၇၈
၁ ၵူၼ်းၵဝ်တင်းလၢႆၶဝ်ဢိူၺ်း၊ ဢွၼ်ၵၼ်ဢဝ်ႁူသူထွမ်ႇငိၼ်းတြႃးၵဝ်တႃႉ။ဢွၼ်ၵၼ်ဝၢႆႇႁူသူၸူးတီႈၵႂၢမ်းဢၼ်သူပ်းမွၵ်ႇလၢတ်ႈၼႆႉတႃႉ။
၂ ၵဝ်တၵ်းပိုတ်ႇပၢၵ်ႇလႄႈမွၵ်ႇလၢတ်ႈၵႂၢမ်းဢူႉပမႃႇဢေႃႈ။ၵဝ်တၵ်းၽုၺ်ႇၼႄလွင်ႈဢၼ်လိုၵ်ႉဢၼ်လမ်ႇၸႃႉ ၸဵမ်မိူဝ်ႈၵွၼ်ႇဢွၼ်ၼႆႉ ၼၼ်ႉဢေႃႈ။
၃ လွင်ႈတၢင်းဢၼ်ႁဝ်းလႆႈႁူႉလႆႈငိၼ်းပူႇပေႃႈႁဝ်းလၢတ်ႈၼႄၶႆႊဝႆႉၸိူဝ်းၼၼ်ႉ ႁဝ်းယင်းဢမ်ႇဢဝ်သိူင်ႇဢဝ်မႅပ်းဝႆႉသေ ၵႃႈတီႈလုၵ်ႈၶဝ်လၢၼ်ၶဝ် လႄႈ
၄ ႁဝ်းတၵ်းဢဝ်တၢင်းဢၼ်ယွင်ႈယေႃးထႃႇဝရႃႉၽြႃးဢိၵ်ႇတင်းႁႅင်းတၼ်းၶူဝ်းမၼ်းၸဝ်ႈ၊ တင်းလွင်ႈတၢင်းဢၼ်လီဢၼ်မၼ်းၸဝ်ႈႁဵတ်းၸိူဝ်းၼၼ်ႉ မွၵ်ႇလၢတ်ႈတီႈ ၸိူဝ်ႉၶိူဝ်းဢၼ်တၵ်းမႃးၸိူဝ်းၼၼ်ႉဢေႃႈ။
၅ လွင်ႈမၼ်းၸမ်းမၼ်းၸဝ်ႈၸီႇယၢင်ႇလွင်ႈတၢင်းဢၼ်ၶၢမ်ႇသၢၵ်ႈသေႇၵႃႈၼႂ်း မဵဝ်းယႃႇၵုပ်ႉ လႄႈဝႆႉပိင်းၺၢပ်ႈတြႃးၵႃႈၼႂ်းမဵဝ်းဢိသရေႇလဢေႃႈ။တြႃးၼၼ်ႉၸိုင် မၼ်းၸဝ်ႈမီးဢမိင်ႉဝႆႉတီႈပူႇပေႃႈႁဝ်းႁႂ်ႈၶဝ်ႁဵတ်းႁႂ်ႈ လုၵ်ႈၶဝ်လၢင်းၶဝ်လႆႈႁူႉလႆႈလႅင်းဢိၵ်ႇတင်း ႁႂ်ႈမဵဝ်းဢၼ်တၵ်းပဵၼ်မႃးဢၼ်ဝႃႈ
၆ လုၵ်ႈလၢင်းဢၼ်တၵ်းၵိူတ်ႇလဵင်ႉမႃးၵမ်းလိုၼ်းလႄႈ တၵ်းလၢတ်ႈၼႄပၼ် တီႈလၢၼ်လဵၼ်ၶဝ်ၸိူဝ်းၼၼ်ႉ ႁႂ်ႈလႆႈႁူႉလႆႈလႅင်းႁႂ်ႈၶဝ်လႆႈယုမ်ႇမၢတ်ႈသွၼ်ႈပိုင်ႈၽြႃးပဵၼ်ၸဝ်ႈလႄႈ
၇ ဢမ်ႇလႆႈလူင်ႈလႆႈလိုမ်း လွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၸိူဝ်းၼၼ်ႉသေယဝ်ႉ၊ ၵမ်ၸွမ်းၵျၢင်ႉၸွမ်းပိင်းၺၢပ်ႈ မၼ်းၸဝ်ႈၸိူဝ်းၼၼ်ႉလႄႈ
၈ ဢမ်ႇႁႂ်ႈလႆႈပဵၼ်မဵဝ်းဢၼ်ၸၢင်ႊတွပ်ႇၸၢင်ႊထဵင်လႄႈ လုၵ်ႉၽိုၼ်ႉမဵဝ်းဢၼ်သၽေႃးဢမ်ႇသိုဝ်ႈဢမ်ႇယူဝ်းလႄႈ ၸႂ်ဝိၺိၺ်ႇဢမ်ႇမီးသႅတ်ႈၸႃႇတီႈၽြႃးပဵၼ်ၸဝ်ႈ၊ မိူၼ်ၸိူဝ်ႉၼင်ႇပူႇမွၼ်ႇ ၶဝ်ၼၼ်ႉဢေႃႈ။
