၁၃၉
၁ ထႃႇဝရႃႉၽြႃးတီႈၶႃႈ၊ၸဝ်ႈႁဝ်းၸႅတ်ႈတူၺ်းၶႃႈ ၸဝ်ႈလႄႈႁူႉတီႈၶႃႈဢေႃႈ။
၂ ၸဝ်ႈႁဝ်းႁူႉတၢင်းဢၼ်ၶႃႈၸဝ်ႈၼင်ႈယူႇ ဢိၵ်ႇတင်းတၢင်းဢၼ်ၶႃႈၸဝ်ႈၸုၵ်းယူႇၼၼ်ႉတီႈၶႃႈဢေႃႈ။ၸဝ်ႈႁဝ်းယူႇတီႈဢၼ်ၵႆလႄႈႁူႉတၢင်းဢၼ် ၶႃႈၸဝ်ႈ ၵျၢမ်ႇပွင်ယူႇၼၼ်ႉတီႈၶႃႈ ဢေႃႈ။
၃ ၸဝ်ႈႁဝ်းၸႅတ်ႈတူၺ်းသဵၼ်ႈတၢင်းဢၼ်ၶႃႈၸဝ်ႈၵႂႃႇၼၼ်ႉဢိၵ်ႇတင်း တီႈဢၼ်ၶႃႈၸဝ်ႈၼွၼ်းၼၼ်ႉလႄႈ ႁူႉၸႅင်ႈတၢင်းၵႂႃႇတၢင်းပႆၶႃႈၸဝ်ႈတင်း သဵင်ႈတင်းလူင်ၼၼ်ႉတီႈၶႃႈဢေႃႈ။
၄ ပဵၵ်ႉသမ်ႉၵႃႈတီႈလိၼ်ႉၶႃႈၸဝ်ႈၼႆႉ ဢမ်ႇမီးၵႂၢမ်းသေၶေႃႈသေၵမ်းသေၵေႃႈထႃႇဝရႃႉၽြႃးတီႈၶႃႈ ၸဝ်ႈႁဝ်းႁူႉလွင်ႈမၼ်းယူႇ တင်းသဵင်ႈတင်းမူတ်းတီႈၶႃႈဢေႃႈ။
၅ ၸဝ်ႈႁဝ်းလွမ်ၼႃႈလွမ်လင်ၶႃႈၸဝ်ႈဝႆႉသေလႄႈ ဢဝ်မိုဝ်းၸဝ်ႈႁဝ်း တၢင်ႇသႂ်ႇၵႃႈၼိူဝ်ၶႃႈၸဝ်ႈတီႈၶႃႈဢေႃႈ။
၆ ၺၢၼ်ႇၸိူဝ်ႉၼင်ႇၼၼ်ပဵၼ်ဢၼ်လီဢၢမ်းၼႃႇလႄႈ ၶႃႈၸဝ်ႈဢမ်ႇတတ်ႈၼိုင်ႇလႆႈတီႈၶႃႈ။ပဵၼ်ဢၼ်သုင်မျၢတ်ႈ ၼႃႇလႄႈၶႃႈၸဝ်ႈဢမ်ႇၶိုတ်းထိုင်လႆႈတီႈၶႃႈ။
၇ တၵ်းၵႂႃႇၵႃႈတီႈ လႂ်ႁႂ်ႈၵၢင်းလွတ်ႈတင်း ဝိၺိၺ်ႇၸဝ်ႈႁဝ်းလႆႈတီႈၶႃႈ။တၵ်းဢွၵ်ႇပၢႆႊၸူးၵႃႈတီႈ လႂ်ႁႂ်ႈၵၢင်းလွတ်ႈ တင်းၼႃႈၸဝ်ႈႁဝ်းလႆႈတီႈၶႃႈ။
၈ ပေႃးၶႃႈၸဝ်ႈၶိုၼ်ႈၵႂႃႇၵႃႈၼိူဝ်ၽႃႉၵၢင်ႁၢဝ်ၵေႃႈ ၸဝ်ႈႁဝ်းမီးယူႇၵႃႈတီႈ ၼၼ်ႉတီႈၶႃႈဢေႃႈ။
၉ ပေႃးၶႃႈၸဝ်ႈသိူဝ်ႇၽႃႈတီႈၼွၼ်းၵႃႈၼႂ်းမိူင်းမႃႇရၼႃႉၵေႃႈ ၸဝ်ႈႁဝ်းမီးယူႇၵႃႈ တီႈၼၼ်ႉတီႈၶႃႈဢေႃႈ။
၁၀ ပေႃးၶႃႈၸဝ်ႈဢဝ်ပိၵ်ႇၶဵင်ႈမိူဝ်ႈၵၢင်ၼႂ်ၼၼ်ႉသေလႄႈၵႂႃႇယူႇၵႃႈတီႈႁိမ်းလႅၼ်သုတ်းၼမ်ႉသမ်ႇမုၵ်ႉတြႃႇပုၼ်ႉၵေႃႈ ၵႃႈတီႈၼၼ်ႉၵေႃႈမိုဝ်းၸဝ်ႈႁဝ်းတၵ်းဢဝ်ၶႃႈၸဝ်ႈသူင်ႇလႄႈ မိုဝ်းၶွၼ်ၶႂႃၸဝ်ႈႁဝ်း တၵ်းယိပ်းၵမ်ၶႃႈၸဝ်ႈယူႇတီႈၶႃႈဢေႃႈ။
၁၁ ပေႃးၶႃႈၸဝ်ႈသမ်ႉလၢတ်ႈလႄႈဝႃႈ၊- လပ်းသိင်ႇတၵ်းႁူမ်ႇသုမ်ႇၵဝ်ဝႆႉလႄႈ ဢၼ်လႅင်းၵႃႈတီႈႁိမ်းၵဝ်ၼႆႉၵေႃႈတၵ်းပဵၼ်ၵၢင်ၶိုၼ်းၵႂႃႇဢေႃႈ၊ ဝႃႈၼင်ႇၼႆၸိုင်လပ်းသိင်ႇတၵ်းဢမ်ႇႁူမ်ႇသုမ်ႇ ၵႃႈတီႈၽၢႆႇၼႃႈၸဝ်ႈႁဝ်းလႆႈလႃးလႃးဢမၢၼ်ႇၶၼ်ပဵၼ်တီႈၶႃႈ။
၁၂ ၵႃႈၶိုၼ်းလႅင်းယူႇမိူၼ်ၸိူဝ်ႉၼင်ႇၵႃႈဝၼ်းတီႈၶႃႈဢေႃႈ။ဢၼ်လပ်းသိင်ႇဢိၵ်ႇတင်းဢၼ်လႅင်းမိူၼ် မိူၼ်ၵၼ်တီႈၸဝ်ႈႁဝ်းတီႈၶႃႈဢေႃႈ။
၁၃ ၸဝ်ႈႁဝ်းႁဵတ်းပဵၼ်မၢၵ်ႇလၼ်းၶႃႈၸဝ်ႈလႄႈ ႁူမ်ႇငမ်းၶႃႈၸဝ်ႈဝႆႉၵႃႈ ၼႂ်းတွင်ႉမေႈၶႃႈၸဝ်ႈတီႈၶႃႈယဝ်ႉ။
၁၄ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း ၵွပ်ႈပိူဝ်ႈဢၼ်ၶႃႈၸဝ်ႈတဵမ်ဝႆႉတင်းလၵ်ႈၶၼႃႇဢၼ်လီဢၢမ်း ဢိၵ်ႇတင်း လၵ်ႈၶၼႃႇဢၼ်လၢၵ်ႇလၢႆးၸိူဝ်းၼၼ်ႉတီႈၶႃႈဢေႃႈ။လွင်ႈတၢင်းဢၼ်ၸဝ်ႈႁဝ်းပွင်ႁဵတ်းၸိူဝ်းၼၼ်ႉပဵၼ်ဢၼ်လီဢၢမ်းၼႃႇလႄႈၸႂ်ဝိၺိၺ်ႇၶႃႈၸဝ်ႈ ႁူႉလွင်ႈမၼ်းယူႇ ဢမၢၼ်ႇၶၼ်ပဵၼ်တီႈၶႃႈဢေႃႈ။
၁၅ တူဝ်ၶၼ်ႇထႃႇၸဝ်ႈဢမ်ႇသိူင်ႇဝႆႉမႅပ်းဝႆႉသေၵႃႈတီႈၸဝ်ႈႁဝ်း ၼႂ်းမိူဝ်ႈဢၼ်ၶႃႈၸဝ်ႈလႆႈၶၢမ်ႇတၢင်းဢၼ်ႁဵတ်းပဵၼ် ၼႂ်းတီႈဢၼ်တဵတ်ႇဢၼ်မႅပ်းၼၼ်ႉလႄႈ လႆႈၶၢမ်ႇတၢင်းဢၼ်ပွင်ႁဵတ်းႁႂ်ႈၸပ်းၵၼ်ငီႇၵၼ်ယူႇ ၵႃႈတီႈတႂ်ႈလိၼ်မိူင်းတီႈ ၶႃႈဢေႃႈ။
၁၆ ၸဝ်ႈႁဝ်းႁၼ် ဢၼ်ပဵၼ်ၵွၼ်ႈပဵၼ်ၽူတ်းဢၼ်ဢမ်ႇပႆႇၸေးပႆႇၸုမ်ႇၸိူဝ်းၼၼ်ႉတီႈၶႃႈယဝ်ႉ။
မိူဝ်ႉဝၼ်းတင်းလၢႆ ဢၼ်ၸဝ်ႈႁဝ်းၸီႇယၢင်ႇဝႆႉလႄႈဢမ်ႇပႆႇပဵၼ်မႃးမီးမႃး သေမိူဝ်ႉသေဝၼ်းၸိူဝ်းၼၼ်ႉၵေႃႈ မီးတၢင်းဢၼ်မၢတ်ႈမၢႆတႅမ်ႈသႂ်ႇ ၵႃႈၼႂ်းၸရၢင်း ၸဝ်ႈႁဝ်းဝႆႉတင်းသဵင်ႈတင်းမူတ်းတီႈၶႃႈဢေႃႈ။
၁၇ ၽြႃးပဵၼ်ၸဝ်ႈတီႈၶႃႈ တၢင်းၵျၢမ်ႇတၢင်းပွင်ၸဝ်ႈႁဝ်းၸိူဝ်းၼၼ်ႉ ထိူၵ်ႈၵႃႈထိူၵ်ႈၶၼ်ၼႃႇလူင်လၢင် တီႈၶႃႈၸဝ်ႈတီႈၶႃႈဢေႃႈ။တၢင်းဢၼ်ၼပ်ႉပွင်းၵၼ်ယႂ်ႇၼမ်ၼႃႇ လူင်လၢင်တီႈၶႃႈဢေႃႈ။
၁၈ ပေႃးၶႃႈၸဝ်ႈၼပ်ႉဢၢၼ်ႇမၼ်းၸိုင်ယဵင်ႈၶႅၼ်းၼမ်ၼႃႇသေ မဵတ်ႉႁိၼ်မဵတ်ႉသၢႆးတီႈၶႃႈဢေႃႈ။မိူဝ်ႈဢၼ်ၶႃႈၸဝ်ႈတိုၼ်ႇမႃးၼၼ်ႉၸိုင်ၶႃႈၸဝ်ႈယင်းမီးယူႇၵႃႈတီႈၸဝ်ႈႁဝ်း တီႈၶႃႈဢေႃႈ။
၁၉ ၽြႃးပဵၼ်ၸဝ်ႈတီႈၶႃႈ၊ ၸဝ်ႈႁဝ်းၶႅၼ်းတေႃႈ ဢဝ်ၶဝ်ၸိူဝ်းဢၼ်ဢမ်ႇတြႃးၼၼ်ႉ တၢႆပႅတ်ႈသေၵမ်းတီႈၶႃႈ။သူၸိူဝ်းဢၼ်ဢဝ်လိူတ်ႈၵူၼ်းထွၵ်ႇပႅတ်ႈၼၼ်ႉဢိူၺ်း၊ဢွၼ်ၵၼ်ဢွၵ်ႇသေၵႃႈတီႈၵဝ်ၼႆႉၵႂႃႇတႃႉ။
၂၀ ၶဝ်ၼၼ်ႉ ဢွၼ်ၵၼ်ပုင်ႇၵၢၼ်ႇႁဵတ်းၶတ်းၵၼ်တင်းၸဝ်ႈႁဝ်းလႄႈ ရၢၼ်ႇသူႇၸဝ်ႈႁဝ်းၸိူဝ်းၼၼ်ႉ ဢုပ်ႇဢၢတ်ႇယူႇလၢႆလၢႆလွၵ်ႇလွၵ်ႇ ဢမ်ႇပွင်ႇလွင်ႈၵႃႈသင် တီႈၶႃႈဢေႃႈ။
၂၁ ထႃႇဝရႃႉၽြႃးတီႈၶႃႈ၊ၶႃႈၸဝ်ႈၸင်းၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉ ဢမ်ႇၸႂ်ႈၶႃႈႁိုဝ်။ၶႃႈၸဝ်ႈ လီႁင်ႈဢဵတ်ႇသဵတ်ႇၶဝ်ၸိူဝ်းဢၼ်ၸုၵ်းယူႇ ၽၢႆႇၼိုင်ႈတင်းၸဝ်ႈႁဝ်းၼၼ်ႉဢမ်ႇၸႂ်ႈၶႃႈႁိုဝ်။
၂၂ ၶႃႈၸဝ်ႈ ပႃးတင်းႁူဝ်ၸႂ်သဵင်ႈသဵင်ႈၸင်းၶဝ်ၸိူဝ်းၼၼ်ႉလႄႈ မၢတ်ႈၶဝ်ပဵၼ်ၸိူဝ်ႉၼင်ႇရၢၼ်ႇသူႇၶႃႈၸဝ်ႈ တီႈ ၶႃႈဢေႃႈ။
၂၃ ၽြႃးပဵၼ်ၸဝ်ႈတီႈၶႃႈ၊ၶႅၼ်းတေႃႈၸႅတ်ႈထၢမ်တူၺ်းၶႃႈၸဝ်ႈလႄႈ ႁူႉၸႅင်ႈႁူဝ်ၸႂ်ၶႃႈၸဝ်ႈ သေၵမ်းတီႈၶႃႈ။ၶႅၼ်းတေႃႈၸၢမ်းတူၺ်းၶႃႈၸဝ်ႈလႄႈႁူႉၸႅင်ႈတၢင်းဢၼ်ၶႃႈၸဝ်ႈထၢင်ႇၼၼ်ႉ သေၵမ်းတီႈ ၶႃႈ။
၂၄ ၶႅၼ်းတေႃႈလူႈတူၺ်းလွင်ႈဢၼ်ၶႃႈၸဝ်ႈၸွမ်းသဵၼ်ႈတၢင်းဢၼ်ႁၢႆႉႁိုဝ်၊ ဢမ်ႇၸွမ်းႁိုဝ်ၼၼ်ႉလႄႈဢဝ်ၶႃႈၸဝ်ႈ သူင်ႇၵႃႈၼႂ်းသဵၼ်ႈတၢင်းထႃႇဝရႃႉၼၼ်ႉသေၵမ်းတီႈၶႃႈ။