႈတွင်းဢဝ် တၢင်းဢၼ်ၶႃႈၸဝ်ႈႁွင်ႉသႅၼ်ႇၼႆႉသေၵမ်းတီႈၶႃႈ။ၶႅၼ်းတေႃႈဝၢႆႇႁူၸဝ်ႈႁဝ်းလႄႈထွမ်ႇဢဝ်ၵႂၢမ်းပထၼႃႇၶႃႈ ၸဝ်ႈဢၼ်ဢမ်ႇၸႂ်ႈဢွၵ်ႇၵႃႈၼႂ်းသူပ်းဢၼ် ၸၢင်ႊပႅတ်ႉၸၢင်ႊလႅၼ်ၼၼ်ႉ သေၵမ်းတီႈၶႃႈ။
၂ ႁႂ်ႈတၢင်းဢၼ်ၸီႇယၢင်ႇၶႃႈၸဝ်ႈၼၼ်ႉဢွၵ်ႇမႃးၵႃႈတီႈၸဝ်ႈႁဝ်းလႄႈႁႂ်ႈမၢၵ်ႇ တႃၸဝ်ႈႁဝ်းလူႈတူၺ်းလွင်ႈတၢင်းဢၼ်သိုဝ်ႈလီယူဝ်းလီ ၼၼ်ႉသေၵမ်းတီႈၶႃႈ။
၃ ၸဝ်ႈႁဝ်းၸၢမ်းတူၺ်းႁူဝ်ၸႂ်ၶႃႈၸဝ်ႈ ၸႅတ်ႈတူၺ်းၶႃႈၸဝ်ႈယူႇၶိင်ႇတဵင်ၶိုၼ်းသေၵေႃႈ ဢမ်ႇထူပ်းဢမ်ႇႁၼ်ၵႃႈသင်လႃးလႃးတီႈၶႃႈ။ၶႃႈၸဝ်ႈမီးတၢင်းၵျၢမ်ႇတၢင်းပွင် လွင်ႈၼင်ႇႁိုဝ်သူပ်းၶႃႈၸဝ်ႈ တၵ်းဢမ်ႇလႆႈပူၼ်ႉလႆႈလိူဝ်ၼၼ်ႉတီႈၶႃႈ ဢေႃႈ။
၄ လွင်ႈတၢင်းဢၼ်ၵူၼ်းတင်းလၢႆႁဵတ်းၸိူဝ်းၼၼ်ႉ ၶႃႈၸဝ်ႈၸွမ်းၼုၵ်ႉၵပၢတ်ႈၸဝ်ႈႁဝ်းသေလႄႈဝေႈပႅတ်ႈ သဵၼ်ႈတၢင်းဢၼ်ႁဝ်ႉဢၼ်ၵျၢမ်းၼႃႇၸိူဝ်း ၼၼ်ႉတီႈၶႃႈဢေႃႈ။
၅ တၢင်းဢၼ်ၶႃႈၸဝ်ႈယုၵ်ႉတိၼ်ယၢင်ႈတိၼ်ၼၼ်ႉ ၸပ်းၸွမ်းသဵၼ်ႈတၢင်းၸဝ်ႈႁဝ်းမၢၼ်ႇမၢၼ်ႇမႅၼ်ႈမႅၼ်ႈလႄႈ တိၼ်ၶႃႈၸဝ်ႈဢမ်ႇလႆႈ ပၢတ်ႈတီႈၶႃႈ။
၆ ၽြႃးပဵၼ်ၸဝ်ႈတီႈၶႃႈ၊ ၶႃႈၸဝ်ႈလဝ်ႈယွၼ်းတီႈၸဝ်ႈႁဝ်းၵွပ်ႈပိူဝ်ႈဢၼ် ၸဝ်ႈႁဝ်းၸၢင်ႊဢိူဝ်ႈၶႃႈၸဝ်ႈၼၼ်ႉတီႈၶႃႈဢေႃႈ။ၶႅၼ်းတေႃႈႁႄႉႁူၸဝ်ႈႁဝ်းၸူးၶႃႈၸဝ်ႈလႄႈ ထွမ်ႇဢဝ်ၵႂၢမ်းၶႃႈၸဝ်ႈ သေၵမ်းတီႈၶႃႈ။
၇ ၸဝ်ႈဢၼ်ဢဝ်တင်းမိုဝ်းၶွၼ်ၶႂႃၵႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်း ၶဝ်ၸိူဝ်းဢၼ်လုၵ်ႉၽိုၼ်ႉၼၼ်ႉလႄႈ ပဵၼ်တီႈဢၼ်သွၼ်ႈပိုင်ႈၼၼ်ႉတီႈၶႃႈ၊ ၶႅၼ်းတေႃႈၼႄပျႃး မႅတ်ႈတႃႇၵျေးၸူးၸဝ်ႈႁဝ်း ဢၼ်လၢၵ်ႇလၢႆးၼၼ်ႉသေၵမ်းတီႈၶႃႈ။
၈ ၶႅၼ်းတေႃႈပႂ်ႉၸွႆႈပႂ်ႉထႅမ်ၶႃႈၸဝ်ႈ မိူၼ်ၸိူဝ်ႉၼင်ႇႁူၺ်ႇတႃၸဝ်ႈႁဝ်းၼၼ်ႉလႄႈ ဢဝ်ၶႃႈၸဝ်ႈႁူမ်ႇသုမ်ႇဝႆႉၵႃႈတႂ်ႈႁူမ်ႊပိၵ်ႇ ၸဝ်ႈႁဝ်းသေၵမ်းတီႈၶႃႈ။
