၂၂
၁ ၽြႃးၵဝ်ၶႃႈၽြႃးၵဝ်ၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈၸိူဝ်ႉၼႆတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းယူႇတီႈဢၼ်ၵႆၵၼ်တင်း တၢင်းဢၼ်ၵႄႇသႄႇၶျွတ်ဢဝ်ၶႃႈၸဝ်ႈဢိၵ်ႇတင်းၵႂၢမ်းဢၼ်ၶႃႈၸဝ်ႈ ႁွင်ႉသႅၼ်ႇၼၼ်ႉၼင်ႇႁိုဝ်တီႈ ၶႃႈ။
၂ ၽြႃးၵဝ်ၶႃႈ၊ၶိင်ႇၵၢင်ဝၼ်းၶႃႈၸဝ်ႈႁွင်ႉသႅၼ်ႇသေၵေႃႈၸဝ်ႈႁဝ်းဢမ်ႇဢိူဝ်ႉတီႈၶႃႈ။ၶိင်ႇၵၢင်ၶိုၼ်းၵေႃႈၶႃႈၸဝ်ႈႁွင်ႉသႅၼ်ႇလႄႈ ဢမ်ႇယူႇတဵတ်ႇတဵတ်ႇယဵၼ်ယဵၼ်တီႈၶႃႈ။ၸဝ်ႈႁဝ်းပဵၼ်ဢၼ်မူတ်းၸၢင်ႇတီႈၶႃႈ ဢေႃႈ။
၃ ၸဝ်ႈဢၼ်ၵိင်းဝၢပ်ႈယူႇၵႃႈၼႂ်းတၢင်းဢၼ်မဵဝ်းၵူၼ်းဢိသရေႇလ ယွင်ႈယေႃးၸိူဝ်းၼၼ်ႉတီႈၶႃႈ၊ ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ ဢိင်ပိုင်ႈၸဝ်ႈႁဝ်း တီႈၶႃႈဢေႃႈ။
၄ ၶဝ်ဢိင်ပိုင်ႈၸဝ်ႈႁဝ်းလႄႈၸဝ်ႈႁဝ်းၵႄႇ သႄႇဢဝ်ၶဝ်လွတ်ႈတီႈၶႃႈဢေႃႈ။
၅ ၶဝ်ႁွင်ႉသႅၼ်ႇတီႈၸဝ်ႈႁဝ်းလႄႈ ႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်တီႈၶႃႈဢေႃႈ။ၶဝ်ဢိင်ပိုင်ႈၸဝ်ႈႁဝ်းလႄႈၵၢင်းလွတ်ႈတင်း တၢင်းဢၼ်ဢူၵ်းဢၼ်ဢၢႆတီႈၶႃႈဢေႃႈ။
၆ ၶႃႈၸဝ်ႈၸမ်းပဵၼ်ၵူၼ်းဢမ်ႇၸႂ်ႈ။ပဵၼ်တူဝ်မူင်ႈၵူၺ်းလႄႈ ပဵၼ်တီႈဢၼ်ၵူၼ်းတင်းလၢႆတၵ်းသေႉသွမ်းတီႈဢၼ်မုၵ်ႉၵူၼ်းၸိူဝ်းၵူၼ်းတင်းလၢႆ ႁဵတ်းဢမ်ႇပေႃး ၼင်ႇႁိုဝ်တီႈၶႃႈဢေႃႈ။
၇ ၶဝ်ၸိူဝ်းဢၼ်ႁၼ်ၶႃႈၸဝ်ႈၵႃႈမီးတင်းသဵင်ႈတင်းလူင်ၼၼ်ႉ ႁဵတ်းပျၢၵ်ႈႁဵတ်းၶူဝ်ၶႃႈၸဝ်ႈတီႈၶႃႈဢေႃႈ။ၶဝ်ဢွၼ်ၵၼ်မီးသူပ်းမီးပၢၵ်ႇ ၸူးလႄႈဝၢႆႇႁူဝ်ၶွၼ်းႁူဝ်ၸူးတီႈၶႃႈဢေႃႈ။
၈ ၶဝ်ဢွၼ်ၵၼ်လၢတ်ႈလႄႈဝႃႈ၊-မၼ်းဢိင်ပိုင်ႈထႃႇဝရႃႉၽြႃးယဝ်ႉ။ႁႂ်ႈမၼ်းၸဝ်ႈၵႄႇသႄႇဢဝ်မၼ်းလွတ်ႈသေၵမ်း။ပိူဝ်ႈဢၼ်မၼ်းၸဝ်ႈ ထုၵ်ႇၸႂ်ၵျိူၵ်ႈၸႂ်တီႈမၼ်းလႄႈႁႂ်ႈမၼ်းၸဝ်ႈၵႄႇသႄႇၶျွတ်ႈဢဝ်မၼ်းသေၵမ်း၊ ဝႃႈၼင်ႇၼႆတီႈၶႃႈဢေႃႈ။
