၉၀
၁ ၸဝ်ႈၽြႃးတီႈၶႃႈ၊ ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈႁဝ်းၶဝ်သွၼ်ႈပိုင်ႈယူႇ ၵူႈၸူဝ်ႈၵူႈပၢၼ်တႃႇသေႇဢမ်ႇထၢတ်ႇတီႈၶႃႈဢေႃႈ။
၂ ၸူဝ်ႈဢၼ်လွႆတင်းလၢႆဢမ်ႇပႆႇပေႃႇပႆႇဢွၵ်ႇလႄႈ ၸဝ်ႈႁဝ်းဢမ်ႇပႆႇႁဵတ်းပဵၼ်လိၼ်မိူင်းတင်းလေႃးၵထၢတ်ႈၼၼ်ႉ ၸဵမ်မိူဝ်ႈၵမ်ႇၽႃႇဢွၼ်ႈၼႆႉသိုပ်ႇသိုပ်ႇတၢမ်ႈတၢမ်ႈၼၼ်ႉလႄႈ ၸဝ်ႈႁဝ်းပဵၼ် ၽြႃးပဵၼ်ၸဝ်ႈတီႈၶႃႈဢေႃႈ။
၃ ၸဝ်ႈႁဝ်းႁႂ်ႈမဵဝ်းၵူၼ်းဝၢႆႇၶိုၼ်းၸူး တၢင်းဢၼ်ယၢႆႈဢၼ်လႅဝ်တီႈၶႃႈဢေႃႈ။ၸဝ်ႈႁဝ်းမီးဢမိင်ႉလႄႈဝႃႈ၊- လုၵ်ႈၵူၼ်းၶဝ်ဢိူၺ်း၊သမ်ႉဝၢႆႇၶိုၼ်းသေတႃႉ၊ ဝႃႈၼင်ႇၼႆတီႈၶႃႈဢေႃႈ။
၄ ၵႃႈတီႈၽၢႆႇၼႃႈၸဝ်ႈႁဝ်းၼၼ်ႉ ပီႊႁဵင်ၼိုင်ႈၸမ်းပဵၼ်ၸိူဝ်ႉၼင်ႇမိူဝ်ႈဝႃးဢၼ်ပူၼ်ႉမႃးယဝ်ႉၼၼ်ႉ ဢိၵ်ႇတင်းၸိူဝ်ႉၼင်ႇ ၶိင်ႇဢၼ်ပႂ်ႉမိူဝ်ႈၵၢင်ၶိုၼ်းၶိင်ႇၼိုင်ႈၼၼ်ႉ ၵူၺ်းတီႈၶႃႈဢေႃႈ။
၅ ၸဝ်ႈႁဝ်းပတ်ႉထူဝ်းပႃးဢဝ်ၶဝ်ၵႂႃႇမိူၼ်ၸိူဝ်ႉၼင်ႇၼမ်ႉၼွင်းၼၼ်ႉတီႈၶႃႈဢေႃႈ။ၶဝ်ပဵၼ်ၸိူဝ်ႉၼင်ႇဢၼ်ၼွၼ်းလပ်းတီႈၶႃႈဢေႃႈ။ၶိင်ႇၵၢင်ၼႂ် ၶဝ်ပဵၼ်ၸိူဝ်ႉၼင်ႇ တူၼ်ႈယိူဝ်ႈတူၼ်ႈယႃႈ ဢၼ်ယႂ်ႇမႃးယူႇၼၼ်ႉတီႈၶႃႈဢေႃႈ။
၆ ၶိင်ႇၵၢင်ၼႂ်ၸိုင်ၼုမ်ႇလီတင်ႈလီလႄႈယႂ်ႇမႃးယူႇတီႈၶႃႈဢေႃႈ။ၶိင်ႇၵၢင်ၶမ်ႈၸမ်း လႆႈၶၢမ်ႇတၢင်းဢၼ်ပၢတ်ႇထိူဝ်လႄႈ ႁဵဝ်ႇၸွပ်ႈၵႂႃႇတီႈၶႃႈဢေႃႈ။
၇ ၶႃႈၸဝ်ႈႁဝ်းၶဝ်ႁွတ်ႈတၢင်းလူႉတၢင်းလႅဝ်ၵွပ်ႈပိူဝ်ႈတၢင်းၸႂ်မႆႈၸဝ်ႈႁဝ်းလႄႈ ၶႃႈၸဝ်ႈႁဝ်းၶဝ် မီးတၢင်းဢၼ်မႆႈၸႂ်သၼ်ႇဝႆၵွပ်ႈပိူဝ်ႈတေႃးသႃႉတၢင်းၶႂ်ႈၸႃႉၸဝ်ႈႁဝ်း တီႈၶႃႈ ဢေႃႈ။
