၉၆
၁ ႁဵတ်းၵႂၢမ်းဢၼ်မႂ်ႇတီႈထႃႇဝရႃႉၽြႃးတႃႉ။လိၼ်မိူင်းတင်းသဵင်ႈတင်းမူတ်းၼႆႉဢိူၺ်း၊ ႁဵတ်းၵႂၢမ်းတီႈထႃႇဝရႃႉၽြႃးတႃႉ။ႁဵတ်းၵႂၢမ်းတီႈထႃႇဝရႃႉၽြႃးလႄႈပၼ် တၢင်းလီတီႈၼႃႇမႃႉၸိုဝ်ႈသဵင်မၼ်းၸဝ်ႈတႃႉ။
၂ ဝၼ်းၼိုင်ႈထႅင်ႈဝၼ်းၼိုင်ႈဢဝ်တြႃးတၢင်းဢၼ်မၼ်း ၸဝ်ႈၵႄႇၶျွတ်ႈဢဝ်ၼၼ်ႉမွၵ်ႇလၢတ်ႈတႃႉ။
၃ ၽုၺ်ႇဢွၵ်ႇၼႄပျႃးမုၼ်ၽုင်းမၼ်းၸဝ်ႈ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢိၵ်ႇတင်း လွင်ႈတၢင်းဢၼ်လီဢၢမ်းမၼ်းၸဝ်ႈၸိူဝ်းၼၼ်ႉ ၵႃႈၼႂ်းမဵဝ်းၵူၼ်းၵူႈမဵဝ်း တႃႉ။
၄ လွင်ႈမၼ်းၸမ်း ထႃႇဝရႃႉၽြႃးယႂ်ႇမျၢတ်ႈၼႃႇလႄႈ ပဵၼ်တီႈဢၼ်ထုၵ်ႇလီယွင်ႈယေႃး ၼႃႇလူင်လၢင်ဢေႃႈ။ပဵၼ်တီႈဢၼ်ထုၵ်ႇလီရူဝ်ႇသေႇၵူဝ်ယမ် ၼႃႇသေၽြႃးတင်းသဵင်ႈတင်းလူင်ဢေႃႈ။
၅ ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်း တင်းသဵင်ႈတင်းလူင်ၼၼ်ႉ ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈ ထႃႇဝရႃႉ ၽြႃးၸမ်း ႁဵတ်းပဵၼ်ၽႃႉၵၢင်ႁၢဝ်ဢေႃႈ။
၆ မုၼ်ၽုင်းဢိၵ်ႇတင်းဢႃႇၼူႉၽေႃႇ မီးၵႃႈတီႈၽၢႆႇၼႃႈမၼ်းၸဝ်ႈလႄႈ ႁႅင်းတၼ်းၶူဝ်းဢိၵ်ႇတင်းၵုင်ႇသရေႇမီးၵႃႈ တီႈထႃႇၼႃႉတီႈမူတ်းၸၢင်ႇမၼ်းၸဝ်ႈဢေႃႈ။
၇ ၵူၼ်းၵူႈၸိူဝ်ႉၵူႈမဵဝ်းၶဝ်ဢိူၺ်း၊ ႁပ်ႉတုင်းဢဝ်တီႈထႃႇဝရႃႉၽြႃးလႄႈဝႃႈ၊-ၸဝ်ႈႁဝ်းမီးမုၼ်ၽုင်းဢိၵ်ႇတင်း ႁႅင်းတၼ်းၶူဝ်းဢေႃႈ၊ ဝႃႈၼင်ႇၼႆတႃႉ။