၉ ၸဝ်ႈႁဝ်းတိုတ်ႉဢဝ်ၶႃႈၸဝ်ႈ ဢွၵ်ႇသေၵႃႈၼႂ်းတွင်ႉမေႈလႄႈ ႁႂ်ႈၶႃႈၸဝ်ႈဢိင်ပိုင်ႈယူႇမိူဝ်ႈဢၼ်ၵိၼ်ၼူမ်း မေႈၼၼ်ႉတီႈၶႃႈဢေႃႈ။
၁၀ ၶႃႈၸဝ်ႈႁွတ်ႈထိုင်ၵႃႈၼႂ်းမိုဝ်းၸဝ်ႈႁဝ်းၸဵမ်မိူဝ်ႈဢၼ်ၵိူတ်ႇဢွၵ်ႇမႃးၼၼ်ႉလႄႈၸဝ်ႈႁဝ်းပဵၼ်ၽြႃးပဵၼ်ၸဝ်ႈၵဝ်ၶႃႈယူႇ ၸဵမ်မိူဝ်ႈဢၼ် ၶႃႈၸဝ်ႈယူႇၵႃႈၼႂ်းတွင်ႉမေႈၼၼ်ႉတီႈၶႃႈယဝ်ႉ။
၁၁ ယႃႇပေယူႇၵႆၶႃႈၸဝ်ႈသေၵမ်းတီႈၶႃႈ။ၽေးဢၢၼ်ႇတရႄႇၸမ်တၵ်းႁွတ်ႈထိုင်တီႈၶႃႈယဝ်ႉ။ၵေႃႉဢၼ်မႃႉၸႃႉၸွႆႈ ထႅမ်ဢမ်ႇမီးတီႈၶႃႈ။
၁၂ ဝူဝ်းဢုၵ်ႉသၽႃႉၼမ်ၼႃႇလွမ်ႉဢုမ်ႇၶႃႈၸဝ်ႈဝႆႉလႄႈ ဢုၵ်ႉသၽႃႇပႃႇသၢၼ်ႇဢၼ်ႁႅင်းယႂ်ႇၼႃႇၸိူဝ်းၼၼ်ႉၵေႃႈ လဵပ်ႈႁွပ်ႈၶႃႈၸဝ်ႈယူႇ တီႈၶႃႈဢေႃႈ။
၁၃ ၶဝ်ဢႃႈသူပ်းဢႃႈပၢၵ်ႇၸူဝ်းၶႃႈၸဝ်ႈယူႇမိူၼ်ၸိူဝ်ႉၼင်ႇ သၢင်ႇသီႈဢၼ်ၸၢင်ႊၶူပ်းၶၢတ်ႇ လႄႈႁွင်ႉသႅၼ်ႇယူႇၼၼ်ႉ တီႈၶႃႈဢေႃႈ။
၁၄ ၶႃႈၸဝ်ႈလႆႈၶၢမ်ႇတၢင်းဢၼ်ထွၵ်ႇႁိူဝ်ႇမိူၼ်ၸိူဝ်ႉၼင်ႇၼမ်ႉၼၼ်ႉလႄႈ လုပ်ႇၵပ်းလုပ်ႇတေႃႇၶႃႈၸဝ်ႈၵႃႈမီးတင်းသဵင်ႈတင်းလူင်သွၼ်ႇတူၵ်းတီႈၶႃႈဢေႃႈ။ႁူဝ်ၸႂ်ၶႃႈၸဝ်ႈပဵၼ်ၸိူဝ်ႉၼင်ႇၶီႈၽိုင်ႈၼၼ်ႉလႄႈ မီးတၢင်းဢၼ်ၸိုမ်းပဵၼ်ၼမ်ႉၵႂႃႇ ၵႃႈတီႈၼႂ်းႁူဝ်ဢူၵ်းၶႃႈၸဝ်ႈ တီႈ ၶႃႈဢေႃႈ။
၁၅ ႁႅင်းတၼ်းၶူဝ်းၶႃႈၸဝ်ႈႁႅင်ႈႁွင်ၵႂႃႇမိူၼ်ၸိူဝ်ႉၼင်ႇၽၢၵ်ႇမေႃႈလႄႈ လိၼ်ႉၶႃႈၸဝ်ႈၵေႃႈၸပ်းၵၼ်ယူႇၵႃႈတီႈလုပ်ႇၵႅမ်ႈလုပ်ႇၵၢင်းၶႃႈၸဝ်ႈ တီႈၶႃႈဢေႃႈ။ၸဝ်ႈႁဝ်း ဢဝ်ၶႃႈၸဝ်ႈၶျႃးတူၵ်းတေႃႇထိုင်ႁွတ်ႈမုၼ်ႈ လိၼ်တၢင်းတၢႆၼၼ်ႉတီႈၶႃႈဢေႃႈ။
၁၆ မႃတင်းလၢႆဢွၼ်ၵၼ်လွမ်ႉဢုမ်ႇၶႃႈၸဝ်ႈသေလႄႈ မုၵ်ႉၸိူဝ်းၵူၼ်းႁၢႆႉၵူၼ်းမိူၵ်ႈတင်းလၢႆဢွၼ်ၵၼ်လဵပ်ႈႁွပ်ႈၶႃႈၸဝ်ႈလႄႈ ၸီး တႅင်းတိၼ်မိုဝ်းၶႃႈၸဝ်ႈပွင်ႇတီႈၶႃႈဢေႃႈ။
