၃၉
၁ ၵဝ်လၢတ်ႈလႄႈဝႃႈ၊-ၵဝ်တၵ်းႁဵတ်းသတိလူၺ်ႈသဵၼ်ႈတၢင်းၵဝ်တင်းလၢႆ ဢမ်ႇလႆႈႁႂ်ႈဢဝ်တင်းလိၼ်ႉၵဝ်ၽိတ်းပိူင်ႈလႃးလႃးလႄႈ တၵ်းဢဝ်ၵၵ်ႉဢဝ်ၵိုဝ်သႂ်ႇဝႆႉၵႃႈၼႂ်းသူပ်းၵဝ် ၼႂ်းမိူဝ်ႈဢၼ်ၵေႃႉဢၼ်ဢမ်ႇတြႃးၼၼ်ႉမီးယူႇသိုဝ်ႈၼႃႈတႂ်ႈတႃၵဝ်ၼၼ်ႉဢေႃႈ၊ဝႃႈ ၼင်ႇၼႆဝႆႉယဝ်ႉ။
၂ ပဵၵ်ႉသမ်ႉၵဝ်ယင်းဢမ်ႇတၵ်းသဵင်တၵ်းပၢၵ်ႇလႄႈဢႃႉယူႇ ယင်းဢမ်ႇလၢတ်ႈၵႃႈသင်လွင်ႈဢၼ်တၵ်းပဵၼ်ဢၼ်လီဢၼ်ငၢမ်းလႄႈ ယူႇတဵတ်ႇတဵတ်ႇယူႇသေၵေႃႈယႃႇ မီးတၢင်းဢၼ်ၵိတ်ႇၸႂ်ၵႅၼ်း ၸႂ်ယူႇဢေႃႈ။
၃ ႁူဝ်ၸႂ်ၵဝ်မီးတၢင်းဢၼ်မႆႈဢၼ်ႁွၼ်ႉၵႃႈၼႂ်းၵဝ်လႄႈၼႂ်းမိူဝ်ႈဢၼ်ၵဝ်ၶႆႈၸႂ်ဝူၼ်ႉၸႂ်ယူႇ ၼၼ်ႉၸိုင်ၽႆးလုၵ်ႉလႄႈမႆႈယူႇဢေႃႈ။
၄ ၵဝ်ၵေႃႈဢဝ်လိၼ်ႉၵဝ်လၢတ်ႈလႄႈဝႃႈၸမ်း- ထႃႇဝရႃႉၽြႃးတီႈၶႃႈၶႅၼ်းတေႃႈ ႁႂ်ႈၶႃႈၸဝ်ႈႁူႉတီႈသုတ်းတီႈၵွႆၶႃႈၸဝ်ႈဢိၵ်ႇတင်း လွင်ႈဢၼ်ၸူဝ်ႈတႃႇဢသၢၵ်ႈၶႃႈၸဝ်ႈ ပဵၼ်ၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ။
၅ ႁႂ်ႈၶႃႈၸဝ်ႈႁူႉလွင်ႈတၢင်းဢၼ်တူဝ်ၸဝ်ႈၵဝ်ႇ ၸၢင်ႊလူႉၸၢင်ႊလႅဝ် ၼၼ်ႉသေၵမ်းတီႈၶႃႈ။တူၺ်းတီႈၶႃႈလူႊ၊ ၸဝ်ႈႁဝ်းမၵ်းၶၢၼ်းဝႆႉၸူဝ်ႈတႃႇဢသၢၵ်ႈၶႃႈၸဝ်ႈ မီးသေမိူၵ်ႈၼိုင်ႈၵူၺ်းလႄႈ ဢရွႆႇၶႃႈၸဝ်ႈပဵၼ်ၸိူဝ်ႉၼင်ႇဢမ်ႇၸႂ်ႈၵႃႈသင်လႃးလႃး ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ၵူၼ်းဢၼ်ဝႃႈၸမ်းပဵၵ်ႉသမ်ႉပဵၼ်ၸိၵ်းပဵၼ်ၸွမ်ၵူၼ်းတင်းလၢႆသေၵေႃႈ ပဵၼ်ဢၼတ်ႉတႃႉၵူၺ်းဢမၢၼ်ႇၶၼ်ပဵၼ်တီႈၶႃႈဢေႃႈ။ၸေႇလႃႇ။
၆ ၵူၼ်းၸိုင် ၵႂႃႇမႃးယူႇၵႃႈၼႂ်းႁူမ်ႊငဝ်းဢမၢၼ်ႇၶၼ်ပဵၼ်တီႈၶႃႈဢေႃႈ။ၶဝ်ယၢပ်ႇၸႂ်ၶၢၼ်ၸႂ်ဢမ်ႇမီး ဢၵျူဝ်းၵႃႈသင်ဢမၢၼ်ႇၶၼ်ပဵၼ်လႄႈ ပဵၵ်ႉသမ်ႉၶဝ်သိမ်းပႅင်းဢုၵ်ႉၸႃႇဝႆႉသေၵေႃႈ ၶဝ်ဢမ်ႇႁူႉ လွင်ႈဢၼ်ၽူႈ လႂ် တၵ်းလႆႈၼၼ်ႉတီႈၶႃႈဝႃႈၼင်ႇၼႆတီႈၶႃႈဢေႃႈ။
