၁၁၈
၁ ဢွၼ်ၵၼ်ယွင်ႈယေႃး ၵျေးၸူးထႃႇဝရႃႉၽြႃးၵွပ်ႈပိူဝ်ႈဢၼ်မၼ်းၸဝ်ႈ ပဵၼ်ဢၼ်မျၢတ်ႈလီလႄႈ ၵရူႉၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇၼၼ်ႉ တႃႉ။
၂ ႁႂ်ႈမဵဝ်းဢိသရေႇလႁပ်ႉတုင်းဢဝ်လႄႈဝႃႈ၊-ၵရူႉၼႃႇမၼ်းၸဝ်ႈ တႄႇယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆသေၵမ်းလူၺ်ႈ။
၃ ႁႂ်ႈၸိူဝ်ႉၶိူဝ်းဢႃႇရုၼ်ႇ ႁပ်ႉတုင်းဢဝ်လႄႈဝႃႈ၊-ၵရူႉၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆသေၵမ်းလူၺ်ႈ။
၄ ႁႂ်ႈၶဝ်ၸိူဝ်းဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၼၼ်ႉႁပ်ႉတုင်းဢဝ်လႄႈဝႃႈ၊-ၵရူႉၼႃႇမၼ်းၸဝ်ႈတႄႇယူႇတႃႇသေဢမ်ႇထၢတ်ႇဢေႃႈ၊ ဝႃႈၼင်ႇၼႆသေၵမ်း လူၺ်ႈ။
၅ ၵဝ်ယူႇၵႃႈၼႂ်းတီႈဢၼ်ၵိတ်ႇဢၼ်ၵႅပ်ႈႁွင်ႉႁႃထႃႇဝရႃႉၽြႃးလႄႈ ထႃႇဝရႃႉၽြႃးဢိူဝ်ႈၵဝ်လႄႈဢဝ်ၵဝ်သႂၢင်းသႂ်ႇပၼ်ၵႃႈၼႂ်း တီႈဢၼ်ၵႂၢင်ႈလီလႃးလီ ဢေႃႈ။
၆ ထႃႇဝရႃႉၽြႃးမီးယူႇၽၢႆႇၵဝ်လႄႈၵဝ်ဢမ်ႇမီး တီႈဢၼ်တၵ်းၵူဝ်တၵ်းႁႄ။
၇ ၵူၼ်းတၵ်းႁဵတ်းၸိူဝ်ႉၼင်ႇႁိုဝ်တီႈၵဝ်လႆႈ။ပိူဝ်ႈဢၼ်ထႃႇဝရႃႉၽြႃးၶဝ်ႈပႃးၵႃႈၼႂ်းၶဝ်ၸိူဝ်းဢၼ်ၸွႆႈထႅမ်မႃႉၸႃႉၵဝ်ၼၼ်ႉလႄႈ ယူႇၽၢႆႇၵဝ်ယူႇၼၼ်ႉ ၵဝ်တၵ်းလႆႈပႄႉၼႅင်ႇၵႃႈၼိူဝ် ၶဝ် ၸိူဝ်းဢၼ်ၸင်းၵဝ်ၼၼ်ႉဢေႃႈ။
၈ တၢင်းဢၼ်သွၼ်ႈပိုင်ႈတီႈထႃႇဝရႃႉၽြႃးၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်ဢိင်ပိုင်ႈၵူၼ်းၼၼ်ႉဢေႃႈ။
၉ တၢင်းဢၼ်သွၼ်ႈပိုင်ႈတီႈထႃႇဝရႃႉၽြႃးၼၼ်ႉ ယဵင်ႈၶႅၼ်းလီၼႃႇ သေတၢင်းဢၼ်ဢိင်ပိုင်ႈၶုၼ်ၵွၼ်းဢေႃႈ။
၁၀ မဵဝ်းၵူၼ်းတင်းသဵင်ႈတင်းလူင် ဢွၼ်ၵၼ်လွမ်ႉႁွပ်ႈၵဝ်ဝႆႉသေၵေႃႈၵဝ်တၵ်းဢိင် ၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈ ပႄႇတႅပ်းၶဝ်ပႅတ်ႈဢေႃႈ။
၁၁ ၶဝ်ဢွၼ်ၵၼ်လွမ်ႉႁွပ်ႈၵဝ်ဝႆႉယူႇဢေႃႈ။ၶဝ်ဢွၼ်ၵၼ်လွမ်ႉႁွပ်ႈၵဝ်ဝႆႉယူႇသေၵေႃႈၵဝ်တၵ်းဢိင်ၼႃႇမႃႉၸိုဝ်သဵင် ထႃႇဝရႃႉၽြႃးလႄႈ ပႄႇတႅပ်းၶဝ်ပႅတ်ႈဢေႃႈ။
၁၂ ၶဝ်ဢွၼ်ၵၼ်လွမ်ႉႁွပ်ႈၵဝ်ဝႆႉယူႇမိူၼ်ၸိူဝ်ႉၼင်ႇၽုင်ၽိုင်ႈၼၼ်ႉလႄႈ မွတ်ႇယဵၼ်ၵႂႃႇမိူၼ်ၸိူဝ်ႉၼင်ႇ ၽႆးဢၼ်မႆႈယုမ်းၼၢမ်ၼၼ်ႉဢေႃႈ။ၵဝ်တၵ်းဢိင်ၼႃႇမႃႉၸိုဝ်သဵင်ထႃႇဝရႃႉၽြႃးလႄႈ ပႄႇ တႅပ်းၶဝ်ပႅတ်ႈဢေႃႈ။
၁၃ ပဵၵ်ႉသမ်ႉမႂ်းတွၵ်ႈဢီးၵဝ်ၼႃႇလူင်လၢင်ႁႂ်ႈၵဝ်လႆႈလူမ်ႉသေၵေႃႈ ထႃႇဝရႃႉၽြႃးၸွႆႈထႅမ် ၵဝ်ယူႇဢေႃႈ။
၁၄ ထႃႇဝရႃႉၽြႃးပဵၼ်ႁႅင်းတၼ်းၶူဝ်းၵဝ်ပဵၼ်တၢင်းဢၼ်ၵဝ်ႁဵတ်းၵႂၢမ်းလႄႈ ပဵၼ်တၢင်းဢၼ် ၵႄႇသႄႇၶျွတ်ႈဢဝ်ၵဝ်ဢေႃႈ။
၁၅ သဵင်ဢၼ်ႁွင်ႉဢၼ်သႂၢင်ႇဢၼ်သိူဝ်း ဢိၵ်ႇတင်း တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ မီးၵႃႈၼႂ်းသုမ်ႉထဵင် ၶဝ်ၸိူဝ်းဢၼ်သိုဝ်ႈတေႃႇၼၼ်ႉဢေႃႈ။မိုဝ်းၶွၼ်ၶႂႃထႃႇဝရႃႉၽြႃး ႁဵတ်းလွင်ႈတၢင်းဢၼ်ႁႅင်းယႂ်ႇၼႃႇၼၼ်ႉဢေႃႈ။
၁၆ မိုဝ်းၶွၼ်ၶႂႃထႃႇဝရႃႉၽြႃး မီးတၢင်းဢၼ်ယုၵ်ႉယွင်ႈယူႇဢေႃႈ။မိုဝ်းၶွၼ်ၶႂႃထႃႇဝရႃႉၽြႃးႁဵတ်းလွင်ႈတၢင်းဢၼ်ႁႅင်းယႂ်ႇၼႃႇၼၼ်ႉဢေႃႈ။
၁၇ ၵဝ်တၵ်းဢမ်ႇတၢႆ။ၵဝ်တၵ်းဢသၢၵ်ႈလိပ်းယူႇလႄႈ ဢဝ်လွင်ႈတၢင်းဢၼ်ထႃႇဝရႃႉၽြႃးႁဵတ်းၸိူဝ်းၼၼ်ႉ မွၵ်ႇလၢတ်ႈထႅင်ႈလူး ၵွၼ်ႇဢေႃႈ။
၁၈ ပဵၵ်ႉသမ်ႉထႃႇဝရႃႉၽြႃးသင်ႇသွၼ်သုင်းမႃႉၵဝ်ၵိတ်ႉၵႅၼ်းၼႃႇလူင်လၢင်သေၵေႃႈ မၼ်းၸဝ်ႈဢမ်ႇဢဝ်ၵဝ်ဢၢပ်ႈပၼ်ၵႃႈတီႈတၢင်းတၢႆ။
၁၉ ၶႅၼ်းတေႃႈၽုၺ်ႇၽၵ်းတူ တၢင်းဢၼ်သိုဝ်ႈတေႃႇၸိူဝ်းၼၼ်ႉပၼ်တီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတၵ်းၶဝ်ႈလႄႈ ယွင်ႈယေႃး ၵျေးၸူးထႃႇဝရႃႉၽြႃး ဢေႃႈ။
၂၀ ဢၼ်ၼႆႉပဵၼ်ၽၵ်းတူထႃႇဝရႃႉၽြႃးလႄႈၶဝ်ၸိူဝ်းဢၼ်သိုဝ်ႈတေႃႇၼၼ်ႉ တၵ်းလႆႈၶဝ်ႈဢေႃႈ။
