၇
၁ ထႃႇဝရႃႉၽြႃး ၽြႃးပဵၼ်ၸဝ်ႈတီႈၶႃႈ၊ ၵဝ်ၶႃႈဢိင်သွၼ်ႈပိုင်ႈတီႈၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၶႃႈၸဝ်ႈ တင်းသဵင်ႈတင်းလူင်ၼၼ်ႉလႄႈ ၵႄႇသႄႇၼုၵ်ႈဢဝ်ဢွၵ်ႇသေၵမ်းတီႈ ၶႃႈ။
၂ ပေႃးဢမ်ႇၼၼ်မၼ်းတၵ်းၶူပ်းငၢၼ်ႈၸႂ်ဝိၺိၺ်ႇၶႃႈၸဝ်ႈၶၢတ်ႇ မိူၼ်ၸိူဝ်ႉၼင်ႇသၢင်ႇသီႈၼၼ်ႉလႄႈၸၵ်ႉၶၢတ်ႇပဵၼ်ပွတ်းပဵၼ်တွၼ်ႈပႅတ်ႈ ၼႂ်းမိူဝ်ႈဢၼ်ဢမ်ႇမီးၵေႃႉဢၼ်ၵႄႇသႄႇၼုၵ်ႈဢဝ်ၼၼ်ႉ တီႈၶႃႈဢေႃႈ။
၃ ထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈ၊ ပေႃးၶႃႈၸဝ်ႈႁဵတ်းၸိူဝ်ႉၼင်ႇၼၼ် ပေႃးဢမူႉဢႃႉထမ်ႇမႃႉမီးၵႃႈၼႂ်းမိုဝ်းၶႃႈၸဝ်ႈ ပေႃးၶႃႈၸဝ်ႈတွပ်ႇတႅၼ်းၶိုၼ်းဢၼ်ဢမ်ႇလီ တီႈၵေႃႉဢၼ်ထုၵ်ႇမေႃၵၼ်တင်းၶႃႈၸဝ်ႈၼၼ်ႉလႄႈ လွင်ႈမၼ်းယင်းဢမ်ႇမီးလႄႈ
၄ ၶႃႈၸဝ်ႈ ႁိမ်ဢဝ်ႁူင်ႇဢဝ်ၵေႃႉဢၼ်ႁဵတ်း ရၢၼ်ႇသူႇၶႃႈၸဝ်ႈၼၼ်ႉၸိုင် ႁႂ်ႈရၢၼ်ႇသူႇလိုပ်ႈၸွမ်းလမ်းၸွမ်းၸႂ် ဝိၺိၺ်ႇၶႃႈၸဝ်ႈလႄႈၶိုတ်းသေၵမ်းလူၺ်ႈ။
၅ ႁႂ်ႈမၼ်းယဵပ်ႇယမ်ႈဢသၢၵ်ႈၶႃႈၸဝ်ႈ သႂ်ႇၵႃႈၼိူဝ်လိၼ်သေလႄႈ ႁႂ်ႈမုၼ်ၽုင်းသရေႇၶႃႈၸဝ်ႈတူၵ်းတီႈတႅမ်ႇၵႃႈ တီႈမုၼ်ႈလိၼ်သေၵမ်းလူၺ်ႈ။
၆ ထႃႇဝရႃႉၽြႃးတီႈၶႃႈ၊ႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇသေလႄႈၶႅၼ်းတေႃႈလုၵ်ႉသေၵမ်းတီႈၶႃႈ။ၶႅၼ်းတေႃႈႁႄႉၶႅၼ်တၢင်းဢၼ်ရၢၼ်ႇသူႇၶႃႈၸဝ်ႈတင်းလၢႆ ႁၢဝ်ႈၵျၢမ်းၼႃႇၼၼ်ႉသေၵမ်းတီႈၶႃႈ။ၸဝ်ႈဢၼ်ၸၢင်ႊၸီႇယၢင်ႇတြႃးတီႈၶႃႈဢိူၺ်း၊ ၶႅၼ်းတေႃႈတိုၼ်ႇမႃးပုၼ်ႈၶႃႈၸဝ်ႈသေၵမ်းတီႈၶႃႈ။ၸေႇလႃႇ။
၇ ႁႂ်ႈၵူၼ်းမဵဝ်းတင်းလၢႆဢၼ်ၸူႉၵၼ်တုမ်ၵၼ်ၼၼ်ႉလွမ်ႉႁွပ်ႈၸဝ်ႈႁဝ်းသေလႄႈ ၸဝ်ႈႁဝ်းယူႇၵႃႈတီႈဢၼ်သုင်ၼၼ်ႉသေယဝ်ႉ ဢုပ်ႉပိူင်ႇၵႃႈၼိူဝ်ၶဝ်သေၵမ်းတီႈ ၶႃႈ။ႁႂ်ႈထႃႇဝရႃႉၽြႃးၸီႇယၢင်ႇတြႃးၵႃႈၼိူဝ်ၵူၼ်းမဵဝ်းတင်းလၢႆသေၵမ်းလူၺ်ႈ။
၈ ထႃႇဝရႃႉၽြႃးတီႈၶႃႈ၊ၶႅၼ်းတေႃႈထွၵ်ႈလူၺ်ႈ တၢင်းဢၼ်ၶႃႈၸဝ်ႈသိုဝ်ႈတေႃႇဢိၵ်ႇတင်း တၢင်းဢၼ်ၸေးၸုမ်ႇတီႈၶႃႈၸဝ်ႈၼၼ်ႉသေလႄႈ ၸီႇယၢင်ႇတႅပ်းတတ်းဢမူႉၶႃႈၸဝ်ႈသေၵမ်း တီႈၶႃႈ။
၉ ဢူဝ်း၊ ၽြႃးပဵၼ်ၸဝ်ႈဢၼ်ႁဵတ်းၸွမ်းၼင်ႇတြႃးဢၼ်ၸႅတ်ႈထၢမ်ၸႅတ်ႈတူၺ်း ႁူဝ်ၸႂ်ဢိၵ်ႇတင်းမၢၵ်ႇလမ်းၼၼ်ႉတီႈၶႃႈ၊ ၶႅၼ်းတေႃႈႁႂ်ႈဢမူႉဢႃႉထမ်ႇမႃႉၶဝ်ၸိူဝ်းဢၼ်ဢမ်ႇတြႃးၼၼ်ႉသုမ်းလႄႈ ႁႂ်ႈၶဝ်ၸိူဝ်းဢၼ်တြႃးၼၼ်ႉတႄႇယူႇမၼ်ႈၶိူင်ႇသေၵမ်း တီႈၶႃႈ။
၁၀ ၶိူင်ႈႁႄႉလၢၵ်ႈၼၢၵ်ႈၵဝ်ၸမ်း ပဵၼ်ၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ် ၶဝ်ၸိူဝ်းဢၼ်သၽေႃး သိုဝ်ႈတေႃႇၼၼ်ႉဢေႃႈ။
၁၁ ၽြႃးပဵၼ်ၸဝ်ႈပဵၼ်ၸဝ်ႈဢၼ်ၸီႇယၢင်ႇၸွမ်းၼင်ႇတြႃးလႄႈ ၼႄပျႃးတၢင်းၸႂ်မႆႈၶႂ်ႈၸႃႉ တီႈၶဝ်ၸိူဝ်းဢၼ်ဢမ်ႇတြႃးၼၼ်ႉယူႇ ၵူႈဝၼ်းဢေႃႈ။
၁၂ ပေႃးၵူၼ်းဢမ်ႇၶၢႆႉပုတ်ႈၸိုင် မၼ်းၸဝ်ႈတၵ်းလပ်ႉလၢပ်ႇမၼ်းၸဝ်ႈဢေႃႈ။မၼ်းၸဝ်ႈတၵ်းဝူတ်ႈၵၢင်ႇမၼ်းၸဝ်ႈတၢင်ႇသေလႄႈႁႅၼ်းဝႆႉ ၶိုင်ဝႆႉဢေႃႈ။
၁၃ လၢၵ်ႈၼၢၵ်ႈဢၼ်ၸၢင်ႊႁႂ်ႈတၢႆဢိၵ်ႇတင်းပိုၼ်ဢၼ်ၽႆးလုၵ်ႉမႆႈယူႇၼၼ်ႉၵေႃႈ မၼ်းၸဝ်ႈႁႅၼ်း ဝႆႉၶိုင်ဝႆႉယူႇဢေႃႈ။
၁၄ ၵေႃႉဢၼ်သိူၵ်ႈသမ်ႇၵၼ်တင်းတူႉၸရိူၵ်ႈဢၼ်ႁၢႆႉမိူၵ်ႈၼၼ်ႉပႃးပတိၵ်ႉသၼ်ႇထေႇဢၼ် ဢမ်ႇလီသေလႄႈၵိူတ်ႇလဵင်ႉမူႉသႃႇဢေႃႈ။
၁၅ ၵေႃႉဢၼ်ၶုတ်ႉၶုမ်ၶုတ်ႉလုၵ်းလႄႈႁဵတ်းႁႂ်ႈလိုၵ်ႉၼႃႇၼၼ်ႉ တူဝ်မၼ်းတူၵ်းၵႂႃႇၵႃႈၼႂ်းၶုမ် လုၵ်းဢၼ်မၼ်းၶုတ်ႉၼၼ်ႉ ဢေႃႈ။
၁၆ တၢင်းၵျၢမ်ႇတၢင်းပွင်မၼ်းဢၼ်ဢမ်ႇလီၼၼ်ႉတၵ်းၶိုၼ်းႁွတ်ႈထိုင်ၵႃႈၼိူဝ်ႁူဝ်မၼ်းလႄႈ ဢမူႉမၼ်းဢၼ်ႁၢဝ်ႈၵျၢမ်းၼႃႇၼၼ်ႉ တၵ်းတူၵ်းႁွတ်ႈၵႃႈၼိူဝ် ၸိၵ်းႁူဝ်မၼ်းဢေႃႈ။
၁၇ ၵဝ်တၵ်းယွင်ႈယေႃးထႃႇဝရႃႉၽြႃး ၵႂပ်ႈပိူဝ်ႈမၼ်းၸဝ်ႈႁဵတ်းၸွမ်းၼင်ႇတြႃးလႄႈၵဝ်တၵ်းႁဵတ်းၵႂၢမ်းထေႃးပၼႃႇ တီႈၼႃႇမႃႉၸိုဝ်သဵင်ထႃႇဝရႃႉၽြႃး ဢၼ်သုင်မျၢတ်ႈၼႃႇသေပိူၼ်ႈၼၼ်ႉဢေႃႈ။