၈ ႁပ်ႉတုင်းဢဝ်တီႈထႃႇဝရႃႉၽြႃးလႄႈဝႃႈ၊- ၼႃႇမႃႉၸိုဝ်ႈသဵင်ၸဝ်ႈႁဝ်းထိူၵ်ႈၶၢမ်ႇမုၼ်ၽုင်းတီႈၶႃႈဢေႃႈ၊ဝႃႈၼင်ႇၼႆတႃႉ။ပႃးတင်းၶိူင်ႈပုၵ်ႉၸေႃႇမႃးလႄႈ ၶဝ်ႈၵႃႈၼႂ်း တမ်ႇတိူင်းမၼ်းၸဝ်ႈတႃႉ။
၉ ဢဝ်တင်းၶိူင်ႈပိူင်ဢၼ်မူတ်းၸၢင်ႇႁၢင်ႈၶိူင်ႈလႄႈ ၵူဝ်းၵႂၢႆႇထႃႇဝရႃႉၽြႃးတႃႉ။လိၼ်မိူင်းတင်းသဵင်ႈတင်းမူတ်းၼႆႉဢိူၺ်း သၼ်ႇသၼ်ႇ သၢႆသၢႆယူႇၵႃႈတီႈၽၢႆႇၼႃႈမၼ်းၸဝ်ႈတႃႉ။
၁၀ မွၵ်ႇလၢတ်ႈၵႃႈၼႂ်းၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆလႄႈဝႃႈ၊-ထႃႇဝရႃႉၽြႃးၼင်ႈႁၢင်ႈၼင်ႈႁေႃယူႇဢေႃႈ၊ဝႃႈၼင်ႇၼႆတႃႉ။လေႃးၵထၢတ်ႈၼႆႉတႄႇယူႇမၼ်ႈၶိူင်ႇၼႃႇထၼ်ႈပေႃး ဢမ်ႇၼိုင်ဢမ်ႇၶွၼ်းလႆႈဢေႃႈ။မၼ်းၸဝ်ႈၸီႇယၢင်ႇတြႃးသိုဝ်ႈသိုဝ်ႈတေႃႇ တေႃႇၵႃႈတီႈၵူၼ်းတင်းလၢႆဢေႃႈ။
၁၁ ႁႂ်ႈၵၢင်ႁၢဝ်မီးတၢင်းဢၼ်ၸူမ်းသိူဝ်းသေၵမ်းလူၺ်ႈ။လိၼ်မိူင်းၵေႃႈႁႂ်ႈမီးတၢင်းဢၼ်သႂၢင်ႇသိူဝ်း သေၵမ်းလူၺ်ႈ။ႁႂ်ႈပၢင်ႇလၢႆႇဢိၵ်ႇတင်း တၢင်းဢၼ်မီးတဵမ်ဝႆႉၵႃႈၼႂ်းမၼ်းၼၼ်ႉ ႁဵတ်းသဵင်လင်ႊသဵင်မေႃး သေၵမ်းလူၺ်ႈ။
၁၂ ပၢင်ႇတူင်ႈၼႃး ဢိၵ်ႇတင်း ၵႃႈဢၼ်မီးၵႃႈၼႂ်းမၼ်းၵေႃႈ ႁႂ်ႈသႂၢင်ႇသိူဝ်းသေၵမ်းလူၺ်ႈ။မိူဝ်ႈၼၼ်ႉတူၼ်ႈမႆႉတူၼ်ႈတွၵ်ႇ ၵႃႈဢၼ်မီးၵႃႈၼႂ်းထိူၼ်ႇၼႂ်းၶိူဝ်းၼၼ်ႉ တၵ်းဢွၼ်ၵၼ်ႁဵတ်းၵႂၢမ်းသႂၢင်ႇသႂၢင်ႇသိူဝ်းသိူဝ်း ၵႃႈတီႈ ၽၢႆႇၼႃႈထႃႇဝရႃႉၽြႃးဢေႃႈ။
၁၃ လွင်ႈမၼ်းၸမ်းမၼ်းၸဝ်ႈမႃးဢေႃႈ။မၼ်းၸဝ်ႈမႃးႁႂ်ႈလႆႈၸီႇယၢင်ႇတႅပ်းတတ်းလေႃးၵႃႉၼႆႉ ၸွမ်းၼင်ႇတြႃးတၢင်းသိုဝ်ႈတေႃႇလႄႈ တႅပ်းတတ်းၵူၼ်းတင်းလၢႆ ၸွမ်းၼင်ႇသႅတ်ႈၸႃႇဢေႃႈ။