၈ ၸဝ်ႈႁဝ်းဢဝ်တူႉၸရိူၵ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉၽုၺ်ႇၵီႈဝႆႉၵႃႈတီႈၽၢႆႇၼႃႈၸဝ်ႈႁဝ်းလႄႈ ဢပျႅတ်ႈၶႃႈၸဝ်ႈႁဝ်းၶဝ် ဢၼ်သိူင်ႇမႅပ်းဝႆႉၸိူဝ်းၼၼ်ႉၽုၺ်ႇၵီႈဝႆႉၵႃႈၼႂ်း ဢၼ်လႅင်းၼႃႈၸဝ်ႈႁဝ်းတီႈၶႃႈ ဢေႃႈ။
၉ မိူဝ်ႈဝၼ်းၶႃႈၸဝ်ႈႁဝ်းၶဝ်တင်းသဵင်ႈတင်းလူင်၊ၸၢင်ႊၶၢႆႉၵႂႃႇလႄႈ ၵွပ်ႈပိူဝ်ႈတၢင်းၸႂ်မႆႈၶႂ်ႈၸႃႉၸဝ်ႈႁဝ်းလႄႈ ၶူပ်ႇၼီႈပီႊမိူင်းၶႃႈၸဝ်ႈႁဝ်းၶဝ်ပူၼ်ႉၵႂႃႇၸိူဝ်ႉၼင်ႇတၢင်းဢၼ်ၸႂ်ထၢင်ႇၸႂ်ထိူမ်ၼၼ်ႉ တီႈၶႃႈဢေႃႈ။
၁၀ ဢသၢၵ်ႈဢရွႆႇၶႃႈၸဝ်ႈႁဝ်းၶဝ် ယၢဝ်းၸဵတ်းသိပ်းပီႊၶႃႈဢေႃႈ။ပေႃးႁႅင်းယႂ်ႇၸိုင်ပဵၼ်ပႅတ်ႇသိပ်းပီႊၵေႃႈပဵၼ်တၢင်းဢၼ်ယၢပ်ႇၽိုတ်ႇၼႃႇ ဢိၵ်ႇတင်းတၢင်းဢၼ်ဢမ်ႇပွင်ႇၵႃႈသင်တီႈၶႃႈဢေႃႈ။ဢသၢၵ်ႈၼၼ်ႉၸဵဝ်းပူၼ်ႉၵႂႃႇၶၼ်ၶၼ်ၽႂ်းၽႂ်းလႄႈ ၶႃႈၸဝ်ႈႁဝ်းၶဝ် လၢႆႈၸူဝ်ႈလၢႆႈၸၢတ်ႈၵႂႃႇတီႈၶႃႈဢေႃႈ။
၁၁ ၽူႈ လႂ်ႁူႉဢရူင်ႇတၢင်းၸႂ်မႆႈၸဝ်ႈႁဝ်း ဢိၵ်ႇတင်းတေႃးသႃႉတၢင်းၶႂ်ႈၸႃႉၸဝ်ႈႁဝ်းၼၼ်ႉ ၸွမ်းၵႃႈၼင်ႇဢၼ်ထုၵ်ႇလီ ရူဝ်ႇသေႇၵူဝ်ယမ်ၸဝ်ႈႁဝ်းၼၼ်ႉတီႈၶႃႈ။
၁၂ ၶႅၼ်းတေႃႈသင်ႇသွၼ်ပၼ်ၶႃႈၸဝ်ႈႁဝ်းၶဝ် လူၺ်ႈမိူဝ်ႉဝၼ်းၶႃႈၸဝ်ႈႁဝ်းၶဝ်ၼၼ်ႉလႄႈ ႁႂ်ႈၶႃႈၸဝ်ႈႁဝ်းၶဝ်လႆႈႁူဝ်ၸႂ်ဢၼ်မီးပိင်ႇၺႃႇၼၼ်ႉသေၵမ်းတီႈၶႃႈ။