၇ မိူဝ်ႈလဵဝ်ၼႆႉၸမ်း ၶႃႈၸဝ်ႈမုင်ထႃႈမွင်းထႃႈၵႃႈသင်ယူႇတီႈၶႃႈ။ထႃႇဝရႃႉၽြႃးတီႈၶႃႈ၊တၢင်းဢၼ်ၶႃႈၸဝ်ႈမုင်ထႃႈမွင်းထႃႈၼၼ်ႉ မီးတီႈၸဝ်ႈႁဝ်းၵူၺ်းတီႈၶႃႈ ဢေႃႈ။
၈ ၶႅၼ်းတေႃႈၵႄႇသႄႇၼုၵ်ႈဢဝ်ၶႃႈၸဝ်ႈဢွၵ်ႇသေ ၵႃႈၼႂ်းဢပျႅတ်ႈ ၵႃႈဢၼ်လႆႈၽိတ်းပိူင်ႈမႅၼ်ႈၼၼ်ႉသေၵမ်းတီႈၶႃႈ။ယႃႇပေႁႂ်ႈၶႃႈၸဝ်ႈလႆႈၶၢမ်ႇတၢင်းဢၼ်ၵူၼ်းမိူၵ်ႈတင်းလၢႆ သေႉသွမ်းၼၼ်ႉသေ ၵမ်းတီႈၶႃႈ။
၉ ၶႃႈၸဝ်ႈဢႃႉယူႇလႄႈယင်းဢမ်ႇၽုၺ်ႇသူပ်းၽုၺ်ႇပၢၵ်ႇ ၵွပ်ႈပိူဝ်ႈဢၼ်ပဵၼ်လွင်ႈတၢင်းဢၼ် ၸဝ်ႈႁဝ်းႁဵတ်းၼၼ်ႉတီႈၶႃႈဢေႃႈ။
၁၀ ၶႅၼ်းတေႃႈဢဝ်တၢမ်ႇၸဝ်ႈႁဝ်း ပႄႇပႅတ်ႈသေၵႃႈတီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈလႆႈၶၢမ်ႇတၢင်းဢၼ်ၸဝ်ႈႁဝ်းဢဝ်မိုဝ်းၸဝ်ႈႁဝ်းပေႃႉယႅၼ်ႉလႄႈႁႅင်းသဵင်ႈၵႂႃႇတီႈၶႃႈ ယဝ်ႉ။
၁၁ မိူဝ်ႈဢၼ်ၸဝ်ႈႁဝ်းသင်ႇသွၼ်သုင်းမႃႉပၼ်တၢမ်ႇတီႈၵူၼ်း ၵွပ်ႈပိူဝ်ႈဢပျႅတ်ႈမၼ်းၼၼ်ႉၸိုင်ၸဝ်ႈႁဝ်းႁႂ်ႈလွင်ႈတၢင်းဢၼ်မၼ်း ထုၵ်ႇၸႂ်ၵျိူၵ်ႈၸႂ်ၼၼ်ႉႁၢႆၵႂႃႇမိူၼ်ၸိူဝ်ႉၼင်ႇမူင်ႈ၊မႅင်း၊ၼၼ်ႉလႄႈ ၵူၼ်းတင်းသဵင်ႈတင်းလူင် ပဵၼ်ဢၼတ်ႉတႃႉၵူၺ်းၵူၺ်းတီႈၶႃႈဢေႃႈ။
၁၂ ထႃႇဝရႃႉၽြႃးတီႈၶႃႈ၊ၶႅၼ်းတေႃႈထွမ်ႇငိၼ်းတၢင်းဢၼ်ၶႃႈၸဝ်းသူးတွင်းပထၼႃႇၼႆႉလႄႈ ဝၢႆႇႁူၸဝ်ႈႁဝ်းၸူးသဵင်ဢၼ်ၶႃႈၸဝ်ႈႁွင်ႉသႅၼ်ႇၼႆႉ သေၵမ်းတီႈၶႃႈ။ယႃႇပတေူၺ်းၼမ်ႉတႃၶႃႈၸဝ်ႈသေလႄႈတဵတ်ႇယဵၼ်ယူႇသေၵမ်းတီႈၶႃႈ။ၶႃႈၸဝ်ႈၵေႃႈလႆႈပဵၼ်ၶႅၵ်ႇဢႃႇၵၼ်ႇတူႉ ၵႃႈတီႈၽၢႆႇၼႃႈၸဝ်ႈႁဝ်း မိူၼ်ၸိူဝ်ႉၼင်ႇပူႇမွၼ်ႇၶႃႈၸဝ်ႈ တင်းသဵင်ႈတင်းလူင်လႆႈပဵၼ် ၼၼ်ႉတီႈၶႃႈဢေႃႈ။
၁၃ ၶႅၼ်းတေႃႈဝၢႆႇၼႃႈၸဝ်ႈႁဝ်းပိူင်ႈသေၶႃႈၸဝ်ႈလႄႈ ႁႂ်ႈၶႃႈၸဝ်ႈလႆႈသၢၵ်ႈသႃႇၶႅၼ်းမႃးၸူဝ်ႈဢၼ်ၶႃႈၸဝ်ႈဢမ်ႇပႆႇၶၢႆႉၵႂႃႇလႄႈ ႁၢႆလၢႆၵႂႃႇၼၼ်ႉသေၵမ်းတီႈၶႃႈ။