၁၇ ၶႃႈၸဝ်ႈၼပ်ႉဢၢၼ်ႇလုပ်ႇၶႃႈၸဝ်ႈၵႃႈမီး လႆႈယူႇတီႈၶႃႈဢေႃႈ။ၶဝ်ဢွၼ်ၵၼ်လူႈတူၺ်းၶႃႈၸဝ်ႈလႄႈ ယႅၵ်ႉတူၺ်းၶႃႈ ၸဝ်ႈယူႇတီႈၶႃႈဢေႃႈ။
၁၈ ၶဝ်ဢဝ်ၶူဝ်းၼုင်ႈၶႃႈၸဝ်ႈၽႄမဵင်ႇၵၼ်လႄႈ ဢဝ်သိူဝ်ႈၶႃႈၸဝ်ႈတူၵ်းၸႃႇၵွၵ်ႈတီႈၶႃႈဢေႃႈ။ထႃႇဝရႃႉၽြႃးတီႈၶႃႈ၊ယႃႇပေယူႇၵႆၶႃႈ ၸဝ်ႈသေၵမ်းတီႈၶႃႈ။
၁၉ ၸဝ်ႈဢၼ်ပဵၼ်ႁႅင်းတၼ်းၶူဝ်းၵဝ်ၶႃႈတီႈၶႃႈ၊- ၶႅၼ်းတေႃႈမႃးၶၼ်ၶၼ်ၽႂ်းၽႂ်းႁႂ်ႈ လႆႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။
၂၀ ၶႅၼ်းတေႃႈၵႄႇသႄႇၶျွတ်ႈဢဝ်ဢသၢၵ်ႈၶႃႈၸဝ်ႈသေ ၵႃႈတီႈၽေးလၢပ်ႇ ဢိၵ်ႇတင်း တၼ်းၶူဝ်းမႃၼၼ်ႉသေ ၵမ်းတီႈၶႃႈ။
၂၁ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈတီႈသူပ်းသၢင်ႇသီႈ ဢိၵ်ႇတင်းၵႃႈတီႈၶဝ်လႅမ် ဝူဝ်းထိူၼ်ႇၼၼ်ႉသေတီႈၶႃႈဢေႃႈ။
၂၂ ၶႃႈၸဝ်ႈတၵ်းမွၵ်ႇလၢတ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈပီႈၼွင်ႉၶႃႈၸဝ်ႈတင်းလၢႆၼၼ်ႉတီႈၶႃႈဢေႃႈ။ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း ၵႃႈတီႈၼႂ်းၵၢင်ပရိၵ်ႈသၢတ်ႈတီႈ ၶႃႈဢေႃႈ။
၂၃ သူၸိူဝ်းဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၶဝ်ဢိူၺ်း၊ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။ၸိူဝ်ႉၶိူဝ်းယႃႇၵုပ်ႉတင်းသဵင်ႈတင်းလူင်ၶဝ်ဢိူၺ်း၊ဢွၼ်ၵၼ်ၽုၺ်ႇဢွၵ်ႇမွၵ်ႇလၢတ်ႈ ၵုင်ႇၵျေးၸူးမၼ်းၸဝ်ႈတႃႉ။ၸိူဝ်ႉၶိူဝ်းဢိသရေႇလ တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ရူဝ်ႇသေႇၵူဝ်ယမ်မၼ်းၸဝ်ႈတႃႉ။
၂၄ လွင်ႈမၼ်းၸမ်း မၼ်းၸဝ်ႈႁဵတ်းဢမ်ႇပေႃးၼင်ႇႁိုဝ်တီႈတၢင်းယၢၵ်ႈတၢင်းၽၢၼ် ၵေႃႉဢၼ်ယၢၵ်ႈၽၢၼ်ၼၼ်ႉဢမ်ႇၸႂ်ႈ။မၼ်းၸဝ်ႈဢမ်ႇဝၢႆႇၼႃႈမၼ်းၸဝ်ႈပႅတ်ႈ။မၼ်းၸဝ်ႈထွမ်ႇဢဝ် မိူဝ်ႈဢၼ်မၼ်းႁွင်ႉႁႃ မၼ်းၸဝ်ႈၼၼ်ႉဢေႃႈ။
၂၅ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း ၵႃႈၼႂ်းၵၢင်မႁႃႇပရိၵ်ႈသၢတ်ႈလႄႈ ၽေႇဝၢတ်ႈသႅတ်ႈၸႃႇ ၸွမ်းၵႃႈၼင်ႇဢၼ်ဝႆႉသႅတ်ႈၸႃႇၵတိ ၵႃႈတီႈၽၢႆႇၼႃႈၶဝ်ၸိူဝ်းဢၼ်ရူဝ်ႇသေႇၵူဝ်ယမ် ၸဝ်ႈႁဝ်းၼၼ်ႉတီႈၶႃႈဢေႃႈ။
၂၆ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ တၵ်းလႆႈၵိၼ်လႄႈဢိမ်ႇတဵမ်ဢေႃႈ။ၶဝ်ၸိူဝ်းဢၼ် ႁႃထႃႇဝရႃႉၽြႃးၼၼ်ႉ တၵ်းယွင်ႈယေႃးမၼ်းၸဝ်ႈဢေႃႈ။ႁႂ်ႈႁူဝ်ၸႂ်သူႁွမ်ႁႅင်းယူႇတႃႇ သေႇဢမ်ႇထၢတ်ႇသေၵမ်း။
၂၇ တီႈသုတ်းတီႈၵွႆလိၼ်မိူင်းၵႃႈမီးတင်းသဵင်ႈတင်းလူင် တၵ်းလႆႈသတိလႄႈ ၶၢႆႉပုတ်ႈမႃးၵႃႈတီႈထႃႇဝရႃႉၽြႃးဢေႃႈ။မဵဝ်းၸိူဝ်ႉၶိူဝ်းၵူၼ်းတၢင်ႇၸိူဝ်ႉတၢင်ႇၶိူဝ်း တင်းသဵင်ႈတင်းလူင်တၵ်းဢွၼ်ၵၼ်ၵူဝ်းၵႂၢႆႇ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈ ဢေႃႈ။
၂၈ လွင်ႈမၼ်းၸမ်းသိုင်ႇၸိုင်ႈဝၢၼ်ႈမိူင်းပဵၼ်မိူင်းထႃႇဝရႃႉၽြႃးဢေႃႈ။မၼ်းၸဝ်ႈဢုပ်ႉပိူင်ႇၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇဢေႃႈ။ၶဝ်ၸိူဝ်းဢၼ်တဵမ်ထူၼ်းလိူင်ႇၸႂ်ၵႃႈၼိူဝ်လိၼ်မိူင်းၼႆႉ တင်းသဵင်ႈတင်းလူင်ၼၼ်ႉ တၵ်းဢွၼ်ၵၼ်ၵိၼ်ၶူပ်းလႄႈ ၵူဝ်းၵႂၢႆႇ ဢေႃႈ။
၂၉ ၶဝ်ၵႃႈဢၼ်လႆႈလူင်းၸူးမုၼ်ႈလိၼ်ဢိၵ်ႇတင်းၶဝ်ၸိူဝ်းဢၼ်ဢမ်ႇပႂ်ႉဢသၢၵ်ႈတူဝ်ၸဝ်ႈၵဝ်ႇလႆႈၼၼ်ႉၵေႃႈတၵ်းဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇ ၼႃႈမၼ်းၸဝ်ႈဢေႃႈ။
၃၀ ၸိူဝ်ႉၶိူဝ်းၶဝ်ၵေႃႈတၵ်းဢွၼ်ၵၼ်ႁဵတ်းဝၢတ်ႈတီႈမၼ်းၸဝ်ႈလႄႈတၵ်းလႆႈမွၵ်ႇလၢတ်ႈလူၺ်ႈလွင်ႈထႃႇဝရႃႉၽြႃး တီႈၵူၼ်းသိုပ်ႇသိုပ်ႇ တၢမ်ႈတၢမ်ႈၼၼ်ႉဢေႃႈ။
၃၁ တၵ်းပေႃႇပဵၼ်မႃးလႄႈဢွၼ်ၵၼ်ၽုၺ်ႇဢွၵ်ႇၼႄပျႃးတၢင်းသိုဝ်ႈတေႃႇမၼ်းၸဝ်ႈၼၼ်ႉ တီႈမဵဝ်းၵူၼ်းဢၼ်တၵ်းၵိူတ်ႇလဵင်ႉမႃးၼၼ်ႉလႄႈဝႃႈ၊- မၼ်းၸဝ်ႈၸီႇယၢင်ႇၸိူဝ်ႉၼင်ႇၼႆယဝ်ႉ၊ဝႃႈၼင်ႇၼႆဢေႃႈ။