၂၁ ၶႃႈၸဝ်ႈ တၵ်းယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။လွင်ႈမၼ်းၸမ်းၸဝ်ႈႁဝ်းဢိူဝ်ႈၶႃႈၸဝ်ႈလႄႈ ပဵၼ်လွင်ႈတၢင်းဢၼ် ၵႄႇသႄႇၶျွတ်ႈဢဝ်ၶႃႈၸဝ်ႈ တီႈၶႃႈဢေႃႈ။
၂၂ မၢၵ်ႇႁိၼ်ဢၼ်ၶဝ်ၸိူဝ်းဢၼ်ႁဵတ်းတိူၵ်ႈပႅတ်ႈဝႆႉၼၼ်ႉ ၵမ်းလိုၼ်းပဵၼ်ႁူဝ်ၸဵင်ႇတိူၵ်ႈဢေႃႈ။လွင်ႈတီႈႁဵင်းၼႆႉ ပဵၼ်တီႈဢၼ်ထႃႇဝရႃႉၽြႃးႁဵတ်း ဝႆႉဢေႃႈ။
၂၃ ၵႃႈတႂ်ႈတႃႁဝ်းၼႆႉၵေႃႈပဵၼ်ဢၼ်လီဢၢမ်း ဢေႃႈ။
၂၄ မိူဝ်ႉဝၼ်းမိူဝ်ႈၼႆႉၸမ်းပဵၼ်မိူဝ်ႉဝၼ်းဢၼ် ထႃႇဝရႃႉၽြႃးႁဵတ်းပဵၼ်လႄႈ ဢွၼ်ၵၼ်သိူဝ်းၸူမ်းမူၼ်ႈ ပျေႃႇၼႂ်းမၼ်းတႃႉႁဝ်း။
၂၅ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၵႄႇသႄႇၶျွတ်ႈဢဝ်သေၵမ်းတီႈၶႃႈ။ၶႃႈၸဝ်ႈႁဝ်းၶဝ်တွင်းပၢၼ်ႇတီႈၶႃႈဢေႃႈ။ထႃႇဝရႃႉၽြႃးတီႈၶႃႈ၊ ၶႅၼ်းတေႃႈပၼ်တၢင်းလီမင်ႇၵလႃႇသေၵမ်းတီႈၶႃႈ။ၶႃႈၸဝ်ႈႁဝ်းၶဝ်တွင်းပၢၼ်ႇတီႈၶႃႈဢေႃႈ။
၂၆ ႁႂ်ႈၵေႃႉဢၼ် ပႃးတင်းဢၶႂၢင်ႉထႃႇဝရႃႉၽြႃးမႃးၼၼ်ႉမီးမင်ႇၵလႃႇသေၵမ်းလူၺ်ႈ။ၶႃႈၸဝ်ႈႁဝ်းၶဝ်ယူႇၵႃႈၼႂ်းႁိူၼ်းထႃႇဝရႃႉၽြႃးလႄႈ ပၼ်တၢင်းလီတီႈၸဝ်ႈႁဝ်းတီႈၶႃႈဢေႃႈ။
၂၇ ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈလႄႈ မၼ်းၸဝ်ႈပွႆႇသၢႆဢရွင်ႇမႃးတီႈႁဝ်းဢေႃႈ။ဢဝ်ၸိူၵ်ႈတင်းလၢႆမတ်ႉၽုၵ်ႇတူဝ်ဢၼ်တၵ်းဢဝ်ပုၵ်ႉၸေႃႇယိၸ်ႉၼၼ်ႉ ဝႆႉၵႃႈ တီႈၶဝ်လႅမ်ယိၸ်ႉပလၢင်ႇတႃႉ။
၂၈ ၸဝ်ႈႁဝ်းပဵၼ်ၽြႃးၶႃႈၸဝ်ႈလႄႈ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းတီႈၶႃႈဢေႃႈ။ပဵၼ်ၽြႃးၶႃႈၸဝ်ႈလႄႈၶႃႈၸဝ်ႈတၵ်းယုၵ်ႉ ယွင်ႈၸဝ်ႈႁဝ်းတီႈၶႃႈဢေႃႈ။
၂၉ ဢွၼ်ၵၼ်ယွင်ႈယေႃးၵျေးၸူးထႃႇဝရႃႉၽြႃးတႃႉ။လွင်ႈမၼ်းၸမ်းမၼ်းၸဝ်ႈပဵၼ်ဢၼ်မျၢတ်ႈလီလႄႈ ၵရူႉၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇဢေႃႈ။