၈၈
၁ ထႃႇဝရႃႉၽြႃးၽြႃးဢၼ်ၵႄႇသႄႇၶျွတ်ႈဢဝ်ၵဝ်ႈၶႃႈတီႈၶႃႈ၊ ၶႃႈၸဝ်ႈသႅၼ်ႇႁွင်ႉၵႃႈတီႈၽၢႆႇၼႃႈၸဝ်ႈႁဝ်းယူႇၵူႈဝၼ်းၵူႈၶိုၼ်း ဢမ်ႇထၢတ်ႇတီႈၶႃႈဢေႃႈ။
၂ ႁႂ်ႈပထၼႃႇဢၼ်ၶႃႈၸဝ်ႈႁဵတ်းၼႆႉ၊ ၶဝ်ႈႁွတ်ႈၶဝ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်း သေၵမ်းလူၺ်ႈတီႈၶႃႈ။ၶႅၼ်းတေႃႈႁေႈႁူၸဝ်ႈႁဝ်း ၸူးသဵင်ဢၼ်ၶႃႈၸဝ်ႈသႅၼ်ႇႁွင်ႉၼႆႉသေၵမ်းတီႈၶႃႈ။
၃ ဝိၺိၺ်ႇၶႃႈၸဝ်ႈ မီးတဵမ်ဝႆႉတင်းတုၵ်ႉၶႃႉလႄႈဢသၢၵ်ႈၶႃႈၸဝ်ႈၵေႃႈ ႁွတ်ႈထိုင်ၵႃႈတီႈႁိမ်းမိူင်းမႃႇရၼႃႉတီႈၶႃႈယဝ်ႉ။
၄ ၶႃႈၸဝ်ႈလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ် လူင်းၵႂႃႇၸူးၵႃႈတီႈသၢင်းၶျႅင်းၼၼ်ႉ ပဵၼ်ၸိူဝ်ႉၼင်ႇၵေႃႉဢၼ်ႁႅင်း သဵင်ႈၵႂႃႇၼၼ်ႉတီႈၶႃႈဢေႃႈ။
၅ ၶႃႈၸဝ်ႈပဵၼ်ၸိူဝ်ႉၼင်ႇၵေႃႉဢၼ်လႆႈၶၢမ်ႇ တၢင်းဢၼ်ပႅတ်ႈဝႆႉၵႃႈတီႈၼႂ်းတူဝ်တၢႆတင်းလၢႆၵေႃႉဢၼ်လႆႈၶၢမ်ႇတၢင်းတၢႆလႄႈ ၼွၼ်းယူႇၵႃႈၼႂ်းသၢင်းၶျႅင်းဢၼ်ဝႃႈ ၵေႃႉဢၼ်ၸဝ်ႈႁဝ်းယင်းဢမ်ႇၶုၵ်းၸႂ်လႆႈၶႆႈၸႂ်ထူပ်းလႄႈ ၵႆယၢၼ်ၵၼ် တင်းမိုဝ်းၸဝ်ႈႁဝ်းၼၼ်ႉတီႈၶႃႈဢေႃႈ။
၆ ၸဝ်ႈႁဝ်းဢဝ်ၶႃႈၸဝ်ႈၶျႃးသႂ်ႇဝႆႉ ၵႃႈၼႂ်းၶုမ်ဢၼ်လိုၵ်ႉၼႃႇသေပိူၼ်ႈၵႃႈၼႂ်းတီႈဢၼ်လပ်းသိင်ႇမုင်းႁူမ်ႇလႄႈ လိုၵ်ႉလမ်ႇ ၼႃႇလူင်လၢင်ၼၼ်ႉတီႈၶႃႈယဝ်ႉ။
၇ တၢင်းၸႂ်မႆႈၶႂ်ႈၸႃႉၸဝ်ႈႁဝ်းၼၼ်ႉ တဵင်ယူႇၵႃႈၼိူဝ်ၶႃႈၸဝ်ႈလႄႈ ၸဝ်ႈႁဝ်းဢဝ်လႅင်းၼမ်ႉပိူပ်ႇၼမ်ႉၸဝ်ႈႁဝ်း တင်းသဵင်ႈတင်းလူင် ၼိၵ်ႈၸၢၵ်ႈငႅၼ်းသေးၶႃႈၸဝ်ႈတီႈၶႃႈဢေႃႈ။ၸေႇလႃႇ။
၈ ၸဝ်ႈႁဝ်း ဢဝ်ၶဝ်ၸိူဝ်းဢၼ်မိုတ်ႈၵၼ်ၵိုဝ်းၵၼ်တင်းၶႃႈၸဝ်ႈၼၼ်ႉၶၢႆႉၵႂႃႇလႄႈ ဝႆႉတီႈဢၼ်ၵႆၵၼ်တင်းၶႃႈၸဝ်ႈတီႈၶႃႈယဝ်ႉ။ၸဝ်ႈႁဝ်းႁႂ်ႈၶႃႈၸဝ်ႈပဵၼ်လွင်ႈဢၼ်လီႁင်ႈဢဵတ်ႇသဵတ်ႇတီႈၶဝ်ၼၼ်ႉ တီႈၶႃႈယဝ်ႉ။ၶႃႈၸဝ်ႈ လႆႈၶၢမ်ႇတၢင်းဢၼ်ၶျူၵ်ႈဝႆႉလႄႈဢမ်ႇဢွၵ်ႇ ၵႃႈၼွၵ်ႈလႆႈတီႈၶႃႈ။
၉ မၢၵ်ႇတႃၶႃႈၸဝ်ႈလူႉၵႂႃႇၵွပ်ႈပိူဝ်ႈတုၵ်ႉၶႃႉဢၼ်ၶႃႈၸဝ်ႈလႆႈၶၢမ်ႇၼၼ်ႉလႄႈ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်းယူႇၵူႈမိူဝ်ႈၵူႈဝၼ်းဢမ်ႇထၢတ်ႇတီႈၶႃႈဢေႃႈ။ၶႃႈၸဝ်ႈ ယဵတ်ႇမိုဝ်းၸူးတီႈၸဝ်ႈႁဝ်းယူႇတီႈၶႃႈဢေႃႈ။
၁၀ ၸဝ်ႈႁဝ်းတၵ်းၼႄပျႃး လွင်ႈတၢင်းဢၼ်လီဢၢမ်းတင်းလၢႆတီႈၶဝ်ၸိူဝ်းဢၼ်တၢႆယဝ်ႉၼၼ်ႉတီႈၶႃႈႁိုဝ်။ၵူၼ်းပႃႇႁဵဝ်ႈတင်းလၢႆတၵ်းဢွၼ်ၵၼ်လုၵ်ႉလႄႈ ယွင်ႈယေႃးၸဝ်ႈႁဝ်းတီႈၶႃႈႁိုဝ်။ၸေႇလႃႇ။
၁၁ တၵ်းဢဝ်ၵရူႉၼႃႇၸဝ်ႈႁဝ်း မွၵ်ႇလၢတ်ႈၵႃႈၼႂ်းသၢင်းၶျႅင်းဢိၵ်ႇတင်း ဢဝ်သႅတ်ႈၸႃႇၸဝ်ႈႁဝ်းမွၵ်ႇလၢတ်ႈ ၵႃႈၼႂ်းတီႈဢၼ်လူႉဢၼ်လႅဝ်ၼၼ်ႉတီႈၶႃႈႁိုဝ်။
၁၂ ၵႃႈၼႂ်းတီႈဢၼ်လပ်းသိင်ႇၼၼ်ႉ တၵ်းငိၼ်းလွင်ႈတၢင်းဢၼ်လီဢၢမ်းၸဝ်ႈႁဝ်းတင်းလၢႆလႄႈ ၵႃႈၼႂ်းမိူင်းတီႈဢၼ်လူင်ႈဢၼ်လိုမ်းၼၼ်ႉတၵ်းငိၼ်းတြႃး တၢင်းဢၼ်ၸဝ်ႈႁဝ်းသိုဝ်ႈတေႃႇတီႈၶႃႈႁိုဝ်။
၁၃ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁွင်ႉသႅၼ်ႇၸူးတီႈၸဝ်ႈႁဝ်းတီႈၶႃႈဢေႃႈ။ၶိင်ႇၵၢင်ၼႂ်ပထၼႃႇၶႃႈၸဝ်ႈႁွတ်ႈထိုင်ၵႃႈ တီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
၁၄ ထႃႇဝရႃႉၽြႃးတီႈၶႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပႄႇဝိၺိၺ်ႇၶႃႈၸဝ်ႈပႅတ်ႈၸိူဝ်ႉၼႆတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဝၢႆႇၼႃႈပႅတ်ႈၶႃႈၸဝ်ႈ ၸိူဝ်ႉၼႆ တီႈၶႃႈ။
၁၅ ၶႃႈၸဝ်ႈလႆႈၶၢမ်ႇတုၵ်ႉၶႃႉဝူၺ်ႇတၼႃႇလႄႈမီးတၢင်းဢၼ် ၸမ်တၵ်းတၢႆၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉတီႈၶႃႈဢေႃႈ။ၶႃႈၸဝ်ႈလႆႈၶၢမ်ႇၽေး ဢၼ်ၸဝ်ႈႁဝ်းၸီႇယၢင်ႇၸိူဝ်းၼၼ်ႉ လႄႈယၢပ်ႇၸႂ်ယုင်ႈၸႂ်တီႈၶႃႈဢေႃႈ။
၁၆ တၢင်းၸႂ်မႆႈၶႂ်ႈၸႃႉၸဝ်ႈႁဝ်းထုမ်ႈႁူမ်ႇၶႃႈၸဝ်ႈဝႆႉလႄႈ ၽေးဢၼ်ၸဝ်ႈႁဝ်းၸီႇယၢင်ႇၸိူဝ်းၼၼ်ႉ ယႃႉၶႃႈၸဝ်ႈပႅတ်ႈတီႈ ၶႃႈဢေႃႈ။
၁၇ ၶဝ်လွမ်ႉႁွပ်ႈၶႃႈၸဝ်ႈယူႇတင်းဝၼ်းတင်းဝၼ်းမိူၼ်ၸိူဝ်ႉၼင်ႇၼမ်ႉၼၼ်ႉလႄႈ ၽွမ်ႉၵၼ်ဝႅင်းႁွပ်ႈ ၶႃႈၸဝ်ႈယူႇတီႈၶႃႈဢေႃႈ။
၁၈ ၸဝ်ႈႁဝ်းဢဝ်ၵေႃႉဢၼ်ႁၵ်ႉဢၼ်ပႅင်းဢိၵ်ႇတင်း ၵေႃႉသေႈၼၼ်ႉၶၢႆႉၵႂႃႇလႄႈဝႆႉတီႈဢၼ်ၵႆၵၼ်တင်းၶႃႈၸဝ်ႈတီႈၶႃႈယဝ်ႉ။ၵေႃႉဢၼ်မိုတ်ႈၵၼ်ၵိုဝ်းၵၼ်တင်းၶႃႈၸဝ်ႈၼၼ်ႉ မီးယူႇၵႃႈၼႂ်းတီႈဢၼ်လပ်းသိင်ႇတီႈၶႃႈဢေႃႈ။