၁၈
၁ ထႃႇဝရႃႉၽြႃးတီႈၶႃႈ၊ၶႃႈၸဝ်ႈႁၵ်ႉပႅင်းၸဝ်ႈႁဝ်းဢၼ်ပဵၼ်ႁႅင်းတၼ်းၶူဝ်းၶႃႈၸဝ်ႈၼၼ်ႉ တီႈၶႃႈဢေႃႈ။ထႃႇဝရႃႉၽြႃးပဵၼ်မၢၵ်ႇႁိၼ်မၢၵ်ႇၽႃၵဝ် လမ်းဝဵင်းၵဝ် ၸဝ်ႈဢၼ်ၵႄႇသႄႇဢဝ်ၵဝ်လွတ်ႈ ၊
၂ ပဵၼ်မၢၵ်ႇႁိၼ်မၢၵ်ႇၽႃတီႈဢၼ်ၵဝ်ဢိင်ပိုင်ႈ ဢၼ်ႁႄႉဢၼ်ၵင်ႈၵဝ်ပဵၼ်ၶဝ်လႅမ်ဢၼ်ၵႄႇသႄႇၶျွတ်ႈဢဝ်ၵဝ် တိူၵ်ႈတီႈ တိုၵ်းသိုၵ်းၵဝ်ဢေႃႈ။
၃ ၵဝ်တၵ်းလဝ်ႈယွၼ်းတီႈထႃႇဝရႃႉၽြႃး ဢၼ်ထုၵ်ႇလီၶၢမ်ႇတၢင်းဢၼ်ယွင်ႈယေႃးၼၼ်ႉလႄႈ ႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ် ၵႃႈၼႂ်းမိုဝ်းရၢၼ်ႇသူႇၵဝ်တင်းလၢႆၼၼ်ႉဢေႃႈ။
၄ သဵၼ်ႈၸိူၵ်ႈတၢင်းတၢႆတင်းလၢႆလွမ်ႉႁွပ်ႈၵဝ်ဝႆႉလႄႈ ၼမ်ႉၸႅဝ်ႈတၢင်းဢၼ်ႁုၵ်းႁၢႆႉယုတ်ႈယွမ်းၼၼ်ႉ ႁႂ်ႈၵဝ်လႆႈၵူဝ်လႆႈ ႁႄဢေႃႈ။
၅ သဵၼ်ႈၸိူၵ်ႈမိူင်းမႃႇရၼႃႉလွမ်ႉႁွပ်ႈၵဝ်ဝႆႉလႄႈ တူင်ႇႁဵဝ်ႉတူင်ႇၶိုမ်းၶုၼ်တၢႆလႆႈႁုတ်ႉမႅၼ်ႈၵဝ်ဝႆႉ ဢေႃႈ။
၆ ၼႂ်းမိူဝ်ႈဢၼ်ၵဝ်ယၢပ်ႇၸႂ်ၶၢၼ်ၸႂ်ယူႇၼၼ်ႉၸိုင် ၵဝ်ႁွင်ႉထႃႇဝရႃႉၽြႃးဢေႃႈ။ႁွင်ႉသႅၼ်ႇတီႈၽြႃးပဵၼ်ၸဝ်ႈႁႂ်ႈလႆႈၸွႆႈထႅမ်ၵဝ်ဢေႃႈ။မၼ်းၸဝ်ႈယူႇၵႃႈၼႂ်းပိၵ်ႉမၢၼ်ႇမၼ်းၸဝ်ႈလႄႈ ငိၼ်းသဵင်ဢၼ်ၵဝ်ႁွင်ႉသႅၼ်ႇႁွင်ႉႁႃၵႃႈတီႈၽၢႆႇၼႃႈမၼ်းၸဝ်ႈၼၼ်ႉ ၶဝ်ႈ ႁွတ်ႈၶဝ်ႈထိုင်ၵႃႈၼႂ်းႁူမၼ်းၸဝ်ႈဢေႃႈ။
၇ မိူဝ်ႈၼၼ်ႉလိၼ်မိူင်းတူင်ႉၼိုင်လႄႈသၼ်ႇသၼ်ႇသၢႆသၢႆယူႇငဝ်ႈႁၢၵ်ႈလွႆတင်းလၢႆသၼ်ႇၶွၼ်းဝႆလႄႈ ၼိုင်ၵႂႃႇၼိုင်မႃးယူႇ ၵွပ်ႈပိူဝ်ႈဢၼ်တၢင်းၸႂ်မႆႈၶႂ်ႈၸႃႉမၼ်းၸဝ်ႈ ဢွၵ်ႇၼၼ်ႉဢေႃႈ။
၈ ၵွၼ်းၽႆးဢွၵ်ႇၵႃႈၼႂ်းၶူႈလင်မၼ်းၸဝ်ႈယူႇ ၽႆးၼႂ်းသူပ်းမၼ်းၸဝ်ႈ မႆႈယူႇသေလႄႈ ထၢၼ်ႇၽႆးလုၵ်ႉဢွၵ်ႇၵႃႈတီႈၼၼ်ႉဢေႃႈ။
၉ မၼ်းၸဝ်ႈၼူပ်ႈၽႃႉၵၢင်ႁၢဝ်သေယဝ်ႉလူင်းမႃးလႄႈ ၵႃႈတႂ်ႈတိၼ် မၼ်းၸဝ်ႈၼၼ်ႉပဵၼ်ဢၼ်လပ်းသိင်ႇဝႆႉဢေႃႈ။
၁၀ မၼ်းၸဝ်ႈၶီႇၶေႇရူႉၽဵမ်ႇသေလႄႈ မိၼ်ယူႇၵႃႈၼိူဝ်ပိၵ်ႇလူမ်း ဢေႃႈ။
၁၁ မၼ်းၸဝ်ႈ ႁႂ်ႈဢၼ်လပ်းသိင်ႇ ပဵၼ်တီႈဢၼ်မၼ်းၸဝ်ႈတဵတ်ႇယူႇလပ်းယူႇလႄႈ ႁႂ်ႈၼမ်ႉဢၼ်လမ်ၵမ်ႇၼႃႇဢိၵ်ႇတင်း ၽႃႉၽူၼ်ဢၼ်ၼႃတၼ်ၼႃႇၼၼ်ႉ ပဵၼ်သုမ်ႉထဵင်မူဝ်းၵႃႇဢၼ်လွမ်ႉႁွပ်ႈမၼ်းၸဝ်ႈ ယူႇဢေႃႈ။
၁၂ ၵွပ်ႈပိူဝ်ႈသၢႆဢရွင်ႇၵႃႈတီႈၽၢႆႇၼႃႈမၼ်းၸဝ်ႈၼၼ်ႉလႄႈ ၶႅပ်းၽႃႉၽူၼ်တင်းလၢႆပႃးလူၺ်ႈၵၼ်တင်းမၢၵ်ႇႁဵပ်း ဢိၵ်ႇတင်းထၢၼ်ႇၽႆးသေလႄႈပိဝ် သဵၼ်ၵႂႃႇဢေႃႈ။
၁၃ ထႃႇဝရႃႉၽြႃးၽႃႉလင်ႊယူႇၵႃႈၼိူဝ်ၵၢင်ႁၢဝ်လႄႈ ၽြႃးဢၼ်သုင်ၼႃႇသေပိူၼ်ႈၼၼ်ႉပွႆႇသဵင်မၼ်းၸဝ်ႈဢၼ်ဝႃႈ မၢၵ်ႇႁဵပ်းဢိၵ်ႇတင်းထၢၼ်ႇၽႆးၼၼ်ႉဢေႃႈ။
၁၄ မၼ်းၸဝ်ႈယိုဝ်းပိုၼ်ၵၢင်ႇမၼ်းၸဝ်ႈသေလႄႈ ႁႂ်ႈၶဝ်ၽူင်ႉပၢႆယၢႆႈၼီႈၵႂႃႇလႄႈ မၼ်းၸဝ်ႈႁႂ်ႈၽႃႉမႅပ်ႈၼႃႇလူင်လၢင်သေလႄႈႁႂ်ႈၶဝ်တူၵ်းသုမ်း ဢေႃႈ။
၁၅ ဢူဝ်း၊ ထႃႇဝရႃႉၽြႃး၊ မိူဝ်ႈၼၼ်ႉ ၵႃႈတႂ်ႈပိုၼ်ႉမေႈၼမ်ႉတင်းလၢႆလႆႈပိုတ်ႇၵီႈလႄႈ ငဝ်ႈႁၢၵ်ႈတိူၵ်ႈလေႃးၵႃႉပေႃႇဢွၵ်ႇဝႆႉ ၵွပ်ႈပိူဝ်ႈဢၼ်ၸဝ်ႈႁဝ်းတၢင်ႇဢပျႅတ်ႈဢိၵ်ႇတင်း ၵွပ်ႈပိူဝ်ႈဢၼ်ၸဝ်ႈႁဝ်းထင်ႇတိုင်ႈတၢင်းဢၼ်ထူၺ်ႈၸႂ် ၵႃႈၼႂ်းၶူးလင်ၸဝ်ႈႁဝ်းဢွၵ်ႇ ၼၼ်ႉတီႈၶႃႈဢေႃႈ။
၁၆ မၼ်ႈၸဝ်ႈယဵတ်ႇမိုဝ်းမၼ်းၸဝ်ႈၵႃႈၼိူဝ်ၼၼ်ႉသေလႄႈ ယိပ်းၵမ်ၵဝ်လႄႈ မၼ်းၸဝ်ႈဢဝ်ၵဝ် ဢွၵ်ႇသေၵႃႈၼႂ်းၼမ်ႉ ဢၼ်ယႂ်ႇၼႃႇၸိူဝ်း ၼၼ်ႉဢေႃႈ။
၁၇ ပိူဝ်ႈဢၼ်ၶဝ်ႁႅင်းယႂ်ႇၼႃႇသေၵဝ်လႄႈမၼ်းၸဝ်ႈၵႄႇသႄႇၼုၵ်ႈဢဝ်ၵဝ် ဢွၵ်ႇသေၵႃႈၼႂ်းမိုဝ်းရၢၼ်ႇသူႇၵဝ်ဢၼ်ႁႅင်းယႂ်ႇၼႃႇဢၼ်ဝႃႈ ၵႃႈၼႂ်းမိုဝ်းၶဝ်ၸိူဝ်းဢၼ်ၸင်းၵဝ်ၼၼ်ႉဢေႃႈ။လွင်ႈမၼ်းၸမ်းၶဝ်ၼၼ်ႉႁႅင်းယႂ်ႇၼႃႇသေၵဝ်လႄႈ ၵဝ်ဢမ်ႇပႄႉ ၶဝ်လႆႈ။
၁၈ ၶဝ်ၽုတ်းၽတ်းပေႃႇမႃးတီႈၵဝ် ၼႂ်းမိူဝ်ႈဝၼ်းဢၼ်ၵဝ်ႁွတ်ႈထိုင် ၽေးဢူးပၢတ်ႈၼၼ်ႉသေၵေႃႈ ထႃႇဝရႃႉၽြႃး ပဵၼ်တီႈဢၼ်ၵဝ်ဢိင်ပိုင်ႈယူႇ ဢေႃႈ။
၁၉ မၼ်းၸဝ်ႈဢဝ်ၵဝ်သူင်ႇၵႃႈတီႈဢၼ်ၵႂၢင်ႈလီလႃးလီလႄႈ မၼ်းၸဝ်ႈၵႄႇသႄႇတိုတ်ႉၸၼ်ဢဝ်ၵဝ် ၵွပ်ႈပိူဝ်ႈဢၼ် မၼ်းၸဝ်ႈၼႅတ်ႈသၢၵ်ႈႁၵ်ႉပႅင်းၵဝ်ၼၼ်ႉဢေႃႈ။
၂၀ ထႃႇဝရႃႉၽြႃး ပၼ်ဢၵျူဝ်း ၸွမ်းၵႃႈၼင်ႇဢၼ်ၵဝ်မီးတၢင်းသိုဝ်ႈတေႃႇၼၼ်ႉလႄႈ မၼ်းၸဝ်ႈတွပ်ႇတႅၼ်းပၼ်ၸွမ်း ၵႃႈၼင်ႇတၢင်းဢၼ်မိုဝ်းၵဝ်မူတ်း သႂ်ၼၼ်ႉဢေႃႈ။
၂၁ လွင်ႈမၼ်းၸမ်းၵဝ်ၸွမ်းသဵၼ်ႈတၢင်းထႃႇဝရႃႉၽြႃးယူႇသေႇသေႇလႄႈ ၵဝ်ဢမ်ႇႁဵတ်းႁၢႆႉႁဵတ်းမိူၵ်ႈ ဢမ်ႇဝေႈပႅတ်ႈၽြႃးပဵၼ်ၸဝ်ႈၵဝ်သေလႄႈ ၵႂႃႇ။
၂၂ လွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၵႃႈမီးၼၼ်ႉမီးယူႇသိုဝ်ႈၼႃႈတႂ်ႈတႃၵဝ်လႄႈ ၵဝ်ဢမ်ႇပႄႇဢမ်ႇပႅတ်ႈ ထုင်းၾိင်ႈတြႃးမၼ်းၸဝ်ႈ ၸိူဝ်းၼၼ်ႉ လႃးလႃး။
၂၃ ၵဝ်ၸေးၸုမ်ႇဝႆႉတင်းလွင်ႈဢၼ်လီဢၼ်ငၢမ်းၵႃႈတီႈၽၢႆႇၼႃႈမၼ်းၸဝ်ႈၼၼ်ႉလႄႈ ၵဝ်ဝေႈ ပႅတ်ႈတူႉၸရိူၵ်ႈတူဝ်ၸဝ်ႈၵဝ်ႇယူႇဢေႃႈ။
၂၄ ပိူဝ်ႈၼႆလႄႈထႃႇဝရႃႉၽြႃးတွပ်ႇတႅၼ်းပၼ်ဢၵျူဝ်းတီႈၵဝ် ၸွမ်းၵႃႈၼင်ႇဢၼ် ၵဝ်မီးတၢင်းဢၼ်သိုဝ်ႈတေႃႇ ဢိၵ်ႇတင်းၸွမ်းၵႃႈၼင်ႇဢၼ် တၢင်းဢၼ်မိုဝ်းၵဝ်မူတ်းသႂ် သိုဝ်ႈၼႃႈတႂ်ႈတႃမၼ်းၸဝ်ႈၼၼ်ႉယဝ်ႉ။
၂၅ တီႈၵေႃႉဢၼ်ဢိတ်းလူၼၼ်ႉ ၸဝ်ႈႁဝ်းၼႄပျႃး သၽေႃးတၢင်းဢၼ်ဢိတ်းလူလႄႈ ၊ တီႈၵေႃႉဢၼ်ၸေးၸုမ်ႇၼၼ်ႉၸဝ်ႈႁဝ်းၼႄပျႃး သၽေႃးဢၼ်ၸေးၸုမ်ႇတီႈၶႃႈ ဢေႃႈ။
၂၆ တီႈၵေႃႉဢၼ်သႂ်ၸၢင်ႇၼၼ်ႉၸဝ်ႈႁဝ်းၼႄပျႃးသၽေႃးဢၼ်သႂ်ၸၢင်ႇလႄႈ တီႈၵေႃႉဢၼ်ႁဵတ်းၶတ်းၼၼ်ႉ ၸဝ်ႈႁဝ်းၼႄပျႃးသၽေႃး ဢၼ်ႁဵတ်း ၶတ်းတီႈၶႃႈဢေႃႈ။
၂၇ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉၸိုင် ၸဝ်ႈႁဝ်းၵႄႇသႄႇၶျွတ်ႈဢဝ်လႄႈ ၼႃႈတႃဢၼ်ၽႅၼ်သုင်ၸမ်း ၸဝ်ႈႁဝ်းဢဝ်ၶျႃးတူၵ်းတီႈ တႅမ်ႇတီႈၶႃႈဢေႃႈ။
၂၈ ၸဝ်ႈႁဝ်းတႆႈၵွၵ်းၽႆးၶႃႈၸဝ်ႈတီႈၶႃႈလႄႈ ထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈႁႂ်ႈလပ်းသိင်ႇၶႃႈၸဝ်ႈလႅင်းတီႈၶႃႈဢေႃႈ။
၂၉ ၶႃႈၸဝ်ႈဢိင်ပိုင်ႈၸဝ်ႈႁဝ်းသေလႄႈ ၶုၼ်ႇလႅၼ်ႈၽင်ႇတၢပ်ႈတီႈၶႃႈလႄႈ ၶႃႈၸဝ်ႈဢိင်ပိုင်ႈၽြႃးပဵၼ်ၸဝ်ႈ သေလႄႈဝႅၼ်ၶၢမ်ႈလမ်းဝဵင်းၵႂႃႇတီႈၶႃႈဢေႃႈ။
၃၀ သဵၼ်ႈတၢင်းၽြႃးပဵၼ်ၸဝ်ႈၼၼ်ႉၸေးၸုမ်ႇလႄႈ သႅတ်ႈၸႃႇထႃႇဝရႃႉၽြႃးၶၢမ်ႇတၢင်းဢၼ်ၸႅတ်ႈထၢမ်လႄႈမူတ်းသႂ်ယူႇဢေႃႈ။မၼ်းၸဝ်ႈပဵၼ်ဢၼ်ႁႄႉဢၼ်ၵင်ႈ တီႈၶဝ်ၸိူဝ်းဢၼ် သွၼ်ႈပိုင်ႈမၼ်းၸဝ်ႈ တင်းသဵင်ႈတင်းလူင်ၼၼ်ႉဢေႃႈ။
