၂၅
၁ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈ တူၵ်ႇႁႃဢေႁႃၸဝ်ႈ ႁဝ်းယူႇတီႈၶႃႈဢေႃႈ။
၂ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ၶႃႈၸဝ်ႈဢိင်ပိုင်ႈၸဝ်ႈႁဝ်းလႄႈ ယႃႇပေႁႂ်ႈၶႃႈၸဝ်ႈလႆႈႁွတ်ႈတၢင်းဢၼ်ဢူၵ်းဢၼ်ဢၢႆ သေၵမ်းတီႈၶႃႈ။ယႃႇပေႁႂ်ႈ ရၢၼ်ႇသူႇၶႃႈၸဝ်ႈတင်းလၢႆ လႆႈပႄႉလႆႈၼႅင်ႇၶႃႈၸဝ်ႈလႄႈ သႂၢင်ႇၸႂ်သိူဝ်းၸႂ်သေၵမ်းတီႈၶႃႈ။
၃ ၶဝ်ၸိူဝ်းဢၼ်မုင်ထႃႈမွင်းထႃႈၸဝ်ႈႁဝ်းၼၼ်ႉ တၵ်းဢမ်ႇလႆႈႁွတ်ႈထိုင် တၢင်းဢၼ်ဢူၵ်းဢၼ်ဢၢႆ ဢမၢၼ်ႇၶၼ်ပဵၼ်တီႈၶႃႈ။ၶဝ်ၸိူဝ်းဢၼ်ယင်းဢမ်ႇမီးလွင်ႈမီးတၢင်းလႄႈ ယႃႉသႅတ်ႈၸႃႇၼၼ်ႉတၵ်းလႆႈႁွတ်ႈထိုင် တၢင်းဢၼ်ဢူၵ်းဢၼ်ဢၢႆတီႈၶႃႈဢေႃႈ။
၄ ထႃႇဝရႃႉၽြႃးတီႈၶႃႈ၊ၶႅၼ်းတေႃႈၼႄပျႃးသဵၼ်ႈတၢင်းၸဝ်ႈႁဝ်းတင်းလၢႆတီႈၶႃႈၸဝ်ႈလႄႈ သင်ႇသွၼ်ပၼ်သၢႆတၢင်းၸဝ်ႈႁဝ်းတင်းလၢႆၼၼ်ႉ တီႈၶႃႈၸဝ်ႈ သေၵမ်းတီႈၶႃႈ။
၅ ဢဝ်ၶႃႈၸဝ်ႈသူင်ႇၵႃႈၼႂ်းသမ်ႇမႃႇတြႃးၸဝ်ႈႁဝ်းလႄႈ သင်ႇသွၼ်ပၼ်ၶႃႈၸဝ်ႈသေၵမ်းတီႈၶႃႈ။လွင်ႈမၼ်းၸမ်းၸဝ်ႈႁဝ်းပဵၼ်ၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၶႃႈၸဝ်ႈတီႈၶႃႈဢေႃႈ။ၶႃႈၸဝ်ႈ မုင်ထႃႈမွင်းထႃႈၸဝ်ႈႁဝ်းယူႇတင်းဝၼ်းတင်း ဝၼ်းတီႈၶႃႈဢေႃႈ။
၆ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းသၽေႃးၵရူႉၼႃႇ ဢိၵ်ႇတင်းသၽေႃးမႅတ်ႈတႃႇၸဝ်ႈႁဝ်းၼၼ်ႉ ၵွပ်ႈပိူဝ်ႈဢၼ်မီးမႃးဝႆႉယဝ်ႉ ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉ သေၵမ်းတီႈၶႃႈ။
၇ ယႃႇပေၶုၵ်းၸႂ်လႆႈၶႆႈၸႂ်ထူပ်းဢပျႅတ်ႈဢၼ်ၶႃႈၸဝ်ႈၽိတ်းပိူင်ႈမႅၼ်ႈ ၼႂ်းမိူဝ်ႈဢၼ်ဢသၢၵ်ႈဢယွႆႇယင်းလဵၵ်ႉယင်းၼုမ်ႇၼၼ်ႉ သေၵမ်းတီႈၶႃႈ။ၶႅၼ်းတေႃႈ ၸွမ်းလူၺ်ႈၵရူႉၼႃႇၸဝ်ႈႁဝ်းသေလႄႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈ ၵွပ်ႈပိူဝ်ႈဢၼ်ၸဝ်ႈႁဝ်းပဵၼ်ဢၼ်မျၢတ်ႈလီၼႃႇၼၼ်ႉ သေၵမ်းတီႈၶႃႈ၊ ထႃႇဝရႃႉၽြႃးတီႈၶႃႈ။
၈ ထႃႇဝရႃႉၽြႃး၊တဵမ်ဝႆႉတင်းသၽေႃးဢၼ်လီဢၼ်ငၢမ်းတင်းသၽေႃးဢၼ်သိုဝ်ႈဢၼ်တေႃႇၼၼ်ႉဢေႃႈ။ပိူဝ်ႈၼႆလႄႈမၼ်းၸဝ်ႈၼႄပျႃးသဵၼ်ႈတၢင်းမၼ်းၸဝ်ႈ တီႈၶဝ်ၸိူဝ်းဢၼ်မီး ဢပျႅတ်ႈၼၼ်ႉဢေႃႈ။
၉ မၼ်းၸဝ်ႈၸူဝ်းဢဝ်ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉ ၵႂႃႇၵႃႈၼႂ်းတၢင်းဢၼ်တြႃးၼၼ်ႉလႄႈမၼ်းၸဝ်ႈသင်ႇသွၼ်ပၼ်တၢင်းဢၼ်မၼ်းၸဝ်ႈၵႂႃႇၼၼ်ႉ တီႈၶဝ်ၸိူဝ်းဢၼ်ႁူဝ်ၸႂ် ၶျႃးတႅမ်ႇၼၼ်ႉဢေႃႈ။
၁၀ သဵၼ်ႈတၢင်းထႃႇဝရႃႉၽြႃးၵႃႈမီးတင်းသဵင်ႈတင်းလူင် ပဵၼ်ၵရူႉၼႃႇတင်းသႅတ်ႈၸႃႇတီႈၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်း ပတိၺိၺ်ႇတြႃးၸဝ်ႈဢိၵ်ႇတင်း တီႈဢၼ်ၶၢမ်ႇသၢၵ်ႈသေႇၸဝ်ႈၸိူဝ်း ၼၼ်ႉဢေႃႈ။
၁၁ ထႃႇဝရႃႉၽြႃးတီႈၶႃႈ၊ၶႅၼ်းတေႃႈထွၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ပွႆႇလွတ်ႈဢပျႅတ်ႈၶႃႈၸဝ်ႈ ဢၼ်ယႂ်ႇၼႃႇၼၼ်ႉသေၵမ်းတီႈ ၶႃႈ။
၁၂ ၽူႈ လႂ်သေဢမ်ႇဝႃႈၵေႃႉဢၼ်ၸၢင်ႊရူဝ်ႇသေႇၵူဝ်ယမ်ထႃႇဝရႃႉၽြႃးၼၼ်ႉမၼ်းၸဝ်ႈတၵ်းၼႄပျႃးသဵၼ်ႈတၢင်းဢၼ်မၼ်းလီလိူၵ်ႈၵဵပ်းဢဝ်ၼၼ်ႉ တီႈ မၼ်းၼၼ်ႉတီႈၶႃႈဢေႃႈ။
၁၃ ႁူဝ်ၸႂ်မၼ်းၼၼ်ႉတၵ်းလႆႈယူႇၼိမ်ၼိမ်လီလီ ၵႃႈၼႂ်းတၢင်းဢၼ်လီဢၼ်ငၢမ်းလႄႈ ၸိူဝ်ႉၶိူဝ်းမၼ်းၵေႃႈတၵ်းလႆႈၶၢမ်ႇဢမူၺ်ႇမိူင်း ၸဝ်ႈတီႈၶႃႈဢေႃႈ။
၁၄ မိၵ်ႈသႁႃႇယႃႉတၢင်းဢၼ်ထုၵ်ႇၸႂ်ထႃႇဝရႃႉၽြႃးၼၼ်ႉ မီးတီႈၶဝ်ၸိူဝ်းဢၼ်ရူဝ်ႇသေႇၵူဝ်ယမ်မၼ်းၸဝ်ႈၼၼ်ႉလႄႈ မၼ်းၸဝ်ႈတၵ်းႁႂ်ႈၶဝ် ႁူႉၸႅင်ႈပတိၺိၺ်ႇတြႃးၸဝ်ႈတီႈၶႃႈဢေႃႈ။
၁၅ မၢၵ်ႇတႃၶႃႈၸဝ်ႈ ႁႅၼ်တူၺ်းတီႈထႃႇဝရႃႉၽြႃးယူႇတႃႇသေႇဢမ်ႇထၢတ်ႇတီႈၶႃႈဢေႃႈ။လွင်ႈမၼ်းၸမ်း မၼ်းၸဝ်ႈၼုၵ်ႈဢဝ်တိၼ်ၶႃႈၸဝ်ႈ ဢွၵ်ႇသေၵႃႈၼႂ်းတူင်ႇ ႁဵဝ်ႉတီႈၶႃႈဢေႃႈ။
၁၆ ၶႅၼ်းတေႃႈဝၢႆႇၼႃႈတေႃႇၶႃႈၸဝ်ႈလႄႈ ဢိတ်းလူႁဵတ်းၵျေးၸူးတီႈၶႃႈၸဝ်ႈ ၵွပ်ႈပိူဝ်ႈဢၼ်ၶႃႈၸဝ်ႈၵိုတ်းၵျၢၼ်ႇဝႆႉၵေႃႉလဵဝ်ၵူၺ်းလႄႈ လႆႈၶၢမ်ႇတၢင်းယၢၵ်ႈတၢင်းၽၢၼ်ၼၼ်ႉ သေၵမ်းတီႈၶႃႈ။
၁၇ ႁူဝ်ၸႂ်ၶႃႈၸဝ်ႈ တဵမ်ဝႆႉတင်းတုၵ်ႉၶႃႉတၢင်းၽၢၼ်လႄႈၶႅၼ်းတေႃႈၵႄႇသႄႇၼုၵ်ႉဢဝ်ၶႃႈၸဝ်ႈသေ ၵႃႈၼႂ်းတၢင်းဢၼ်ၶႃႈၸဝ်ႈ ၵိတ်ႇၸႂ်ၵႅၼ်းၸႂ်ၸိူဝ်းၼၼ်ႉသေ ၵမ်းတီႈၶႃႈ။
၁၈ ၶႅၼ်းတေႃႈလူႈတူၺ်းတၢင်းဢၼ်ၶႃႈၸဝ်ႈယၢၵ်ႈၽၢၼ် ဢိၵ်ႇတင်း တၢင်းဢၼ်ၶႃႈၸဝ်ႈယၢပ်ႇၸႂ်ၶၢၼ်ၸႂ်ၼၼ်ႉလႄႈ ပွႆႇလွတ်ႈသေၵႃႈၼႂ်းဢပျႅတ်ႈၶႃႈၸဝ်ႈၵႃႈမီးတင်းသဵင်ႈတင်းလူင်ၼၼ်ႉ သေ ၵမ်းတီႈၶႃႈ။
၁၉ ၶႅၼ်းတေႃႈႁၼ်ရၢၼ်ႇသူႇၶႃႈၸဝ်ႈၵွပ်ႈပိူဝ်ႈဢၼ်ၶဝ်ၼမ်ၼႃႇလႄႈ ၸင်းၶႃႈၸဝ်ႈၼႃႇလူင် လၢင်ၼၼ်ႉသေၵမ်းတီႈၶႃႈ။
၂၀ ၶႅၼ်းတေႃႈပႂ်ႉလူပႂ်ႉတူၺ်းဢသၢၵ်ႈၶႃႈၸဝ်ႈလႄႈ ၵႄႇသႄႇတိုတ်ႉၸၼ်ဢဝ်ၶႃႈၸဝ်ႈသေၵမ်းတီႈၶႃႈ။ၵွပ်ႈပိူဝ်ႈဢၼ်ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇလႄႈ ယႃႇပေႁႂ်ႈၶႃႈၸဝ်ႈလႆႈႁွတ်ႈထိုင် တၢင်းဢၼ်ဢူၵ်းဢၼ်ဢၢႆသေၵမ်းတီႈၶႃႈ။
၂၁ ၵွပ်ႈပိူဝ်ႈဢၼ်ၶႃႈၸဝ်ႈ မုင်ထႃႈမွင်းထႃႈၸဝ်ႈႁဝ်းယူႇလႄႈႁႂ်ႈတၢင်းဢၼ်ၵၢင်းလွတ်ႈတင်းဢပျႅတ်ႈ ဢိၵ်ႇတင်းတၢင်းဢၼ်သၽေႃးသိုဝ်ႈတေႃႇၼၼ်ႉ ပႂ်ႉလူႈပႂ်ႉတူၺ်း ၶႃႈၸဝ်ႈယူႇသေၵမ်းတီႈၶႃႈ။
၂၂ ၽြႃးပဵၼ်ၸဝ်ႈတီႈၶႃႈ၊ၶႅၼ်းတေႃႈထူတ်ႇၼုၵ်ႈဢဝ်မဵဝ်းဢိသရေႇလ ဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်မၼ်း တင်းသဵင်ႈတင်းလူင်သေၵမ်းတီႈၶႃႈ။