၁၄၇
၁ ဢွၼ်ၵၼ်ယွင်ႈယေႃးထႃႇဝရႃႉၽြႃးတႃႉ။လွင်ႈမၼ်းၸမ်း တၢင်းဢၼ်ႁဵတ်းထေႃးပၼႃႇတီႈ ၽြႃးပဵၼ် ၸဝ်ႈႁဝ်းၼၼ်ႉပဵၼ်ဢၼ်ထုၵ်ႇဢၼ်လီၼႃႇပဵၼ်ဢၼ်သႃႇယႃႇ ႁၢင်ႊလီႁၢင်ႊငၢမ်းၼႃႇလႄႈတၢင်းဢၼ်ယွင်ႈယေႃးၼၼ်ႉပဵၼ်ဢၼ်ထိူၵ်ႈတၢၼ်ႇၵၼ် ၼႃႇဢေႃႈ။
၂ ထႃႇဝရႃႉၽြႃးတႄႇႁဵတ်းဝဵင်းယေႇရုသလႅမ်ႇသေလႄႈႁႂ်ႈ မဵဝ်းဢိသရေႇလ ဢၼ်လႆႈၶၢမ်ႇတၢင်းဢၼ်ႁေႃႈပႅတ်ႈ ၵႃႈတီႈဢၼ်ၵႆၸိူဝ်းၼၼ်ႉမႃး ၸူႉၵၼ်တုမ်ၵၼ်ဢေႃႈ။
၃ မၼ်းၸဝ်ႈႁႂ်ႈၶဝ်ၸိူဝ်းဢၼ်ႁူဝ်ၸႂ်တႅၵ်ႇလႅဝ်ၼၼ်ႉသၢၵ်ႈသႃႇၶႅၼ်းမႃးလႄႈ ယႃပၼ် တၢင်းၸဵပ်းၶဝ်ၼၼ်ႉဢေႃႈ။
၄ မၼ်းၸဝ်ႈၼပ်ႉဢၢၼ်ႇလၢဝ်တင်းလၢႆလႄႈ ႁွင်ႉႁိၵ်ႈၸိုဝ်ႁင်းၽႂ်ႁင်းမၼ်း ဢေႃႈ။ၸဝ်ႈၽြႃးႁဝ်းယႂ်ႇမျၢတ်ႈၼႃႇဢေႃႈ။
၅ တၼ်းၶူဝ်းမၼ်းၸဝ်ႈယႂ်ႇၼႃႇလႄႈ ၺၢၼ်ႇမၼ်းၸဝ်ႈၼၼ်ႉ ပဵၼ်ဢၼၼ်ႇတႃႉဢေႃႈ။
၆ ထႃႇဝရႃႉၽြႃးယုၵ်ႉဢဝ်ယွင်ႊဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉလႄႈၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်း မၼ်းၸဝ်ႈဢဝ်လူမ်ႉပႅတ်ႈၵႃႈၼိူဝ်လိၼ်ဢေႃႈ။
၇ ဢွၼ်ၵၼ်ယွင်ႈယေႃးၵျေးၸူးၸဝ်ႈသေလႄႈ ႁဵတ်းၵႂၢမ်းတီႈထႃႇဝရႃႉၽြႃးတႃႉ။ဢွၼ်ၵၼ်ဢဝ်တိင်ႇ လဵတ်းႁဵတ်းသဵင်တီႈၽြႃးပဵၼ်ၸဝ်ႈႁဝ်းတႃႉ။
၈ မၼ်းၸဝ်ႈဢဝ်ၽႃႉၽူၼ်ၵီႈႁူမ်ႇ ၵႃႈၼိူဝ်ၵၢင်ႁၢဝ်ယူႇ ပွင်ႁဵတ်းပွင်မႄးၼမ်ႉၽူၼ်ဝႆႉ ပုၼ်ႈလိၼ်မိူင်းယူႇသေလႄႈႁႂ်ႈတူၼ်ႈယိူဝ်ႈတူၼ်ႈယႃႈဢွၵ်ႇမႃး ၵႃႈတီႈၼိူဝ်လွႆ ၼိူဝ်ၵုင်းဢေႃႈ။
၉ မၼ်းၸဝ်ႈလဵင်ႉဢွႆႇပၼ်တၢင်းၵိၼ်တၢင်းၶူပ်းတီႈတူဝ်သတ်း ဢိၵ်ႇတင်းၵႃဢွၼ်ႇဢၼ် ၸၢင်ႊႁွင်ႉၸိူဝ်းၼၼ်ႉဢေႃႈ။
၁၀ မၼ်းၸဝ်ႈဢမ်ႇမီးတၢင်းဢၼ်ထုၵ်ႇၸႂ်ဢဵၼ်ႁႅင်းမႃႉလႄႈ ဢမ်ႇမီးတၢင်းဢၼ် ၵျိူၵ်ႈၸႂ်ၶႅၼ်ၵူၼ်းတိၼ်ၵူၼ်း။
၁၁ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ် ၶဝ်ၸိူဝ်းဢၼ်ရူဝ်ႇသေႇၵူဝ်ယမ်မၼ်းၸဝ်ႈဢိၵ်ႇတင်းၶဝ်ၸိူဝ်းဢၼ် မုင်ထႃႈမွင်းထႃႈၵရူႉၼႃႇ မၼ်းၸဝ်ႈၼၼ်ႉဢေႃႈ။
၁၂ ဝဵင်းယေႇရုသလႅမ်ႇဢိူၺ်း၊ယွင်ႈယေႃးထႃႇဝရႃႉၽြႃးတႃႉ။ဝဵင်းၸိဢုၼ်ႇဢိူၺ်း၊ ယွင်ႈယေႃးၽြႃးပဵၼ်ၸဝ်ႈမႂ်းတႃႉ။
၁၃ လွင်ႈမၼ်းၸမ်း မၼ်းၸဝ်ႈႁႂ်ႈၵိူၼ်ႇၽၵ်းတူမႂ်းတင်းလၢႆ ၵႅၼ်ႇၶႅင်လႄႈပၼ်တၢင်းလီတီႈ လုၵ်ႈမႂ်းလၢင်းမႂ်းၵႃႈၼႂ်းမႂ်းဢေႃႈ။
၁၄ မၼ်းၸဝ်ႈႁႂ်ႈဢမူႉၵႃႈတီႈ ၶွပ်ႇၼမ်ႉလႅၼ်လိၼ်မိူင်းမႂ်းထၢတ်ႇယဵၼ်လႄႈဢဝ်ဢၼ်ပဵၼ်ၶႆပဵၼ်မၼ်းၶဝ်ႈၵျုင်ႇၼၼ်ႉ လဵင်ႉပၼ်တီႈမႂ်းဢိမ်ႇဢိမ်ႇတဵမ်တဵမ်ဢေႃႈ။
၁၅ မၼ်းၸဝ်ႈ ပွႆႇပျႃႇတိၵ်ႈမၼ်းၸဝ်ႈဝႆႉၵႃႈၼိူဝ်လိၼ်မိူင်းလႄႈ ၼုၵ်ႉၵပၢတ်ႈမၼ်းၸဝ်ႈၸၢင်ႊၶုၼ်ႇလႅၼ်ႈ ၶၼ် ၶၼ်ၽႂ်းၽႂ်းဢေႃႈ။
၁၆ မၼ်းၸဝ်ႈၶျႃးပၼ်မူၺ်ႁႃႇမိူၼ်ၸိူဝ်ႉၼင်ႇၶူၼ်သူဝ်းၼၼ်ႉလႄႈ မၼ်းၸဝ်ႈဢဝ်ၵွၼ်ႈၼမ်ႉၼၢႆးၸတ်းပိုၼ်ဝႆႉမိူၼ်ၸိူဝ်ႉၼင်ႇတဝ်ႊ ၼၼ်ႉ ဢေႃႈ။
၁၇ မၼ်းၸဝ်ႈဢဝ်မၢၵ်ႇႁိၼ်မၼ်းၸဝ်ႈပွႆႇတူၵ်းမိူၼ်ၸိူဝ်ႉၼင်ႇ တၢင်းၵိၼ်ဢၼ်ယွႆႈဢၼ်ယႅမ်းၼၼ်ႉလႄႈ ၽူႈ လႂ်တၵ်းၸုၵ်းၶၢမ်ႇတၢင်းဢၼ်မၼ်းၸဝ်ႈႁႂ်ႈ ၵတ်းၼၼ်ႉလႆႈ။
၁၈ မၼ်းၸဝ်ႈသမ်ႉပွႆႇၼုၵ်ႉၵပၢတ်ႈမၼ်းၸဝ်ႈလႄႈႁႂ်ႈၶဝ်ၸိုမ်းပဵၼ်ၼမ်ႉၵႂႃႇဢေႃႈ။မၼ်းၸဝ်ႈႁႂ်ႈလူမ်းမၼ်းၸဝ်ႈမႃးလႄႈ ၼမ်ႉၸိူဝ်းၼၼ်ႉလႆၵႂႃႇ ဢေႃႈ။
၁၉ မၼ်းၸဝ်ႈဢဝ်ဢွၵ်ႇၼႄပျႃးၼုၵ်ႉၵပၢတ်ႈမၼ်းၸဝ်ႈတီႈမဵဝ်းယႃႇၵုပ်ႉ ဢိၵ်ႇတင်းထုင်းၾိင်ႈတြႃးမၼ်းၸဝ်ႈတင်းလၢႆ လွင်ႈတၢင်းဢၼ်မၼ်းၸဝ်ႈၸီႇယၢင်ႇ ဝႆႉၸိူဝ်းၼၼ်ႉတီႈမဵဝ်းဢိသရေႇလ ဢေႃႈ။
၂၀ မၼ်းၸဝ်ႈဢမ်ႇႁဵတ်းၸိူဝ်ႉၼင်ႇၼၼ် တီႈမဵဝ်းၵူၼ်းသေၸိူဝ်ႉသေမဵဝ်း။ၶဝ်ဢမ်ႇႁူႉလွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၸိူဝ်းၼၼ်ႉ။ႁႃႇလေႇလုယႃႇ။