၅၀
၁ ၽြႃးပဵၼ်ၸဝ်ႈ ဢၼ်ပဵၼ်ၸဝ်ႈပဵၼ်ၸွမ်ၽြႃးတင်းလၢႆဢၼ်ဝႃႈထႃႇဝရႃႉၽြႃးၼၼ်ႉ ပၼ်ပျႃႇတိၵ်ႈလႄႈႁွင်ႉဢဝ်လိၼ်မိူင်း ၸႃႉၸဵမ်တီႈဢၼ်ၵၢင်ဝၼ်းဢွၵ်ႇတေႃႇထိုင်ႁွတ်ႈ တီႈဢၼ်ၵၢင်ဝၼ်းတူၵ်းၼၼ်ႉဢေႃႈ။
၂ သၢႆဢရွင်ႇၽြႃးပဵၼ်ၸဝ်ႈ ႁိူဝ်ႈလႅင်းဢွၵ်ႇၵႃႈၼိူဝ်လွႆၸိဢုၼ်ႇ တီႈဢၼ်ၸေးၸုမ်ႇဝႆႉတင်း တၢင်းဢၼ် ႁၢင်ႊလီႁၢင်ႊငၢမ်းၼၼ်ႉဢေႃႈ။
၃ ၽြႃးပဵၼ်ၸဝ်ႈႁဝ်းမႃးလႄႈမၼ်းၸဝ်ႈတၵ်းဢမ်ႇယူႇ တဵတ်ႇတဵတ်ႇယဵၼ်ယဵၼ်။ၵႃႈတီႈၽၢႆႇၼႃႈမၼ်းၸဝ်ႈၼၼ်ႉမီးတၢင်းဢၼ်ၽႆးမႆႈယူႇလႄႈၵႃႈတီႈႁိမ်းႁွမ်းမၼ်း ၸဝ်ႈၼၼ်ႉမီးၽူၼ်လူင်လူမ်းလူင်ယူႇဢေႃႈ။
၄ မၼ်းၸဝ်ႈႁွင်ႉဢဝ်ၽႃႉၵၢင်ႁၢဝ်ၵႃႈၼိူဝ် ဢိၵ်ႇတင်းလိၼ်မိူင်းႁႂ်ႈလႆႈၸႅတ်ႈထၢမ်ၸီႇယၢင်ႇ ၵူၼ်းမၼ်းၸဝ်ႈတင်း လၢႆလႄႈဝႃႈ၊-
၅ ႁႂ်ႈၶဝ်ၸိူဝ်းဢၼ်ၵဝ်ႁၵ်ႉပႅင်းဢၼ်ဢဝ်တင်း တၢင်းဢၼ်ပုၵ်ႉၸေႃႇယိၸ်ႉ ႁဵတ်းပတိၺိၺ်ႇလူၺ်ႈၵၼ်တင်းၵဝ်ၼၼ်ႉ ၸူႉၵၼ်တုမ်ၵၼ်ၵႃႈတီႈၵဝ် တႃႉ၊ဝႃႈၼင်ႇၼႆဢေႃႈ။
၆ ၽႃႉၵၢင်ႁၢဝ်ၸိူဝ်းၼၼ်ႉဢွၼ်ၵၼ်ၽုၺ်ႇဢွၵ်ႇၼႄပျႃး လွင်ႈတၢင်းဢၼ်မၼ်းၸဝ်ႈသိုဝ်ႈတေႃႇၼၼ်ႉ ၵွပ်ႈပိူဝ်ႈဢၼ်တူဝ်ၽြႃးပဵၼ်ၸဝ်ႈတႅပ်းတတ်းတြႃးၼၼ်ႉဢေႃႈ။ၸေႇလႃႇ။
၇ ၵူၼ်းတင်းလၢႆၶဝ်ဢိူၺ်း၊ဢွၼ်ၵၼ်ထွမ်ႇတႃႉ။ၵဝ်တၵ်းလၢတ်ႈဢေႃႈ။မဵဝ်းဢိသရေႇလဢိူၺ်း၊ ၵဝ်တၵ်းၶၢမ်ႇသၢၵ်ႈသေႇတီႈမႂ်းဢေႃႈ။ၵဝ်ပဵၼ်ၽြႃးပဵၼ်ၸဝ်ႈ ဢေႃႈ။
၈ ပဵၼ်ၽြႃးပဵၼ်ၸဝ်ႈမႂ်းဢေႃႈ။ၵဝ်ဢမ်ႇတၢင်ႇဢပျႅတ်ႈတီႈမႂ်း ၵွပ်ႈပိူဝ်ႈတၢင်းပုၵ်ႉၸေႃႇယိၸ်ႉမႂ်းၸိူဝ်းၼၼ်ႉ။ယိၸ်ႉဢၼ်တုတ်ႇၽႆးမႂ်းၸိူဝ်းၼၼ်ႉမီးယူႇၵႃႈ တီႈၽၢႆႇၼႃႈၵဝ်သေႇသေႇဢေႃႈ။
