၁၁၉
၁ ၶဝ်ၸိူဝ်းဢၼ်ၸေးၸုမ်ႇ ၼႂ်းသဵၼ်ႈတၢင်းၸဝ်ႈလႄႈၵႂႃႇမႃးၸွမ်းတြႃး ထႃႇဝရႃႉၽြႃးယူႇၼၼ်ႉ မီးမင်ႇ ၵလႃႇဢေႃႈ။
၂ ၶဝ်ၸိူဝ်းဢၼ်ပႂ်ႉလွင်ႈတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇဝႆႉၸိူဝ်းၼၼ်ႉလႄႈ ပႃးတင်းႁူဝ်ၸႂ်သဵင်ႈသဵင်ႈသေယဝ်ႉ ႁႃဢဝ်မၼ်းၸဝ်ႈၼၼ်ႉမီးမင်ႇၵ လႃႇဢေႃႈ။
၃ ၶဝ်ၼၼ်ႉဢမ်ႇၸၢင်ႊႁဵတ်းတူႉၸရိူၵ်ႈ။ၶဝ်ၸၢင်ႊဢွၼ်ၵၼ်ၵႂႃႇမႃး ၼႂ်းသဵၼ်ႈတၢင်းမၼ်းၸဝ်ႈ ဢေႃႈ။
၄ ၸဝ်ႈႁဝ်းပိင်းၺၢပ်ႈပၼ်ဢေႃးဝႃႇတႃႉတင်းလၢႆပုၼ်ႈဢၼ်ၶႃႈၸဝ်ႈႁဝ်းၶဝ် တၵ်းလႆႈၵျုဝ်းၸႃးၵမ်ၵျၢင်ႉ ၼၼ်ႉတီႈၶႃႈဢေႃႈ။
၅ ႁႂ်ႈသဵၼ်ႈတၢင်းဢၼ်ၶႃႈၸဝ်ႈၵႂႃႇၼၼ်ႉမၼ်ႈၶိူင်ႇသေၵမ်းလူၺ်ႈ။ႁႂ်ႈၶႃႈၸဝ်ႈလႆႈပႂ်ႉထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉသေၵမ်းလူၺ်ႈ။
၆ မိူဝ်ႈၼၼ်ႉ ၶႃႈၸဝ်ႈတၵ်းလႆႈၵၢင်းလွတ်ႈတင်းတၢင်းဢၼ်ဢူၵ်းဢၼ်ဢၢႆ ၼႂ်းမိူဝ်ႈဢၼ်ၶႃႈၸဝ်ႈထွၵ်ႈလူၺ်ႈပိင်း ၺၢပ်ႈၸဝ်ႈႁဝ်းၵူႈၸိူဝ်ႉၵူႈပိူင်ၼၼ်ႉတီႈၶႃႈဢေႃႈ။
၇ ၶႃႈၸဝ်ႈတၵ်းပႃးဢဝ်တင်းၸႂ်ဢၼ် သိုဝ်ႈလီယူဝ်းလီသေလႄႈ ယွင်ႈယေႃးၵျေးၸူးၸဝ်ႈႁဝ်း ၼႂ်းမိူဝ်ႈဢၼ်ၶႃႈၸဝ်ႈသွၼ်ဢဝ် လွင်ႈတၢင်းဢၼ်ၸဝ်ႈႁဝ်းၸီႇယၢင်ႇသိုဝ်ႈသိုဝ်ႈတေႃႇတေႃႇ ၸိူဝ်းၼၼ်ႉယဝ်ႉၼၼ်ႉတီႈၶႃႈ ဢေႃႈ။
၈ ၶႃႈၸဝ်ႈတၵ်းပႂ်ႉၸွမ်းထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈလႃးလႃးသေၵမ်းတီႈၶႃႈ။
၉ ၵူၼ်းဢၼ်ယင်းၼုမ်ႇယင်းၵမ်ၼၼ်ႉ တၵ်းႁႂ်ႈသဵၼ်ႈတၢင်းဢၼ်မၼ်းၵႂႃႇၼၼ်ႉ မူတ်းၸၢင်ႇလႆႈၸိူဝ်ႉၼင်ႇႁိုဝ်ဝႃႈၼႆၸမ်းတၵ်းလႆႈႁဵတ်းသတိ ၸွမ်းၵႃႈၼင်ႇဢၼ်ၼုၵ်ႉၵပၢတ်ႈၸဝ်ႈႁဝ်းမီးၼၼ်ႉဢေႃႈ။
၁၀ ၶႃႈၸဝ်ႈပႃးတင်းႁူဝ်ၸႂ်သဵင်ႈသဵင်ႈသေလႄႈ ႁႃဢဝ်ၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈယႃႇပေႁႂ်ႈၶႃႈၸဝ်ႈ ပိူင်ႈသသေဵၼ်ႈတၢင်းပိင်းၺၢပ်ႈၸဝ်ႈႁဝ်းၼၼ်ႉ ၵႂႃႇသေၵမ်းတီႈၶႃႈ။
၁၁ ၶႃႈၸဝ်ႈဢဝ်ပျႃႇတိၵ်ႈၸဝ်ႈႁဝ်းသိမ်းဝႆႉၼႂ်းႁူဝ်ၸႂ် ဢမ်ႇႁႂ်ႈလႆႈၽိတ်းပိူင်ႈၸဝ်ႈႁဝ်းတီႈ ၶႃႈယဝ်ႉ။
၁၂ ထႃႇဝရႃႉၽြႃးတီႈၶႃႈ၊ၸဝ်ႈႁဝ်းမီးမင်ႇၵလႃႇတီႈၶႃႈဢေႃႈ။ၶႅၼ်းတေႃႈဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ သွၼ်ပၼ်တီႈၶႃႈၸဝ်ႈသေၵမ်းတီႈ ၶႃႈ။
၁၃ ၶႃႈၸဝ်ႈဢဝ်သူပ်းၶႃႈၸဝ်ႈႁေႃးလၢတ်ႈလွင်ႈတၢင်းဢၼ်ၸဝ်ႈ ႁဝ်းၸီႇယၢင်ႇဢွၵ်ႇပၢၵ်ႇၸဝ်ႈႁဝ်းဝႆႉ ၸိူဝ်းၼၼ်ႉတီႈၶႃႈဢေႃႈ။
၁၄ ၶႃႈၸဝ်ႈမူၼ်ႈပျေႃႇယူႇၵႃႈၼႂ်းသဵၼ်ႈတၢင်း တီႈဢၼ်ၸဝ်ႈႁဝ်းၶၢမ်ႇသၢၵ်ႈသေႇၸိူဝ်းၼၼ်ႉ မိူၼ်ၸိူဝ်ႉၼင်ႇၼႂ်းၸေးၸိမ်ႇဢုၵ်ႉၸႃႇၵူႈ ၸိူဝ်ႉၵူႈပိူင်ၼၼ်ႉတီႈၶႃႈဢေႃႈ။
၁၅ ၶႃႈၸဝ်ႈတၵ်းၶႆႈၸႂ်ဝူၼ်ႉၸႂ် လူၺ်ႈလွင်ႈဢေႃးဝႃႇတႃႉ ၸဝ်ႈႁဝ်းၸိူဝ်းၼၼ်ႉလႄႈ လူႈတူၺ်းသဵၼ်တၢင်းဢၼ်ၸဝ်ႈႁဝ်းၵႂႃႇၸိူဝ်း ၼၼ်ႉတီႈၶႃႈဢေႃႈ။
၁၆ ၶႃႈၸဝ်ႈတၵ်းမူၼ်ႈပျေႃႇၼႂ်းထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉလႄႈ ယင်းဢမ်ႇမၢတ်ႈဢမ်ႇတွင်းၼုၵ်ႉၵပၢတ်ႈၸဝ်ႈႁဝ်းလႄႈ တၵ်းဢမ်ႇယူႇ တီႈၶႃႈ။
၁၇ ၶႅၼ်းတေႃႈႁဵတ်းၵျေးၸူးတီႈၶႃႈၸဝ်ႈႁဝ်းႁႂ်ႈၶႃႈၸဝ်ႈႁဝ်း ဢသၢၵ်ႈလိပ်းယူႇသေၵမ်းတီႈၶႃႈ။ၶႃႈၸဝ်ႈႁဝ်းတၵ်းပႂ်ႉၼုၵ်ႉၵပၢတ်ႈၸဝ်ႈႁဝ်းယူႇ တီႈၶႃႈ ဢေႃႈ။
၁၈ ၶႅၼ်းတေႃႈၽုၺ်ႇမၢၵ်ႇတႃၶႃႈၸဝ်ႈႁႂ်ႈၶႃႈၸဝ်ႈလႆႈႁၼ် လွင်ႈတၢင်းဢၼ်လီဢၢမ်းတင်းလၢႆ ၵႃႈၼႂ်းတြႃးၸဝ်ႈႁဝ်းၼၼ်ႉသေၵမ်းတီႈၶႃႈ။
၁၉ ၶႃႈၸဝ်ႈပဵၼ်ၶႅၵ်ႇၵႃႈၼိူဝ်လိၼ်မိူင်းၼႆႉယူႇတီႈၶႃႈဢေႃႈ။ၶႅၼ်းတေႃႈယႃႇပေသိူင်ႇမႅပ်းပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉ သေၵႃႈတီႈၶႃႈၸဝ်ႈသေၵမ်းတီႈၶႃႈ။
၂၀ ႁူဝ်ၸႂ်ၶႃႈၸဝ်ႈမီးတၢင်းဢၼ်တႅၵ်ႇလႅဝ်ၵႂႃႇ ၵွပ်ႈပိူဝ်ႈဢၼ်တူၵ်းဢၢင်ႈလွင်ႈတၢင်းဢၼ် ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉယူႇ ၵူႈၶိင်ႇၵူႈၶႃႇၼၼ်ႉတီႈၶႃႈဢေႃႈ။
၂၁ ၸဝ်ႈႁဝ်းသင်ႇသွၼ်သုင်းမႃႉ ၶဝ်ၸိူဝ်းဢၼ်မႃႇၼႃႉယႂ်ႇ ဢၼ်လႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈလႄႈ ပိူင်ႈသဵၼ်ႈတၢင်းပိင်းၺၢပ်ႈၸဝ်ႈႁဝ်းတင်းလၢႆၵႂႃႇၸိူဝ်းၼၼ်ႉ တီႈၶႃႈဢေႃႈ။
၂၂ ၶႅၼ်းတေႃႈႁႂ်ႈတၢင်းဢၼ်သေႉဢၼ်သွမ်း ဢိၵ်ႇတင်းတၢင်းဢၼ်ႁဵတ်းဢမ်ႇပေႃးၼင်ႇႁိုဝ်ၼၼ်ႉ ၵႆၵၼ်ယၢၼ်ၵၼ်တင်းၶႃႈၸဝ်ႈ ၵွပ်ႈပိူဝ်ႈဢၼ်ၶႃႈၸဝ်ႈ ပႂ်ႉလွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉယူႇ ၼၼ်ႉသေၵမ်းတီႈၶႃႈ။
၂၃ ၶုၼ်တင်းလၢႆဢွၼ်ၵၼ်ၼင်ႈလႄႈ လၢတ်ႈဝႃႈယူႇၽၢႆႇၼိုင်ႈတင်းၶႃႈၸဝ်ႈတီႈၶႃႈဢေႃႈ။ၶႃႈၸဝ်ႈႁဝ်းၸမ်း ၶႆႈၸႂ်ဝူၼ်ႉၸႂ်လူၺ်ႈလွင်ႈထုင်းၾိင်ႈတြႃးၸဝ်ႈႁဝ်း တင်းလၢႆယူႇတီႈၶႃႈဢေႃႈ။
၂၄ လွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉ ပဵၼ်တီႈဢၼ်ၶႃႈၸဝ်ႈတိူင်ႇပၢင်ႇတွင်ႈထၢမ်တီႈၶႃႈဢေႃႈ။
၂၅ ဝိၺိၺ်ႇၶႃႈၸဝ်ႈၸပ်းယူႇၵႃႈတီႈမုၼ်ႈလိၼ်လႄႈ ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇၸွမ်း ၵႃႈၼင်ႇဢၼ်ၼုၵ်ႉၵပၢတ်ႈၸဝ်ႈႁဝ်းမီးၼၼ်ႉ သေၵမ်းတီႈၶႃႈ။
၂၆ ၶႃႈၸဝ်ႈၽုၺ်ႇဢွၵ်ႇၼႄပျႃးသဵၼ်ႈတၢင်းဢၼ်ၶႃႈၸဝ်ႈၵႂႃႇၸိူဝ်းၼၼ်ႉလႄႈ ၸဝ်ႈႁဝ်းထွမ်ႇဢဝ်တီႈၶႃႈယဝ်ႉ။ၶႅၼ်းတေႃႈဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ သွၼ်ပၼ်တီႈၶႃႈၸဝ်ႈသေ ၵမ်းတီႈၶႃႈ။
၂၇ ၶႅၼ်းတေႃႈႁႂ်ႈၶႃႈၸဝ်ႈႁူႉသဵၼ်ႈတၢင်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉ သေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင် ၶႃႈၸဝ်ႈတၵ်းၶုၵ်းၸႂ်လႆႈၶႆႈၸႂ်ဝူၼ်ႉၸႂ် လူၺ်ႈလွင်ႈတၢင်းဢၼ်လီဢၢမ်း ၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
၂၈ ႁူဝ်ၸႂ်ၶႃႈၸဝ်ႈမီးတၢင်းဢၼ်ႁူဝ်ႈၵႂႃႇၸိူမ်ႈၵႂႃႇ ၵွပ်ႈပိူဝ်ႈတၢင်းဢၼ်ၸႂ်လဵၵ်ႉၸႂ်ဢူၼ်ႈၼၼ်ႉလႄႈၶႅၼ်းတေႃႈႁႂ်ႈၶႃႈၸဝ်ႈတႄႇယူႇၸွမ်းၵႃႈၼင်ႇဢၼ် ၼုၵ်ႉၵပၢတ်ႈၸဝ်ႈႁဝ်း မီးၼၼ်ႉသေၵမ်းတီႈၶႃႈ။
၂၉ ၶႅၼ်းတေႃႈႁႂ်ႈသဵၼ်ႈတၢင်း မူႉသႃႇၽၢတ်ႇယၢၼ်ၵၼ်တင်းၶႃႈၸဝ်ႈလႄႈ ဢိတ်းလူပၼ်တြႃးၸဝ်ႈႁဝ်းတီႈၶႃႈၸဝ်ႈ သေၵမ်းတီႈၶႃႈ။
၃၀ ၶႃႈၸဝ်ႈလိူၵ်ႈၵဵပ်းဢဝ် သဵၼ်ႈတၢင်းသႅတ်ႈၸႃႇတီႈၶႃႈယဝ်ႉ။ၶႃႈၸဝ်ႈဢဝ်လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈၶႃႈၸဝ်ႈတီႈ ၶႃႈယဝ်ႉ။
၃၁ ၶႃႈၸဝ်ႈၸွမ်းလွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉယူႇတီႈၶႃႈယဝ်ႉ။ထႃႇဝရႃႉၽြႃးတီႈၶႃႈ ၶႅၼ်းတေႃႈယႃႇပေပၼ်ႁႂ်ႈၶႃႈၸဝ်ႈႁွတ်ႈထိုင်တၢင်းဢၼ်ဢူၵ်းဢၼ်ဢၢႆ သေၵမ်းတီႈၶႃႈ။
၃၂ ၶႃႈၸဝ်ႈတၵ်းၶုၼ်ႇလႅၼ်ႈၸွမ်း ၼႂ်းသဵၼ်ႈတၢင်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ ၼႂ်းမိူဝ်ႈဢၼ်ၸဝ်ႈႁဝ်းႁႂ်ႈၺၢၼ်ႇႁူဝ်ၸႂ်ၶႃႈၸဝ်ႈယႂ်ႇၵႂၢင်ႈမႃးယူႇၼၼ်ႉ တီႈၶႃႈဢေႃႈ။
၃၃ ထႃႇဝရႃႉၽြႃးတီႈၶႃႈ ၶႅၼ်းတေႃႈသွၼ်ပၼ်သဵၼ်ႈတၢင်းထုင်းၾိင်ႈတြႃးၸဝ်ႈႁဝ်းၼၼ်ႉ တီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတၵ်းၸွမ်းၵႂႃႇတေႃႇထိုင် ႁွတ်ႈတီႈသုတ်းတီႈၵွႆၼၼ်ႉတီႈၶႃႈဢေႃႈ။
၃၄ ၶႅၼ်းတေႃႈႁႂ်ႈၶႃႈၸဝ်ႈႁူႉၸႅင်ႈၺၢၼ်ႇၸဝ်ႈႁဝ်း သေၵမ်းတီႈၶႃႈ။ၶႃႈၸဝ်ႈတၵ်းပႂ်ႉၸွမ်းတြႃးၸဝ်ႈႁဝ်းလႄႈ ပႃးတင်းႁူဝ်ၸႂ်သဵင်ႈသဵင်ႈသေလႄႈ ၵမ်ႈၵျၢင်ႉယူႇတီႈၶႃႈဢေႃႈ။
၃၅ ၶႅၼ်းတေႃႈဢဝ်ၶႃႈၸဝ်ႈသူင်ႇၵႃႈၼႂ်း သဵၼ်ႈတၢင်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်သဵၼ်ႈတၢင်းၼၼ်ႉ တီႈၶႃႈ ဢေႃႈ။
၃၆ ၶႅၼ်းတေႃႈႁႂ်ႈႁူဝ်ၸႂ်ၶႃႈၸဝ်ႈဢူၼ်ႈၼူပ်ႈၵွမ်းၸူးၽၢႆႇလေႃးၽႃႉဢမ်ႇၸႂ်ႈ။ၵွမ်းၸူးၵႃႈတီႈၽၢႆႇလွင်ႈတၢင်းဢၼ်ၸဝ်ႈႁဝ်း ၶၢမ်ႇသၢၵ်ႈသေႇဝႆႉၸိူဝ်းၼၼ်ႉ သေၵမ်းတီႈၶႃႈ။
၃၇ ၶႅၼ်းတေႃႈႁႂ်ႈမၢၵ်ႇတႃၶႃႈၸဝ်ႈဝေႈပိူင်ႈသေ တၢင်းဢၼ်ထူပ်းဢၼ်ႁၼ် ဢၼၢတ်ႉတႃႉၼၼ်ႉလႄႈႁႂ်ႈၶႃႈၸဝ်ႈဢသၢၵ်ႈလိပ်းယူႇၵႃႈၼႂ်း သဵၼ်ႈတၢင်းၸဝ်ႈႁဝ်းၼၼ်ႉသေၵမ်းတီႈၶႃႈ။
၃၈ ၶႅၼ်းတေႃႈႁႂ်ႈပျႃႇတိၵ်ႈၸဝ်ႈႁဝ်း တႄႇယူႇတီႈၶႃႈၸဝ်ႈႁဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းယူႇၼၼ်ႉ သေၵမ်းတီႈ ၶႃႈ။
၃၉ ၶႅၼ်းတေႃႈႁႂ်ႈတၢင်းဢၼ်သေႉဢၼ်သွမ်းဢၼ်ၶႃႈၸဝ်ႈၵူဝ်ႁႄၼၼ်ႉ ႁၢႆၵႂႃႇသေၵမ်းတီႈၶႃႈ။လွင်ႈတၢင်းဢၼ်ၸဝ်ႁဝ်းၸီႇယၢင်ႇဝႆႉၸိူဝ်းၼၼ်ႉ ပဵၼ်ဢၼ် လီဢၼ်ငၢမ်းတီႈၶႃႈဢေႃႈ။
၄၀ တူၺ်းတီႈၶႃႈလူႊ။ၶႃႈၸဝ်ႈတူၵ်ႇဢၢင်ႈ ဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉယူႇတီႈၶႃႈဢေႃႈ။ၶႅၼ်းတေႃႈဢဝ်တင်းတြႃးတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉ ႁႂ်ႈၶႃႈၸဝ်ႈဢသၢၵ်ႈလိပ်းယူႇသေၵမ်းတီႈၶႃႈ။
၄၁ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈႁႂ်ႈၵရူႉၼႃႇၸဝ်ႈႁဝ်းဢၼ်ဝႃႈ၊ ၵျေးၸူးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ ႁွတ်ႈထိုင်ၵႃႈတီႈၶႃႈၸဝ်ႈၸွမ်းၵႃႈၼင်ႇဢၼ်ပျႃႇတိၵ်ႈၸဝ်ႈႁဝ်းမီးၼၼ်ႉ သေၵမ်းတီႈ ၶႃႈ။
၄၂ ၼင်ႇၼၼ်လႄႈၶႃႈၸဝ်ႈတၵ်းလႆႈမီးလွင်ႈဢၼ်တၵ်းလႆႈၶိုၼ်းၵႄႈလိတ်ႈၵႂၢမ်း ၵေႃႉဢၼ်သေႉဢၼ်သွမ်းၼၼ်ႉ ၵွပ်ႈပိူဝ်ႈဢၼ်ၶႃႈၸဝ်ႈဢိင်ပိုင်ႈ ၼုၵ်ႉၵ ပၢတ်ႈၸဝ်ႈႁဝ်းယူႇၼၼ်ႉတီႈၶႃႈဢေႃႈ။
၄၃ ၶႅၼ်းတေႃႈယႃႇပေၼုၵ်ႈသိမ်းဢဝ် ၵႂၢမ်းသႅတ်ႈၸႃႇၵႃႈၼႂ်းသူပ်းၶႃႈၸဝ်ႈလႃးလႃး။ၵွပ်ႈပိူဝ်ႈဢၼ်ၶႃႈၸဝ်ႈမုင်ထႃႈမွင်းထႃႈလွင်ႈတၢင်းဢၼ်ၸဝ်ႈႁဝ်း ၸီႇယၢင်ႇဝႆႉၸိူဝ်း ၼၼ်ႉတီႈၶႃႈဢေႃႈ။
၄၄ ၶႃႈၸဝ်ႈယင်းဢမ်ႇၵိုတ်းဢမ်ႇသဝ်းလႄႈတၵ်းပႂ်ႉၸွမ်းတြႃးၸဝ်ႈႁဝ်းယူႇတႃႇသေႇ ဢမ်ႇထၢတ်ႇတီႈၶႃႈဢေႃႈ။
၄၅ ၶႃႈၸဝ်ႈတၵ်းၵႂႃႇမႃးၵႃႈၼႂ်းတီႈဢၼ်ၵႂၢင်ႈလီလႃးလီၼၼ်ႉ ၵွပ်ႈပိူဝ်ႈဢၼ်ၶႃႈၸဝ်ႈတွင်ႈထၢမ်ႁႃဢဝ် ဢေႃးဝႃႇတႃႉၸဝ်ႈႁဝ်းၸိူဝ်း ၼၼ်ႉယူႇၼၼ်ႉတီႈၶႃႈဢေႃႈ။
၄၆ ၶႃႈၸဝ်ႈတၵ်းဢဝ်လွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉ ၸိူဝ်းၼၼ်ႉမွၵ်ႇလၢတ်ႈတီႈၶုၼ်ႁေႃၶမ်းတင်းလၢႆလႄႈ ဢမ်ႇမီး တၢင်းဢၼ်ဢူၵ်းဢၼ်ဢၢႆတီႈၶႃႈ။
၄၇ ၶႃႈၸဝ်ႈတၵ်းမူၼ်ႈပျေႃႇယူႇၵႃႈၼႂ်းပိင်းၺၢပ်ႈၸဝ်ႈႁဝ်း ဢၼ်ၶႃႈ ၸဝ်ႈႁၵ်ႉၸိူဝ်းၼၼ်ႉတီႈၶႃႈဢေႃႈ။