၉ ၵူၼ်းမဵဝ်းဢေႇၽရိမ်ႇၸိူဝ်းၼၼ်ႉပႃးလၢၵ်ႈၼၢၵ်ႈလႄႈယိပ်းၵမ်ၵၢင်ႇယူႇသေလႄႈ ဝၢႆႇၶိုၼ်းတၢင်းလင် ၼႂ်းမိူဝ်ႈဝၼ်းဢၼ်တိုၵ်းသိုၵ်းၼၼ်ႉလူင် ပေႇ။
၁၀ ၶဝ်ဢမ်ႇပႂ်ႉသႅတ်ႈၸႃႇၽြႃးပဵၼ်ၸဝ်ႈ။ၶဝ်ဢမ်ႇမီး ဢလူဝ်ႇၶႂ်ႈၸွမ်းၼႂ်းသဵၼ်ႈတၢင်းတြႃးမၼ်းၸဝ်ႈ။
၁၁ ၶဝ်လူင်လိုမ်းပႅတ်ႈလွင်ႈတၢင်းဢၼ် မၼ်းၸဝ်ႈႁဵတ်းၸိူဝ်းၼၼ်ႉဢိၵ်ႇတင်း လွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈၼႄပျႃးတီႈၶဝ်ၸိူဝ်းၼၼ်ႉပႅတ်ႈဢေႃႈ။
၁၂ မၼ်းၸဝ်ႈ ႁဵတ်းလွင်ႈတၢင်းဢၼ်လီဢၢမ်းတင်းလၢႆသိုဝ်ႈၼႃႈတႂ်ႈတႃပူႇၶဝ်ပေႃႈၶဝ် ၵႃႈၼႂ်းမိူင်းဢေႇၵႅပ်ႉတု ဢိၵ်ႇတင်းတီႈ ၸေႃႇၼႃႉ ၼၼ်ႉယဝ်ႉဢေႃႈ။
၁၃ မၼ်းၸဝ်ႈၽႃႇပၢင်ႇလၢႆႇၶၢတ်ႇသေလႄႈ ႁႂ်ႈၶဝ်ပႆၵႂႃႇလတ်းၵႂႃႇလႄႈ မၼ်းၸဝ်ႈ ဢဝ်ၼမ်ႉၶွၼ်ႈၵၼ်ၵွင်ႊၵၼ်ဝႆႉ ဢေႃႈ။
၁၄ မၼ်းၸဝ်ႈဢဝ်မွၵ်ႇၵုမ်ႈၼႄပၼ်သဵၼ်ႈတၢင်းတီႈၶဝ်မိူဝ်ႈၶိင်ႇၵၢင်ဝၼ်းလႄႈ ဢဝ်ဢၼ်လႅင်းၽႆးၼႄ ပၼ်သဵၼ်ႈတၢင်းတီႈၶဝ်မိူဝ်ႈၶိင်ႇၵၢင်ၶိုၼ်းဢေႃႈ။
၁၅ မၼ်းၸဝ်ႈ ၽႃႇမၢၵ်ႇႁိၼ်မၢၵ်ႇၽႃၶၢတ်ႇ ၵႃႈၼႂ်းထိူၼ်ႇလႄႈဢဝ်ၼမ်ႉၼမ်ၼႃႇ မိူၼ်ၸိူဝ်ႉၼင်ႇၼမ်ႉတီႈဢၼ် လိုၵ်ႉဢၼ်လမ်ႇၼၼ်ႉ ပၼ်ၶဝ်ၵိၼ်ဢေႃႈ။
၁၆ မၼ်းၸဝ်ႈႁႂ်ႈၼမ်ႉဢၼ်လႆယူႇၼၼ်ႉ ဢွၵ်ႇသေၵႃႈၼႂ်းမၢၵ်ႇႁိၼ်မၢၵ်ႇၽႃမႃးလႄႈ ႁႂ်ႈၼမ်ႉၼမ်ၼႃႇလႆယူႇမိူၼ်ၸိူဝ်ႉ ၼင်ႇၼမ်ႉႁွင်ႊၼမ်ႉၵႄးၼၼ်ႉဢေႃႈ။
၁၇ ၼႂ်းဝႃႈၼၼ်သေၵေႃႈ ၶဝ်ၸိူဝ်းၼၼ်ႉယဵင်ႈၶႅၼ်းၽိတ်းပိူင်ႈလႄႈ လုၵ်ႉၽိုၼ်ႉ ၽြႃးဢၼ်သုင်ၼႃႇသေပိူၼ်ႈၼၼ်ႉ ၵႃႈၼႂ်း ထိူၼ်ႇဢေႃႈ။
၁၈ ၶဝ်ၸွမ်းလူၺ်ႈဢလူဝ်ႇတူဝ်ၸဝ်ႈၵဝ်ႇသေလႄႈ ယွၼ်းဢဝ်တၢင်းၵိၼ်လႄႈ ၸၢမ်းတူၺ်း ၽြႃးပဵၼ်ၸဝ်ႈၵႃႈၼႂ်းႁူဝ်ၸႂ်ၶဝ်ဢေႃႈ။
