၇၂
၁ ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈပၼ်တၢင်းဢၼ်ၸဝ်ႈႁဝ်းတႅပ်းတတ်းဢမူႉတင်းလၢႆၼၼ်ႉ တီႈၶုၼ်ႁေႃၶမ်းဢိၵ်ႇတင်း တၢင်းဢၼ်ၸဝ်ႈႁဝ်းၸီႇယၢင်ႇသိုဝ်ႈသိုဝ်ႈတေႃႇတေႃႇၼၼ်ႉ တီႈလုၵ်ႈၸၢႆးၶုၼ်ႁေႃၶမ်း သေၵမ်းတီႈၶႃႈ။
၂ မၼ်းၸဝ်ႈတၵ်းၸီႇယၢင်ႇၵူၼ်းၸဝ်ႈႁဝ်းတင်းလၢႆသိုဝ်ႈသိုဝ်ႈတေႃႇတေႃႇလႄႈ ပၼ်တြႃးတီႈ ၵူၼ်းဢၼ်ယၢၵ်ႈဢၼ်ၽၢၼ်ၸဝ်ႈႁဝ်း ၸိူဝ်း ၼၼ်ႉတီႈၶႃႈဢေႃႈ။
၃ လွႆလူင်တင်းလၢႆတၵ်းပၼ်ၵတ်းယဵၼ်ၶျၢမ်းသႃႇ တီႈၵူၼ်းတင်းလၢႆလႄႈ လွႆဢွၼ်ႇတင်းလၢႆၵေႃႈ တၵ်းပၼ်တြႃးတၢင်းဢၼ်ၸီႇယၢင်ႇ သိုဝ်ႈသိုဝ်ႈတေႃႇတေႃႇၼၼ်ႉတီႈၶႃႈဢေႃႈ။
၄ မၼ်းၸဝ်ႈၸီႇယၢင်ႇတြႃး တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၵႃႈၼႂ်းၵူၼ်းတင်းလၢႆလႄႈၵႄႇသႄႇၶျွတ်ႈဢဝ်လုၵ်ႈလၢင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉသေလႄႈ ႁၵ်းႁိၵ်းၵေႃႉဢၼ်ၼိၵ်ႈၸၢၵ်ႈငႅၼ်းသေးၼၼ်ႉ ပႅတ်ႈတီႈၶႃႈဢေႃႈ။
၅ ၵူၼ်းသိုပ်ႇသိုပ်ႇတၢမ်ႈတၢမ်ႈတင်းသဵင်ႈတင်းလူင် တၵ်းဢွၼ်ၵၼ်ရူဝ်ႇသေႇၵူဝ်ယမ်ၸဝ်ႈႁဝ်းယူႇၶိင်ႇၵႃႇလႃႉ ၸူဝ်ႈဢၼ်ၵၢင်ဝၼ်း ဢိၵ်ႇတင်း လိူၼ်ယင်းတိုၵ်ႉတႄႇယူႇၼၼ်ႉတီႈၶႃႈဢေႃႈ။
၆ မၼ်းၸဝ်ႈတၵ်းလူင်းမႃး မိူၼ်ၸိူဝ်ႉၼင်ႇၽူၼ်ဢၼ်တူၵ်းသႂ်ႇၵႃႈၼိူဝ်တူၼ်ႈယိူဝ်ႈဢၼ်ပၢတ်ႇၼၼ်ႉ ဢိၵ်ႇတင်းမိူၼ်ၸိူဝ်ႉၼင်ႇႁႃႇၽူၼ် ဢၼ်ႁႂ်ႈလိၼ်မိူင်းယမ်းၼၼ်ႉ တီႈၶႃႈဢေႃႈ။
၇ ၵႃႈၼႂ်းၸူဝ်ႈပၢၼ်မၼ်းၸဝ်ႈၼၼ်ႉၸိုင်ၵေႃႉဢၼ်သိုဝ်ႈတေႃႇၼၼ်ႉ တၵ်းတဵမ်ထူၼ်းလိူင်ႇၸႂ်လႄႈ ၵတ်းယဵၼ်ၶျၢမ်းသႃႇယႂ်ႇၽႄၼမ်ၵိုၼ်းမႃးယူႇတေႃႇထိုင်ႁွတ်ႈမိူဝ်ႈဢၼ်လိူၼ်ႁၢႆလၢႆၵႂႃႇၼၼ်ႉ တီႈၶႃႈဢေႃႈ။
