၈၆
၁ ထႃႇဝရႃႉၽြႃးတီႈၶႃႈ၊ၶႅၼ်းတေႃႈႁေႈႁူၸဝ်ႈႁဝ်းၸူးလႄႈၶိုၼ်းဢိူဝ်ႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈပဵၼ်ဢၼ်ယၢၵ်ႈဢၼ်ၽၢၼ်လႄႈ ၸုတ်ႈလုတ်ႈတီႈ ၶႃႈဢေႃႈ။
၂ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈပႂ်ႉဝိၺိၺ်ႇၶႃႈၸဝ်ႈ ၵွပ်ႈပိူဝ်ႈဢၼ်ၶႃႈၸဝ်ႈပဵၼ်ၵေႃႉဢၼ်ၸဝ်ႈႁဝ်းႁၵ်ႉပႅင်းၼၼ်ႉလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈႁဝ်း ဢၼ်ဢိင်ပိုင်ႈၸဝ်ႈႁဝ်းယူႇၼႆႉသေၵမ်း တီႈၶႃႈ။
၃ ၸဝ်ႈၽြႃးတီႈၶႃႈ၊ၵွပ်ႈပိူဝ်ႈဢၼ်ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်းယူႇ တင်းဝၼ်းတင်းဝၼ်းလႄႈၶႅၼ်းတေႃႈဢိတ်းလူၸွႆႈထႅမ်ၶႃႈၸဝ်ႈ သေၵမ်း တီႈၶႃႈ။
၄ ၸဝ်ႈၽြႃးတီႈၶႃႈ၊ ၵွပ်ႈပိူဝ်ႈၶႃႈၸဝ်ႈၵၢဝ်ႇႁႃဢေႁႃၸဝ်ႈႁဝ်းယူႇလႄႈ ၶႅၼ်းတေႃႈႁဵတ်းႁႂ်ႈႁူဝ်ၸႂ်ၶႃႈၸဝ်ႈလႆႈၸူမ်းသိူဝ်း သေၵမ်းတီႈၶႃႈ။
၅ ၸဝ်ႈၽြႃးတီႈၶႃႈ ၸဝ်ႈႁဝ်းတဵမ်ဝႆႉတင်းသၽေႃးဢၼ်လီဢၼ်ငၢမ်း၊ ဢိၵ်ႇတင်းသၽေႃးဢၼ်ယိူၼ်ႉၶၢမ်ႇလႄႈ ၵရူႉၼႃႇၸဝ်ႈႁဝ်းလိူင်ႇၼမ်ၼႃႇတီႈၶဝ်ၸိူဝ်းဢၼ်ႁဵတ်းပထၼႃႇတီႈၸဝ်ႈႁဝ်း တင်းသဵင်ႈတင်းလူင်ၼၼ်ႉတီႈၶႃႈဢေႃႈ။
၆ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈဝၢႆႇႁူၸူးပထၼႃႇၶႃႈၸဝ်ႈ သေၵမ်းတီႈၶႃႈ။ၶႅၼ်းတေႃႈထွမ်ႇဢဝ်သဵင်ၵႂၢမ်းဢၼ်ၶႃႈၸဝ်ႈလဝ်ႈယွၼ်း ၶၢမ်ႇဢဝ်တၢင်းဢၼ် ၸဝ်ႈႁဝ်းဢိတ်းလူၼၼ်ႉသေၵမ်းတီႈၶႃႈ။
၇ ၼႂ်းဝၼ်းဢၼ်ၽေးႁွတ်ႈထိုင်ၼၼ်ႉ ၶႃႈၸဝ်ႈတၵ်းႁွင်ႉႁႃၸဝ်ႈ ႁဝ်းလႄႈၸဝ်ႈႁဝ်းတၵ်းဢိူဝ်ႈတီႈၶႃႈဢေႃႈ။
၈ ၸဝ်ႈၽြႃးတီႈၶႃႈ၊ ၵႃႈၼႂ်းၽြႃးတင်းလၢႆ ၽြႃးဢၼ်မိူၼ်ၸိူဝ်ႉၼင်ႇၸဝ်ႈႁဝ်းဢမ်ႇမီးတီႈၶႃႈ။ဢမူႉဢၼ်မိူၼ်ၼင်ႇဢမူႉၸဝ်ႈႁဝ်းၸိူဝ်းၼၼ်ႉၵေႃႈ ဢမ်ႇမီးတီႈၶႃႈ။
၉ ၸဝ်ႈၽြႃးတီႈၶႃႈ ၊မဵဝ်းၵူၼ်းၵႃႈဢၼ်ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၼၼ်ႉ တၵ်းဢွၼ်ၵၼ်သုတ်ႉၸပ်းသုတ်ႉၸူးသေလႄႈ ၶုပ်ႉမူပ်ႇၵႃႈတီႈၽၢႆႇၼႃႈၸဝ်ႈႁဝ်းလႄႈ ယွင်ႈယေႃးမုၼ်ၽုင်းၼႃႇမႃႉၸိုဝ်ႈသဵင်ၸဝ်ႈ ႁဝ်းတီႈၶႃႈဢေႃႈ။
၁၀ ၸဝ်ႈႁဝ်းပဵၼ်ဢၼ်ယႂ်ႇမျၢတ်ႈၼႃႇလႄႈ ႁဵတ်းလွင်ႈတၢင်းဢၼ်လီဢၢမ်း တင်းလၢႆတီႈၶႃႈဢေႃႈ။ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။
၁၁ ထႃႇဝရႃႉၽြႃးတီႈၶႃႈ၊ၶႅၼ်းတေႃႈၼႄပျႃးသဵၼ်ႈတၢင်းၸဝ်ႈႁဝ်းတီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတၵ်းၸွမ်းၵႂႃႇ ၵႃႈၼႂ်းသဵၼ်ႈတၢင်းသမ်ႇမႃႇတြႃးတီႈၶႃႈဢေႃႈ။ၶႅၼ်းတေႃႈႁႂ်ႈႁူဝ်ၸႂ်ၶႃႈၸဝ်ႈငီႇၽွမ်ႉၵၼ်ႁႂ်ႈၶႃႈၸဝ်ႈ လႆႈရူဝ်ႇသေႇၵူဝ်ယမ် ၼႃႇမႃႉၸိုဝ်သဵင် ၸဝ်ႈႁဝ်းသေၵမ်းတီႈၶႃႈ။
၁၂ ၸဝ်ႈၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႃႈၸဝ်ႈတၵ်းပႃးတင်းႁူဝ်ၸႂ်သဵင်ႈသဵင်ႈသေလႄႈယွင်ႈယေႃးၸဝ်ႈႁဝ်းလႄႈ ယုၵ်ႉယွင်ႈၼႃႇမႃႉၸိုဝ်သဵင်ၸဝ်ႈႁဝ်းတႃႇသေႇဢမ်ႇထၢတ်ႇတီႈၶႃႈဢေႃႈ။
၁၃ ၵရူႉၼႃႇၸဝ်ႈႁဝ်း ဢၼ်ၶႃႈၸဝ်ႈလႆႈၶၢမ်ႇၼၼ်ႉယႂ်ႇၼႃႇတီႈၶႃႈဢေႃႈ။ၸဝ်ႈႁဝ်းၵႄႇသႄႇၼုၵ်ႈဢဝ်ဝိၺိၺ်ႇၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းမႃႇရၼႃႉတၢင်း တႂ်ႈၼၼ်ႉတီႈၶႃႈယဝ်ႉ။
၁၄ ၽြႃးပဵၼ်ၸဝ်ႈတီႈၶႃႈ၊ၶဝ်ၸိူဝ်းဢၼ်မႃႇၼႃႉယႂ်ႇ ဢၼ်ၵျၢမ်းထၢမ်းၼႃႇလူင်လၢင်ၸိူဝ်းၼၼ်ႉ ယင်းဢမ်ႇဢဝ်ၸဝ်ႈႁဝ်းဝႆႉသိုဝ်ႈၼႃႈတႂ်ႈတႃၶဝ်လႄႈ ႁႃဢသၢၵ်ႈၶႃႈၸဝ်ႈယူႇ တီႈၶႃႈဢေႃႈ။
၁၅ ၸဝ်ႈၽြႃးတီႈၶႃႈ၊ ၸဝ်ႈႁဝ်းပဵၼ်ၽြႃးဢၼ်တဵမ်ဝႆႉတင်းတၢင်းဢၼ်ၸၢင်ႊဢိတ်းလူႁၵ်ႉပႅင်း၊ တၢင်းဢၼ်ၸၢင်ႊႁဵတ်းၵျေးၸူး၊ တၢင်းဢၼ်ယိူၼ်ႉၶၢမ်ႇ၊ ဢိၵ်ႇတင်း တၢင်းဢၼ်ၵရူႉၼႃႇတင်းသႅတ်ႈၸႃႇလိူင်ႇၼမ် ၼႃႇၼၼ်ႉတီႈၶႃႈဢေႃႈ။
၁၆ ၶႅၼ်းတေႃႈဝၢႆႇၼႃႈတေႃႇၶႃႈၸဝ်ႈလႄႈ ဢိတ်းလူၸွႆႈထႅမ်ၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈပၼ်ႁႅင်းတၼ်းၶူဝ်းၸဝ်ႈႁဝ်းတီႈၶႃႈၸဝ်ႈႁဝ်းလႄႈ ၵႄႇသႄႇၶျွတ်ႈဢဝ် လုၵ်ႈၸၢႆးမေႈ ယိင်းၶႃႈၸဝ်ႈႁဝ်းၼႆႉသေၵမ်းတီႈၶႃႈ။
၁၇ ၶႅၼ်းတေႃႈႁဵတ်းၼီႉမိၵ်ႈလၵ်ႈၶၼႃႇဢၼ်လီၼၼ်ႉ တီႈၶႃႈၸဝ်ႈလႄႈႁႂ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉ လႆႈႁၼ်လႄႈဢူၵ်းဢၢႆသေၵမ်းလူၺ်ႈ။လွင်ႈမၼ်းၸမ်းထႃႇဝရႃႉၽြႃးတီႈၶႃႈ၊ ၸဝ်ႈႁဝ်းၸွႆႈထႅမ်ၶႃႈၸဝ်ႈလႄႈပၼ်ၵတ်းယဵၼ်ၶျၢမ်းသႃႇတီႈၶႃႈဢေႃႈ။