၉ ၵဝ်ဢမ်ႇၶၢမ်ႇဢမ်ႇဢဝ်ဝူဝ်းၵႃႈၼႂ်းႁိူၼ်းမႂ်း ဢိၵ်ႇတင်းပေႉၵႃႈၼႂ်းၶွၵ်ႈမႂ်း ၼၼ်ႉ။
၁၀ တူဝ်သတ်းၼႂ်းထိူၼ်ႇၼႂ်းၶိူဝ်းၵႃႈမီးတင်းသဵင်ႈတင်းလူင်ဢိၵ်ႇတင်း တရိၵ်ႈသၢၼ်ႇဢၼ်ပဵၼ်ပၢၵ်ႇပဵၼ်ႁဵင်ၵႃႈၼိူဝ်လွႆၼိူဝ်ၵုင်းၼၼ်ႉ ပဵၼ်ဢုၵ်ႉၸႃႇၵဝ် ဢေႃႈ။
၁၁ ၵဝ်ႁူႉ ၼူၵ်ႉဢၼ်ၸၢင်ႊယူႇၵႃႈၼိူဝ်လွႆတင်းသဵင်ႈတင်းလူင်ၼၼ်ႉယူႇဢေႃႈ။တူဝ်ထိူၼ်ႇၸိူဝ်းၼၼ်ႉ မီးယူႇၵႃႈတီႈၵဝ်ဢေႃႈ။
၁၂ ပေႃးၵဝ်ဢိုပ်းယၢၵ်ႈၸိုင်ၵဝ်ဢမ်ႇလၢတ်ႈတီႈမႂ်း။
၁၃ လွင်ႈမၼ်းၸမ်းလေႃးၵထၢတ်ႈတင်းၵႃႈဢၼ်မီးၼႂ်းမၼ်းၼႆႉ ပဵၼ်ဢုၵ်ႉၸႃႇၵဝ်ဢေႃႈ။
၁၄ ၸွင်ႇၵဝ်တၵ်းၵိၼ်ၼိူဝ်ႉဝူဝ်းႁိုဝ်။ၸွင်ႇၵဝ်တၵ်းသူတ်ႉလိူတ်ႈပေႉႁိုဝ်။ပုၵ်ႉၸေႃႇယိၸ်ႉတၢင်းဢၼ်ယွင်ႈယေႃးၵျေးၸူးၸဝ်ႈၼၼ်ႉတီႈၽြႃးပဵၼ်ၸဝ်ႈတႃႉ။ၸွမ်းၵႃႈၼင်ႇဢၼ်မႂ်းဝႆႉၵတိသႅတ်ႈၸႃႇၼၼ်ႉသေလႄႈ ၽေႇဝၢတ်ႈသႅတ်ႈၸႃႇ တီႈၽြႃးဢၼ်သုင်ၼႃႇသေပိူၼ်ႈ ၼၼ်ႉတႃႉ။
၁၅ ႁွင်ႉသႅၼ်ႇႁွင်ႉႁႃၵဝ်ၼႂ်းမိူဝ်ႈဝၼ်းဢၼ်ၽေးဢၢၼ်ႇတရႄႇႁွတ်ႈထိုင်ၼၼ်ႉတႃႉ။ၵဝ်တၵ်းၵႄႇသႄႇတိုတ်ႉၸၼ်ဢဝ်မႂ်းဢွၵ်ႇလႄႈ မႂ်းတၵ်းလႆႈယွင်ႈယေႃးမုၼ်ၽုင်းၵဝ်ဢေႃႈ၊ ဝႃႈၼင်ႇၼႆဢေႃႈ။
၁၆ တီႈၵူၼ်းဢၼ်ဢမ်ႇတြႃးၼၼ်ႉၵေႃႈ ၽြႃးပဵၼ်ၸဝ်ႈလၢတ်ႈလႄႈဝႃႈ၊-တၢင်းဢၼ်ႁဵတ်းႁႂ်ႈလႆႈမွၵ်ႇလၢတ်ႈထုင်းၽိင်ႈတြႃးၵဝ်တင်းလၢႆလႄႈဢဝ်ပတိၺိၺ်ႇတြႃးၵဝ်ဝႃႈဢွၵ်ႇသူပ်းၼၼ်ႉ ၸၢပ်ႈသႅင်ႇၵၼ်တင်းမႂ်း ၸိူဝ်ႉၼင်ႇႁိုဝ်။
၁၇ မႂ်းၸင်းတၢင်းဢၼ်သင်ႇသွၼ်သုင်းမႃႉၼၼ်ႉလႄႈ ဢဝ်ၵဝ်ပႅတ်ႈဝႆႉၽၢႆႇလင်မႂ်းယဝ်ႉလူင်ပေႇ။
၁၈ ပေႃးမႂ်းႁၼ်ၽူႈလၵ်ႉၸိုင် သၽေႃးမႂ်းၸၢင်ႊမိူၼ်ၵၼ်တင်းမၼ်းၼၼ်ႉလႄႈ ၸၢင်ႊသိူၵ်ႈသမ်ႇၵၼ်တင်းၶဝ် ၸိူဝ်းဢၼ်ၽိတ်းပိူင်ႈမေးပိူၼ်ႈၼၼ်ႉဢေႃႈ။
၁၉ မႂ်းၸၢင်ႊဢဝ်သူပ်းမႂ်းဢၢပ်ႈပၼ်တီႈတူႉၸရိူၵ်ႈလႄႈ ဢဝ်တင်း လိၼ်ႉမႂ်းၸီႇယၢင်ႇမူႉသႃႇဢေႃႈ။
၂၀ မႂ်းၸၢင်ႊၼင်ႈလႄႈလၢတ်ႈၵႂၢမ်းၶတ်းၵၼ်တင်းပီႈၼွင်ႉမႂ်းလႄႈ ၸၢင်ႊသေႉသွမ်းလုၵ်ႈၸၢႆးဢွၵ်ႇမေးမႂ်းဢေႃႈ။မႂ်းႁဵတ်းလွင်ႈတၢင်းၸိူဝ်ႉၼင်ႇၼၼ်လႄႈ ၵဝ်ဢမ်ႇတၵ်းသဵင်တၵ်းပၢၵ်ႇ လႄႈယူႇဢေႃႈ။
၂၁ ပိူဝ်ႈၼႆလႄႈမႂ်းထၢင်ႇၵဝ်မိူၼ်ၵၼ်တင်းမႂ်းယဝ်ႉလူင်ပေႇ။ၵဝ်တၵ်းၽုၺ်ႇဢွၵ်ႇၼႄပျႃးဢပျႅတ်ႈမႂ်းလႄႈ ဢဝ်ၵီႈၽႄဝႆႉသိုဝ်ႈၼႃႈတႂ်ႈတႃမႂ်း ဢေႃႈ။
၂၂ ၵူၼ်းၸိူဝ်းဢၼ်လူင်ႈလိုမ်းၽြႃးပဵၼ်ၸဝ်ႈၶဝ်ဢိူၺ်း၊ ဢွၼ်ၵၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းၼႆႉတႃႉ။ပေႃးဢမ်ႇၼၼ်ၵေႃႉဢၼ်ၵႄႇသႄႇၼုၵ်ႈဢဝ်သူယင်းဢမ်ႇမီးလႄႈ ၵဝ်တၵ်းတိုတ်ႉသူၶၢတ်ႇပဵၼ်ပွတ်း ပဵၼ်တွတ်းပႅတ်ႈဢေႃႈ။
၂၃ ၵေႃႉဢၼ်ပုၵ်ႉၸေႃႇယိၸ်ႉတၢင်းဢၼ်ယွင်ႈယေႃးၵျေးၸူးၸဝ်ႈၼၼ်ႉ ပဵၼ်ၵေႃႉဢၼ်ႁႂ်ႈမုၼ်ၽုင်းၵဝ်ထၢင်ႇသႃးဢေႃႈ။တီႈၵေႃႉဢၼ်ၶႆႈၸႂ်လူၺ်ႈတၢင်းဢၼ်မၼ်းၵႂႃႇယူႇၼၼ်ႉၵေႃႈ ၵဝ်တၵ်းၽုၺ်ႇဢွၵ်ႇၼႄပျႃးၵျေးၸူး တၢင်းဢၼ်ၽြႃးပဵၼ်ၸဝ်ႈၵႄႇသႄႇၶျွတ်ႈဢဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။