၁၃ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၶိုၼ်းမႃးသေၵမ်းတီႈၶႃႈ။တၵ်းယူႇႁိုင်ၼႃႇၵႃႈႁိုဝ်တီႈၶႃႈ။ၶႅၼ်းတေႃႈမီးၵရူႉၼႃႇ ၵႃႈၼိူဝ်ၶႃႈၸဝ်ႈႁဝ်းၶဝ်တင်းလၢႆသေၵမ်း တီႈၶႃႈ။
၁၄ ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်လႆႈၼိမ်ၸႂ်ယူႇၼႂ်းၵရူႉၼႃႇၸဝ်ႈႁဝ်း ၶိင်ႇၵၢင်ၼႂ်ၸဝ်ႉၸဝ်ႉ သေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင် ၶႃႈၸဝ်ႈႁဝ်းၶဝ်တၵ်းဢဝ်တင်းတၢင်းဢၼ် ႁဵတ်းၵႂၢမ်းဢၼ်သႂၢင်ႇ ဢၼ်သိူဝ်းၼၼ်ႉလႄႈၸူမ်းသိူဝ်းတီႈၶႃႈဢေႃႈ။
၁၅ ၶႅၼ်းတေႃႈဢိတ်းလူပၼ်ဢၶႂၢင်ႉ တၢင်းဢၼ်လႆႈၸူမ်းလႆႈသိူဝ်းၸွမ်း ၵႃႈၼင်ႇမိူဝ်ႈဝၼ်းဢၼ်ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်လႆႈၸဵပ်းသႅပ်ႇ ဢိၵ်ႇတင်းၶူပ်ႇၼီႈပီႊမိူင်းဢၼ်ၶႃႈၸဝ်ႈႁဝ်းၶဝ် လႆႈၶၢမ်ႇတုၵ်ႉၶႃႉမႃးယဝ်ႉၼၼ်ႉ သေၵမ်းတီႈၶႃႈ။
၁၆ ႁႂ်ႈဢမူႉၸဝ်ႈႁဝ်းထၢင်ႇသႃးတီႈၶႃႈၸဝ်ႈႁဝ်းၶဝ်တင်းလၢႆလႄႈႁႂ်ႈမုၼ်ၽုင်းၸဝ်ႈႁဝ်းထၢင်ႇသႃးၵႃႈတီႈလုၵ်ႈၶဝ်လၢင်းၶဝ် သေၵမ်းလူၺ်ႈတီႈၶႃႈ။ႁႂ်ႈသရေႇထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢၼ်ႁၢင်ႊလီႁၢင်ႊငၢမ်းၼၼ်ႉ ႁွတ်ႈထိုင်ၵႃႈၼိူဝ်ၶႃႈ ၸဝ်ႈႁဝ်းၶဝ် သေၵမ်းလူၺ်ႈတီႈၶႃႈ။
၁၇ ၶႅၼ်းတေႃႈႁႂ်ႈလွင်ႈတၢင်းဢၼ် မိုဝ်းၶႃႈၸဝ်ႈႁဝ်းၶဝ် ႁဵတ်းၼၼ်ႉမၼ်ႈၶိူင်ႇပုၼ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ၸႂ်ႈတီႈၶႃႈယဝ်ႉ။လွင်ႈတၢင်းဢၼ်မိုဝ်းၶႃႈၸဝ်ႈႁဝ်းၶဝ်ႁဵတ်းၼၼ်ႉၶႅၼ်းတေႃႈႁႂ်ႈမၼ်ႈၶိူင်ႇယူႇသေၵမ်းတီႈၶႃႈ။