၁၉ ၶဝ်လၢတ်ႈၶတ်းၵၼ်တင်းၽြႃးပဵၼ်ၸဝ်ႈလႄႈဝႃႈ၊- ၽြႃးပဵၼ်ၸဝ်ႈတၵ်းမႄးႁႅၼ်းၽိူၼ်တီႈၵိၼ် ၵႃႈၼႂ်းထိူၼ်ႇၼႆႉ လႆႈႁိုဝ်။
၂၀ တူၺ်းလူႊ။မၼ်းၸဝ်ႈပေႃႉယႅၼ်ႉမၢၵ်ႇႁိၼ်မၢၵ်ႇၽႃထၼ်ႈပေႃးႁႂ်ႈၼမ်ႉဢွၵ်ႇမႃးလႄႈ ပဵၼ်ႁွင်ႊပဵၼ်ၵႄးလႆယူႇဢေႃႈ။ၶဝ်ႈမုၼ်းၵေႃႈမၼ်းၸဝ်ႈတၵ်းပၼ်လႆႈႁိုဝ်။ၼိူဝ်ႉၵေႃႈမၼ်းၸဝ်ႈတၵ်းမႄးႁႅၼ်းဝႆႉပုၼ်ႈၵူၼ်းမၼ်းၸဝ်ႈတင်းလၢႆလႆႈႁိုဝ်၊ ဝႃႈၼင်ႇၼႆဢေႃႈ။
၂၁ ထႃႇဝရႃႉၽြႃးပဵၼ်ၸဝ်ႈ ငိၼ်းၵႂၢမ်းၼၼ်ႉလႄႈၸႂ်မႆႈၶႆႈၸႃႉဢေႃႈ။ၽႆးမႆႈတီႈမဵဝ်းယႃႇၵုပ်ႉလႄႈ တေႃးသႃႉႁုပ်ႈ ၶိုၼ်ႈတီႈမဵဝ်း ဢိသရေႇလ ဢေႃႈ။
၂၂ လွင်ႈမၼ်းၸမ်းၶဝ်ဢမ်ႇယုမ်ႇမၢတ်ႈၽြႃးပဵၼ်ၸဝ်ႈလႄႈ ဢမ်ႇဢိင်ပိုင်ႈ ၵျေးၸူးတၢင်းဢၼ်မၼ်းၸဝ်ႈၵႄႇသႄႇၶျွတ်ႈ ဢဝ်ၼၼ်ႉ။
၂၃ မၼ်းၸဝ်ႈသင်ႇလၢတ်ႈတီႈၽႃႉၽူၼ်ၵႃႈ ၼိူဝ်လႄႈၽုၺ်ႇၽၵ်းတူၵၢင်ႁၢဝ်ဢေႃႈ။
၂၄ မၼ်းၸဝ်ႈႁႂ်ႈၽူၼ်ၶဝ်ႈမုၼ်းမၼ်ႇၼႃႉတူၵ်းလူင်း ပုၼ်ႈဢၼ်ၶဝ်တၵ်းၵိၼ်ၼၼ်ႉလႄႈ ဢဝ်ၶဝ်ႈသၢၼ်ၶဝ်ႈပိူၵ်ႇၵၢင်ႁၢဝ် ပၼ်တီႈၶဝ်ဢေႃႈ။
၂၅ ၶဝ်တင်းသဵင်ႈတင်းလူင်ဢွၼ်ၵၼ်ၵိၼ်ၶဝ်ႈမုၼ်း ဢၼ်ယႂ်ႇမျၢတ်ႈၼႃႇၼၼ်ႉလႄႈ မၼ်းၸဝ်ႈပၼ်တၢင်းၵိၼ်မႃးတီႈၶဝ် ႁႂ်ႈၶဝ်လႆႈၵိၼ်ဢိမ်ႇ ၵိၼ်တဵမ်ဢေႃႈ။
၂၆ မၼ်းၸဝ်ႈဢဝ်ႁႅင်းတၼ်းၶူဝ်းမၼ်းၸဝ်ႈသေလႄႈ ႁႂ်ႈလူမ်းတၢင်းဢွၵ်ႇထူဝ်းမႃးၵႃႈၼိူဝ်ၵၢင်ႁၢဝ်လႄႈႁႂ်ႈလူမ်းတၢင်းၸၢၼ်းပဝ်ႇမႃးဢေႃႈ။
၂၇ မၼ်းၸဝ်ႈ ႁႂ်ႈၽူၼ်ဢၼ်ပဵၼ်ၼိူဝ်ႉၼမ်ၼႃႇထၢၼ်ႇမုၼ်ႈလိၼ်ဢိၵ်ႇတင်းၽူၼ်ဢၼ်ပဵၼ်ၼူၵ်ႉဢၼ်ၸၢင်ႊမိၼ်ၼမ်ၼႃႇ ထၢၼ်ႇသၢႆးၼမ်ႉသမ်ႇမုၵ်ႉတြႃႇၼၼ်ႉတူၵ်းလူင်းသေၵႃႈၼိူဝ်ၵၢင်ႁၢဝ်မႃးဢေႃႈ။
၂၈ မၼ်းၸဝ်ႈ ႁႂ်ႈတူၵ်းၵႃႈၼႂ်းတီႈဢၼ်ၶဝ်ၶျႃးတပ်ႉၵႃႈ ႁိမ်းတီႈယူႇၶဝ်ၼၼ်ႉဢေႃႈ။
၂၉ ၼင်ႇၼၼ်လႄႈၶဝ်လႆႈၵိၼ်ဢိမ်ႇၵိၼ်တဵမ်ၼႃႇလူင်လၢင်လႄႈ မၼ်းၸဝ်ႈပၼ်ၸွမ်း ၵႃႈၼင်ႇဢၼ်ဢလူဝ်ႇၶဝ်မီးၼၼ်ႉဢေႃႈ။
၃၀ ၶဝ်ဢမ်ႇၵၢင်းဢမ်ႇလွတ်ႈတင်းဢလူဝ်ႇၶဝ်ၼၼ်ႉ။ၼႂ်းမိူဝ်ဢၼ် တၢင်းၵိၼ်ၶဝ်ယင်းတိုၵ်ႉမီးယူႇၼႂ်းသူပ်းၶဝ် ယူႇၼၼ်ႉ
၃၁ တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈႁုပ်ႇၶိုၼ်ႈသႂ်ႇတီႈၶဝ်လႄႈဢဝ်ၶဝ်ၸိူဝ်းဢၼ်ပီးလီမၼ်းလီၼၼ်ႉတၢႆလႄႈ ႁႂ်ႈၵူၼ်းၼုမ်ႇၵူၼ်းၵမ် ဢိသရေႇလ တင်းလၢႆလူမ်ႉပႅတ်ႈဢေႃႈ။
၃၂ ပဵၵ်ႉသမ်ႉၶဝ်လႆႈထူပ်းလႆႈႁၼ်လွင်ႈတၢင်းၵႃႈမီးၼၼ်ႉသေၵေႃႈ ၶဝ်ၽိတ်းပိူင်ႈထႅင်ႈယူႇတိၵ်းတိၵ်းလႄႈ ယင်းဢမ်ႇယုမ်ႇမၢတ်ႈလွင်ႈတၢင်းဢၼ်လီဢၢမ်းမၼ်းၸဝ်ႈၸိူဝ်းၼၼ်ႉလႄႈ ယူႇ ဢေႃႈ။
၃၃ ပိူဝ်ႈၼႆလႄႈမၼ်းၸဝ်ႈႁႂ်ႈမိူဝ်ႈဝၼ်းၶဝ်ၸိူဝ်းၼၼ်ႉပူၼ်ႉၵႂႃႇယူႇလၢႆလၢႆလွၵ်ႇလွၵ်ႇလႄႈ ဢဝ်ၶူပ်ႇၼီႈပီႊမိူင်းၶဝ်ၸိူဝ်းၼၼ်ႉ သဵင်ႈၵႂႃႇယူႇၵႃႈၼႂ်းၽေးဢူး ပၢတ်ႈၼၼ်ႉဢေႃႈ။
၃၄ မိူဝ်ႈဢၼ်မၼ်းၸဝ်ႈဢဝ်ၶဝ်တၢႆၼၼ်ႉၸိုင်ၶဝ်ဢွၼ်ၵၼ်ႁႃဢဝ်မၼ်းၸဝ်ႈဢေႃႈ။ၶဝ်ဢွၼ်ၵၼ်ၶိုၼ်းမႃးလႄႈ ၸွမ်းႁႃၽြႃးပဵၼ်ၸဝ်ႈ ဢေႃႈ။
၃၅ ၶဝ်လႆႈသတိလွင်ႈဢၼ်ဝႃႈၽြႃးပဵၼ်ၸဝ်ႈပဵၼ်မၢၵ်ႇႁိၼ်မၢၵ်ႇၽႃၶဝ် ၽြႃးဢၼ်သုင်ၼႃႇသေပိူၼ်ႈပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၶဝ် ၼၼ်ႉဢေႃႈ။
၃၆ ၼႂ်းဝႃႈၼၼ်သေၵေႃႈ ၶဝ်ဢွၼ်ၵၼ်ဢဝ်သူပ်းၶဝ်ၶျေႃးဝွၼ်းမၼ်းၸဝ်ႈလႄႈ ဢဝ်လိၼ်ႉၶဝ်လၢတ်ႈၵႂၢမ်းမူႉသႃႇ ဢေႃႈ။
၃၇ ၸႂ်သၽေႃးၶဝ်ၸမ်းဢမ်ႇသိုဝ်ႈဢမ်ႇယူဝ်းတီႈမၼ်းၸဝ်ႈ။ၶဝ်ယင်းဢမ်ႇပႂ်ႉသႅတ်ႈၸႃႇမၼ်းၸဝ်ႈ လႄႈယူႇဢေႃႈ။
၃၈ မၼ်းၸဝ်ႈၸမ်းမီးၸႂ်ၵရူႉၼႃႇလႄႈယင်းဢမ်ႇယႃႉၶဝ်ပႅတ်ႈလႄႈ ႁူမ်ႇဢပျႅတ်ႈၶဝ်ဝႆႉဢေႃႈ။မၼ်းၸဝ်ႈယိူၼ်ႉၸႂ်မၼ်းၸဝ်ႈ၊ ဢမ်ႇႁူႉလၢႆၽဝ်ႇလၢႆပွၵ်ႈၼမ်ၼႃႇလႄႈ ဢမ်ႇတိုၵ်းယူင်းတၢင်းၸႂ်မႆႈၶႆႈၸႃႉ မၼ်းၸဝ်ႈႁႂ်ႈလုၵ်ႉၶိုၼ်ႈ။
၃၉ မၼ်းၸဝ်ႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ဝႃႈ၊ ၶဝ်ပဵၼ်ၼိူဝ်ႉပဵၼ်လိူတ်ႈၵူၺ်း၊ဢိၵ်ႇတင်းလွင်ႈဢၼ်ဝႃႈ၊ ၶဝ်ပဵၼ်လူမ်းဢၼ်ၸၢင်ႊပူၼ်ႉၵႂႃႇၼၼ်ႉလႄႈ ၵမ်းလိုၼ်းဢမ်ႇၶိုၼ်းမႃးၼၼ်ႉ ဢေႃႈ။
၄၀ ၶဝ်ႁဵတ်းတၢင်းဢၼ်ပုင်ႇၵၢၼ်ႇမၼ်းၸဝ်ႈၵႃႈၼႂ်းထိူၼ်ႇလႄႈႁႂ်ႈမၼ်းၸဝ်ႈၸဵပ်းၸႂ်ၵႃႈၼႂ်းတီႈဢၼ်ၵူၼ်းသိတ်ႇၵူၼ်းယဵၼ်ၼၼ်ႉ ဢမ်ႇႁူႉလၢႆၽဝ်ႇ လၢႆပွၵ်ႈၼမ်ၼႃႇလူင်ပေႇ။
၄၁ ၶဝ်သမ်ႉၶိုၼ်းၸၢမ်းတူၺ်းၽြႃးပဵၼ်ၸဝ်ႈလႄႈႁဵတ်းတၢင်း ဢၼ်ဢမ်ႇၼပ်ႉဢမ်ႇၶၢၼ်းတီႈၽြႃးပဵၼ်ၸဝ်ႈ ဢၼ်မူတ်းၸၢင်ႇ မဵဝ်းဢိသ ရေႇလ ၼၼ်ႉလူင်ပေႇ။
၄၂ ၶဝ်ဢမ်ႇၶုၵ်းၸႂ်လႆႈၶႆႈၸႂ်ထူပ်းၶႅၼ်မိုဝ်းမၼ်းၸဝ်ႈ ဢိၵ်ႇတင်းမိူဝ်ႈဝၼ်းဢၼ်မၼ်းၸဝ်ႈၵႄႇသႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်း ရၢၼ်ႇသူႇၼၼ်ႉ။
၄၃ မၼ်းၸဝ်ႈႁဵတ်းလၵ်ႈၶၼႃႇသၢၵ်ႈသေႇမၼ်းၸဝ်ႈတင်းလၢႆၵႃႈၼႂ်းမိူင်းဢေႇၵႅပ်ႉတု ဢိၵ်ႇတင်း လွင်ႈတၢင်းဢၼ်လီဢၢမ်းတင်းလၢႆ ၵႃႈၼႂ်း ပၢင်ႇပဵင်းၸေႃႇၼၼၼ်ႉဢေႃႈ။
၄၄ မၼ်းၸဝ်ႈႁႂ်ႈၼမ်ႉႁွင်ႊၼမ်ႉၵႄးၶဝ်တင်းလၢႆပဵၼ်လိူတ်ႈၵႂႃႇ ႁႂ်ႈၶဝ်ဢမ်ႇၵိၼ် လႆႈဢေႃႈ။
၄၅ မၼ်းၸဝ်ႈပွႆႇၸႂ်ႉလိူၵ်ႇဢၼ်ၸၢင်ႊၶူပ်းၵိၼ်ၶဝ်ၼၼ်ႉဢိၵ်ႇတင်း ၶဵတ်ႇ ဢၼ်ၸၢင်ႊယႃႉယူၵ်ႉၶဝ် ၼၼ်ႉမႃးတီႈၶဝ်ဢေႃႈ။
၄၆ မၼ်းၸဝ်ႈဢဝ်မၢၵ်ႇလိၼ်ႁူင်းလိၼ်ၶဝ် ဢၢပ်ႈပၼ်တီႈ မႅင်းၵႅင်းၶႃႇသိလ လႄႈဢဝ်ဢုၵ်ႉၸႃႇဢၼ်ၶဝ်ႁဵတ်းလႄႈလႆႈမႃးၼၼ်ႉ ဢၢပ်ႈ ပၼ်တီႈမႅင်းၵႅင်းဢရႃႇၽ ဢေႃႈ။
