၈၄
၁ ထႃႇဝရႃႉၽြႃး ၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ထႃႇၼႃႉ တီႈဢၼ်ၸဝ်ႈႁဝ်းၵိင်းဝၢပ်ႈယူႇၸိူဝ်းၼၼ်ႉ ပဵၼ်ဢၼ်သႃႇယႃႇလီငၢမ်းၼႃႇလူင်လၢင် တီႈၶႃႈဢေႃႈ။
၂ ဝိၺိၺ်ႇၶႃႈၸဝ်ႈ ၵၢဝ်ႇႁႃဢေႁႃတမ်ႇတိူင်းထႃႇဝရႃႉၽြႃးၸိူဝ်းၼၼ်ႉလႄႈ ႁႅင်းဢူၼ်ႈၵႂႃႇတီႈၶႃႈဢေႃႈ။ႁူဝ်ၸႂ်တင်းၼိူဝ်ႉလိူတ်ႈၶႃႈၸဝ်ႈ ႁွင်ႉသႅၼ်ႇႁွင်ႉႁႃၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ တီႈၶႃႈဢေႃႈ။
၃ ထႃႇဝရႃႉၽြႃးၸဝ်ႈပူဝ်ႇပႃႇၵၢင်ႁၢဝ်၊ ၶုၼ်ႁေႃၶမ်းၵဝ်ၶႃႈ၊ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၼူၵ်ႉၸွၵ်ႇလႆႈထူပ်းတီႈယူႇတီႈသဝ်းလႄႈ ၼူၵ်ႉဢႅၼ်ႇၽႃႉၵေႃႈ လႆႈထူပ်းႁင်းပုၼ်ႈမၼ်း တီႈဢၼ်မၼ်းတၵ်းၶႆႇလုၵ်ႈဢွၼ်ႇမၼ်း ၵႃႈတီႈယိတ်ႉပလၢင်ႇၸဝ်ႈႁဝ်းၸိူဝ်းၼၼ်ႉ တီႈ ၶႃႈဢေႃႈ။
၄ ၶဝ်ၸိူဝ်းဢၼ်ယူႇၵႃႈၼႂ်းႁိူၼ်းၸဝ်ႈႁဝ်းၼၼ်ႉမီးမင်ႇၵလႃႇတီႈၶႃႈဢေႃႈ။ၶဝ်တၵ်းဢွၼ်ၵၼ်ယွင်ႈယေႃးၸဝ်ႈႁဝ်းယူႇတႃႇသေႇတီႈၶႃႈဢေႃႈ။ၸေႇလႃႇ။
၅ ၵေႃႉဢၼ်ဢဝ်ၸဝ်ႈႁဝ်းႁဵတ်းႁႅင်းယူႇလႄႈ ၵႃႈၼႂ်းၸႂ်မၼ်း ပႃးသဵၼ်ႈတၢင်းၸဝ်ႈႁဝ်းတင်းလၢႆယူႇၼၼ်ႉ မီးမင်ႇၵလႃႇတီႈၶႃႈဢေႃႈ။
၆ ၶဝ်ၼၼ်ႉၼႂ်းမိူဝ်ႈဢၼ်ယင်းတိုၵ်ႉပႆၵႂႃႇလတ်းၵႂႃႇ ၵႃႈၼႂ်းပၢင်ႇႁူၺ်ႈပႃႇၶႃႇဢၼ်ႁႅင်ႈႁွင်ၼၼ်ႉယူႇၼၼ်ႉၸိုင် ၶဝ်ႁႂ်ႈၵႃႈတီႈၼၼ်ႉပဵၼ်တီႈဢၼ်ၼမ်ႉဢွၵ်ႇႁူးမႃးၼမ်ၼႃႇလႄႈ ၽူၼ်ႁူဝ်ပီႊၵေႃႈ ဢဝ်မင်ႇၵလႃႇတင်းလၢႆထုမ်ႈႁူမ်ႇတီႈၶႃႈ ဢေႃႈ။
၇ ၶဝ်ၼၼ်ႉ ယဵင်ႈၵႂႃႇယဵင်ႈႁႅင်းယႂ်ႇတိၵ်းတိၵ်းလႄႈ ၼႄပျႃးၼႃႈၶဝ်ၵႃႈတီႈၽြႃးပဵၼ်ၸဝ်ႈၵႃႈၼႂ်း ဝဵင်းၸိဢုၼ်ႇၼၼ်ႉတီႈၶႃႈဢေႃႈ။
၈ ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်တီႈၶႃႈ။ၶႅၼ်းတေႃႈထွမ်ႇဢဝ်ၵႂၢမ်းပထၼႃႇၶႃႈၸဝ်ႈသေၵမ်းတီႈၶႃႈ။ၽြႃးပဵၼ်ၸဝ်ႈမဵဝ်းယႃႇၵုပ်ႉတီႈၶႃႈ။ၶႅၼ်းတေႃႈဝၢႆႇႁူၸူးသေၵမ်းတီႈၶႃႈ။ၸေႇလႃႇ။
၉ ၽြႃးဢၼ်ပဵၼ်ၶိူင်ႈႁႄႉလၢၵ်ႈၼၢၵ်ႈႁဝ်းၶႃႈၼၼ်ႉတီႈၶႃႈ၊ၶႅၼ်းတေႃႈလူႈတူၺ်းသေၵမ်းတီႈၶႃႈ။ၶႅၼ်းတေႃႈထွၵ်ႈလူၺ်ႈၼႃႈ ၵေႃႉဢၼ်ၶၢမ်ႇၽိၵ်ႉသိၵ်ႈတီႈ ၸဝ်ႈႁဝ်းၼၼ်ႉသေၵမ်းတီႈၶႃႈ။
၁၀ မိူဝ်ႈဝၼ်းဢၼ်ယူႇၵႃႈၼႂ်းတမ်ႇတိူင်းၸဝ်ႈႁဝ်း ဝၼ်းၼိုင်ႈၼၼ်ႉ ယဵင်ႈၶႅၼ်းလီၼႃႇသေဝၼ်းဢၼ်ယူႇတၢင်ႇတီႈတၢင်ႇလႅၼ်ႁဵင်ဝၼ်းတီႈၶႃႈဢေႃႈ။ၶႃႈၸဝ်ႈယဵင်ႈၶႅၼ်းထုၵ်ႇၸႂ်ၵျိူၵ်ႈၸႂ် ဢရႃႇဢၼ်ပႂ်ႉၽၵ်းတူၵႃႈတီႈႁိူၼ်းၽြႃးပဵၼ်ၸဝ်ႈၵဝ်ၶႃႈၼၼ်ႉ ၼႃႇသေဢၶႂင်ႉဢၼ်လႆႈယူႇၵႃႈၼႂ်းသုမ်ႉထဵင် ၶဝ်ၸိူဝ်းဢၼ်ဢမ်ႇတြႃးၸိူဝ်းၼၼ်ႉ တီႈၶႃႈဢေႃႈ။
၁၁ ၸဝ်ႈထႃႇဝရႃႉၽြႃးပဵၼ်ၸဝ်ႈပဵၼ်ၵၢင်ဝၼ်းဢိၵ်ႇတင်း ၶိူင်ႈႁႄႉလၢၵ်ႈၼၢၵ်ႈတီႈၶႃႈဢေႃႈ။ထႃႇဝရႃႉၽြႃးပၼ်ၵျေးၸူး ဢိၵ်ႇတင်းမုၼ်သရေႇတီႈၶႃႈဢေႃႈ။မၼ်းၸဝ်ႈဢမ်ႇထဵင်ပဵတ်ႈလွင်ႈတၢင်းဢၼ်လီဢၼ်ငၢမ်း သေၸိူဝ်ႉသေပိူင် ၵႃႈတီႈၶဝ်ၸိူဝ်းဢၼ်ၵႂႃႇမႃးသိုဝ်ႈသိုဝ်ႈတေႃႇတေႃႇၼၼ်ႉတီႈၶႃႈ။
၁၂ ထႃႇဝရႃႉၽြႃး၊ ၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၵေႃႉဢၼ်ဢိင်ပိုင်ႈၸဝ်ႈႁဝ်းယူႇၼၼ်ႉ မီးမင်ႇၵလႃႇတီႈၶႃႈဢေႃႈ။