၉၄
၁ ထႃႇဝရႃႉၽြႃးပဵၼ်ၸဝ်ႈ ဢၼ်ပိူင်ႇပၼ်ဢပျႅတ်ႈတီႈၶႃႈ၊ ၶႅၼ်းတေႃႈပွႆႇဢရွင်ႇၸဝ်ႈႁဝ်းသေၵမ်းတီႈၶႃႈ။ၸဝ်ႈဢၼ်တႅပ်းတတ်းတြႃး ၵႃႈၼိူဝ်လိၼ်မိူင်းၼႆႉတီႈၶႃႈ၊ၶႅၼ်းတေႃႈလုၵ်ႉသေၵမ်းတီႈၶႃႈ။
၂ ၶႅၼ်းတေႃႈတွပ်ႇတႅၼ်းပၼ် ဢၵျူဝ်းဢပျႅတ်ႈ တီႈၶဝ်ၸိူဝ်းဢၼ်မႃႇၼႃႉၸႂ်သုင်ၼႃႇလူင်လၢင်ၼၼ်ႉသေၵမ်းတီႈၶႃႈ။
၃ ၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းလႆႈသႂၢင်ႇၸႂ်သိူဝ်းၸႂ်ယူႇၶိင်ႇၵႃႇလႃႉႁိုင်ၵႃႈႁိုဝ်ၶႃႈ။ထႃႇဝရႃႉၽြႃးတီႈၶႃႈ၊ ၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းသႂၢင်ႇၸႂ် သိူဝ်းၸႂ်ယူႇၶိင်ႇၵႃႇလႃႉႁိုင်ၵႃႈႁိုဝ်ၶႃႈ။
၄ ၶဝ်ဢွၼ်ၵၼ်သူပ်းၼမ်ၵႂၢမ်းၽႄလႄႈ ဝႃႈဢွၵ်ႇသူပ်းသုင်ၼႃႇလူင်လၢင်လႄႈ ၶဝ်ၸိူဝ်းဢၼ်ႁဵတ်းဢမူႉဢႃႉထမ်ႇမႃႉတင်းသဵင်ႈတင်းလူင်ၼၼ်ႉ ဢွၼ်ၵၼ်ဢုပ်ႇဢၢတ်ႇယူႇ တီႈ ၶႃႈဢေႃႈ။
၅ ထႃႇဝရႃႉၽြႃးတီႈၶႃႈ၊ ၶဝ်ၼၼ်ႉယႃႉႁၵ်းၵူၼ်းၸဝ်ႈႁဝ်းတင်းလၢႆပႅတ်ႈလႄႈ ၼိၵ်ႈၸၢၵ်ႈငႅၼ်း သေးဢမူၺ်ႇၸဝ်ႈႁဝ်းတီႈၶႃႈဢေႃႈ။
၆ ၶဝ်ဢဝ်မေႈမုၵ်ႉမေႈမၢႆႈဢိၵ်ႇတင်း ၶႅၵ်ႇဢႃႇၵၼ်ႇတူႉတင်းလၢႆတၢႆလႄႈႁႃၽၼ်းလုၵ်ႈဢွၼ်ဢၼ်ၽၢၼ်ပေႃႈၽၢၼ်မေႈ ၼၼ်ႉပႅတ်ႈတီႈၶႃႈဢေႃႈ။
၇ ၶဝ်လၢတ်ႈလႄႈဝႃႈ၊-ထႃႇဝရႃႉၽြႃးဢမ်ႇႁၼ်၊ၽြႃးပဵၼ်ၸဝ်ႈ မဵဝ်းယႃႇၵုပ်ႉၼၼ်ႉဢမ်ႇမၢတ်ႈဢမ်ႇတွင်းဝႆႉ၊ ဝႃႈၼင်ႇၼႆတီႈၶႃႈ ဢေႃႈ။