၉ ႁႂ်ႈၶႃႈၸဝ်ႈလႆႈၵၢင်းလွတ်ႈသေၵႃႈၼႂ်းမိုဝ်း ၶဝ်ၸိူဝ်းဢၼ်ႁုၵ်ႉဢၼ်ႁၢႆႉဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈဢၼ်ပဵၼ်ရၢၼ်ႇသူႇၶႃႈၸဝ်ႈဢၼ်မီးဢလူဝ်ႇၶႂ်ႈဢဝ်ၶႃႈၸဝ်ႈတၢႆလႄႈ လွမ်ႉ ႁွပ်ႈၶႃႈၸဝ်ႈဝႆႉၼၼ်ႉသေၵမ်းတီႈၶႃႈ။
၁၀ ၶဝ်ၼၼ်ႉဢဝ်တၢင်းဢၼ်ပီးဢၼ်မၼ်းၶဝ် ႁူမ်ႇသုမ်ႇတူဝ်ၶဝ်ဝႆႉသေလႄႈ ဢဝ်သူပ်းၶဝ် လၢတ်ႈပူၵ်းပႅၼ်ၽႅၼ်သုင်ယူႇ တီႈၶႃႈဢေႃႈ။
၁၁ ၶႃႈၸဝ်ႈႁဝ်းၵႂႃႇတီႈ လႂ်တၢင်း လႂ်ၵေႃႈမိူဝ်ႈလဵဝ်ၼႆႉ ၶဝ်လွမ်ႉႁွပ်ႈၶႃႈၸဝ်ႈဝႆႉယူႇတီႈၶႃႈဢေႃႈ။ၶဝ်ဢဝ်မၢၵ်ႇတႃၶဝ်ပၵ်းသႂ်ႇၶႃႈၸဝ်ႈလႄႈ လႆႈလူမ်ႉၵႃႈ ၼိူဝ်လိၼ်တီႈၶႃႈဢေႃႈ။
၁၂ မၼ်းပဵၼ်ၸိူဝ်ႉၼင်ႇသၢင်ႇသီႈ ဢၼ်ၶႂ်ႈၶူပ်းသိၵ်ႇၵိၼ်ၼႃႇလူင်လၢင်ၼၼ်ႉ ဢိၵ်ႇတင်း ၸိူဝ်ႉၼင်ႇသၢင်ႇသီႈၼုမ်ႇဢၼ်ယူႇၵႃႈၼႂ်း တီႈ ဢၼ်ၽိတ်ႇဢၼ်ငႅဝ်ၼၼ်ႉတီႈၶႃႈဢေႃႈ။
၁၃ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈလုၵ်ႉသေၵမ်းတီႈၶႃႈ။ႁႄႉၶႅၼ်မၼ်းလႄႈ ဢဝ်မၼ်းလူမ်ႉတူၵ်းပႅတ်ႈသေၵမ်းတီႈၶႃႈ။ၶႅၼ်းတေႃႈဢဝ်လၢပ်ႇၸဝ်ႈႁဝ်းလႄႈ ၵႄႇသႄႇဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်း ၶဝ်ၸိူဝ်းဢၼ် ဢမ်ႇတြႃးၼၼ်ႉသေၵမ်းတီႈၶႃႈ။
၁၄ ထႃႇဝရႃႉၽြႃးတီႈၶႃႈ၊ ဢဝ်တင်းမိုဝ်းၸဝ်ႈႁဝ်း ၵႄႇသႄႇၶႃၸဝ်ႈဢွၵ်ႇသေၵႃႈၼႂ်းမိုဝ်းၵူၼ်းလေႃးၵီႇ ဢၼ်လႆႈၶၢမ်ႇဢမူၺ်ႇၵႃႈၼႂ်းၸၢတ်ႈၼႆႉဢၼ်ၸဝ်ႈႁဝ်းႁႂ်ႈပုမ်ၶဝ်တွင်ႉၶဝ်သတ်ႉဝႆႉတဵမ်ဝႆႉတင်းၽၼ်ႇတႃႇၸဝ်ႈႁဝ်းၼၼ်ႉသေၵမ်းတီႈၶႃႈ။လွင်ႈလုၵ်ႈလွင်ႈလၢင်းၵေႃႈ ဢလူဝ်ႇၶဝ်တဵမ်ထူၼ်ႈလႄႈ ႁႂ်ႈၸေးၸိမ်ႇတၢင်းဢၼ်ၶဝ်မၢၵ်ႈမီးၼၼ်ႉ ၵိုတ်းဝႆႉတီႈလုၵ်ႈဢွၼ်ႇလၢင်းဢွၼ်ႇၶဝ်ၼၼ်ႉ တီႈၶႃႈဢေႃႈ။
၁၅ ၶႃႈၸဝ်ႈၸမ်း မီးတၢင်းဢၼ်သိုဝ်ႈတေႃႇလႄႈ တၵ်းႁၼ်ၼႃႈၸဝ်ႈႁဝ်းတီႈၶႃႈဢေႃႈ။မိူဝ်ႈဢၼ်တိုၼ်ႇမႃးၼၼ်ႉ ဢလူဝ်ႇၶႃႈၸဝ်ႈတၵ်းတဵမ်လူၺ်ႈပုင်ႇႁၢင်ႊၸဝ်ႈႁဝ်းတီႈၶႃႈဢေႃႈ။