၄၇ မၼ်းၸဝ်ႈဢဝ်မၢၵ်ႇႁဵပ်း၊ယႃႉၶိူဝ်းမၢၵ်ႇၸပိတ်ႉၶဝ်တင်းလၢႆ ဢဝ်ၵွၼ်ႈ မူၺ်၊ယႃႉမႆႉမွၼ်းၶဝ်တင်းလၢႆပႅတ်ႈဢေႃႈ။
၄၈ မၼ်းၸဝ်ႈဢဝ်သူဝ်းဝူဝ်းၶဝ်တင်းလၢႆဢၢပ်ႈပၼ်တီႈမၢၵ်ႇႁဵပ်းလႄႈ ဢဝ်ၽုင်တရိၵ်ႉသၢၼ်ႇၶဝ်တင်းလၢႆဢၢပ်ႈပၼ် တီႈၽႆးၽႃႉဢေႃႈ။
၄၉ မၼ်းၸဝ်ႈပွႆႇၸႂ်ႉဢရွင်ႇတၢင်းဢၼ်ၶႆႈၸႃႉတေႃးသႃႉတၢင်းဢၼ်ၸႂ်မႆႈ တၢင်းဢၼ်ပၼ်တၢမ်ႇ တၢင်းဢၼ်ယႃႉယူၵ်ႉဢၼ်ဝႃႈပူဝ်ႇပႃႇတမၢၼ်ႇ ဢၼ်ႁၢႆႉၸိူဝ်းၼၼ်ႉၸူးတီႈၶဝ်ဢေႃႈ။
၅၀ မၼ်းၸဝ်ႈမႄးပွင်မႄးႁႅၼ်းသဵၼ်ႈတၢင်းပုၼ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဝႆႉဢေႃႈ။မၼ်းၸဝ်ႈဢမ်ႇပၼ်ႁႂ်ႈဝိၺိၺ်ႇၶဝ်လႆႈၵၢင်းလွတ်ႈတင်းတၢင်းတၢႆလႄႈ ဢဝ်ဢသၢၵ်ႈၶဝ်ဢၢပ်ႈပၼ်ၵႃႈၼႂ်းမိုဝ်း တၢင်းဢၼ်ပဵၼ်ၵႃႇလႃႉႁႃႈ လႅင်မိူင်းၼၼ်ႉဢေႃႈ။
၅၁ မၼ်းၸဝ်ႈပေႃႉလုၵ်ႈၸၢႆးတူၼ်ႈၵႃႈဢၼ်မီးၵႃႈၼႂ်း မိူင်းဢေႇၵႅပ်ႉတု ဢၼ်ဝႃႈ ၶဝ်ၸိူဝ်းဢၼ်ပဵၼ်ဢၼ်ထွတ်ႈဢၼ်မျၢတ်ႈ ႁႅင်းတၼ်းၶူဝ်းၶဝ်ၵႃႈၼႂ်းသုမ်ႉထဵင်ၵူၼ်း ႁႃႇမ ၸိူဝ်းၼၼ်ႉ တၢႆပႅတ်ႈ ဢေႃႈ။
၅၂ ၵူၼ်းမၼ်းၸဝ်ႈတင်းလၢႆၸမ်းမၼ်းၸဝ်ႈႁႂ်ႈဢွၵ်ႇၵႂႃႇမိူၼ်ၸိူဝ်ႉၼင်ႇသူဝ်းလႄႈ ဢဝ်ၶဝ်သူင်ႇၵႃႈၼႂ်း ထိူၼ်ႇမိူၼ်ၸိူဝ်ႉၼင်ႇၽုင်သူဝ်းၼၼ်ႉဢေႃႈ။
၅၃ မၼ်းၸဝ်ႈဢဝ်ၶဝ်သူင်ႇလူင်ႉလီလွတ်ႈလီထၼ်ႈပေႃး ႁႂ်ႈၶဝ်ဢမ်ႇလႆႈၵူဝ်လႆႈႁႄဢေႃႈ။ရၢၼ်ႇသူႇၶဝ်တင်းလၢႆၸမ်းၼမ်ႉ ပၢင်ႇလၢႆႇထုမ်ႈႁူမ်ႇပႅတ်ႈဢေႃႈ။
၅၄ မၼ်းၸဝ်ႈဢဝ်ၶဝ်သူင်ႇတေႃႇထိုင်ႁွတ်ႈလႅၼ်လိၼ်မိူင်းၸဝ်ႈ ဢၼ်မူတ်းၸၢင်ႇၼၼ်ႉ ဢိၵ်ႇတင်း ၵႃႈတီႈမိူင်းလွႆဢၼ်မၼ်း ၸဝ်ႈဢဝ်တင်းမိုဝ်းၶွၼ်ၶႂႃဢုပ်ႉပိူင်ႇၼႆႉဢေႃႈ။
၅၅ မၼ်းၸဝ်ႈ ႁေႃႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢွၵ်ႇပႅတ်ႈသေၵႃႈတီႈၽၢႆႇၼႃႈၶဝ်လႄႈ တႅၵ်ႈတႃႇၸၵ်းၽႄလိၼ် ပုၼ်ႈဢၼ်ၶဝ်တၵ်းလႆႈၶၢမ်ႇဢမူၺ်ႇၼၼ်ႉသေလႄႈၶျႃးပၼ်တီႈယူႇတီႈသဝ်းမဵဝ်းၸိူဝ်ႉၶိူဝ်း ဢိသရေႇလ ႁင်းၽႂ်ႁင်းမၼ်းၵႃႈၼႂ်းသုမ်ႉထဵင်ၶဝ်ၸိူဝ်းၼၼ်ႉ ဢေႃႈ။
၅၆ ၼႂ်းဝႃႈၼၼ်သေၵေႃႈၶဝ်ဢွၼ်ၵၼ်ၸၢမ်းတူၺ်းလႄႈ လုၵ်ႉၽိုၼ်ႉၽြႃးဢၼ်သုင်ၼႃႇသေပိူၼ်ႈၼၼ်ႉဢေႃႈ။ၶဝ်ယင်းဢမ်ႇပႂ်ႉဢမ်ႇၸွမ်းလွင်ႈတၢင်း ဢၼ်မၼ်းၸဝ်ႈၶၢမ်ႇသၢၵ်ႈသေႇဝႆႉၸိူဝ်းၼၼ်ႉ။
၅၇ ၶဝ်ဢွၼ်ၵၼ်ၽွၵ်ႈပျၢၼ်ႇၶိုၼ်းၵႂႃႇလႄႈ ယႃႉပႅတ်ႈသႅတ်ႈၸႃႇမိူၼ်ၸိူဝ်ႉၼင်ႇပူႇမွၼ်ႇၶဝ်ၼၼ်ႉဢေႃႈ။ၶဝ်ပိူင်ႈတၢင်းၵႂႃႇ မိူၼ်ၸိူဝ်ႉၼင်ႇၵၢင်ႇဢၼ်လိမ်ႇၼၼ်ႉဢေႃႈ။
၅၈ ၶဝ်ဢဝ် ထႃႇၼႃႉတီႈသုင်ၶဝ်တင်းလၢႆၸိူဝ်းၼၼ်ႉသေလႄႈ တိုၵ်းယူင်းတၢင်းၸႂ်မႆႈၶႂ်ႈၸႃႉမၼ်းၸဝ်ႈဢေႃႈ။ၶဝ်ဢဝ်ရူၵ်ႈထူႉ ဢၼ်တွင်ႈႁဵတ်းၶၵ်းႁဵတ်းၸိူဝ်းၼၼ်ႉ သေလႄႈယႃႉယူၵ်ႉၸႂ်မၼ်းၸဝ်ႈဢေႃႈ။
၅၉ ၽြႃးပဵၼ်ၸဝ်ႈႁူႉငိၼ်းသေယဝ်ႉ တၢင်းၸႂ်မႆႈၶႂ်ႈၸႃႉမၼ်းၸဝ်ႈဢွၵ်ႇလႄႈ မၼ်းၸဝ်ႈလီႁင်ႈဢဵတ်ႇသဵတ်ႇ မဵဝ်းၵူၼ်း ဢိသရေႇလ ၼႃႇလူင်လၢင်ဢေႃႈ။
၆၀ မၼ်းၸဝ်ႈၸုၼ်ႉပႅတ်ႈသုမ်ႉထဵင်ၸဝ်ႈဢၼ်မီးၵႃႈတီႈ သိလေႃႇဢၼ်ဝႃႈသုမ်ႉထဵင်တီႈယူႇဢၼ်မၼ်းၸဝ်ႈ ၶျႃးဝႆႉၵႃႈၼႂ်းၵူၼ်း တင်းလၢႆၼၼ်ႉဢေႃႈ။
၆၁ မၼ်းၸဝ်ႈဢဝ်တၼ်းၶူဝ်းမၼ်းၸဝ်ႈ ဢၢပ်ႈပၼ်တီႈတၢင်းဢၼ်သိမ်းဢဝ်ၵႂႃႇ ဢိၵ်ႇတင်းမုၼ်ၽုင်းမၼ်းၸဝ်ႈဢၢပ်ႈပၼ်ၵႃႈၼႂ်းမိုဝ်း ရၢၼ်ႇသူႇမၼ်းၸဝ်ႈဢေႃႈ။
၆၂ မၼ်းၸဝ်ႈဢဝ်ၵူၼ်းမၼ်းၸဝ်ႈတင်းလၢႆဢၢပ်ႈပၼ်တီႈၽေးလၢပ်ႇလႄႈ တၢင်းၸႂ်မႆႈၶႆႈၸႃႉမၼ်းၸဝ်ႈဢွၵ်ႇၸူးတီႈဢမူၺ်ႇမၼ်း ၸဝ်ႈဢေႃႈ။
၆၃ ၽႆးႁုပ်ႉမႆႈၽူႈမၢဝ်ႇၶဝ်တင်းလၢႆပႅတ်ႈလႄႈၽူႈသၢဝ်ၶဝ်တင်းလၢႆ ဢမ်ႇလႆႈမီးသဵင်ၵႂၢမ်းဢၼ်သွင်ႇ မင်ႇၵလႃႇၼၼ်ႉ။
၆၄ ယိတ်ႉပရေႃးႁိၵ်ႈၶဝ်တင်းလၢႆလူႉသုမ်းလူၺ်ႈၽေးလၢပ်ႇၽေးလႅဝ်းလႄႈ မေႈမုၵ်ႉမေႈမၢႆႈၶဝ် ဢမ်ႇႁွင်ႉဢမ်ႇႁႆႈလႆႈ။
၆၅ မိူဝ်ႈၼၼ်ႉၸဝ်ႈၽြႃးတိုၼ်ႇမႃးမိူၼ်ၸိူဝ်ႉၼင်ႇ ၵေႃႉဢၼ်ၼွၼ်းလပ်းတိုၼ်ႇမႃးၼၼ်ႉလႄႈ တိုၼ်ႇမႃးမိူၼ်ၸိူဝ်ႉၼင်ႇၵူၼ်းႁတ်းၵူၼ်းႁၢၼ် ဢၼ်ႁွင်ႉသႅၼ်ႇၵွပ်ႈပိူဝ်ႈၼမ်ႉၸပိတ်ႉၼၼ်ႉဢေႃႈ။
၆၆ မၼ်းၸဝ်ႈပၼ်တၢမ်ႇႁႂ်ႈရၢၼ်ႇသူႇမၼ်းၸဝ်ႈတင်းလၢႆပိၼ်ႈၶိုၼ်းၵႂႃႇလႄႈ ႁႂ်ႈၶဝ်ႁွတ်ႈထိုင်တၢင်းဢၼ်ဢူၵ်း ဢၼ်ဢၢႆယူႇသေႇသေႇဢေႃႈ။
၆၇ မၼ်းၸဝ်ႈပႄႇပႅတ်ႈသုမ်ႉထဵင်မူဝ်းၵႃႇ ယုဝ်းသႅပ်ႉ လႄႈဢမ်ႇလိူၵ်ႈၵဵပ်းဢဝ် မဵဝ်းဢေႇၽရိမ်ႇ။
၆၈ မၼ်းၸဝ်ႈလိူၵ်ႈၵဵပ်းဢဝ်မဵဝ်း ယုတဢိၵ်ႇတင်း လွႆၸိဢုၼ်ႇ ဢၼ်မၼ်းၸဝ်ႈႁၵ်ႉၼၼ်ႉ ဢေႃႈ။
၆၉ မၼ်းၸဝ်ႈတႄႇႁဵတ်းထႃႇၼႃႉတီႈမူတ်းၸၢင်ႇမၼ်းၸဝ်ႈ မိူၼ်ၸိူဝ်ႉၼင်ႇပၢႆၸိၵ်းလွႆတင်းလၢႆ ဢိၵ်ႇတင်း မိူၼ်ၸိူဝ်ႉၼင်ႇ လိၼ်မိူင်းဢၼ်မၼ်းၸဝ်ႈႁႂ်ႈ မၼ်ႈၶိူင်ႇယူႇသေႇသေႇၼၼ်ႉဢေႃႈ။
၇၀ မၼ်းၸဝ်ႈလိူၵ်ႈၵဵပ်းၶႃႈမၼ်းၸဝ်ႈတႃႇဝိတ်ႉ ၼၼ်ႉလႄႈ ဢဝ်မၼ်း ဢွၵ်ႇသေၵႃႈၼႂ်းသိုင်ႇသူဝ်းၶွၵ်ႈသူဝ်းဢေႃႈ။
၇၁ မၼ်းၸဝ်ႈၼုၵ်ႈဢဝ်မၼ်း ဢွၵ်ႇသေၵႃႈၼႂ်း တၢင်းဢၼ်လဵင်ႉထိင်းသူဝ်းမေႈလုၵ်ႈဢွၼ်ႇတင်းလၢႆသေယဝ်ႉ ႁႂ်ႈမၼ်းလႆႈလဵင်ႉလူၵူၼ်းမၼ်းၸဝ်ႈဢၼ်ဝႃႈမဵဝ်းယႃႇၵုပ်ႉဢိၵ်ႇတင်းဢမူၺ်ႇမၼ်းၸဝ်ႈဢၼ်ဝႃႈ မဵဝ်းဢိသရေႇ လၸိူဝ်းၼၼ်ႉဢေႃႈ။
၇၂ ၼင်ႇၼၼ်လႄႈ မၼ်းၼၼ်ႉလဵင်ႉလူၶဝ်ၸွမ်းၵႃႈၼင်ႇဢၼ် မၼ်းမီးသၽေႃးဢၼ်ၸေးၸုမ်ႇၼၼ်ႉလႄႈ ဢဝ်တင်းမိုဝ်းမၼ်းဢၼ်လၵ်းဢၼ်လႅမ်ၼၼ်ႉဢဝ်ၶဝ်သူင်ႇဢေႃႈ။