၈ မၼ်းၸဝ်ႈလႆႈဢုပ်ႉပိူင်ႇဢဝ်ၵႃႈတီႈပၢင်ႇလၢႆႇမေႈၼိုင်ႈတေႃႇထိုင်ႁွတ်ႈပၢင်ႇလၢႆႇမေႈၼိုင်ႈ ဢိၵ်ႇတင်းဢဝ်ၵႃႈတီႈၼမ်ႉႁွင်ႊ တေႃႇထိုင်ႁွတ်ႈ တီႈသုတ်းလိၼ်မိူင်းၼၼ်ႉ တီႈၶႃႈဢေႃႈ။
၉ ၵူၼ်းဢၼ်ယူႇၵႃႈၼႂ်းထိူၼ်ႇၼႂ်းၶိူဝ်းတင်းလၢႆ ဢွၼ်ၵၼ်ၵူမ်ႈႁူဝ်ၵွမ်းႁူဝ်ၵႃႈတီႈၽၢႆႇၼႃႈမၼ်းၸဝ်ႈလႄႈ ရၢၼ်ႇသူႇမၼ်းၸဝ်ႈတင်းလၢႆ တၵ်းဢွၼ်ၵၼ်လႄႇၵိၼ်မုၼ်ႈ လိၼ်တီႈၶႃႈဢေႃႈ။
၁၀ ၶုၼ်ႁေႃၶမ်းမိူင်းတႃႇသူႉတင်းလၢႆဢိၵ်ႇတင်းၶုၼ်ႁေႃၶမ်း တီႈၵုၼ်ၼႂ်းပၢင်ႇလၢႆႇၸိူဝ်းၼၼ်ႉတၵ်းဢွၼ်ၵၼ်သႂၢင်းပၼ်ၶွၼ်ႇလႄႈ ၶုၼ်ႁေႃၶမ်းမိူင်းသေႇၽတင်းၶုၼ်ႁေႃၶမ်းမိူင်းၸေႇၽ ၸိူဝ်းၼၼ်ႉတၵ်းဢွၼ်ၵၼ်သၢၵ်ႈလၢၵ်ႈသွင်ႇတီႈၶႃႈ ဢေႃႈ။
၁၁ လိူဝ်သေၼၼ်ႉဢမ်ႇၵႃး၊ ၶုၼ်ႁေႃၶမ်းတင်းသဵင်ႈတင်းလူင် တၵ်းဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈမၼ်းၸဝ်ႈလႄႈ မဵဝ်းၵူၼ်းတင်းသဵင်ႈတင်းလူင် တၵ်းဢွၼ် ၵၼ်ႁၢပ်ႇဢမူႉမၼ်းၸဝ်ႈတီႈၶႃႈဢေႃႈ။
၁၂ လွင်ႈမၼ်းၸမ်း မၼ်းၸဝ်ႈတၵ်းပၼ်ၵတ်းယဵၼ်ၶျၢမ်းသႃႇ တီႈၵေႃႉဢၼ်ၸုတ်ႈဢၼ်လုတ်ႈ ဢၼ်ႁွင်ႉသႅၼ်ႇၼၼ်ႉဢိၵ်ႇတင်း ၵေႃႉဢၼ်ယၢၵ်ႈဢၼ်ၽၢၼ် တင်းၵေႃႉဢၼ်ဢမ်ႇမီး တီႈဢၼ်တၵ်းၸႂ်လီလူၺ်ႈၼၼ်ႉဢေႃႈ။
၁၃ မၼ်းၸဝ်ႈတၵ်းဢိတ်းလူ ၵေႃႉဢၼ်ၽၢၼ်ဢၼ်ၵႅၼ်းဢိၵ်ႇတင်း ၵေႃႉဢၼ်ၸုတ်ႈဢၼ်လုတ်ႈၼၼ်ႉလႄႈၵႄႇသႄႇၶျွတ်ႈဢဝ်ဢသၢၵ်ႈ ၶဝ်ၸိူဝ်းဢၼ်ၸုတ်ႈ ဢၼ်လုတ်ႈၼၼ်ႉဢေႃႈ။
၁၄ မၼ်းၸဝ်ႈတၵ်းထူတ်ႇၼုၵ်ႈဢဝ်ဢသၢၵ်ႈၶဝ်ဢွၵ်ႇသေ ၵႃႈၼႂ်းမိုဝ်းဢၼ်ပႅတ်ႉဢၼ်လႅၼ် ဢိၵ်ႇတင်း တၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉလႄႈ လိူတ်ႈၶဝ်တၵ်းထိူၵ်ႈၵႃႈထိူၵ်ႈၶၼ်သိုဝ်ႈ ၼႃႈတႂ်ႈတႃမၼ်းၸဝ်ႈတီႈၶႃႈဢေႃႈ။
၁၅ မၼ်းၼၼ်ႉဢသၢၵ်ႈတၵ်းတႄႇယူႇလႄႈ မၼ်းတၵ်းဢဝ်ၶမ်းမိူင်းသေႇၽ သၢၵ်ႈတီႈမၼ်းၸဝ်ႈယူႇ၊ သူးတွင်းပထၼႃႇပုၼ်ႈမၼ်းၸဝ်ႈယူႇတႃႇသေႇသေလႄႈ ႁဵတ်းထေႃးပ ၼႃႇယွင်ႈယေႃးယူႇတင်းဝၼ်းတင်းဝၼ်းဢေႃႈ။
၁၆ ၶဝ်ႈသၢၼ်ၶဝ်ႈပိူၵ်ႇ တၵ်းမီးလိူင်ႇၼမ်ၼႃႇၵႃႈၼႂ်းမိူင်းၸဝ်ႈၵႃႈၼိူဝ်ၸိၵ်းလွႆၸွမ်လွႆတင်းလၢႆလႄႈ မၢၵ်ႇမၼ်းရူင်းမၼ်းတၵ်းတူင်ႉၼိုင်ယူႇ မိူၼ်ၸိူဝ်ႉၼင်ႇထိူၼ်ႇလေႇပၼုၼ်ႇၼၼ်ႉလႄႈ ၵူၼ်းဝဵင်းၸဝ်ႈတင်းလၢႆၵေႃႈတၵ်းၵိုၼ်းၼႃႇမိူၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈ ၵႃႈ တီႈလိၼ်ၼၼ်ႉတီႈၶႃႈဢေႃႈ။
၁၇ ၼႃႇမႃႉၸိုဝ်ႈသဵင်မၼ်းၸဝ်ႈတၵ်းတႄႇယူႇသေႇသေႇလႄႈ ၼႃႇမႃႉၸိုဝ်ႈသဵင်မၼ်းၸဝ်ႈတၵ်းယႂ်ႇၽႄတူဝ်းတွၼ်းမႃးယူႇ ၼႂ်းၶိင်ႇမိူဝ်ႈဢၼ်ၵၢင်ဝၼ်း ယင်းတိုၵ်ႉတႄႇယူႇၼၼ်ႉတီႈၶႃႈဢေႃႈ။ၵူၼ်းတင်းလၢႆတၵ်းလႆႈၶၢမ်ႇတၢင်းလီမင်ႇၵလႃႇတီႈမၼ်းၸဝ်ႈလႄႈ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းသဵင်ႈတင်းလူင် တၵ်းဢွၼ်ၵၼ်ယွင်ႈယေႃးမၼ်းၸဝ်ႈလႄႈဝႃႈ၊-မီးမင်ႇၵလႃႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
၁၈ ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈ၊ၽြႃးပဵၼ်ၸဝ်ႈမဵဝ်းဢိသရေႇလ၊ ဢၼ်မၼ်းၸဝ်ႈသူႇလဵဝ်ပႃးလဵဝ်ၵူၺ်းၸီႇယၢင်ႇႁဵတ်း လွင်ႈတၢင်းဢၼ်လီဢၢမ်းတင်း လၢႆၼၼ်ႉမီးမင်ႇၵလႃႇသေၵမ်းလူၺ်ႈ။
၁၉ ႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈဢၼ်မုၼ်ၽုင်းယႂ်ႇၼႃႇၼၼ်ႉ မီးမင်ႇၵလႃႇယူႇသေႇသေႇသေၵမ်းလူၺ်ႈ။ႁႂ်ႈလိၼ်မိူင်းတင်းသဵင်ႈတင်းမူတ်း၊ တဵမ်ဝႆႉတင်းမုၼ်ၽုင်းမၼ်းၸဝ်ႈသေၵမ်းလူၺ်ႈ။ဢႃႈမိၼ်ႈတင်းဢႃႈမိၼ်ႈ။
၂၀ ၵႂၢမ်းသူးတွင်းပထၼႃႇတႃႇဝိတ်ႉ၊ လုၵ်ႈၸၢႆးယေႇသေႇၼၼ်ႉယဝ်ႉယဝ်ႉဢေႃႈ။