၄၈ ၶႃႈၸဝ်ႈတၵ်းယုၵ်ႉယွင်ႈမိူဝ်းၸူးတီႈပိင်းၺၢပ်ႈၸဝ်ႈႁဝ်း ဢၼ်ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉလႄႈ ၶုၵ်းၸႂ်လႆႈၶႆႈၸႂ်ဝူၼ်ႉၸႂ်လူၺ်ႈလွင်ႈထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ တီႈ ၶႃႈဢေႃႈ။
၄၉ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၼုၵ်ႉၵပၢတ်ႈဢၼ်ၸဝ်ႈႁဝ်းဝႆႉ တီႈၶႃႈၸဝ်ႈႁဝ်းဢၼ်ဝႃႈ၊လွင်ႈတၢင်းဢၼ်ၸဝ်ႈႁဝ်း ႁႂ်ႈၶႃႈၸဝ်ႈမုင်ထႃႈမွင်း ထႃႈယူႇၼၼ်ႉသေၵမ်းတီႈၶႃႈ။
၅၀ ပိူဝ်ႈဢၼ်ပျႃႇတိၵ်ႈၸဝ်ႈႁဝ်းႁႂ်ႈၶႃႈၸဝ်ႈဢသၢၵ်ႈလိပ်းယူႇလႄႈ ဢၼ်ၼၼ်ႉ ပဵၼ်လွင်ႈဢၼ်ၶႃႈၸဝ်ႈသၢၵ်ႈသႃႇမႃးၼႂ်းမိူဝ်ႈဢၼ်ၶႃႈၸဝ်ႈလႆႈၶၢမ်ႇ တုၵ်ႉၶႃႉတၢင်းၽၢၼ်ၼၼ်ႉတီႈ ၶႃႈဢေႃႈ။
၅၁ ပဵၵ်ႉသမ်ႉ၊ၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉသေႉသွမ်းၶႃႈၸဝ်ႈၼႃႇလူင်လၢင်သေၵေႃႈ ၶႃႈၸဝ်ႈ ဢမ်ႇဝေႈပႅတ်ႈတြႃးၸဝ်ႈႁဝ်းတီႈၶႃႈ။
၅၂ ထႃႇဝရႃႉၽြႃးတီႈၶႃႈ၊ၶႃႈၸဝ်ႈၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉ မိူဝ်ႈဢွၼ်ၼႆႉၼၼ်ႉၸိူဝ်းၼၼ်ႉလႄႈ တူဝ်ၸဝ်ႈၵဝ်ႇႁႂ်ႈတူဝ်ၸဝ်ႈၵဝ်ႇၼိမ်ၸႂ်ၼိမ် ၶေႃးယူႇတီႈၶႃႈဢေႃႈ။
၅၃ ၸႂ်ႈဢၼ်မႆႈဢၼ်ႁွၼ်ႉၸပ်းၸွႆးၶႃႈၸဝ်ႈယူႇၵွပ်ႈပိူဝ်ႈၵူၼ်းဢႃႉထမ်ႇမႃႉ ဢၼ်ၸုၼ်ႉ ပႅတ်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
၅၄ ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ ပဵၼ်လွင်ႈတၢင်းဢၼ်ၶႃႈၸဝ်ႈ ႁဵတ်းၵႂၢမ်းယူႇၵႃႈၼႂ်းႁိူၼ်း တီႈဢၼ်ၶႃႈ ၸဝ်ႈပဵၼ်ၶႅၵ်ႇယူႇၼႆႉတီႈၶႃႈဢေႃႈ။
၅၅ ထႃႇဝရႃႉၽြႃးတီႈၶႃႈ၊ ၶိင်ႇၵၢင်ၶိုၼ်းၶႃႈၸဝ်ႈၶုၵ်းၸႂ်လႆႈၶႆႈၸႂ်ထူပ်းၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ပႂ်ႉၸွမ်းတြႃးၸဝ်ႈႁဝ်းယူႇ တီႈၶႃႈဢေႃႈ။
၅၆ ၵွပ်ႈပိူဝ်ႈဢၼ်ၶႃႈၸဝ်ႈထွမ်ႇဢဝ်ဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉလႄႈ ၸင်ႇပဵၼ်မႃးတီႈ ၶႃႈၸဝ်ႈၸိူဝ်ႉၼင်ႇၼၼ်တီႈၶႃႈဢေႃႈ။
၅၇ ထႃႇဝရႃႉၽြႃးပဵၼ်ပုၼ်ႈပဵၼ်တႃႇၶႃႈၸဝ်ႈလႄႈ ၶႃႈၸဝ်ႈလၢတ်ႈဝႆႉလႄႈဝႃႈ၊-ၶႃႈၸဝ်ႈတၵ်းထွမ်ႇဢဝ်ၼုၵ်ႉၵပၢတ်ႈၵႂၢမ်း ၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆတီႈၶႃႈယဝ်ႉ။
၅၈ ၶႃႈၸဝ်ႈပႃးတင်းႁူဝ်ၸႂ်သဵင်ႈသဵင်ႈလႄႈ တွင်းပၢၼ်ႇတီႈၸဝ်ႈႁဝ်း၊ ႁႂ်ႈလႆႈၶၢမ်ႇၵျေးၸူးၸဝ်ႈႁဝ်းလႄႈ ၶႅၼ်းတေႃႈဢိတ်းလူၶႃႈၸဝ်ႈၸွမ်းၵႃႈၼင်ႇဢၼ်ပျႃႇ တိၵ်ႈၸဝ်ႈႁဝ်းမီးၼၼ်ႉသေၵမ်းတီႈၶႃႈ။
၅၉ ၶႃႈၸဝ်ႈၶႆႈၸႂ်ဝူၼ်ႉၸႂ်ႈလူၺ်ႈ လွင်ႈသဵၼ်ႈတၢင်းဢၼ်ၶႃႈၸဝ်ႈၵႂႃႇၸိူဝ်းၼၼ်ႉလႄႈ ဢဝ်တိၼ်ၶႃႈၸဝ်ႈဝၢႆႇၸူးငႅၵ်းၸူးလွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉတီႈၶႃႈဢေႃႈ။
၆၀ ၶႃႈၸဝ်ႈယင်းဢမ်ႇၵွႆႈဢမ်ႇထိူင်းလႄႈ ႁိပ်ႈၼႅတ်ႈႁႂ်ႈလႆႈပႂ်ႉၸွမ်း ပိင်းၺၢပ်ႈၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
၆၁ ပဵၵ်ႉသမ်ႉသဵၼ်ႈၸိူၵ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉ မတ်ႉၽုၵ်ႇၶႃႈၸဝ်ႈဝႆႉသေၵေႃႈၶႃႈၸဝ်ႈ ဢမ်ႇလူင်ႈဢမ်ႇလိုမ်း တြႃးၸဝ်ႈႁဝ်းတီႈ ၶႃႈ။
၆၂ ၶႃႈၸဝ်ႈထွၵ်ႈလူၺ်ႈလွင်ႈတၢင်းဢၼ်ၸဝ်ႈႁဝ်းၸီႇယၢင်ႇၸွမ်းၼင်ႇတြႃးဝႆႉၸိူဝ်းၼၼ်ႉလႄႈ လုၵ်ႉၶိင်ႇတဵင်ႈၶိုၼ်း ႁႂ်ႈလႆႈယွင်ႈယေႃးမုၼ်ၵျေးၸူးၸဝ်ႈႁဝ်း တီႈၶႃႈဢေႃႈ။
၆၃ ၶႃႈၸဝ်ႈပဵၼ်ၵေႃႉပဵၼ်သေႈလူၺ်ႈၵၼ်တင်း ၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်း ဢိၵ်ႇတင်းၶဝ်ၸိူဝ်းဢၼ်ထွမ်ႇဢဝ် ဢေႃးဝႃႇတႃႉၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
၆၄ ထႃႇဝရႃႉၽြႃးတီႈၶႃႈ၊လိၼ်မိူင်းၼႆႉ၊ တဵမ်ဝႆႉတင်းၵရူႉၼႃႇၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈ ဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉသင်ႇသွၼ်ပၼ်တီႈၶႃႈၸဝ်ႈသေၵမ်းတီႈၶႃႈ။
၆၅ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းႁဵတ်းၵျေးၸူးတီႈၶႃႈၸဝ်ႈ၊ၸွမ်းၵႃႈၼင်ႇဢၼ် ၼုၵ်ႉၵပၢတ်ႈၸဝ်ႈႁဝ်းမီးၼၼ်ႉတီႈၶႃႈဢေႃႈ။
၆၆ ၶႅၼ်းတေႃႈသွၼ်ပၼ်ၺၢၼ်ႇဢၼ်လီဢၼ်ငၢမ်း ဢိၵ်ႇတင်းဢတၢတ်ႈပိင်ႇၺႃႇတီႈၶႃႈၸဝ်ႈၵွပ်ႈပိူဝ်ႈၶႃႈၸဝ်ႈ ယုမ်ႇမၢတ်ႈပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
၆၇ ၸူဝ်ႈဢၼ်ၶႃႈၸဝ်ႈ ဢမ်ႇပႆႇလႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉၸိုင်ၶႃႈၸဝ်ႈပိူင်ႈတၢင်းၵႂႃႇတီႈၶႃႈဢေႃႈ။တေႃႈလဵဝ်ၼႆႉၸမ်း ၶႃႈၸဝ်ႈပႂ်ႉၸွမ်းပျႃႇတိၵ်ႈၸဝ်ႈႁဝ်းယူႇတီႈၶႃႈ ဢေႃႈ။
၆၈ ၸဝ်ႈႁဝ်းမီးၸႂ်ဢၼ်လီဢၼ်ငၢမ်းဢိၵ်ႇတင်းၸႂ်ဢၼ်ၸၢင်ႊႁဵတ်းၵျေးၸူးတီႈၶႃႈဢေႃႈ။ၶႅၼ်းတေႃႈ ဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉသွၼ် ပၼ်တီႈၶႃႈၸဝ်ႈသေၵမ်းတီႈၶႃႈ။
၆၉ ပဵၵ်ႉသမ်ႉၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉ ယူႇၽၢႆႇၼိုင်ႈတင်းၶႃႈၸဝ်ႈသေလႄႈ ၵျၢမ်ႇပွင်မူႉသႃႇယူႇသေၵေႃႈ ၶႃႈၸဝ်ႈတၵ်းပႃးတင်းႁူဝ်ၸႂ်သဵင်ႈသဵင်ႈ ၵမ်ၵျၢင်ႉဢေႃးဝႃႇတႃႉၸဝ်ႈ ႁဝ်းယူႇတီႈၶႃႈဢေႃႈ။
၇၀ ႁူဝ်ၸႂ်ၶဝ်ၼၼ်ႉယင်းမီးတၢင်းဢၼ်ပဵၼ်ၶႆပဵၼ်မၼ်းယူႇ မိူၼ်ၸိူဝ်ႉၼင်ႇၵွၼ်ႈၶႆၵွၼ်ႈမၼ်းၼၼ်ႉတီႈၶႃႈဢေႃႈ။ၶႃႈၸဝ်ႈၸမ်းမူၼ်ႈပျေႃႇ ယူႇၼႂ်းတြႃးၸဝ်ႈႁဝ်းတီႈၶႃႈဢေႃႈ။
၇၁ လွင်ႈၼင်ႇႁိုဝ်ၶႃႈၸဝ်ႈတၵ်းလႆႈသွၼ်ဢဝ် ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉၸိုင် တၢင်းဢၼ်ၶႃႈၸဝ်ႈလႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉပဵၼ်ဢၼ်လီပုၼ်ႈၶႃႈ ၸဝ်ႈတီႈၶႃႈဢေႃႈ။
၇၂ တြႃးဢၼ်ဢွၵ်ႇသူပ်းၸဝ်ႈႁဝ်းၼၼ်ႉ ယဵင်ႈၶႅၼ်းလီၼႃႇသငေိုၼ်းၶမ်းပဵၼ်ႁဵင်ပဵၼ် မုၼ်ႇတီႈၶႃႈၸဝ်ႈတီႈၶႃႈဢေႃႈ။
၇၃ မိုဝ်းၸဝ်ႈႁဝ်းႁဵတ်းပဵၼ်ၶႃႈၸဝ်ႈလႄႈ ႁႂ်ႈၶႃႈၸဝ်ႈပဵၼ်ပုင်ႇပဵၼ်ႁၢင်ႊတီႈၶႃႈယဝ်ႉ။ၶႅၼ်းတေႃႈႁႂ်ႈၶႃႈၸဝ်ႈတဵမ်ထူၼ်ႈဝႆႉတင်းၺၢၼ်ႇႁႂ်ႈၶႃႈၸဝ်ႈ သွၼ်ဢဝ်ပိင်းၺၢပ်ႈၸဝ်ႈႁဝ်းလႆႈ သေၵမ်းတီႈၶႃႈ။
၇၄ ၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းၼၼ်ႉတၵ်းႁၼ်ၶႃႈၸဝ်ႈလႄႈ ဢွၼ်ၵၼ်ၸူမ်းသိူဝ်းၵွပ်ႈပိူဝ်ႈၶႃႈၸဝ်ႈ မုင်ထႃႈမွင်းထႃႈၼုၵ်ႉၵပၢတ်ႈ ၸဝ်ႈႁဝ်းယူႇၼၼ်ႉတီႈၶႃႈဢေႃႈ။
၇၅ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁူႉလွင်ႈဢၼ် လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ ပဵၼ်ဢၼ်ၸိုဝ်ႈဢၼ်ၸႂ်ႈဢိၵ်ႇတင်းလွင်ႈတၢင်းဢၼ်ၸဝ်ႈႁဝ်းႁႂ်ႈၶႃႈၸဝ်ႈၶၢမ်ႇတုၵ်ႉၶႃႉတၢင်းၽၢၼ် မႅၼ်ႈၸွမ်းသႅတ်ႈၸႃႇၸဝ်ႈ ႁဝ်းၼၼ်ႉယူႇတီႈၶႃႈဢေႃႈ။
၇၆ ၶႅၼ်းတေႃႈၸဝ်ႈႁဝ်းပၼ်ၵတ်းယဵၼ်ၶျၢမ်းသႃႇတီႈၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈၼၼ်ႉ သေၵမ်း တီႈၶႃႈ။
၇၇ ၶႃႈၸဝ်ႈသူးတွင်းတီႈၶႃႈဢေႃႈ။ၶႅၼ်းတေႃႈႁႂ်ႈတၢင်းဢၼ်ၸဝ်ႈႁဝ်းဢိတ်းလူႁၵ်ႉပႅင်းၼၼ်ႉ ႁွတ်ႈထိုင်ၵႃႈၼိူဝ်ၶႃႈၸဝ်ႈ ႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇသေၵမ်းတီႈၶႃႈ။လွင်ႈမၼ်းၸမ်းတြႃးၸဝ်ႈႁဝ်းပဵၼ်တီႈဢၼ်ၶႃႈၸဝ်ႈ မူၼ်ႈပျေႃႇတီႈၶႃႈဢေႃႈ။
၇၈ ႁႂ်ႈၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉ ဢူၵ်းဢၢႆသေၵမ်းလူၺ်ႈ။လွင်ႈမၼ်းယင်းဢမ်ႇမီးလႄႈၶဝ်ႁဵတ်းဢၼ်ဢမ်ႇတြႃးၵႃႈတီႈၶႃႈၸဝ်ႈတီႈၶႃႈယဝ်ႉ။ၶႃႈၸဝ်ႈၸမ်း တၵ်းၶုၵ်းၸႂ်လႆႈၶႆႈၸႂ်ဝူၼ်ႉၸႂ်လူၺ်ႈ ဢေႃးဝႃႇ တႃႉၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
၇၉ ၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းဢၼ်ဝႃႈ ၶဝ်ၸိူဝ်းဢၼ်ႁူႉလွင်ႈတၢင်းဢၼ်ၸဝ်ႈႁဝ်း ၶၢမ်ႇသၢၵ်ႈသေႇဝႆႉၸိူဝ်းၼၼ်ႉ တၵ်းဢွၼ်ၵၼ်ဝၢႆႇၶိုၼ်းၸူးတီႈၶႃႈၸဝ်ႈတီႈၶႃႈဢေႃႈ။
၈၀ ၶႅၼ်းတေႃႈႁႂ်ႈႁူဝ်ၸႂ်ၶႃႈၸဝ်ႈၸေးၸုမ်ႇၼႂ်းထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉလႄႈ ႁႂ်ႈၶႃႈၸဝ်ႈၵၢင်းလွတ်ႈတင်းတၢင်းဢၼ်ဢူၵ်းဢၼ်ဢၢႆသေၵမ်းတီႈၶႃႈ။
၈၁ ဝိၺိၺ်ႇၶႃႈၸဝ်ႈႁႅင်းဢူၼ်ႈၵႂႃႇယၢမ်းမိူဝ်ႈဢၼ်တူၵ်ႇဢၢင်ႈၵျေးၸူး တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉတီႈၶႃႈဢေႃႈ။ၼႂ်းဝႃႈၼၼ်သေၵေႃႈ ၶႃႈၸဝ်ႈမုင်ထႃႈမွင်းထႃႈၼုၵ်ႉၵပၢတ်ႈၸဝ်ႈႁဝ်းယူႇတီႈၶႃႈဢေႃႈ။
၈၂ မၢၵ်ႇတႃၶႃႈၸဝ်ႈႁႅင်းဢူၼ်ႈၵႂႃႇယၢမ်းမိူဝ်ႈဢၼ် တူၵ်ႇဢၢင်ႈပျႃႇတိၵ်ႈၸဝ်ႈယူႇၼၼ်ႉလႄႈၶႃႈၸဝ်ႈဝႃႈ၊- ၸဝ်ႈႁဝ်းတၵ်းပၼ်ၵတ်းယဵၼ်ၶျၢမ်းသႃႇတီႈၶႃႈၸဝ်ႈမိူဝ်ႈ လႂ်တီႈၶႃႈ၊ ဝႃႈၼင်ႇၼႆယူႇတီႈၶႃႈဢေႃႈ။
၈၃ ၶႃႈၸဝ်ႈပဵၼ်ၸိူဝ်ႉၼင်ႇၼမ်ႉတဝ်ႈဢၼ်မီး ယူႇၵႃႈၼႂ်းၵွၼ်းၽႆးၼၼ်ႉတီႈၶႃႈဢေႃႈ။ၵူၺ်းၵႃႈၶႃႈၸဝ်ႈဢမ်ႇလူင်ႈဢမ်ႇလိုမ်း ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈ။
၈၄ မိူဝ်ႉဝၼ်းဢၼ်ၶႃႈၸဝ်ႈႁဝ်းလႆႈယူႇၼၼ်ႉၼမ်ၵႃႈႁိုဝ်တီႈၶႃႈ။ၸဝ်ႈႁဝ်းတၵ်းၸီႇယၢင်ႇတႅပ်းတတ်းတြႃး တီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉမိူဝ်ႈ လႂ်ၶႃႈ။
၈၅ ၶဝ်ၸိူဝ်းဢၼ်မႃႇၼႃႉယႂ်ႇလႄႈ ပူၼ်ႉလိူဝ်တြႃးၸဝ်ႈႁဝ်းၼၼ်ႉ ဢွၼ်ၵၼ်ၶုတ်ႉၶုမ်ၶုတ်ႉလုၵ်းပုၼ်ႈၶႃႈၸဝ်ႈတီႈၶႃႈယဝ်ႉ။
၈၆ ပိင်းၺၢပ်ႈၸဝ်ႈႁဝ်းၵႃႈမီးတင်းသဵင်ႈတင်းလူင်တဵမ်ဝႆႉတင်းသႅတ်ႈၸႃႇတီႈၶႃႈဢေႃႈ။လွင်ႈမၼ်းယင်းဢမ်ႇမီးလႄႈၶဝ်ဢွၼ်ၵၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈတီႈၶႃႈဢေႃႈ။ၶႅၼ်းတေႃႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။
၈၇ ၶဝ်ၸမ်းတၵ်းပႄႇၽဵဝ်ႈၶႃႈၸဝ်ႈပႅတ်ႈသေ ၵႃႈၼိူဝ်လိၼ်မိူင်းၼႆႉတီႈၶႃႈယဝ်ႉ။ၵူၺ်းၵႃႈၶႃႈၸဝ်ႈဢမ်ႇၸုၼ်ႉပႅတ်ႈဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉတီႈၶႃႈ။
၈၈ ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းမီးၼၼ်ႉသေၵမ်းတီႈၶႃႈ။ၼင်ႇၼၼ်လႄႈၶႃႈၸဝ်ႈတၵ်းပႂ်ႉၸွမ်း လွင်ႈတၢင်းဢၼ်ၸဝ်ႈႁဝ်းဝႃႈဢွၵ်ႇသူပ်းၶၢမ်ႇသၢၵ်ႈသေႇဝႆႉၼၼ်ႉ တီႈၶႃႈဢေႃႈ။
၈၉ ထႃႇဝရႃႉၽြႃးတီႈၶႃႈ၊ ၼုၵ်ႉၵပၢတ်ႈၸဝ်ႈႁဝ်းတႄႇယူႇၵႃႈၼိူဝ်ၽုင်ႇၵၢင်ႁၢဝ် တႃႇသေႇဢမ်ႇထၢတ်ႇတီႈၶႃႈဢေႃႈ။
၉၀ သႅတ်ႈၸႃႇၸဝ်ႈႁဝ်းမၼ်ႈၶိူင်ႇယူႇတီႈမဵဝ်းၵူၼ်းသိုပ်ႇသိုပ်ႇတၢမ်ႈတၢမ်ႈတီႈၶႃႈဢေႃႈ။ၸဝ်ႈႁဝ်းႁႂ်ႈလိၼ်မိူင်းတႄႇယူႇလႄႈ မၼ်းလႆႈမီးယူႇသေႇသေႇတီႈၶႃႈဢေႃႈ။