၈ ၵူၼ်းဢၼ်မီးသၽေႃးတရိၵ်ႈသၢၼ်ႇၶဝ်ဢိူၺ်းဢွၼ်ၵၼ်ႁူႉႁၼ်တႃႉ။ၵူၼ်းမိူၵ်ႈၶဝ်ဢိူၺ်းသူတၵ်းလႆႈပိင်ႇၺႃႇသတိမိူဝ်ႈ လႂ်။
၉ ၸဝ်ႈဢၼ်ၽုၵ်ႇသွမ်ႈႁူးႁူၼၼ်ႉတၵ်းဢမ်ႇငိၼ်းႁိုဝ်။ၸဝ်ႈဢၼ်ၽၢၼ်ႇသၢင်းႁဵတ်း ပဵၼ်မၢၵ်ႇတႃၼၼ်ႉ တၵ်းဢမ်ႇႁၼ်ႁိုဝ်။
၁၀ ၸဝ်ႈဢၼ်သုင်းမႃႉပၼ်ၵူၼ်းၵူႈၸိူဝ်ႉၵူႈမဵဝ်း၊ ၸဝ်ႈဢၼ်သင်ႇသွၼ်ပၼ်ဢတၢတ်ႈပိင်ႇၺႃႇတီႈၵူၼ်း တင်းလၢႆၼၼ်ႉတၵ်း ဢမ်ႇပၼ်ဢပျႅတ်ႈႁိုဝ်။
၁၁ ထႃႇဝရႃႉၽြႃးႁူႉလွင်ႈဢၼ်တၢင်းၵျၢမ်ႇတၢင်းပွင်ၵူၼ်းပဵၼ်ဢၼ်လၢႆလၢႆ ဢမ်ႇပွင်ႇ လွင်ႈၵႃႈသင်ၼၼ်ႉယူႇဢေႃႈ။
၁၂ ထႃႇဝရႃႉၽြႃးတီႈၶႃႈ၊ၵေႃႉဢၼ်ၸဝ်ႈႁဝ်းသုင်းမႃႉလႄႈ ဢဝ်တြႃးၸဝ်ႈသင်ႇသွၼ်ပၼ် ႁႂ်ႈလႆႈပၼ်ၵတ်းယဵၼ်ၶျၢမ်းသႃႇ တၢင်း ဢၼ်လွတ်ႈသေၵႃႈၼႂ်းမိူဝ်ႉဝၼ်းတုၵ်ႉၶႃႉ
၁၃ တေႃႇထိုင်ႁွတ်ႈၶုတ်ႉၶုမ်ၶုတ်ႉလုၵ်းဝႆႉ ပုၼ်ႈၶဝ်ၸိူဝ်းဢၼ်ဢမ်ႇတြႃးတင်းလၢႆယဝ်ႉၼၼ်ႉ မီးမင်ႇၵလႃႇ တီႈၶႃႈဢေႃႈ။
၁၄ ထႃႇဝရႃႉၽြႃး တၵ်းဢမ်ႇပႄႇပႅတ်ႈၵူၼ်းမၼ်းၸဝ်ႈတင်းလၢႆလႄႈ မၼ်းၸဝ်ႈတၵ်းဢမ်ႇၸုၼ်ႉပႅတ်ႈ ဢမူၺ်ႇမၼ်းၸဝ်ႈၼၼ်ႉ။
၁၅ တၢင်းဢၼ်ၸီႇယၢင်ႇတႅပ်းတတ်းၼၼ်ႉ တၵ်းလႆႈၶိုၼ်းပဵၼ်ၽႆးတၢင်းဢၼ်သိုဝ်ႈတေႃႇလႄႈ ၶဝ်ၸိူဝ်းဢၼ်သၽေႃးသိုဝ်ႈယူဝ်းတင်းသဵင်ႈတင်းလူင်ၼၼ်ႉ တၵ်းၸွမ်းလင်မၼ်းဢေႃႈ။
၁၆ ၽူႈ လႂ်တၵ်းလုၵ်ႉယူႇၽၢႆႇၵဝ်သေလႄႈ ႁႄႉၶႅၼ်ၵူၼ်းႁၢႆႉတင်းလၢႆ။ၽူႈ လႂ်တၵ်းၸုၵ်းယူႇၽၢႆႇၵဝ်သေလႄႈႁႄႉၶႅၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ။
၁၇ သင်ထႃႇဝရႃႉၽြႃးဢမ်ႇၸွႆႈထႅမ်မႃႉၸႃႉၵဝ်ၸိုင်၊ ဢမ်ႇပေႃးႁိုင်ပေႃးၼၢၼ်း ဝိၺိၺ်ႇၵဝ် တၵ်းလႆႈယူႇၵႃႈၼႂ်းတီႈဢၼ် တဵတ်ႇယဵၼ်ၼၼ်ႉယဝ်ႉ။
၁၈ မိူဝ်ႈဢၼ်ၶႃႈၸဝ်ႈလၢတ်ႈလႄႈဝႃႈ၊- တိၼ်ၵဝ်မီးတၢင်းဢၼ်ပၢတ်ႈယူႇဢေႃႈ၊ဝႃႈၼင်ႇၼႆၼၼ်ႉၸိုင်၊ထႃႇဝရႃႉၽြႃးတီႈၶႃႈ၊ ၵရူႉၼႃႇ ၸဝ်ႈႁဝ်းၵမ်ႉထွၵ်ႈၶႃႈၸဝ်ႈယူႇတီႈၶႃႈဢေႃႈ။
၁၉ မိူဝ်ႈဢၼ်ၶႃႈၸဝ်ႈ လႅင်ၸႂ်ယူႇၼၼ်ႉၸိုင် တၢင်းဢၼ်ၸဝ်ႈႁဝ်းႁႂ်ႈသၢၵ်ႈသႃႇၸိူဝ်းၼၼ်ႉ ႁႂ်ႈဝိၺိၺ်ႇၶႃႈၸဝ်ႈ သႂၢင်ႇသိူဝ်းတီႈၶႃႈဢေႃႈ။
၂၀ ၸွင်ႇရႃႇၸႃႉပလၢင်ႇဢႃႉထမ်ႇမႃႉ ဢၼ်ဢဝ်တင်းဢၶႂၢင်ႉၶုၼ်လႄႈ ပွင်ႁဵတ်းတၢင်းၵျၢမ်ႇတၢင်းပွင် ဢၼ်ဢမ်ႇတြႃးၼၼ်ႉ တၵ်းႁဵတ်းမိၵ်ႈသႁႃႇယႃႉ တၢင်းဢၼ်ထုၵ်ႇၵၼ်တင်းၸဝ်ႈ ႁဝ်းလႆႈတီႈၶႃႈႁိုဝ်။
၂၁ ၶဝ်ၸူႉၵၼ်တုမ်ၵၼ်ယူႇၽၢႆႇၼိုင်ႈတင်း ၶဝ်ၸိူဝ်းဢၼ်သိုဝ်ႈတေႃႇၼၼ်ႉလႄႈၸီႇယၢင်ႇထွၵ်ႇလိူတ်ႈၶဝ်ၸိူဝ်းဢၼ်ဢမ်ႇမီး ဢပျႅတ်ႈၼၼ်ႉတီႈ ၶႃႈဢေႃႈ။
၂၂ ၵူၺ်းၵႃႈထႃႇဝရႃႉၽြႃးပဵၼ်တိူၵ်ႈတီႈတိုၵ်းသိုၵ်းၵဝ်လႄႈ ၽြႃးပဵၼ်ၸဝ်ႈၵဝ်ပဵၼ်မၢၵ်ႇႁိၼ်မၢၵ်ႇ ၽႃတီႈဢၼ်ၵဝ်သွၼ်ႈပိုင်ႈဢေႃႈ။
၂၃ မၼ်းၸဝ်ႈတၵ်းႁႂ်ႈဢပျႅတ်ႈၶဝ်ႁွတ်ႈထိုင်ၵႃႈၼိူဝ်ၶဝ်လႄႈ တၵ်းတႅပ်းၶဝ်ပႅတ်ႈၼႂ်းတၢင်းဢၼ်ၶဝ်ႁဵတ်း ဢႃႉထမ်ႇမႃႉယူႇၼၼ်ႉဢေႃႈ။ထႃႇဝရႃႉၽြႃးပဵၼ်ၸဝ်ႈႁဝ်းတၵ်းတႅပ်းၶဝ်ပႅတ်ႈဢေႃႈ။