၇၀
၁ ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈမီးဢလူဝ်ႇၶႂ်ႈၵႄႇသေႇၼုၵ်ႈဢဝ်ၶႃႈၸဝ်ႈသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ၊ ၶႅၼ်းတေႃႈႁိပ်ႈၼႅတ်ႈႁႂ်ႈလႆႈၸွႆႈထႅမ်မႃႉ ၸႃႉၶႃႈၸဝ်ႈသေၵမ်းတီႈၶႃႈ။
၂ ႁႂ်ႈၶဝ်ၸိူဝ်းဢၼ်ၵျၢမ်ႇႁႃႁႂ်ႈလႆႈဢဝ်ဢသၢၵ်ႈၵဝ်တၢႆၼၼ်ႉ ဢူၵ်းဢၢႆလႄႈၼႃႈလူႉသေၵမ်းလူၺ်ႈ။ႁႂ်ႈၶဝ်ၸိူဝ်းဢၼ်မီးဢလူဝ်ႇၶႂ်ႈႁဵတ်းဢၢၼ်ႇတရႄႇတီႈၵဝ်ၼၼ်ႉ လႆႈၶၢမ်ႇတၢင်းဢၼ်တူၵ်းၸႂ်လႄႈႁွတ်ႈထိုင်တၢင်းဢၼ်လီဢူၵ်းလီဢၢႆ သေၵမ်း လူၺ်ႈ။
၃ ႁႂ်ႈၶဝ်ၸိူဝ်းဢၼ်လၢတ်ႈတီႈၵဝ်ဝႃႈ၊-ဢေႇႁေႇဢေႇႁေႇ၊ ဝႃႈၼင်ႇၼႆၼၼ်ႉ လႆႈၶၢမ်ႇတၢင်းဢၼ်ဝႅၼ်ၶိုၼ်းၵႂႃႇတၢင်းလင် ၵွပ်ႈပိူဝ်ႈတၢင်းဢၼ်ၶဝ်ဢူၵ်းဢၢႆၼၼ်ႉသေၵမ်းလူၺ်ႈ။ႁႂ်ႈၶဝ်ၸိူဝ်းဢၼ်ႁႃၸဝ်ႈႁဝ်းတင်းသဵင်ႈတင်းလူင်ၼၼ်ႉ လႆႈၸူမ်းသိူဝ်းလႄႈ သႂၢင်ႇၸႂ်ယူႇၵႃႈတီႈၸဝ်ႈႁဝ်းသေၵမ်းလူၺ်ႈ။
၄ ႁႂ်ႈၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ် ၵျေးၸူးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ ဢွၼ်ၵၼ်လၢတ်ႈလႄႈဝႃႈ၊-ၽြႃးပဵၼ်ၸဝ်ႈမုၼ်ၽုင်းယႂ်ႇၼႃႇဢေႃႈ၊ ဝႃႈၼင်ႇၼႆယူႇတႃႇသေႇဢမ်ႇထၢတ်ႇသေၵမ်းလူၺ်ႈ။
၅ ၶႃႈၸဝ်ႈၸမ်းပဵၼ်ဢၼ်ယၢၵ်ႈဢၼ်ၽၢၼ်ဢၼ်ၸုတ်ႈဢၼ်လုတ်ႈတီႈၶႃႈဢေႃႈ။ၶႅၼ်းတေႃႈႁိပ်ႈၼႅတ်ႈၸူးတီႈၶႃႈၸဝ်ႈသေၵမ်းတီႈၶႃႈ။ၸဝ်ႈႁဝ်းပဵၼ်ၸဝ်ႈဢၼ်ၸွႆႈထႅမ်မႃႉၸႃႉၶႃႈၸဝ်ႈ၊ ၸဝ်ႈဢၼ်ၵႄႇသႄႇဢဝ်ၶႃႈၸဝ်ႈလွတ်ႈတီႈၶႃႈဢေႃႈ။ထႃႇဝရႃႉၽြႃးတီႈၶႃႈ၊ ယႃႇပေၵိုတ်းယူႇသေၵမ်းတီႈၶႃႈ။