၉၁ ပိူဝ်ႈဢၼ်ၵႃႈမီးတင်းသဵင်ႈတင်းလူင်ပဵၼ်ၶႃႈၸဝ်ႈႁဝ်းလႄႈ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ တႄႇယူႇတေႃႇထိုင်ႁွတ်ႈဝၼ်းမိူဝ်ႈၼႆႉတီႈၶႃႈဢေႃႈ။
၉၂ သင်ၶႃႈၸဝ်ႈဢမ်ႇမီးတၢင်းဢၼ်မူၼ်ႈပျေႃႇၵႃႈၼႂ်းတြႃးၸဝ်ႈႁဝ်းၸိုင် ၶႃႈၸဝ်ႈတၵ်းလူႉလႅဝ်ၼႂ်းမိူဝ်ႈဢၼ်လႆႈၶၢမ်ႇတုၵ်ႉၶႃႉတၢင်းၽၢၼ် မိူဝ်ႈၼၼ်ႉတီႈၶႃႈယဝ်ႉ။
၉၃ ၶႃႈၸဝ်ႈတၵ်းဢမ်ႇလူင်ႈဢမ်ႇလိုမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉ သပွေၵ်ႈတီႈၶႃႈ။လွင်ႈမၼ်းၸမ်း ၸဝ်ႈႁဝ်းဢဝ်ၸိူဝ်းၼၼ်ႉႁႂ်ႈၶႃႈၸဝ်ႈဢသၢၵ်ႈလိပ်းယူႇတီႈၶႃႈဢေႃႈ။
၉၄ ၶႃႈၸဝ်ႈပဵၼ်တီႈဢၼ်ၸဝ်ႈႁဝ်းပိူင်ႇတီႈၶႃႈဢေႃႈ။ၶႅၼ်းတေႃႈၵႄႇသႄႇၶျွတ်ဢဝ်ၶႃႈၸဝ်ႈ ၵွပ်ႈပိူဝ်ႈဢၼ်ၶႃႈၸဝ်ႈႁႃဢဝ်ဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
၉၅ ၶဝ်ၸိူဝ်းဢၼ်ဢမ်ႇတြႃးၼၼ်ႉ ဢွၼ်ၵၼ်ပႂ်ႉထႃႈၶႃႈၸဝ်ႈယူႇႁႂ်ႈလႆႈယႃႉၶႃႈၸဝ်ႈပႅတ်ႈတီႈၶႃႈဢေႃႈ။ၶႃႈၸဝ်ႈၸမ်းၶုၵ်းၸႂ်လႆႈၶႆႈၸႂ်လူၺ်ႈ လွင်ႈတၢင်းဢၼ်ၸဝ်ႈႁဝ်း ၶၢမ်ႇသၢၵ်ႈသေႇဝႆႉၸိူဝ်းၼၼ်ႉယူႇ တီႈၶႃႈဢေႃႈ။
၉၆ ၶႃႈၸဝ်ႈႁၼ်တီႈသုတ်းတီႈၵွႆႇတၢင်းဢၼ်ၸေးၸုမ်ႇၵူႈၸိူဝ်ႉၵူႈပိူင်ၼၼ်ႉတီႈၶႃႈယဝ်ႉ။ပိင်းၺၢပ်ႈတြႃးၸဝ်ႈႁဝ်းၸမ်း ပဵၼ်ဢၼ်ၵႂၢင်ႈၼႃႇလူင်လၢင်တီႈၶႃႈဢေႃႈ။
၉၇ ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်တြႃးၸဝ်ႈႁဝ်းၼႃႇလူင်လၢင်လႄႈ ၸိူဝ်းၼၼ်ႉပဵၼ်တီႈဢၼ်ၶႃႈၸဝ်ႈၶုၵ်းၸႂ်လႆႈၶႆႈၸႂ်ဝူၼ်ႉၸႂ်ၸွမ်းယူႇ တင်းဝၼ်းတင်းဝၼ်းတီႈၶႃႈဢေႃႈ။
၉၈ ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉႁႂ်ႈၶႃႈၸဝ်ႈယဵင်ႈၶႅၼ်းမီးပိင်ႇၺႃႇ ၼႃႇသရေၢၼ်ႇသူႇၶႃႈၸဝ်ႈတင်းလၢႆလႄႈ ၸိူဝ်းၼၼ်ႉတႄႇယူႇတီႈၶႃႈၸဝ်ႈတႃႇသေႇဢမ်ႇထၢတ်ႇတီႈၶႃႈဢေႃႈ။
၉၉ ပိူဝ်ႈဢၼ်လွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉ ပဵၼ်တီႈဢၼ်ၶႃႈၸဝ်ႈၶုၵ်းၸႂ်လႆႈ ၶႆႈၸႂ်ဝူၼ်ႉၸႂ်ၸွမ်းၼၼ်ႉလႄႈ ၶႃႈၸဝ်ႈယဵင်ၶႅၼ်းမီးတၢင်းဢၼ်ႁူႉၼႃႇသသြေႃႇၶႃႈၸဝ်ႈ တင်းသဵင်ႈတင်းလူင်ၸိူဝ်းၼၼ်ႉတီႈၶႃႈဢေႃႈ။
၁၀၀ ၺၢၼ်ႇၶႃႈၸဝ်ႈယဵင်ႈၶႅၼ်းလီၼႃႇသေၶဝ်ၸိူဝ်းဢၼ်ဢသၢၵ်ႈယႂ်ႇၼၼ်ႉ ၵွပ်ႈပိူဝ်ႈဢၼ် ၶႃႈၸဝ်ႈပႂ်ႉၸွမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉယူႇတီႈၶႃႈဢေႃႈ။
၁၀၁ ၶႃႈၸဝ်ႈဝေႈပႅတ်ႈတၢင်းဢၼ်ဢမ်ႇလီဢမ်ႇငၢမ်းၵႃႈမီးၼၼ်ႉ ႁႂ်ႈလႆႈပႂ်ႉၸွမ်းၼုၵ်ႉ ၵပၢတ်ႈၸဝ်ႈႁဝ်းတီႈၶႃႈဢေႃႈ။
၁၀၂ ၶႃႈၸဝ်ႈဢမ်ႇဝေႈဢမ်ႇပိူင်ႈ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ ၵွပ်ႈပိူဝ်ႈဢၼ် ၸဝ်ႈႁဝ်းသွၼ်ပၼ်ၶႃႈၸဝ်ႈၼၼ်ႉတီႈၶႃႈ။
၁၀၃ ဢမိင်ႉၸဝ်ႈႁဝ်းၸိူဝ်းၼၼ်ႉဝၢၼ်ၸဵမ်းၼႃႇလူင်လၢင်ယူႇၵႃႈၼႂ်းၵူင်ၶေႃးၶႃႈၸဝ်ႈလႄႈ ယဵင်ႈၶႅၼ်းဝၢၼ်ၸဵမ်းၼႃႇသေ ၼမ်ႉၽိုင်ႈၵႃႈၼႂ်းသူပ်းၶႃႈၸဝ်ႈၼႆႉတီႈၶႃႈဢေႃႈ။
၁၀၄ ၶႃႈၸဝ်ႈၺၢၼ်ႇယႂ်ႇၵႂၢင်ႈမႃးၵွပ်ႈပိူဝ်ႈဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉလႄႈ ၶႃႈၸဝ်ႈငိၼ်းၸင်း သဵၼ်ႈတၢင်းမိၵ်ႉသႃႇၵႃႈမီးၼၼ်ႉတီႈၶႃႈဢေႃႈ။
၁၀၅ ၼုၵ်ႉၵပၢတ်ႈၸဝ်ႈႁဝ်း ပဵၼ်ၵွၵ်းၽႆး တီႈတိၼ်ၶႃႈၸဝ်ႈလႄႈ ပဵၼ်ဢၼ်ႁိူဝ်ႈလႅင်းတီႈသဵၼ်ႈတၢင်းၶႃႈၸဝ်ႈတီႈၶႃႈဢေႃႈ။
၁၀၆ ၶႃႈၸဝ်ႈလႆႈတိူင်ႇဝႃႈဝႆႉလႄႈဝႃႈ၊- ၶႃႈၸဝ်ႈတၵ်းပႂ်ႉၸွမ်းလွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉ သိုဝ်ႈသိုဝ်ႈတေႃႇတေႃႇၸိူဝ်းၼၼ်ႉဢေႃႈ၊ဝႃႈၼင်ႇၼႆလႄႈ ႁဵတ်းတႄႉတႄႉဝႃႈဝႃႈတီႈၶႃႈယဝ်ႉ။
၁၀၇ ၶႃႈၸဝ်ႈလႆႈၶၢမ်ႇ တုၵ်ႉၶႃႉတၢင်းၽၢၼ်ၼႃႇလူင်လၢင်တီႈၶႃႈဢေႃႈ။ထႃႇဝရႃႉၽြႃးတီႈၶႃႈ၊ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ်ၼုၵ်ႉၵပၢတ်ႈၸဝ်ႈႁဝ်းမီးၼၼ်ႉသေၵမ်းတီႈၶႃႈ။
၁၀၈ ၶႅၼ်းတေႃႈထုၵ်ႇၸႂ်ၵျိူၵ်ႈၸႂ်ၶိူင်ႈတၢင်းဢၼ်ပုၵ်ႉၸေႃႇ ဢၼ်ၶႃႈၸဝ်ႈမီးၸႂ်ၸေႇတၼႃႇသေလႄႈ ဢဝ်တင်းသူပ်းတူဝ်ၸဝ်ႈၵဝ်ႇႁဵတ်းၸိူဝ်းၼၼ်ႉသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ ၶႅၼ်းတေႃႈဢဝ်လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ သွၼ်ပၼ်တီႈၶႃႈၸဝ်ႈသေၵမ်းတီႈၶႃႈ။
၁၀၉ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ။ပဵၵ်ႉသမ်ႉဢသၢၵ်ႈၶႃႈၸဝ်ႈ မီးယူႇၵႃႈၼႂ်းမိုဝ်းၶႃႈၸဝ်ႈတႃႇသေႇၵေႃႈယႃႇ ၶႃႈၸဝ်ႈဢမ်ႇလူင်ႈဢမ်ႇလိုမ်းတြႃးၸဝ်ႈႁဝ်းတီႈၶႃႈ။
၁၁၀ ၶဝ်ၸိူဝ်းဢၼ်ဢမ်ႇတြႃးၼၼ်ႉ ၵၢင်တူင်ႇႁဵဝ်ႉတူင်ႇၶိုမ်းဝႆႉပုၼ်ႈၶႃႈၸဝ်ႈတီႈၶႃႈဢေႃႈ။ၵူၺ်းၵႃႈၶႃႈၸဝ်ႈဢမ်ႇဝေႈပိူင်ႈသေဢေႃးဝႃႇ၁၁၁ တႃႉၸဝ်ႈႁဝ်းၸိူဝ်းၼၼ်ႉတီႈၶႃႈ။
၁၁၁ ၶႃႈၸဝ်ႈၶၢမ်ႇဢဝ်လွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉပုၼ်ႈဢမူၺ်ႇဢုၵ်ႉၸႃႇတူဝ်ၸဝ်ႈၵဝ်ႇ ၵွပ်ႈပိူဝ်ႈဢၼ်ၸိူဝ်းၼၼ်ႉ ပဵၼ်တီႈဢၼ်ႁူဝ်ၸႂ်ၶႃႈၸဝ်ႈသိူဝ်သႂၢင်ႇတီႈၶႃႈဢေႃႈ။
၁၁၂ ၶႃႈၸဝ်ႈတိုၵ်းယူင်းႁူဝ်ၸႂ်ၶႃႈၸဝ်ႈႁႂ်ႈၶႃႈၸဝ်ႈလႆႈႁဵတ်းၸွမ်း ထုင်းၾိင်ႈၸဝ်ႈႁဝ်းၸိူဝ်းၼၼ်ႉယူႇတႃႇသေႇတေႃႇထိုင်ႁွတ်ႈ တီႈသုတ်းတီႈၵွႆတီႈၶႃႈဢေႃႈ။
၁၁၃ ၶႃႈၸဝ်ႈငိၼ်းၸင်းၶဝ်ၸိူဝ်းဢၼ်မီးၸႂ်သွင်ငၢမ်ႈၼၼ်ႉလႄႈ ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်တြႃးၸဝ်ႈႁဝ်းတီႈၶႃႈဢေႃႈ။
၁၁၄ ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈတဵတ်ႇမႅပ်းယူႇ ပဵၼ်ၶိူင်ႈႁႄႉလၢၵ်ႈၼၢၵ်ႈၶႃႈၸဝ်ႈလႄႈ ၶႃႈၸဝ်ႈမုင်ထႃႈမွင်းထႃႈၼုၵ်ႉၵပၢတ်ႈၸဝ်ႈႁဝ်းယူႇတီႈၶႃႈဢေႃႈ။
၁၁၅ ၵူၼ်းဢၼ်ႁဵတ်းတူႉၸရိူၵ်ႈၶဝ်ဢိူၺ်း၊ ဢွၼ်ၵၼ်ဢွၵ်ႇသေၵႃႈတီႈၵဝ်တႃႉ။ၵဝ်တၵ်းပႂ်ႉၵမ်ပႂ်ႉၸွမ်း ပိင်းၺၢပ်ႈၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။
၁၁၆ ၶႅၼ်းတေႃႈၵမ်ႉထွၵ်ႈၶႃႈၸဝ်ႈၸွမ်းၵႃႈၼင်ႇဢၼ်ပျႃႇတိၵ်ႈၸဝ်ႈႁဝ်းမီးၼၼ်ႉ ႁႂ်ႈၶႃႈၸဝ်ႈဢသၢၵ်ႈလႆႈလိပ်းယူႇသေၵမ်းတီႈၶႃႈ။ၶႅၼ်းတေႃႈယႃႇပေႁႂ်ႈၶႃႈၸဝ်ႈလႆႈဢူၵ်းလႆႈဢၢႆ ၼႂ်းလွင်ႈတၢင်းဢၼ်ၶႃႈၸဝ်ႈ မုင်ထႃႈမွင်းထႃႈယူႇၼၼ်ႉ သေၵမ်းတီႈၶႃႈ။
၁၁၇ ၶႅၼ်းတေႃႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်ၶႃႈၸဝ်ႈတၵ်းလႆႈၵတ်းယဵၼ်ၶျၢမ်းသႃႇလႄႈ တၵ်းထွၵ်ႈလူၺ်ႈထုင်းၾိင်ႈတြႃးၸဝ်ႈႁဝ်းယူႇတႃႇသေႇတီႈၶႃႈဢေႃႈ။
၁၁၈ ၸဝ်ႈႁဝ်းပႄႇပႅတ်ႈ ၶဝ်ၸိူဝ်းဢၼ်ပိူင်ႈထုင်းၾိင်ႈတြႃးၸဝ်ႈႁဝ်းၵႂႃႇၵႃႈမီးၼၼ်ႉတီႈၶႃႈဢေႃႈ။ပရိယႄႇ ၶဝ်ၼၼ်ႉပဵၼ်မူႉသႃႇတီႈၶႃႈဢေႃႈ။
၁၁၉ ၸဝ်ႈႁဝ်းမၢတ်ႈၵူၼ်းလိၼ်မိူင်း ဢၼ်ဢမ်ႇတြႃးတင်းသဵင်ႈတင်းလူင်ပဵၼ်ၸိူဝ်ႉၼင်ႇၶီႈငိုၼ်းဝၢၵ်ႇငိုၼ်းတီႈၶႃႈဢေႃႈ။ပိူဝ်ႈၼႆလႄႈ ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉ တီႈၶႃႈဢေႃႈ။
၁၂၀ တုမ်ႇၶူၼ်ၼိူဝ်ႉၶႃႈၸဝ်ႈတူၵ်း ၵွပ်ႈပိူဝ်ႈတၢင်းဢၼ်ၵူဝ်ႁႄၸဝ်ႈႁဝ်းၼၼ်ႉလႄႈ ၶႃႈၸဝ်ႈရူဝ်ႇသေႇၵူဝ်ယမ် လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၼၼ်ႉ တီႈၶႃႈဢေႃႈ။
၁၂၁ ၶႃႈၸဝ်ႈႁဵတ်းတၢင်းဢၼ်တႅပ်းတတ်းတြႃးဢိၵ်ႇတင်း တၢင်းဢၼ်ၸီႇယၢင်ႇ သိုဝ်ႈသိုဝ်ႈတေႃႇတေႃႇၼၼ်ႉတီႈၶႃႈဢေႃႈ။ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈဝႆႉၵႃႈၼႂ်းမိုဝ်း ၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉသေၵမ်းတီႈၶႃႈ။
၁၂၂ ၶႅၼ်းတေႃႈဢႃႇမႃႉၶၢမ်ႇဢဝ်ၶႃႈၸဝ်ႈႁဝ်း ပုၼ်ႈဢၼ်လီဢၼ်ငၢမ်းသေၵမ်းတီႈၶႃႈ။ယႃႇပေပၼ်ႁႂ်ႈၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉ လႆႈၼိၵ်ႈၸၢၵ်ႈငႅၼ်းသေးၶႃႈၸဝ်ႈသေၵမ်းတီႈၶႃႈ။
၁၂၃ မၢၵ်ႇတႃၶႃႈၸဝ်ႈႁႅင်းဢူၼ်ႈၵႂႃႇ ၼႂ်းတၢင်းဢၼ်တူၵ်ႇဢၢင်ႈၵျေးၸူးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်၊ ဢိၵ်ႇတင်းပျႃႇတိၵ်ႈၸဝ်ႈႁဝ်းဢၼ်သိုဝ်ႈလီတေႃႇလီၼၼ်ႉတီႈၶႃႈယဝ်ႉ။
၁၂၄ ၶႅၼ်းတေႃႈ ႁဵတ်းတီႈၶႃႈၸဝ်ႈၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းမီးၼၼ်ႉလႄႈ ဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ သွၼ်ပၼ်တီႈၶႃႈၸဝ်ႈသေၵမ်းတီႈၶႃႈ။
၁၂၅ ၶႃႈၸဝ်ႈပဵၼ်ၶႃႈၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈဢိတ်းလူပၼ်ၺၢၼ်ႇတီႈၶႃႈၸဝ်ႈ ႁႂ်ႈၶႃႈၸဝ်ႈလႆႈႁူႉလွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉသေၵမ်းတီႈၶႃႈ။
၁၂၆ ၶိင်ႇဢၼ်ထႃႇဝရႃႉၽြႃးထုၵ်ႇလီၸီႇယၢင်ႇၼၼ်ႉ ႁွတ်ႈထိုင်တီႈၶႃႈယဝ်ႉ။ၶဝ်ပႄႇပႅတ်ႈတြႃးၸဝ်ႈႁဝ်းတီႈၶႃႈဢေႃႈ။
၁၂၇ ၶႃႈၸဝ်ႈၸမ်း ယဵင်ႈၶႅၼ်းထုၵ်ႇၸႂ်ၵျိူၵ်ႈၸႂ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉၼႃႇသေၶမ်းဢမ်ႇၵႃး၊ ယဵင်ႈၶႅၼ်းထုၵ်ႇၸႂ်ၵျိူၵ်ႈၸႂ်လိူဝ်တွၼ်းၼႃႇသေ ၶမ်းလွတ်ႈငၢၼ်ႇတီႈၶႃႈဢေႃႈ။
၁၂၈ ပိူဝ်ႈၼႆလႄႈၶႃႈၸဝ်ႈမၢတ်ႈဢေႃးဝႃႇတႃႉၸဝ်ႈႁဝ်းတင်းသဵင်ႈတင်းလူင်၊ပဵၼ်ဢၼ်သိုဝ်ႈလီယူဝ်းလီလႄႈ ငိၼ်းၸင်းသဵၼ်ႈတၢင်းမိၵ်ႉသႃႇၵႃႈမီးၼၼ်ႉတီႈၶႃႈဢေႃႈ။
၁၂၉ လွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉပဵၼ်ဢၼ်လီဢၢမ်းလႄႈ ဝိၺိၺ်ႇၶႃႈၸဝ်ႈပႂ်ႉၵမ် ပႂ်ႉၸွမ်းယူႇတီႈၶႃႈဢေႃႈ။
၁၃၀ တၢင်းဢၼ်ၽုၺ်ႇဢွၵ်ႇၼႄပျႃးၼုၵ်ႉၵပၢတ်ႈၸဝ်ႈႁဝ်းၼၼ်ႉ ပၼ်ဢၼ်လႅင်းလႄႈ ၸၢင်ႊႁႂ်ႈၶဝ်ၸိူဝ်းဢၼ် ဢမ်ႇလၵ်းဢမ်ႇလႅမ်ၼၼ်ႉလၵ်းလႅမ်မႃးတီႈၶႃႈဢေႃႈ။
၁၃၁ ၶႃႈၸဝ်ႈဢႃႈပၢၵ်ႇသေလႄႈ ထူၺ်ႈၸႂ်သဝ်ႇၸႂ်လူင်ယူႇ ၵွပ်ႈပိူဝ်ႈဢၼ်ၶႃႈၸဝ်ႈ တူၵ်ႇဢၢင်ႈပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
၁၃၂ ၶႅၼ်းတေႃႈဝၢႆႇၸူးၶႃႈၸဝ်ႈလႄႈ ႁဵတ်းၵျေးၸူးတီႈၶႃႈၸဝ်ႈၸွမ်းၵႃႈၼင်ႇဢၼ်ၸဝ်ႈႁဝ်းၸၢင်ႊႁဵတ်း တီႈၶဝ်ၸိူဝ်းဢၼ်ႁၵ်ႉၼႃႇမႃႉၸိုဝ်သဵင်ၸဝ်ႈႁဝ်းၼၼ်သေၵမ်းတီႈၶႃႈ။
၁၃၃ ၶႅၼ်းတေႃႈၸွမ်းလူၺ်ႈဢမိင်ႉၸဝ်ႈႁဝ်းၼၼ်ႉလႄႈ ႁႂ်ႈတၢင်းဢၼ်ၶႃႈၸဝ်ႈယၢင်ႊတိၼ်ၵႂုႇၸိူဝ်းၼၼ်ႉ မၼ်ႈၶိူင်ႇသေၵမ်းတီႈၶႃႈ။ယႃႇပေႁႂ်ႈတူႉၸရိူၵ်ႈ လႆႈဢုပ်ႉပိူင်ႇၼိူဝ်ၶႃႈၸဝ်ႈလႃးလႃးသေၵမ်းတီႈၶႃႈ။
၁၃၄ ၶႅၼ်းတေႃႈၼုၵ်ႈဢဝ်ၶႃႈၸဝ်ႈသေၵႃႈၼႂ်း တၢင်းဢၼ်ၵူၼ်းၼိၵ်ႈၸၢၵ်ႈငႅၼ်းသေးၼၼ်ႉသေၵမ်းတီႈၶႃႈ။ၶႃႈၸဝ်ႈတၵ်းပႂ်ႉၵမ်ပႂ်ႉၸွမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉ တီႈၶႃႈဢေႃႈ။
၁၃၅ ၶႅၼ်းတေႃႈႁႂ်ႈၼႃႈၸဝ်ႈႁဝ်းလႅင်းထွင်ႇၵႃႈၼိူဝ်ၶႃႈၸဝ်ႈႁဝ်းလႄႈ ဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ သွၼ်ပၼ်တီႈၶႃႈၸဝ်ႈသေၵမ်းတီႈၶႃႈ။
၁၃၆ ၼမ်ႉတႃပဵၼ်ၼမ်ႉႁွင်ႊၼမ်ႉၵႄးဢၼ်လႆဢွၵ်ႇၵႃႈတီႈမၢၵ်ႇတႃၶဝ်ယူႇ ၵွပ်ႈပိူဝ်ႈဢၼ်ၶဝ်ဢမ်ႇပႂ်ႉၵမ်ပႂ်ႉၸွမ်းတြႃးၸဝ်ႈႁဝ်းၼၼ်ႉတီႈၶႃႈဢေႃႈ။
၁၃၇ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းသိုဝ်ႈတေႃႇတီႈၶႃႈဢေႃႈ။လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉ ၸိူဝ်းၼၼ်ႉသိုဝ်ႈလီယူဝ်းလီတီႈၶႃႈဢေႃႈ။
၁၃၈ ၸဝ်ႈႁဝ်းမီးတြႃးတၢင်းဢၼ်သိုဝ်ႈတေႃႇ၊ ဢိၵ်ႇတင်းသႅတ်ႈၸႃႇ ဢၼ်ၼမ်ၼႃႇလူင်လၢင်ၼၼ်ႉသေလႄႈ ၸီႇယၢင်ႇလွင်ႈတၢင်းဢၼ်ၸဝ်ႈႁဝ်း ၶၢမ်ႇသၢၵ်ႈသေႇဝႆႉ ၸိူဝ်းၼၼ်ႉတီႈၶႃႈဢေႃႈ။
၁၃၉ ၸႂ်ဢၼ်ၸပ်းဢၼ်ၸွႆးၶႃႈၸဝ်ႈသုတ်းၵႂႃႇသဵင်ႈၵႂႃႇ ၵွပ်ႈပိူဝ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉ လူင်လိုမ်းပႅတ်ႈၵႂၢမ်းၸဝ်ႈႁဝ်းၼၼ်ႉတီႈၶႃႈဢေႃႈ။
၁၄၀ ပိူဝ်ႈဢၼ်ပျႃႇတိၵ်ႈၸဝ်ႈႁဝ်းမူတ်းၸၢင်ႇၼႃႇလူင်လၢင်လႄႈ ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်တီႈၶႃႈဢေႃႈ။
၁၄၁ ၶႃႈၸဝ်ႈပဵၼ်ၵေႃႉဢၼ်လဵၵ်ႉဢၼ်ဢွၼ်ႇဢၼ်လႆႈၶၢမ်ႇတၢင်းဢၼ် ႁဵတ်းဢမ်ႇပေႃးၼင်ႇႁိုဝ်ၼၼ်ႉတီႈၶႃႈဢေႃႈ။ၵူၺ်းၵႃႈၶႃႈၸဝ်ႈဢမ်ႇလူင်ႈဢမ်ႇလိုမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉတီႈၶႃႈ။
၁၄၂ တၢင်းဢၼ်ၸဝ်ႈႁဝ်းသိုဝ်ႈတေႃႇၼၼ်ႉ ပဵၼ်တၢင်းဢၼ်သိုဝ်ႈတေႃႇ ၼိၵ်ႉၸႃႉထႃႇဝရႃႉလႄႈတြႃးၸဝ်ႈႁဝ်းၼၼ်ႉပဵၼ်သႅတ်ႈၸႃႇတြႃးတီႈၶႃႈဢေႃႈ။
၁၄၃ ပဵၵ်ႉသမ်ႉတၢင်းဢၼ် ယၢပ်ႇၸႂ်ၽိုတ်ႇၸႂ်ယၢၵ်ႈၸႂ်ၶၢၼ်ၸႂ်ႁွတ်ႈထိုင်ၵႃႈၼိူဝ်ၶႃႈၸဝ်ႈသေၵေႃႈ ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ ပဵၼ်တီႈဢၼ်ၶႃႈၸဝ်ႈ မူၼ်ႈပျေႃႇတီႈၶႃႈဢေႃႈ။
၁၄၄ လွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉ သိုဝ်ႈတေႃႇယူႇတႃႇသေႇတီႈၶႃႈဢေႃႈ။ၶႅၼ်းတေႃႈပၼ်ၺၢၼ်ႇတီႈၶႃႈၸဝ်ႈႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇ သေၵမ်းတီႈၶႃႈ။
၁၄၅ ၶႃႈၸဝ်ႈ ပႃးတင်းႁူဝ်ၸႂ်သဵင်ႈသဵင်ႈသေလႄႈ ႁွင်ႉသႅၼ်ႇလဝ်ႈဝႃႈ၊- ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၶိုၼ်းဢိူဝ်ႈသေၵမ်းတီႈၶႃႈ။ၶႃႈၸဝ်ႈတၵ်းပႂ်ႉၵမ်ပႂ်ႉၸွမ်းထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉ တီႈၶႃႈဢေႃႈ၊ဝႃႈၼင်ႇၼႆတီႈၶႃႈဢေႃႈ။
၁၄၆ ၶႃႈၸဝ်ႈႁွင်ႉသႅၼ်ႇတီႈၸဝ်ႈႁဝ်းလႄႈလဝ်ႈလၢတ်ႈလႄႈဝႃႈ၊- ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတၵ်းပႂ်ႉၵမ်ပႂ်ႉၸွမ်း လွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉတီႈၶႃႈဢေႃႈ။
၁၄၇ ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉၶႃႈၸဝ်ႈလုၵ်ႉလႄႈ ႁွင်ႉသႅၼ်ႇမုင်ထႃႈမွင်းထႃႈၼုၵ်ႉၵပၢတ်ႈၸဝ်ႈႁဝ်းယူႇ တီႈၶႃႈဢေႃႈ။
၁၄၈ ၸူဝ်ႈဢၼ်ၶိင်ႇၵၢင်ၶိုၼ်းဢမ်ႇပႆႇတၼ်းပူၼ်ႉၼၼ်ႉၶႃႈၸဝ်ႈယင်းတိုၼ်ႇယူႇလႄႈ ၶုၵ်းၸႂ်လႆႈၶႆႈၸႂ်ဝူၼ်ႉၸႂ်လူၺ်ႈ ပျႃႇတိၵ်ႈၸဝ်ႈႁဝ်းယူႇတီႈၶႃႈဢေႃႈ။
၁၄၉ ၶႅၼ်းတေႃႈထွမ်ႇသဵင်ၶႃႈၸဝ်ႈ ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းမီးၼၼ်ႉသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းလူၺ်ႈလွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉသေၵမ်းတီႈၶႃႈ။
၁၅၀ ၶဝ်ၸိူဝ်းဢၼ်ၵႂႃႇမႃးၼႂ်းတၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းၼၼ်ႉဢွၼ်ၵၼ်သုတ်ႉၸမ်မႃးတီႈၶႃႈဢေႃႈ။ၶဝ်ၼၼ်ႉၵႆၵၼ်တင်းတြႃးၸဝ်ႈႁဝ်းတီႈၶႃႈဢေႃႈ။
၁၅၁ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းမီးၸမ်ယူႇတီႈၶႃႈဢေႃႈ။ပိင်းၺၢပ်ႈၸဝ်ႈႁဝ်း ၵူႈၸိူဝ်ႉၵူႈပိူင်ၸိူဝ်းၼၼ်ႉ ပဵၼ်သႅတ်ႈၸႃႇတီႈၶႃႈဢေႃႈ။
၁၅၂ ၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉၶႃႈၸဝ်ႈသွၼ်ဢဝ်လွင်ႈဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉဢၼ်တႄႇယူႇသေႇသေႇၼၼ်ႉ တီႈၶႃႈဢေႃႈ။
၁၅၃ ၶႅၼ်းတေႃႈလူႈတူၺ်းတုၵ်ႉၶႃႉတၢင်းၽၢၼ်ၶႃႈၸဝ်ႈလႄႈ ၵႄႇသႄႇၼုၵ်ႈဢဝ်ၶႃႈၸဝ်ႈ သေၵမ်းတီႈၶႃႈ။ၶႃႈၸဝ်ႈဢမ်ႇလူင်ႈဢမ်ႇလိုမ်းတြႃးၸဝ်ႈႁဝ်းတီႈၶႃႈ။
၁၅၄ ၶႅၼ်းတေႃႈပႂ်ႉဢမူႉၶႃႈၸဝ်ႈလႄႈ ထူတ်ႇၼုၵ်ႈဢဝ်ၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ်ပျႃႇတိၵ်ႈၸဝ်ႈႁဝ်းမီးၼၼ်ႉသေၵမ်းတီႈၶႃႈ။
၁၅၅ တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ ၵႆၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉ ၵွပ်ႈပိူဝ်ႈဢၼ်ၶဝ်ဢမ်ႇႁႃဢဝ် ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
၁၅၆ ထႃႇဝရႃႉၽြႃးတီႈၶႃႈ။ၸႂ်တၢင်းဢၼ်ၸဝ်ႈႁဝ်းဢိတ်းလူႁၵ်ႉပႅင်းၼၼ်ႉလိူင်ႇၼမ်တီႈၶႃႈဢေႃႈ။ၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ် လွင်ႈတၢင်းဢၼ်ၸဝ်ႈႁဝ်းၸီႇယၢင်ႇမီးဝႆႉၸိူဝ်းၼၼ်ႉသေၵမ်းတီႈၶႃႈ။
