၅၆
၁ ၽြႃးပဵၼ်ၸဝ်ႈတီႈၶႃႈ ၶႅၼ်းတေႃႈဢိတ်းလူၶႃႈၸဝ်ႈသေၵမ်းတီႈၶႃႈ။လွင်ႈမၼ်းၸမ်းၵူၼ်းထူၺ်ႈၸႂ်သဝ်ႇၸႂ်လူင်ၶဝ်လိုပ်ႈၸွမ်းလႄႈႁဵတ်းတၢင်းဢၼ်တိုၵ်းသိုၵ်းယူႇသေလႄႈ ၼိၵ်ႈၸၢၵ်ႈငႅၼ်းသေးၶႃႈၸဝ်ႈယူႇ တင်းဝၼ်းတင်းဝၼ်းတီႈၶႃႈဢေႃႈ။
၂ ရၢၼ်ႇသူႇၶႃႈၸဝ်ႈၸိူဝ်းၼၼ်ႉဢွၼ်ၵၼ်ထူၺ်ႈၸႂ်သဝ်ႇၸႂ်လူင်လႄႈ လိုပ်ႈၸွမ်းၶႃႈၸဝ်ႈယူႇတင်းဝၼ်းတင်းဝၼ်းလႄႈ ၶဝ်ၸိူဝ်းဢၼ်မီးတင်းၸႂ်ဢၼ်ၽႅၼ်သုင်သေလႄႈ တိုၵ်းတေႃးၶႃႈၸဝ်ႈၼၼ်ႉမီးၼမ်ၼႃႇတီႈၶႃႈ ဢေႃႈ။
၃ မိူဝ်ႈဢၼ်ၶႃႈၸဝ်ႈၵူဝ်ႁႄၼၼ်ႉၶႃႈၸဝ်ႈတၵ်း ဢိင်ပိုင်ႈၸဝ်ႈႁဝ်းတီႈၶႃႈဢေႃႈ။
၄ ၵဝ်ဢိင်ပိုင်ႈၽြႃးပဵၼ်ၸဝ်ႈသေလႄႈယွင်ႈယေႃးၼုၵ်ႉၵပၢတ်ႈမၼ်းၸဝ်ႈဢေႃႈ။ၵဝ်သွၼ်ႈပိုင်ႈၽြႃးပဵၼ်ၸဝ်ႈယူႇလႄႈဢမ်ႇမီးတီႈဢၼ်တၵ်းၵူဝ်တၵ်းႁႄ။ၵူၼ်းတၵ်းႁဵတ်းၸိူဝ်ႉၼင်ႇ ႁိုဝ်တီႈၵဝ်လႆႈ။
၅ ၶဝ်ၼၼ်ႉဢဝ်ၵႂၢမ်းၵဝ်ပိူင်ႈၵႂႃႇတင်းဝၼ်းတင်းဝၼ်းလႄႈ တၢင်းၵျၢမ်ႇတၢင်းပွင်ၶဝ်ၼၼ်ႉပဵၼ် ဢၼ်ဢမ်ႇလီဢမ်ႇငၢမ်းၵူၺ်းၵူၺ်းတီႈၶႃႈဢေႃႈ။
၆ ၶဝ်ၼၼ်ႉၸူႉၵၼ်တုမ်ၵၼ်ယူႇလွမ်တူၺ်းယူႇ မၢတ်ႈတွင်းႁွႆးသူၼ်ႈတိၼ်ၵဝ်တင်းလၢႆယူႇ ၸွမ်းၵႃႈၼင်ႇဢၼ် ၶဝ်လွမ်ပႂ်ႉဢသၢၵ်ႈၵဝ်ယူႇၼၼ်ႉဢေႃႈ။
၇ ၶဝ်ၼၼ်ႉတၵ်းလႆႈမီးတၢင်းဢၼ်ၵၢင်းလွတ်ႈ ၵွပ်ႈပိူဝ်ႈလွင်ႈတၢင်းဢၼ်ဢမ်ႇတြႃးၼၼ်ႉၶႃႈႁိုဝ်း။ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈပႃးတင်းတၢင်းၸႂ်မႆႈၶႂ်ႈၸႃႉသေလႄႈ ႁႂ်ႈမဵဝ်းၵူၼ်းတင်းလၢႆလူမ်ႉပႅတ်ႈသေၵမ်းၶႃႈ။
၈ ၸဝ်ႈႁဝ်းမၢတ်ႈတွင်း လွင်ႈတၢင်းဢၼ်ၶႃႈၸဝ်ႈပွင်ႉၶင်းလႄႈၵႂႃႇၵူႈတီႈၵူႈလႅၼ်ယူႇၼၼ်ႉ ၶႅၼ်းတေႃႈဢဝ်ၼမ်ႉတႃၶႃႈၸဝ်ႈတင်းလၢႆထႅမ်သႂ်ႇ ၵႃႈၼႂ်းၼမ်ႉတဝ်ႈၸဝ်ႈႁဝ်းသေၵမ်းတီႈၶႃႈ။မီးယူႇၵႃႈၼႂ်းလိၵ်ႈၸရၢင်းၸဝ်ႈႁဝ်း ဢမ်ႇၸႂ်ႈတီႈၶႃႈႁိုဝ်။
၉ မိူဝ်ႈဢၼ်ရၢၼ်ႇသူႇၵဝ်တင်းလၢႆတၵ်းလႆႈသုတ်ႈၶိုၼ်းၵႂႃႇ ၼႂ်းမိူဝ်ႈဢၼ်ၵဝ်သႅၼ်ႇႁွင်ႉၼၼ်ႉလႄႈ ၵဝ်ႁူႉလွင်ႈဢၼ်ၽြႃးပဵၼ်ၸဝ်ႈမီးယူႇၽၢႆႇ ၵဝ်ၼၼ်ႉဢေႃႈ။
၁၀ ၵဝ်ဢိင်ပိုင်ႈၽြႃးပဵၼ်ၸဝ်ႈသေလႄႈယွင်ႈယေႃးၼုၵ်ႉၵပၢတ်ႈမၼ်းၸဝ်ႈဢေႃႈ။
၁၁ ၵဝ်သွၼ်ႈပိုင်ႈၽြႃးပဵၼ်ၸဝ်ႈယူႇလႄႈၵဝ်ဢမ်ႇမီးတီႈဢၼ်တၵ်းၵူဝ်တၵ်းႁႄ။ၵူၼ်းတၵ်းႁဵတ်းၸိူဝ်ႉၼင်ႇႁိုဝ်တီႈ ၵဝ်လႆႈ။
၁၂ ၽြႃးပဵၼ်ၸဝ်ႈတီႈၶႃႈ၊ တၢင်းဢၼ်ႁဵတ်းၵတိသႅတ်ႈၸႃႇတီႈၸဝ်ႈႁဝ်းၼၼ်ႉမီးယူႇတီႈၶႃႈၸဝ်ႈလႄႈၶႃႈၸဝ်ႈ တၵ်းၽေႇဝၢတ်ႈသႅတ်ႈၸႃႇယွင်ႈ ယေႃးၸဝ်ႈႁဝ်းတီႈၶႃႈဢေႃႈ။
၁၃ လွင်ႈမၼ်းၸမ်းၸဝ်ႈႁဝ်းၵႄႇသႄႇၼုၵ်ႈဢဝ်ဢသၢၵ်ႈၶႃႈၸဝ်ႈ ဢွၵ်ႇသေၵႃႈၼႂ်းတၢင်းတၢႆတီႈၶႃႈယဝ်ႉ။ၸဝ်ႈႁဝ်းၵႄႇသႄႇၼုၵ်ႈဢဝ်တိၼ်ၶႃႈၸဝ်ႈ ဢွၵ်ႇသေၵႃႈၼႂ်းတၢင်းဢၼ်တိူဝ်ႉမႅၼ်ႈလႄႈလူမ်ႉၼၼ်ႉ ႁႂ်ႈၶႃႈၸဝ်ႈလႆႈၵႂႃႇမႃးၽၢႆႇၼႃႈၽြႃးပဵၼ်ၸဝ်ႈ ၵႃႈၼႂ်းဢၼ်လႅင်းဢသၢၵ်ႈၼၼ်ႉၶႃႈယဝ်ႉ။