၃၁
၁ ထႃႇဝရႃႉၽြႃးတီႈၶႃႈ။ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇတီႈၶႃႈဢေႃႈ။ၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈတင်း တၢင်းဢၼ်ဢူၵ်းဢၼ်ဢၢႆယူႇ တႃႇသေႇဢမ်ႇထၢတ်ႇသေၵမ်းတီႈၶႃႈ။ၶႅၼ်းတေႃႈၸွမ်းလူၺ်ႈတၢင်းသိုဝ်ႈတေႃႇၸဝ်ႈႁဝ်းၼၼ်ႉသေလႄႈ ၵႄႇသႄႇဢဝ် ၶႃႈၸဝ်ႈလွတ်ႈသေၵမ်းတီႈၶႃႈ။
၂ ၶႅၼ်းတေႃႈဝၢႆႇႁူၸဝ်ႈႁဝ်းမႃးၸူးၽၢႆႇၶႃႈၸဝ်ႈလႄႈ ၵႄႇသႄႇၼုၵ်ႈဢဝ်ၶႃႈၸဝ်ႈၼၼ်ႉၶၼ်ၶၼ်ၽႂ်းၽႂႂ်းသေၵမ်းတီႈၶႃႈ။ၸဝ်ႈႁဝ်းၶႅၼ်းတေႃႈပဵၼ် မၢၵ်ႇႁိၼ်မၢၵ်ႇၽႃဢၼ်မၼ်ႈဢၼ်ၶိူင်ႇပုၼ်ႈၶႃႈၸဝ်ႈဢိၵ်ႇတင်းတိူၵ်ႈတီႈတိုၵ်းသိုၵ်း ပုၼ်ႈဢၼ်တၵ်းၵႄႇသႄႇၶျွတ်ႈဢဝ်ၶႃႈၸဝ်ႈ သေၵမ်းတီႈၶႃႈ။
၃ ၸဝ်ႈႁဝ်းပဵၼ်မၢၵ်ႇႁိၼ်မၢၵ်ႇၽႃၶႃႈၸဝ်ႈတိူၵ်ႈတီႈတိုၵ်းသိုၵ်းၶႃႈၸဝ်ႈ ဢမၢၼ်ႇၶၼ်ပဵၼ်တီႈၶႃႈဢေႃႈ။ၶႅၼ်းတေႃႈဢဝ်ၶႃႈၸဝ်ႈသူင်ႇလႄႈၼႄပျႃးသဵၼ်ႈတၢင်းတီႈၶႃႈၸဝ်ႈ ပုၼ်ႈၼႃႇမႃႉၸိုဝ်ႈ သဵင်ၸဝ်ႈႁဝ်းသေၵမ်းတီႈၶႃႈ။
၄ ၵွပ်ႈပိူဝ်ႈဢၼ်ၸဝ်ႈႁဝ်းပဵၼ်တိူၵ်ႈတီႈတိုၵ်းသိုၵ်းၶႃႈၸဝ်ႈလႄႈ ၶႅၼ်းတေႃႈၼုၵ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းတူင်ႇႁဵဝ်ႉတူင်ႇၶိုမ်းဢၼ်ၵၢင်ဝႆႉပုၼ်ႈၶႃႈၸဝ်ႈၼၼ်ႉ သေၵမ်းတီႈၶႃႈ။
၅ ၶႃႈၸဝ်ႈဢဝ် ဝိၺိၺ်ႇၶႃႈၸဝ်ႈ ဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ထႃႇဝရႃႉၽြႃးၽြႃးပဵၼ်ၸဝ်ႈဢၼ်ပႂ်ႉသႅတ်ႈၸႃႇၼၼ်ႉတီႈၶႃႈ၊ ၸဝ်ႈႁဝ်း ထူတ်ႇၼုၵ်ႈဢဝ်ၶႃႈၸဝ်ႈတီႈၶႃႈဢေႃႈ။
၆ ၶႃႈၸဝ်ႈၸင်းၶဝ်ၸိူဝ်းဢၼ် ၸပ်းၸွမ်းမူႉသႃႇဢၼၼ်ႇတႃႉၸိူဝ်းၼၼ်ႉလႄႈ ၶႃႈၸဝ်ႈဢိင်ပိုင်ႈထႃႇဝရႃႉၽြႃးတီႈၶႃႈ ဢေႃႈ။
၇ ၶႃႈၸဝ်ႈတၵ်းမီးတၢင်းဢၼ်ၸူမ်းသိူဝ်းသႂၢင်ႇၸႂ်ၼႂ်းၵရူႉၼႃႇၸဝ်ႈႁဝ်းတီႈၶႃႈဢေႃႈ။ၸဝ်ႈႁဝ်းလူႈတူၺ်း တၢင်းဢၼ်ၶႃႈၸဝ်ႈယၢၵ်ႈၽၢၼ်ၼၼ်ႉလႄႈႁူႉႁၼ်တုၵ်ႉၶႃႉတၢင်းယၢၵ်ႈတၢင်းၽၢၼ် ဝိၺိၺ်ႇၶႃႈ ၸဝ်ႈၼၼ်ႉတီႈၶႃႈဢေႃႈ။
၈ ၸဝ်ႈႁဝ်းယင်းဢမ်ႇဢဝ်ၶႃႈၸဝ်ႈ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈတင်းလၢႆလႄႈ ဢဝ်တိၼ်ၶႃႈၸဝ်ႈတမ်းသႂ်ႇပၼ်ၵႃႈၼႂ်းတီႈဢၼ်ၵႂၢင်ႈလီလႃးလီၼၼ်ႉ တီႈၶႃႈဢေႃႈ။
၉ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈဢိတ်းလူၶႃႈၸဝ်ႈၵွပ်ႈပိူဝ်ႈဢၼ်ၶႃႈၸဝ်ႈ ႁွတ်ႈထိုင်တၢင်းဢၼ်ၵိတ်ႇၸႂ်ၵႅၼ်းၸႂ်ၼၼ်ႉသေၵမ်းတီႈၶႃႈ။မၢၵ်ႇတႃၶႃႈၸဝ်ႈ၊ႁူဝ်ၸႂ်ၶႃႈၸဝ်ႈ၊တင်းတွင်ႉၶႃႈၸဝ်ႈလူႉၵႂႃႇလႅဝ်ၵႂႃႇ ၵွပ်ႈပိူဝ်ႈတၢင်းဢၼ်ယၢပ်ႇၸႂ်မႆႈၸႂ်ႁွၼ်ႉၸႂ်ၼၼ်ႉ တီႈၶႃႈ ယဝ်ႉ။
၁၀ ၶႃႈၸဝ်ႈမီးတၢင်းဢၼ်မႆႈၸႂ်ႁွၼ်ႉၸႂ်ယူႇသေလႄႈ ဢသၢၵ်ႈၶႃႈၸဝ်ႈလႆႈပူၼ်ႉၵႂႃႇတီႈၶႃႈဢေႃႈ။ၶႃႈၸဝ်ႈလႆႈၶင်းၶီၶင်းၽၢၼ်ယူႇ ၵူႈပီႊတီႈၶႃႈဢေႃႈ။ႁႅင်းၶႃႈၸဝ်ႈဢူၼ်ႈၵႂႃႇၵွပ်ႈပိူဝ်ႈဢပျႅတ်ႈၶႃႈၸဝ်ႈၼၼ်ႉလႄႈ လုပ်ႇၶႃႈၸဝ်ႈတင်းလၢႆ ၽင်ႉဢူႉၵႂႃႇတီႈ ၶႃႈဢေႃႈ။
၁၁ ၵွပ်ႈပိူဝ်ႈရၢၼ်ႇသူႇၶႃႈၸဝ်ႈ တင်းသဵင်ႈတင်းလူင်ၼၼ်ႉ ၶႃႈၸဝ်ႈ ပဵၼ်တီႈဢၼ်သေႉဢၼ်သွမ်းၼႃႇလူင်လၢင် တီႈၵူၼ်းႁိူၼ်းၸမ်ၵၼ် ဢိၵ်ႇတင်းတၢင်းဢၼ်လီႁင်ႈဢဵတ်ႇသဵတ်ႇ တီႈၶဝ်ၸိူဝ်းဢၼ်မိုတ်ႈၵိုဝ်းၵၼ်တင်း ၶႃႈၸဝ်ႈၸိူဝ်းၼၼ်ႉတီႈၶႃႈဢေႃႈ။ၶဝ်ၸိူဝ်းဢၼ်ထူပ်းႁၼ်ၶႃႈၸဝ်ႈၵႃႈတီႈၼွၵ်ႈႁိူၼ်းၸိူဝ်းၼၼ်ႉဢွၼ်ၵၼ်ဢွၵ်ႇပၢႆၶႃႈၸဝ်ႈ တီႈၶႃႈ ဢေႃႈ။
၁၂ ၶဝ်လူင်လိုမ်းၶႃႈၸဝ်ႈပႅတ်ႈမိူၼ်ၸိူဝ်ႉၼင်ႇတူဝ်တၢႆဢၼ်ဢမ်ႇၶုၵ်းၸႂ်လႆႈၶႆႈၸႂ်ထူပ်းၼၼ်ႉလႄႈ ၶႃႈၸဝ်ႈလႆႈပဵၼ်ၸိူဝ်ႉၼင်ႇ ၽၢၵ်ႇမေႃႈၼၼ်ႉ တီႈၶႃႈ ဢေႃႈ။
၁၃ ၶႃႈၸဝ်ႈလႆႈငိၼ်းတၢင်းဢၼ်ၵူၼ်းၼမ်ၼႃႇၶၢႆႇၸိုဝ်ႈၶႃႉသဵင်ၼၼ်ႉလႄႈ လွင်ႈတၢင်းဢၼ်လီၵူဝ်လီႁႄၼၼ်ႉမီးယူႇၵူႈၽၢႆႇၵူႈပႃႈတီႈၶႃႈဢေႃႈ။ၼႂ်းမိူဝ်ႈဢၼ် ၶဝ်ဢွၼ်ၵၼ်ယူႇၽၢႆႇၼိုင်ႈတင်းၶႃႈၸဝ်ႈသေလႄႈ တိူင်ႇပၢင်ႇလၢတ်ႈၸႃၵၼ်ယူႇၼၼ်ႉၸိုင် ၶဝ်ၵျၢမ်ႇပွင် ႁႂ်ႈလႆႈဢဝ်ဢသၢၵ်ႈၶႃႈၸဝ်ႈတၢႆ တီႈၶႃႈ ဢေႃႈ။
၁၄ ၼႂ်းဝႃႈၼၼ်သေၵေႃႈ ထႃႇဝရႃႉၽြႃးတီႈၶႃႈ၊ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇတီႈၶႃႈဢေႃႈ။ၶႃႈၸဝ်ႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းပဵၼ်ၽြႃးပဵၼ်ၸဝ်ႈၵဝ်ၶႃႈတီႈၶႃႈယဝ်ႉ၊ဝႃႈၼင်ႇၼႆတီႈၶႃႈဢေႃႈ။ၶိင်ႇၵႃႇလႃႉၶႃႈၸဝ်ႈမီးယူႇ ၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။
၁၅ ၶႅၼ်းတေႃႈၵႄႇၼုၵ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈ ဢိၵ်ႇတင်းၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉ သေၵမ်းတီႈၶႃႈ။
၁၆ ႁႂ်ႈၼႃႈၸဝ်ႈႁဝ်းၼၼ်ႉ လႅင်းထွင်ႇသႂ်ႇၵႃႈတီႈၶႃႈၸဝ်ႈႁဝ်းသေၵမ်းတီႈၶႃႈ။ၶႅၼ်းတေႃႈၸွမ်းလူၺ်ႈၵရူႉၼႃႇၸဝ်ႈႁဝ်းသေလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈသေ ၵမ်းတီႈၶႃႈ။
၁၇ ထႃႇဝရႃႉၽြႃးတီႈၶႃႈ၊ ၵွပ်ႈပိူဝ်ႈဢၼ်ၶႃႈၸဝ်ႈႁဵတ်းသူးတွင်းပထၼႃႇ တီႈၸဝ်ႈႁဝ်းယူႇလႄႈယႃႇပေႁႂ်ႈၶႃႈၸဝ်ႈမီးတၢင်းဢၼ်ဢူၵ်းဢၼ်ဢၢႆ သေၵမ်းတီႈၶႃႈ။ႁႂ်ႈၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ မီးတၢင်းဢၼ်ဢူၵ်းဢၼ်ဢၢႆလႄႈ တဵတ်ႇယဵၼ်ယူႇၵႃႈၼႂ်းမိူင်းမႃႇရၼႃႉပုၼ်ႉသေၵမ်းတီႈၶႃႈ။
၁၈ ႁႂ်ႈသူပ်းဢၼ်သုင်းသွင်ႇမူႉသႃႇလႄႈ ယူႇၽၢႆႇၼိုင်ႈတင်းၵူၼ်းသိုဝ်ႈတေႃႇသေယဝ်ႉလၢတ်ႈၵႂၢမ်းဢၼ်ဢမ်ႇၼပ်ႉဢမ်ႇၶၢၼ်း ဢိၵ်ႇတင်း တၢင်းဢၼ်မႃႇၼႃႉၸႂ်သုင်တင်းတၢင်းဢၼ်ႁဵတ်းဢမ်ႇပေႃးၼင်ႇႁိုဝ်ၸိူဝ်းၼၼ်ႉ လႆႈယူႇတဵတ်ႇတဵတ်ႇယဵၼ်ယဵၼ်သေၵမ်းတီႈၶႃႈ။
၁၉ ၵျေးၸူးဢၼ်ၸဝ်ႈႁဝ်းဢဝ်သိမ်းဝႆႉပုၼ်ႈၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်း ဢၼ်ၸဝ်ႈႁဝ်းမႄးႁဵတ်းပုၼ်ႈၶဝ်ၸိူဝ်းဢၼ်ဢိင်ပိုင်ႈၸဝ်ႈႁဝ်းၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ ယႂ်ႇၼႃႇလူင်လၢင်တီႈၶႃႈဢေႃႈ။
၂၀ ၸဝ်ႈႁဝ်း ဢဝ်ၶဝ်သိူင်ႇဝႆႉလပ်ႉဝႆႉၵႃႈၼႂ်းတီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉလႄႈႁႂ်ႈၶဝ်လႆႈၵၢင်းလွတ်ႈတင်းပရိယႄႇၵူၼ်းတင်းလၢႆၼၼ်ႉ တီႈၶႃႈဢေႃႈ။ၸဝ်ႈႁဝ်းပႂ်ႉလူႈပႂ်ႉတူၺ်းၶဝ်ယူႇ ၵႃႈၼႂ်းသုမ်ႉထဵင်ၸဝ်ႈႁဝ်းသေလႄႈ ႁႄႉၵင်ႈႁႄႉလပ်ႉသိင်ႇသူပ်းဢၼ်ၽိတ်း ၵၼ်ၽႅၵ်ႇၵၼ်ၼၼ်ႉတီႈၶႃႈဢေႃႈ။
၂၁ ႁႂ်ႈထႃႇဝရႃႉၽြႃးမီးမင်ႇၵလႃႇသေၵမ်းလူၺ်ႈ။လွင်ႈမၼ်းၸမ်းၸဝ်ႈႁဝ်းၼႄပျႃးမႅတ်ႈတႃႇၵရူႉၼႃႇၸဝ်ႈႁဝ်း ဢၼ်လီဢၢမ်းၼၼ်ႉတီႈၶႃႈၸဝ်ႈ ၵႃႈၼႂ်းဝဵင်းဢၼ်မၼ်ႈဢၼ်ၶိူင်ႇ ၼၼ်ႉတီႈၶႃႈဢေႃႈ။
၂၂ ပဵၵ်ႉသမ်ႉၶႃႈၸဝ်ႈသၼ်ႇသၼ်ႇသၢႆသၢႆယူႇသေလႄႈလၢတ်ႈဝႃႈ၊ ၵဝ်ၼႆႉလႆႈၶၢမ်ႇတၢင်းဢၼ်ဢဝ်ပႄႇပႅတ်ႈသေ ၵႃႈတီႈၽၢႆႇၼႃႈမၢၵ်ႇတႃၸဝ်ႈႁဝ်းယဝ်ႉ၊ ဝႃႈၼင်ႇၼႆသေၵေႃႈ မိူဝ်ႈဢၼ်ၶႃႈၸဝ်ႈႁွင်ႉသႅၼ်ႇၸူးတီႈၸဝ်ႈႁဝ်းၼၼ်ႉၸိုင် ၸဝ်ႈႁဝ်းထွမ်ႇဢဝ်သဵင်ၵႂၢမ်း ဢၼ်ၶႃႈၸဝ်ႈႁဵတ်းသူးတွင်းပထ ၼႃႇၼၼ်ႉတီႈၶႃႈဢေႃႈ။
၂၃ ၵူၼ်းဢၼ်ထႃႇဝရႃႉၽြႃးႁၵ်ႉပႅင်းတင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ႁၵ်ႉထႃႇဝရႃႉၽြႃးတႃႉ။ထႃႇဝရႃႉၽြႃးပႂ်ႉလူႈပႂ်ႉတူၺ်းၶဝ်ၸိူဝ်းဢၼ်မီးသႅတ်ႈၸႃႇၼၼ်ႉလႄႈ တွပ်ႇတႅၼ်းပၼ်ဢပျႅတ်ႈၼမ်ၼႃႇ တီႈၶဝ်ၸိူဝ်းဢၼ်မႃႇၼႃႉသုင်ၼၼ်ႉ ဢေႃႈ။
၂၄ ၵူၼ်းဢၼ်ဢိင်ပိုင်ႈထႃႇဝရႃႉၽြႃးတင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ဢဝ်ႁႅင်းလႄႈမီးႁူဝ်ၸႂ်ဢၼ်ႁတ်းႁၢၼ်တႃႉ။