၁၅၇ ၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈဢိၵ်ႇတင်း ၶဝ်ၸိူဝ်းဢၼ်ႁဵတ်းၶတ်းၵၼ်တင်းၶႃႈၸဝ်ႈၼၼ်ႉမီးၼမ်ၼႃႇတီႈၶႃႈဢေႃႈ။ၵူၺ်းၵႃႈၶႃႈၸဝ်ႈဢမ်ႇဝေႈပိူင်ႈသေလွင်ႈတၢင်းဢၼ် ၸဝ်ႈႁဝ်းၶၢမ်ႇသၢၵ်ႈသေႇဝႆႉ ၸိူဝ်းၼၼ်ႉလႄႈ ၵႂႃႇတီႈၶႃႈ။
၁၅၈ ၶႃႈၸဝ်ႈလႆႈႁၼ်ၶဝ်ၸိူဝ်းဢၼ်ဢမ်ႇမီးသႅတ်ႈၸႃႇၼၼ်ႉလႄႈၸဵပ်းၸႂ်တီႈၶႃႈဢေႃႈ။လွင်ႈမၼ်းၸမ်း ၶဝ်ၼၼ်ႉ ယင်းဢမ်ႇထွမ်ႇဢမ်ႇဢဝ်ၵႂၢမ်းပျႃႇတိၵ်ႈၸဝ်ႈႁဝ်းလႄႈယူႇ တီႈၶႃႈယဝ်ႉ။
၁၅၉ ၶႅၼ်းတေႃႈလူႈတူၺ်းလွင်ႈဢၼ်ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်ဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉ သေၵမ်းတီႈၶႃႈ။ထႃႇဝရႃႉၽြႃးတီႈၶႃႈၶႅၼ်းတေႃႈႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်းမီးၼၼ်ႉသေၵမ်းတီႈၶႃႈ။
၁၆၀ ၼုၵ်ႉၵပၢတ်ႈၸဝ်ႈၵူႈၸိူဝ်ႉၵူႈပိူင်၊ပဵၼ်ဢၼ်ၸိုဝ်ႈဢၼ်ၸႂ်ႈတီႈၶႃႈဢေႃႈ။လွင်ႈတၢင်းဢၼ်ၸဝ်ႈႁဝ်းၸီႇယၢင်ႇၸွမ်းၼင်ႇတြႃးဝႆႉတင်းသဵင်ႈတင်းလူင်ၼၼ်ႉ တႄႇယူႇတႃႇသေႇဢမ်ႇထၢတ်ႇတီႈၶႃႈဢေႃႈ။
၁၆၁ ပဵၵ်ႉသမ်ႉၶုၼ်တင်းလၢႆ၊ ယင်းဢမ်ႇမီးလွင်ႈမၼ်းတၢင်းမၼ်းလႄႈ ၼိၵ်ႈၸၢၵ်ႈငႅၼ်းသေးၶႃႈၸဝ်ႈသေၵေႃႈႁူဝ်ၸႂ်ၶႃႈၸဝ်ႈ၊ၵူဝ်ယမ်ၵႂၢမ်းၸဝ်ႈႁဝ်းယူႇတီႈၶႃႈဢေႃႈ။
၁၆၂ ၶႃႈၸဝ်ႈသိူဝ်းပျေႃႇၵွပ်ႈပိူဝ်ႈပျႃႇတိၵ်ႈၸဝ်ႈႁဝ်းၼၼ်ႉ မိူၼ်ၸိူဝ်ႉၼင်ႇ ၵေႃႉဢၼ်ထူပ်းဢုၵ်ႉၸႃႇဢၼ်ႁိမ်ႁူင်ႇဢဝ်လႄႈလႆႈမႃးၼၼ်ႉတီႈၶႃႈဢေႃႈ။
၁၆၃ ၶႃႈၸဝ်ႈၶၢၼ်ႉငိၼ်းလႄႈ လီႁင်ႈဢဵတ်ႇသဵတ်ႇၵႂၢမ်းမူႉသႃႇတီႈၶႃႈဢေႃႈ။တြႃးၸဝ်ႈႁဝ်းၸမ်းၶႃႈၸဝ်ႈထုၵ်ႇၸႂ်ၵျိူၵ်ႈၸႂ်တီႈၶႃႈဢေႃႈ။
၁၆၄ ၶႃႈၸဝ်ႈယွင်ႈယေႃးၸဝ်ႈႁဝ်းယေႈဝၼ်းၸဵတ်းပွၵ်ႈ ၵွပ်ႈပိူဝ်ႈလွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉသိုဝ်ႈသိုဝ်ႈတေႃႇတေႃႇၸိူဝ်းၼၼ်ႉတီႈၶႃႈဢေႃႈ။
၁၆၅ ၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ်တြႃးၸဝ်ႈႁဝ်းၼၼ်ႉ မီးတၢင်းဢၼ်ၼိမ်သိမ်ႇယႂ်ႇၼႃႇလႄႈလွင်ႈဢၼ်ၶဝ်တၵ်းလႆႈၸႂ်လူႉၼၼ်ႉ ဢမ်ႇမီးတီႈၶႃႈ။
၁၆၆ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈမုင်ထႃႈမွင်းထႃႈၵျေးၸူးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉလႄႈ ၵမ်ၵျၢင်ႉပိင်းၺၢပ်ႈၸဝ်ႈႁဝ်းတင်းလၢႆယူႇတီႈၶႃႈဢေႃႈ။
၁၆၇ ဝိၺိၺ်ႇၶႃႈၸဝ်ႈပႂ်ႉၵမ်ပႂ်ႉၸွမ်းလွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉ ၸိူဝ်းၼၼ်ႉယူႇလႄႈ ၶႃႈၸဝ်ႈထုၵ်ႇၸႂ်ၵျိူၵ်ႈၸႂ်ၸိူဝ်းၼၼ်ႉၼႃႇလူင်လၢင်တီႈၶႃႈဢေႃႈ။
၁၆၈ ၶႃႈၸဝ်ႈပႂ်ႉၵမ်ပႂ်ႉၸွမ်းဢေႃးဝႃႇတႃႉၸဝ်ႈႁဝ်း ဢိၵ်ႇတင်းလွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉၸိူဝ်းၼၼ်ႉ တီႈၶႃႈဢေႃႈ။သဵၼ်ႈတၢင်းၶႃႈၸဝ်ႈၵႃႈမီးၸိူဝ်းၼၼ်ႉ မီးယူႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
၁၆၉ ထႃႇဝရႃႉၽြႃးတီႈၶႃႈ၊ႁႂ်ႈသဵင်ဢၼ်ၶႃႈၸဝ်ႈႁွင်ႉသႅၼ်ႇၼၼ်ႉ ႁွတ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ၶႅၼ်းတေႃႈပၼ်ၺၢၼ်ႇတီႈၶႃႈၸဝ်ႈၸွမ်းၵႃႈၼင်ႇဢၼ် ၼုၵ်ႉၵပၢတ်ႈၸဝ်ႈမီးၼၼ်ႉသေၵမ်းတီႈၶႃႈ။
၁၇၀ ၶႅၼ်းတေႃႈႁႂ်ႈ ၵႂၢမ်းဢၼ်ၶႃႈၸဝ်ႈလဝ်ႈယွၼ်းၼႆႉႁွတ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်း သေၵမ်းတီႈၶႃႈ။ၶႅၼ်းတေႃႈ ၵႄႇသႄႇၼုၵ်ႈဢဝ်ၶႃႈၸဝ်ႈ ၸွမ်းၵႃႈၼင်ႇဢၼ်ပျႃႇတိၵ်ႈၸဝ်ႈမီးၼၼ်ႉ သေၵမ်းတီႈၶႃႈ။
၁၇၁ သူပ်းၶႃႈၸဝ်ႈတၵ်းဝႃႈဢွၵ်ႇ ၵႂၢမ်းတၢင်းဢၼ်ယွင်ႈယေႃးၸဝ်ႈႁဝ်းၵွပ်ႈပိူဝ်ႈဢၼ်ၸဝ်ႈႁဝ်းဢဝ်ထုင်းၾိင်ႈတြႃးၸဝ်ႈႁဝ်းၸိူဝ်းၼၼ်ႉသွၼ်ပၼ်တီႈၶႃႈၸဝ်ႈၼၼ်ႉတီႈၶႃႈဢေႃႈ။
၁၇၂ လိၼ်ႉၶႃႈၸဝ်ႈတၵ်းႁဵတ်းၵႂၢမ်း လွင်ႈပျႃႇတိၵ်ႈၸဝ်ႈႁဝ်းၼၼ်ႉ ၵွပ်ႈပိူဝ်ႈဢၼ်ပိင်းၺၢပ်ႈၸဝ်ႈႁဝ်း ၵူႈၸိူဝ်ႉၵူႈပိူင်သိုဝ်ႈတေႃႇၼၼ်ႉတီႈၶႃႈဢေႃႈ။
၁၇၃ ႁႂ်ႈမိုဝ်းၸဝ်ႈႁဝ်းၸွႆႈထႅမ်ၶႃႈၸဝ်ႈယူႇၵွပ်ႈပိူဝ်ႈဢၼ် ၶႃႈၸဝ်ႈလိူၵ်ႈၵဵပ်းဢဝ်ဢေႃးဝႃႇတႃ ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
၁၇၄ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈတူၵ်ႇဢၢင်ႈၵျေးၸူး တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉတီႈၶႃႈဢေႃႈ။တြႃးၸဝ်ႈႁဝ်းၵေႃႈပဵၼ်တီႈဢၼ်ၶႃႈၸဝ်ႈ မူၼ်ႈပျေႃႇတီႈၶႃႈဢေႃႈ။
၁၇၅ ႁႂ်ႈဝိၺိၺ်ႇၶႃႈၸဝ်ႈဢသၢၵ်ႈလိပ်းယူႇလႄႈယွင်ႈယေႃးၸဝ်ႈႁဝ်းသေၵမ်းတီႈၶႃႈ။ႁႂ်ႈလွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ ၸွႆႈထႅမ်မႃႉၸႃႉၶႃႈၸဝ်ႈယူႇသေၵမ်းတီႈၶႃႈ။
၁၇၆ ၶႃႈၸဝ်ႈၽိတ်းတၢင်းပိူင်ႈတၢင်းၵႂႃႇ မိူၼ်ၸိူဝ်ႉၼင်ႇသူဝ်းဢၼ်ႁၢႆၵႂႃႇၼၼ်ႉတီႈၶႃႈယဝ်ႉ။ၶႅၼ်းတေႃႈႁႃဢဝ်ၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈဢမ်ႇလူင်ႈဢမ်ႇလိုမ်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈ။