၁၀၇
၁ ဢွၼ်ၵၼ်ယွင်ႈယေႃး ၵျေးၸူးထႃႇဝရႃႉၽြႃးၵွပ်ႈပိူဝ်ႈဢၼ်မၼ်းၸဝ်ႈ ပဵၼ်ဢၼ်မျၢတ်ႈလီလႄႈ ၵရူႉၼႃႇမၼ်းၸဝ်ႈ တႄႇယူႇတႃႇသေႇ ဢမ်ႇထၢတ်ႇၼၼ်ႉ တႃႉ။
၂ ႁႂ်ႈၶဝ်ၸိူဝ်းဢၼ်ထႃႇဝရႃႉၽြႃးထူတ်ႇၼုၵ်ႈဢဝ်ဢၼ်ဝႃႈ ၶဝ်ၸိူဝ်းဢၼ်မၼ်းၸဝ်ႈထူတ်ႇၼုၵ်ႈဢဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇ ဢဝ်ၵႃႈၼႂ်းမိူင်းတင်း လၢႆ
၃ တၢင်းဢွၵ်ႇတၢင်းတူၵ်းတၢင်းႁွင်ႇတၢင်းၸၢၼ်းၸူႉသိမ်းဝႆႉၼၼ်ႉ ဢွၼ်ၵၼ်ႁပ်ႉတုင်းဢဝ် ၸိူဝ်ႉၼင်ႇ ၼၼ်သေၵမ်းလူၺ်ႈ။
၄ ၶဝ်လႄႇၵႂႃႇလႄႇမႃးၵႃႈၼႂ်းထိူၼ်ႇ တီႈဢၼ်သိတ်ႇၵူၼ်းယဵၼ်ၵူၼ်းၼၼ်ႉလႄႈဢမ်ႇထူပ်းဢမ်ႇႁၼ်ဝဵင်းတီႈဢၼ်ၵူၼ်းယူႇၵူၼ်း သဝ်း။
၅ ၶဝ်တွင်ႉမႆႈသႆႈလိူတ်ႇယၢၵ်ႇၼမ်ႉယၢၵ်ႇၼၢႆးလႄႈ ၸႂ်လူႉဢေႃႈ။
၆ ၶဝ်ႁွင်ႉသႅၼ်ႇတီႈထႃႇဝရႃႉၽြႃးၼႂ်းမိူဝ်ႈဢၼ်ၶဝ်လႆႈၶၢမ်ႇတၢင်းယၢၵ်ႈတၢင်းၽၢၼ်ၼၼ်ႉလႄႈမၼ်းၸဝ်ႈၵႄႇသႄႇၼုၵ်ႈဢဝ်ၶဝ် ဢွၵ်ႇသေၵႃႈ ၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
၇ မၼ်းၸဝ်ႈဢဝ်ၶဝ်သူင်ႇၼႂ်းသဵၼ်ႈတၢင်းဢၼ်သိုဝ်ႈဢၼ်လီ ႁႂ်ႈၶဝ်လႆႈႁွတ်ႈထိုင်ၵႃႈတီႈ ဝဵင်းဢၼ်ၵူၼ်းယူႇၵူၼ်းသဝ်းၼၼ်ႉ ဢေႃႈ။
၈ ႁႂ်ႈၵူၼ်းတင်းလၢႆဢွၼ်ၵၼ်ထွၵ်ႈလူၺ်ႈၵရူႉၼႃႇမၼ်းၸဝ်ႈဢိၵ်ႇတင်း လွင်ႈတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်း တီႈလုၵ်ႈၵူၼ်းတင်းလၢႆၸိူဝ်းၼၼ်ႉသေလႄႈယွင်ႈယေႃးထႃႇဝရႃႉၽြႃးသေၵမ်း လူၺ်ႈ။
၉ လွင်ႈမၼ်းၸမ်းမၼ်းၸဝ်ႈႁႂ်ႈဝိၺိၺ်ႇဢၼ်မီးဢလူဝ်ႇၶႂ်ႈလႆႈၼၼ်ႉ ဢိမ်ႇၸႂ်ၼိမ်ၸႂ်လႄႈ ႁႂ်ႈၸႂ်ဝိၺိၺ်ႇဢၼ်ဢိုပ်းဢၼ်ယၢၵ်ႈၼၼ်ႉ တဵမ်ဝႆႉတင်းလွင်ႈ တၢင်းဢၼ်လီဢၼ်ငၢမ်းဢေႃႈ။
၁၀ ၶဝ်လႆႈၼင်ႈယူႇၵႃႈၼႂ်းလပ်းသိင်ႇဢိၵ်ႇတင်းငဝ်းႁူမ်ႊတၢင်းတၢႆၼၼ်ႉလႄႈ လႆႈၶၢမ်ႇတၢင်းဢၼ်မတ်ႉၽုၵ်ႇဝႆႉၵႃႈၼႂ်းတုၵ်ႉၶႃႉ
၁၁ ဢိၵ်ႇတင်း ၵႃႈၼႂ်းၸိူၵ်ႈလဵၵ်း ၵွပ်ႈပိူဝ်ႈဢၼ်ၶဝ်တွပ်ႇထဵင်ပႅတ်ႈဢမိင်ႉၽြႃးပဵၼ်ၸဝ်ႈသေလႄႈ ႁဵတ်းဢမ်ႇပေႃးၼင်ႇႁိုဝ်တီႈ တၢင်းၵျၢမ်ႇတၢင်းပွင်ၽြႃးဢၼ်သုင် ၼႃႇသေပိူၼ်ႈၼၼ်ႉဢေႃႈ။
၁၂ ပိူဝ်ႈၼႆလႄႈမၼ်းၸဝ်ႈဢဝ်ၵၢၼ်တၢင်းႁဵတ်းတၢင်းသၢင်ႈ ၶျႃးသႂ်ႇၼိူဝ်ၶဝ်ႁႂ်ႈတူၵ်းတီႈတႅမ်ႇလႄႈ ၶဝ်လူမ်ႉၵေႃႈဢမ်ႇမီးၵေႃႉဢၼ် ထွၵ်ႈဢၼ်ၵမ်ႉလႃးလႃး။
၁၃ ၶဝ်ႁွင်ႉသႅၼ်ႇတီႈထႃႇဝရႃႉၽြႃး ၼႂ်းမိူဝ်ႈဢၼ်ၶဝ်လႆႈၶၢမ်ႇတၢင်းယၢၵ်ႈတၢင်းၽၢၼ်ၼၼ်ႉလႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ် သေၵႃႈၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
၁၄ မၼ်းၸဝ်ႈဢဝ်ၶဝ်ဢွၵ်ႇသေၵႃႈၼႂ်းလပ်းသိင်ႇ ဢိၵ်ႇတင်းငဝ်းႁူမ်ႊတၢင်းတၢႆလႄႈ ၵႄႈလိတ်ႈတၢင်းဢၼ်မတ်ႉဢၼ် ၽုၵ်ႇၶဝ်ၼၼ်ႉပႅတ်ႈဢေႃႈ။
၁၅ ႁႂ်ႈၵူၼ်းတင်းလၢႆဢွၼ်ၵၼ်ထွၵ်ႈလူၺ်ႈၵရူႉၼႃႇမၼ်းၸဝ်ႈ ဢိၵ်ႇတင်းလွင်ႈတၢင်းဢၼ်လီဢၢမ်းမၼ်းၸဝ်ႈ ဢၼ်ႁဵတ်းတီႈလုၵ်ႈၵူၼ်းတင်းလၢႆၸိူဝ်းၼၼ်ႉသေလႄႈ ယွင်ႈယေႃးထႃႇဝရႃႉ ၽြႃးသေၵမ်းလူၺ်ႈ။
၁၆ လွင်ႈမၼ်းၸမ်းမၼ်းၸဝ်ႈယႃႉႁၵ်းၽၵ်းတူတွင်းလိူင်တင်းလၢႆပႅတ်ႈလႄႈ တႅပ်းသေႈ လဵၵ်းတင်းလၢႆပႅတ်ႈဢေႃႈ။
၁၇ ၶဝ်ၸိူဝ်းဢၼ်မီးၸႂ်ဢၼ်မိူၵ်ႈၼၼ်ႉ လႆႈၶၢမ်ႇတုၵ်ႉၶႃႉတၢင်းၽၢၼ် ၵွပ်ႈပိူဝ်ႈဢၼ်ၶဝ်ၽိတ်းတၢင်းပိူင်ႈတၢင်းလႄႈ ႁဵတ်းတူႉၸရိူၵ်ႈၼၼ်ႉ ဢေႃႈ။
၁၈ ၶဝ်လီႁင်ႈဢဵတ်ႇသဵတ်ႇတၢင်းၵိၼ်တၢင်းၶူပ်းၵူႈၸိူဝ်ႉၵူႈမဵဝ်းလႄႈ ႁွတ်ႈထိုင်ၵႃႈတီႈဢၼ်ၸမ်ႁိမ်း ၽၵ်းတူတၢင်းတၢႆဢေႃႈ။
၁၉ ၶဝ်ႁွင်ႉသႅၼ်ႇတီႈထႃႇဝရႃႉၽြႃးၼႂ်းမိူဝ်ႈဢၼ် ၶဝ်လႆႈၶၢမ်ႇတၢင်းယၢၵ်ႈတၢင်းၽၢၼ်ၼၼ်ႉလႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ် သေၵႃႈၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
၂၀ မၼ်းၸဝ်ႈပွႆႇၸႂ်ႉၼုၵ်ႉၵပၢတ်ႈမၼ်းၸဝ်ႈလႄႈ ႁႂ်ႈတၢင်းၶႆႈတၢင်းပဵၼ်ၶဝ်ႁၢႆလႄႈ ၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈ ၼႂ်းၶုမ်ၼႂ်းႁူးဢေႃႈ။
၂၁ ႁႂ်ႈၵူၼ်းတင်းလၢႆဢွၼ်ၵၼ်ထွၵ်ႈလူၺ်ႈၵရူႉၼႃႇမၼ်းၸဝ်ႈ ဢိၵ်ႇတင်း လွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းတီႈလုၵ်ႈၵူၼ်းတင်းလၢႆၸိူဝ်းၼၼ်ႉသေလႄႈ ယွင်ႈယေႃးထႃႇဝရႃႉ ၽြႃးသေၵမ်းလူၺ်ႈ။
၂၂ ႁႂ်ႈၶဝ်ပုၵ်ႉၸေႃႇယိၸ်ႉဢၼ်ႁပ်ႉတုင်းဢဝ် ၵျေးၸူးၸဝ်ႈၼၼ်ႉသေလႄႈ ဢဝ်တင်းတၢင်းဢၼ်ႁဵတ်းၵႂၢမ်း ဢၼ်သႂၢင်ႇဢၼ်သိူဝ်းၽုၺ်ႇဢွၵ်ႇၼႄပျႃး လွင်ႈတၢင်းဢၼ်မၼ်းၸဝ်ႈႁဵတ်းၸိူဝ်းၼၼ်ႉသေၵမ်းလူၺ်ႈ။
၂၃ ၶဝ်ၸိူဝ်းဢၼ်ၶီႇႁိူဝ်းသၢင်းၽေႃးၶၢမ်ႈပၢင်ႇလၢႆႇလႄႈ ႁဵတ်းၵၢၼ်ႁဵတ်းငၢၼ်းၵႃႈၼိူဝ် ၼမ်ႉၼၼ်ႉ
၂၄ လႆႈႁၼ်လွင်ႈတၢင်းဢၼ်ထႃႇဝရႃႉၽြႃးႁဵတ်းဢိၵ်ႇတင်း လွင်ႈတၢင်းဢၼ်လီဢၢမ်းမၼ်းၸဝ်ႈတင်းလၢႆ ၵႃႈၼႂ်းတီႈဢၼ်လိုၵ်ႉဢၼ်လမ်ႇၸိူဝ်းၼၼ်ႉ ဢေႃႈ။
၂၅ မၼ်းၸဝ်ႈမီးဢမိင်ႉလႄႈႁႂ်ႈလူမ်းလူင်ဢၼ်ႁႂ်ႈလႅင်းၼမ်ႉပိူပ်ႇၼမ်ႉ လုၵ်ႉၶိုၼ်ႈၼၼ်ႉပတ်ႉၶိုၼ်းဢေႃႈ။
၂၆ ၶဝ်ၼၼ်ႉ ၶိုၼ်ႈၵႃႈၼိူဝ်ၽႃႉၵၢင်ႁၢဝ်သေယဝ်ႉသမ်ႉလူင်းၵႃႈတႂ်ႈတီႈဢၼ်လိုၵ်ႉဢၼ်လမ်ႇဢေႃႈ။ၸႂ်ၶဝ်လူႉၵႂႃႇ ၵွပ်ႈပိူဝ်ႈၽေးဢေႃႈ။
၂၇ ၶဝ်ဢိူင်ႇဢၢင်ႇၵႂႃႇဢိူင်ႇဢၢင်ႇၶိုၼ်းယူႇဝၢင်ႇဝီႈဝၢင်ႇဝိူဝ်ႈယူႇ မိူၼ်ၸိူဝ်ႉၼင်ႇၵူၼ်းဢၼ်မဝ်းလဝ်ႈၼၼ်ႉသေလႄႈ မီးတၢင်းဢၼ်ၺၢၼ်ႇ တိုၼ်ႈၸူမ်ႁၢႆၵႂႃႇဢေႃႈ။
၂၈ ၶဝ်ႁွင်ႉသႅၼ်ႇတီႈထႃႇဝရႃႉၽြႃး ၼႂ်းမိူဝ်ႈဢၼ်ၶဝ်လႆႈၶၢမ်ႇ တၢင်းဢၼ်ယၢၵ်ႈဢၼ်ၽၢၼ်ၼၼ်ႉလႄႈ မၼ်းၸဝ်ႈႁႂ်ႈၶဝ်ဢွၵ်ႇသေၵႃႈ ၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
၂၉ မၼ်းၸဝ်ႈႁႂ်ႈၽူၼ်လူင်လူမ်းလူင် ပၢင်ႇၸိုၼ်ႈႁၢႆၵႂႃႇထၼ်ႈပေႃးလႅင်းၼမ်ႉ ပိူပ်ႇၼမ်ႉတင်းလၢႆထၢတ်ႇယဵၼ်ၵႂႃႇဢေႃႈ။
၃၀ မိူဝ်ႈၼၼ်ႉၶဝ်ၸူမ်းသိူဝ်းၵွပ်ႈပိူဝ်ႈဢၼ်ထၢတ်ႇယဵၼ်ၵႂႃႇၸိူဝ်ႉၼင်ႇၼၼ်ၼၼ်ႉဢေႃႈ။ၼင်ႇၼၼ်လႄႈမၼ်းၸဝ်ႈဢဝ်ၶဝ်သူင်ႇႁွတ်ႈထိုင်ၵႃႈတီႈ တႃႈႁိူဝ်းတီႈဢၼ်ၶဝ် မီးဢလူဝ်ႇၼၼ်ႉဢေႃႈ။
၃၁ ႁႂ်ႈၵူၼ်းတင်းလၢႆဢွၼ်ၵၼ်ထွၵ်ႈလူၺ်ႈၵရူႉၼႃႇမၼ်းၸဝ်ႈဢိၵ်ႇတင်း လွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းတီႈလုၵ်ႈၵူၼ်းတင်းလၢႆၸိူဝ်းၼၼ်ႉသေလႄႈ ယွင်ႈယေႃးထႃႇဝရႃႉ ၽြႃးသေၵမ်းလူၺ်ႈ။
၃၂ ႁႂ်ႈၶဝ်ဢွၼ်ၵၼ်ယုၵ်ႉယွင်ႈမၼ်းၸဝ်ႈ ၵႃႈၼႂ်းၵၢင်ပရိၵ်ႈသၢတ်ႈၵူၼ်းတင်းလၢႆလႄႈယွင်ႈယေႃးမၼ်းၸဝ်ႈၵႃႈၼႂ်းတီႈဢၼ်ၶဝ်ၸိူဝ်းဢၼ်ဢသၢၵ်ႈၵႄႇထဝ်ႈၸူႉၵၼ်တုမ်ၵၼ်ၼၼ်ႉ သေ ၵမ်းလူၺ်ႈ။
၃၃ မၼ်းၸဝ်ႈႁဵတ်းႁႂ်ႈၼမ်ႉႁွင်ႊၼမ်ႉၵႄးပဵၼ်ထိူၼ်ႇပဵၼ်ၶိူဝ်းၵႂႃႇ ႁႂ်ႈတီႈဢၼ်ၼမ်ႉဢွၵ်ႇႁူးတင်းလၢႆ
၃၄ ပဵၼ်တီႈဢၼ်ႁႅင်ႈဢၼ်ႁွင် ႁႂ်ႈမိူင်းဢၼ်ၶွၼ်ႇၼမ်ႉမၼ်းလိၼ်လီၼၼ်ႉ ပဵၼ်လိၼ်ၵိူဝ်ၵႂႃႇၵွပ်ႈပိူဝ်ႈဢပျႅတ်ႈၵူၼ်းဝၢၼ်ႈၵူၼ်းမိူင်းၼၼ်ႉဢေႃႈ။
၃၅ လၢႆးသမ်ႉ မၼ်းၸဝ်ႈႁဵတ်းႁႂ်ႈတီႈဢၼ်ပဵၼ်ထိူၼ်ႇပဵၼ်ၶိူဝ်းၼၼ်ႉမီးတဵမ်ဝႆႉတင်းၼမ်ႉလႄႈ ႁႂ်ႈတီႈဢၼ်ႁႅင်ႈဢၼ်ႁွင်ၼၼ်ႉ ပဵၼ်တီႈဢၼ်မီးၼမ်ႉဢွၵ်ႇႁူးဢေႃႈ။
၃၆ မၼ်းၸဝ်ႈ ဢဝ်ၶဝ်ၸိူဝ်းဢၼ်ဢိုပ်းဢၼ်ယၢၵ်ႈၼၼ်ႉၶျႃးတီႈယူႇပၼ်ၵႃႈတီႈၼၼ်ႉလႄႈၶဝ်ၼၼ်ႉဢွၼ်ၵၼ်တႄႇႁဵတ်းဝဵင်း ပုၼ်ႈဢၼ်ၶဝ်တၵ်းယူႇဢေႃႈ။
၃၇ ၶဝ်ဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈႁႆတီႈၼႃးယူႇၽုၵ်ႇသွမ်ႈ သူၼ်ဢူးယဵၼ်ႇမၢၵ်ႇၸပိတ်ႉယူႇသေလႄႈလႆႈသိမ်းဢဝ်မၢၵ်ႇလိၼ်ရူင်းလိၼ်ယူႇဢေႃႈ။
၃၈ မၼ်းၸဝ်ႈပၼ်တၢင်းလီ ႁႂ်ႈၶဝ်ယႂ်ႇၽႄတူဝ်းတွၼ်းမႃးၼႃႇလူင်လၢင်လႄႈ ဢမ်ႇႁႂ်ႈသူဝ်းၶဝ်ဝူဝ်းၶဝ်လႆႈသုတ်ႈလႆႈ ယွမ်း။
၃၉ လၢႆးသမ်ႉၶဝ်ၼၼ်ႉလႆႈသုတ်ႉယွမ်းၵႂႃႇလႄႈမီးတၢင်းဢၼ်ၶျႃးတူၵ်းတီႈတႅမ်ႇ ၵွပ်ႈပိူဝ်ႈတၢင်းဢၼ်ၼိၵ်ႈၸၢၵ်ႈငႅၼ်းသေး တၢင်းဢၼ်ဢမ်ႇတြႃးဢိၵ်ႇတင်းတၢင်းဢၼ်ၶၢၼ်ၸႂ်ၶၢၼ်ၶေႃးၼၼ်ႉဢေႃႈ။
၄၀ မၼ်းၸဝ်ႈ ဢဝ်တၢင်းဢၼ်လီဢူၵ်းလီဢၢႆထွၵ်ႇသႂ်ႇၵႃႈၼိူဝ် လုၵ်ႈၶုၼ်လုၵ်ႈၵွၼ်းတင်းလၢႆလႄႈ ႁႂ်ႈၶဝ်လႄႇၵႂႃႇလႄႇမႃးယူႇၵႃႈၼႂ်းတီႈဢၼ်ပဝ်ႇဢၼ်လၢပ်ႈတီႈဢၼ်သဵၼ်ႈတၢင်းဢမ်ႇမီး ၼၼ်ႉဢေႃႈ။
၄၁ မၼ်းၸဝ်ႈ ဢဝ်ၵေႃႉဢၼ်ၸုတ်ႈဢၼ်လုတ်ႈၼၼ်ႉဢွၵ်ႇသေၵႃႈၼႂ်းတုၵ်ႉၶႃႉသေလႄႈ ယုၵ်ႉဝႆႉၵႃႈတီႈဢၼ်သုင်လႄႈ ႁႂ်ႈႁိူၼ်းယေးၶဝ်ယႂ်ႇၽႄတူဝ်းတွၼ်းမႃး မိူၼ်ၸိူဝ်ႉၼင်ႇၽုင်သူဝ်းၼၼ်ႉဢေႃႈ။
၄၂ ၶဝ်ၸိူဝ်းဢၼ်သိုဝ်ႈဢၼ်ယူဝ်းၼၼ်ႉႁၼ်လႄႈ ၸူမ်းသိူဝ်းဢေႃႈ။ၶဝ်ၸိူဝ်းဢၼ်ႁဵတ်းတူႉၸရိူၵ်ႈၸမ်း လႆႈဢိုတ်းသူပ်း တူဝ်ၸဝ်ႈၵဝ်ႇယူႇဢေႃႈ။
၄၃ ၽူႈ လႂ်သေဢမ်ႇဝႃႈၵေႃႉဢၼ်မီးပိင်ႇၺႃႇၼၼ်ႉ တၵ်းပႂ်ႉၸွမ်း လွင်ႈတၢင်းၸိူဝ်းၼႆႉလႄႈ ႁူႉၵျေးၸူးၵရူႉၼႃႇထႃႇဝရႃႉၽြႃးဢေႃႈ။