၃၁ ၼွၵ်ႈသထေႃႇဝရႃႉၽြႃးၼၼ်ႉ ယင်းမီးၽြႃးပဵၼ်ၸဝ်ႈသူႇ လႂ် လူးၵွၼ်ႇ။ၼွၵ်ႈသေၽြႃးပဵၼ်ၸဝ်ႈႁဝ်းၼၼ်ႉ ယင်းမီးမၢၵ်ႇႁိၼ်မၢၵ်ႇၽႃဢၼ် လႂ် လူးၵွၼ်ႇ။
၃၂ ၽြႃးပဵၼ်ၸဝ်ႈၼၼ်ႉ ဢဝ်တင်းသၢႆဢႅဝ်ႁႅင်းတၼ်းၶူဝ်းႁတ်ႉၵဝ်လႄႈ ႁႂ်ႈသဵၼ်ႈတၢင်းဢၼ်ၵဝ်ၵႂႃႇၼၼ်ႉၸေးၸုမ်ႇဢေႃႈ။
၃၃ မၼ်းၸဝ်ႈ ႁႂ်ႈတိၼ်ၵဝ်ၶၼ်ၽႂ်းမိူၼ်ၸိူဝ်ႉၼင်ႇတိၼ်ၵႂၢင်ၼၼ်ႉလႄႈမၼ်းၸဝ်ႈဢဝ်ၵဝ်တၢင်ႇဝႆႉၵႃႈၼိူဝ် တီႈဢၼ်သုင်ၸိူဝ်းၼၼ်ႉဢေႃႈ။
၃၄ မၼ်းၸဝ်ႈသင်ႇသွၼ်ပၼ်မိုဝ်းၵဝ် ႁႂ်ႈမေႃႁႂ်ႈၸၢင်ႊလွင်ႈတၢင်းဢၼ်တိုၵ်းသိုၵ်းလႄႈ ၶႅၼ်ၵဝ်ဝူတ်ႈၵၢင်ႇတွင်းလိူင်လႆႈဢေႃႈ။
၃၅ ၸဝ်ႈႁဝ်း ဢဝ်ဢၼ်ႁႄႉဢၼ်ၵင်ႈ တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ ပၼ်တီႈၶႃႈၸဝ်ႈလႄႈမိုဝ်းၶွၼ်ၶႂႃၸဝ်ႈႁဝ်း ၸွႆႈၵမ်ႉၸွႆႈထႅမ်ၶႃႈၸဝ်ႈတီႈၶႃႈဢေႃႈ။တၢင်းဢၼ်ၸဝ်ႈႁဝ်းဢိတ်းလူယိူၼ်ႉၶၢမ်ႇၼၼ်ႉ ႁႂ်ႈၶႃႈၸဝ်ႈႁွတ်ႈထိုင်တၢင်းဢၼ်ယုၵ်ႉယွင်ႈဝႆႉ တီႈၶႃႈဢေႃႈ။
၃၆ ၸဝ်ႈႁဝ်းႁႂ်ႈသဵၼ်ႈတၢင်းဢၼ်တိၼ်ၶႃႈၸဝ်ႈယဵပ်ႇၼၼ်ႉၵႂၢင်ႈလီလႃးလီလႄႈ တႃတိၼ် ၶႃႈၸဝ်ႈဢမ်ႇပၢတ်ႈၵႂႃႇတီႈၶႃႈ။
၃၇ ၶႃႈၸဝ်ႈလိုပ်ႈၸွမ်းလမ်းၸွမ်းရၢၼ်ႇသူႇၶႃႈၸဝ်ႈတင်းလၢႆသေလႄႈ ၶိုတ်းၶဝ်လႄႈ ၸူဝ်ႈဢၼ်ဢမ်ႇပႆႇပႄႇၽဵဝ်ႈၶဝ်ပႅတ်ႈၼၼ်ႉ ၸိုင်ၵဝ်ဢမ်ႇၶိုၼ်းမႃးတီႈၶႃႈ။
၃၈ ၶႃႈၸဝ်ႈတိူဝ်ႉတူၵ်းသႂ်ႇၶဝ်တေႃႇထိုင်ႁွတ်ႈထၼ်ႈပေႃး ၶဝ်ဢမ်ႇလုၵ်ႉလႆႈလႄႈ ၶဝ်လူမ်ႉယူႇၵႃႈတႂ်ႈတိၼ်ၶႃႈၸဝ်ႈတီႈၶႃႈဢေႃႈ။
၃၉ လွင်ႈမၼ်းၸမ်း ၸဝ်ႈႁဝ်းဢဝ်သၢႆဢႅဝ်ႁႅင်းတၼ်းၶူဝ်းႁတ်ႉၶႃႈၸဝ်ႈႁႂ်ႈၶႃႈၸဝ်ႈမေႃၸၢင်ႊလွင်ႈတၢင်းဢၼ်တိုၵ်းသိုၵ်းလႄႈ ၸဝ်ႈႁဝ်းဢဝ်ၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၶႃႈၸဝ်ႈၸိူဝ်းၼၼ်ႉ လူမ်ႉတူၵ်းပႅတ်ႈ ၵႃႈတႂ်ႈၶႃႈၸဝ်ႈတီႈၶႃႈဢေႃႈ။
၄၀ ၸဝ်ႈႁဝ်းႁႂ်ႈရၢၼ်ႇသူႇၶႃႈၸဝ်ႈတင်းလၢႆဝၢႆႇလင်ပၼ်တီႈၶႃႈၸဝ်ႈလႄႈၶႃႈၸဝ်ႈယႃႉၽဵဝ်ႈ ၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉ ပႅတ်ႈတီႈၶႃႈဢေႃႈ။
၄၁ ၶဝ်ၼၼ်ႉႁွင်ႉသႅၼ်ႇႁွင်ႉႁႃသေၵေႃႈၵေႃႉဢၼ် ၵႄႇသႄႇၶျွတ်ႈဢဝ် ဢမ်ႇမီးလႄႈ ၶဝ်ႁွင်ႉသႅၼ်ႇႁွင်ႉႁႃထႃႇဝရႃႉၽြႃးသေၵေႃႈ မၼ်းၸဝ်ႈဢမ်ႇ ဢိူဝ်ႈ။
၄၂ ၶဝ်ၼၼ်ႉၸိုင်ၶႃႈၸဝ်ႈၼူတ်ႈလႅဝ်ဢွၼ်ႇဢွၼ်ႇႁႂ်ႈပဵၼ်ၽွင်မိူၼ်ၸိူဝ်ႉၼင်ႇ မုၼ်ႈလိၼ်ဢၼ်လူမ်းထူဝ်းၼၼ်ႉလႄႈ ၶႃႈၸဝ်ႈဢဝ်ၶဝ်ထွၵ်ႇပႅတ်ႈမိူၼ်ၸိူဝ်ႉၼင်ႇမုၼ်ႈဢၢင်ႈဢၢၵ်ႇ ၵႃႈတီႈၵၢင်တႃႈၵၢင်တၢင်းၼၼ်ႉ တီႈၶႃႈဢေႃႈ။
၄၃ ၸဝ်ႈႁဝ်းၵႄႇသႄႇဢဝ်ၶႃႈၸဝ်ႈလွတ်ႈသေၵႃႈၼႂ်း တၢင်းဢၼ်မုၵ်ႉၵူၼ်းၸိူဝ်းၵူၼ်းၶႃႈၸဝ်ႈတင်းလၢႆ ၶႄႉၶဵင်ႇတိုၵ်းတေႃးၵၼ်ယူႇၼၼ်ႉလႄႈၸဝ်ႈႁဝ်းႁႂ်ႈၶႃႈၸဝ်ႈ ပဵၼ်ၵႄႇပဵၼ်ႁူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ မုၵ်ႉၵူၼ်းၸိူဝ်းၵူၼ်း ဢၼ်ၶႃႈၸဝ်ႈဢမ်ႇတွၼ်ႉႁူႉၸၵ်းၼၼ်ႉၶၢမ်ႇႁဵတ်းၶႃႈတီႈၶႃႈၸဝ်ႈတီႈ ၶႃႈဢေႃႈ။
၄၄ ၶဝ်ဢွၼ်ၵၼ်ထွမ်ႇဢဝ်ၼႂ်းမိူဝ်ႈဢၼ်ၶဝ်ငိၼ်းသဵင်ၵႂၢမ်းၶႃႈၸဝ်ႈၼၼ်ႉလႄႈ ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ ႁဵတ်းၵိူမ်ႈႁဵတ်းလိူမ်ႈတီႈၶႃႈၸဝ်ႈတီႈ ၶႃႈဢေႃႈ။
၄၅ ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉႁဵဝ်ႇၸွပ်ႈၵႂႃႇလႄႈ ဢွၼ်ၵၼ်လုၵ်ႉသေၵႃႈၼႂ်းတိူၵ်ႈတိုၵ်းသိုၵ်းၶဝ်ၼၼ်ႉ သၼ်ႇသၼ်ႇသၢႆသၢႆဢွၵ်ႇၵႂႃႇတီႈၶႃႈ ဢေႃႈ။
၄၆ ထႃႇဝရႃႉၽြႃးဢသၢၵ်ႈလိပ်းယူႇလႄႈႁႂ်ႈမၢၵ်ႇႁိၼ်မၢၵ်ႇၽႃၵဝ်မီးမင်ႇၵလႃႇသေၵမ်းလူၺ်ႈ။ႁႂ်ႈၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ႈၵဝ်ၼၼ်ႉ မီး တၢင်းဢၼ်ယုၵ်ႉယွင်ႈသေၵမ်းလူၺ်ႈ။
၄၇ မၼ်းၸဝ်ႈပဵၼ်ၽြႃးပဵၼ်ၸဝ်ႈဢၼ်ယူႇၽၢႆႇၵဝ်သေလႄႈ ၸီႇယၢင်ႇၸွမ်းၼင်ႇတြႃးလႄႈဢဝ်မုၵ်ႉၵူၼ်းၸိူဝ်းၵူၼ်းၶျႃး တူၵ်းဝႆႉၵႃႈတႂ်ႈၵဝ်ၼၼ်ႉဢေႃႈ။
၄၈ မၼ်းၸဝ်ႈၵႄႇသႄႇဢဝ်ၵဝ်လွတ်ႈသေ ၵႃႈၼႂ်းမိုဝ်းရၢၼ်ႇသူႇၵဝ်ဢေႃႈ။ၸဝ်ႈႁဝ်း ယုၵ်ႉယွင်ႈၶႃႈၸဝ်ႈတၢင်ႇဝႆႉၵႃႈၼိူဝ်ၶဝ်ၸိူဝ်းဢၼ်လုၵ်ႉယူႇ ၽၢႆႇၼိုင်ႈတင်းၶႃႈၸဝ်ႈၼၼ်ႉလႄႈၸဝ်ႈႁဝ်းၵႄႇသႄႇၼုၵ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းၵေႃႉဢၼ်ႁိမ်ႁူင်ႇယႃႉယူၵ်ႉၼၼ်ႉ တီႈၶႃႈဢေႃႈ။
၄၉ ပိူဝ်ႈၼႆလႄႈ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉလႄႈ ႁဵတ်းၵႂၢမ်းထေႃးပၼႃႇ တီႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။
၅၀ မၼ်းၸဝ်ႈပၼ်တၢင်းဢၼ်ၵႄႇၶျွတ်ႈ ဢၼ်ယႂ်ႇၼႃႇလူင်လၢင်တီႈၶုၼ်လူင်မၼ်းၸဝ်ႈၼၼ်ႉဢေႃႈ။မၼ်းၸဝ်ႈႁဵတ်းၵျေးၸူးၵရူႉၼႃႇတီႈၸႃႉၸဵမ် ၵေႃႉဢၼ်လႆႈၶၢမ်ႇၽိၵ်ႉသိၵ်ႈၸဝ်ႈဢၼ်ပဵၼ် တႃႇဝိတ်ႉ ၼၼ်ႉဢိၵ်ႇတင်းၸိူဝ်ႉၶိူဝ်းမၼ်းတင်းလၢႆယူႇၶိင်ႇၵႃႇလႃႉသိုပ်ႇသိုပ်ႇတၢမ်ႈတၢမ်ႈတႃႇသေႇဢေႃႈ။