၁၀၂
၁ ထႃႇဝရႃႉၽြႃးတီႈၶႃႈ ၶႅၼ်းတေႃႈထွမ်ႇဢဝ်ပထၼႃႇၶႃႈၸဝ်ႈလႄႈ ႁႂ်ႈသဵင်ဢၼ်ၶႃႈၸဝ်ႈႁွင်ႉသႅၼ်ႇၼၼ်ႉႁွတ်ႈထိုင်တီႈၸဝ်ႈႁဝ်းသေၵမ်းတီႈၶႃႈ။ယႃႇပေသိူင်ႇမႅပ်းၼႃႈၸဝ်ႈႁဝ်းဝႆႉသေၵႃႈတီႈၶႃႈၸဝ်ႈ ၼႂ်းမိူဝ်ႈဝၼ်း ဢၼ်ၽေးႁွတ်ႈထိုင်ၼၼ်ႉသေၵမ်းတီႈၶႃႈ။
၂ ၶႅၼ်းတေႃႈႁေႈႁူၸဝ်ႈႁဝ်းၸူးၶႃႈၸဝ်ႈလႄႈ ၸဵဝ်းၶိုၼ်းဢိူဝ်ႈၶႃႈၸဝ်ႈ ၶၼ်ၶၼ်ၽႂ်းၽႂ်းၼႂ်းမိူဝ်ႈဢၼ်ၶႃႈၸဝ်ႈ ႁွင်ႉၼၼ်ႉသေၵမ်းတီႈၶႃႈ။
၃ လွင်ႈမၼ်းၸမ်းမိူဝ်ႉဝၼ်းၶႃႈၸဝ်ႈၸၢင်ႊသဵင်ႈၵႂႃႇႁၢႆၵႂႃႇ မိူၼ်ၸိူဝ်ႉၼင်ႇၵွၼ်းၽႆးၼၼ်ႉလႄႈ လုပ်ႇၶႃႈၸဝ်ႈတင်းလၢႆမႆႈသုတ်းၵႂႃႇ မိူၼ် ၸိူဝ်ႉၼင်ႇထၢၼ်ႇၽႆးၼၼ်ႉတီႈၶႃႈဢေႃႈ။
၄ ႁူဝ်ၸႂ်ၶႃႈၸဝ်ႈ လႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇ မိူၼ်ၸိူဝ်ႉၼင်ႇယိူဝ်ႈယႃႈၼၼ်ႉလႄႈ မီးတၢင်းဢၼ်ႁဵဝ်ႇၸွပ်ႈၵႂႃႇတီႈၶႃႈဢေႃႈ။ၶႃႈၸဝ်ႈၸၢင်ႊလူင်ႈလိုမ်းပႅတ်ႈလွင်ႈဢၼ်တၵ်းၵိၼ်တၵ်းၶူပ်းၼၼ်ႉ တီႈၶႃႈဢေႃႈ။
၅ ၵွပ်ႈပိူဝ်ႈသဵင်ဢၼ်ၶႃႈၸဝ်ႈၶင်းၶီၶင်းၽၢၼ်ၼၼ်ႉလႄႈ လုပ်ႇၶႃႈၸဝ်ႈတင်းလၢႆမီးတၢင်းဢၼ်ၸပ်းၼင်ၶႃႈၸဝ်ႈယူႇတီႈၶႃႈဢေႃႈ။
၆ ၶႃႈၸဝ်ႈမိူၼ်ၸိူဝ်ႉၼင်ႇၼူၵ်ႉဝၢမ်ႇပူဝ် ၵႃႈၼႂ်းထိူၼ်ႇၼႂ်းၶိူဝ်းၼၼ်ႉလႄႈ ပဵၼ်ၸိူဝ်ႉၼင်ႇ ၼူၵ်ႉၵဝ်ႉ ဢၼ်ယူႇၵႃႈၼႂ်းတီႈဢၼ်ၵိူၼ်ႇ ပင်းလူႉလႅဝ်ၼၼ်ႉတီႈၶႃႈဢေႃႈ။
၇ ၶႃႈၸဝ်ႈပႂ်ႉယူႇလႄႈပဵၼ်ၸိူဝ်ႉၼင်ႇၼူၵ်ႉ ဢၼ်လႆႈယူႇၵႃႈၼိူဝ်မုင်းႁိူၼ်းတူဝ်လဵဝ်ၵူၺ်းမၼ်းၼၼ်ႉတီႈၶႃႈဢေႃႈ။ရၢၼ်ႇသူႇၶႃႈၸဝ်ႈတင်းလၢႆ ဢွၼ်ၵၼ်သေႉသွမ်းၶႃႈၸဝ်ႈယူႇတင်း ဝၼ်းတင်းဝၼ်းတီႈၶႃႈဢေႃႈ။
၈ ၶဝ်ၸိူဝ်းဢၼ်ယူႇၽၢႆႇၼိုင်ႈတင်းၶႃႈၸဝ်ႈသေလႄႈ ၸွၵ်ႇၵႃးလူလၢႆၼၼ်ႉၸၢင်ႊဢဝ်ၶႃႈၸဝ်ႈႁဵတ်းဢပုမ်ႇတႅၵ်ႈသေလႄႈ ၵိၼ်ႇ ဝႃႈတီႈၶႃႈဢေႃႈ။
၉ ၶႃႈၸဝ်ႈလႆႈၵိၼ်တဝ်ႊမိူၼ်ၸိူဝ်ႉၼင်ႇၶဝ်ႈမုၼ်းလႄႈ မိူဝ်ႈဢၼ်သူတ်ႉၼၼ်ႉ လႆႈသူတ်ႉလေႃးၼမ်ႉတႃယူႇ၊ ၵွပ်ႈပိူဝ်ႈဢၼ်ၸႂ်ၸဝ်ႈႁဝ်းဢမ်ႇပျေႇလႄႈ တၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇၼၼ်ႉတီႈ ၶႃႈဢေႃႈ။
၁၀ ၸဝ်ႈႁဝ်းယုၵ်ႉယွင်ႈၶႃႈၸဝ်ႈသေလႄႈသမ်ႉ ဢဝ်ၶျႃးတူၵ်းပႅတ်ႈတီႈၶႃႈယဝ်ႉ။
၁၁ မိူဝ်ႈဝၼ်းၶႃႈၸဝ်ႈတင်းလၢႆ ပဵၼ်ၸိူဝ်ႉၼင်ႇ ႁူမ်ႊငဝ်းဢၼ်ပူၼ်ႉၵႂႃႇယူႇၼၼ်ႉလႄႈ ၶႃႈၸဝ်ႈႁဵဝ်ႇၸွပ်ႈၵႂႃႇမိူၼ်ၸိူဝ်ႉၼင်ႇယိူဝ်ႈ ယႃႈၼၼ်ႉတီႈၶႃႈဢေႃႈ။
၁၂ ထႃႇဝရႃႉၽြႃးတီႈၶႃႈၸဝ်ႈႁဝ်းၸၢမ်ႇၸႃးယူႇၼိၵ်ႉၸႃႉထႃႇဝရႃႉလႄႈ လွင်ႈတၢင်းဢၼ်ပဵၼ် တီႈဢၼ်ၶုၵ်းၸႂ်လႆႈၶႆႈၸႂ်ထူပ်းၸဝ်ႈႁဝ်းၼၼ်ႉ တႄႇယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်ႈတၢမ်ႈ တီႈၶႃႈဢေႃႈ။
၁၃ ၸဝ်ႈႁဝ်းတၵ်းလုၵ်ႉလႄႈဢိတ်းလူ ဝဵင်းၸိဢုၼ်ႇတီႈၶႃႈဢေႃႈ။ၶိင်ႇဢၼ်တၵ်းလႆႈဢိတ်းလူမၼ်း၊ၶိင်ႇဢၼ်ၸဝ်ႈႁဝ်းမၵ်းၶၢၼ်းဝႆႉၼၼ်ႉႁွတ်ႈထိုင်မႃးတီႈၶႃႈယဝ်ႉ။
၁၄ ၶႃႈၸဝ်ႈႁဝ်းၸိူဝ်းၼၼ်ႉဢွၼ်ၵၼ်ထုၵ်ႇၸႂ်ၵျိူၵ်ႈၸႂ် မၢၵ်ႇႁဵၼ်မၼ်းတင်းလၢႆလႄႈ ဢိတ်းလူမုၼ်ႈလိၼ်မၼ်းတီႈၶႃႈဢေႃႈ။
၁၅ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းဢွၼ်ၵၼ် ရူဝ်ႇသေႇၵူဝ်ယမ်ၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈ ၶုၼ်ႁေႃၶမ်းလေႃးၵီႇတင်းသဵင်ႈတင်းလူင် တၵ်းဢွၼ်ၵၼ်ရူဝ်ႇ သေႇၵူဝ်ယမ်မုၼ်ၽုင်းၸဝ်ႈႁဝ်းတီႈၶႃႈဢေႃႈ။
၁၆ လွင်ႈမၼ်းၸမ်း ထႃႇဝရႃႉၽြႃးတႄႇႁဵတ်းဝဵင်း ၸိဢုၼ်ႇလႄႈ ပႃးတင်းမုၼ်ၽုင်းမၼ်းၸဝ်ႈသေလႄႈ ထၢင်ႇ သႃးပေႃႇမႃးဢေႃႈ။
၁၇ မၼ်းၸဝ်ႈမၢတ်ႈတွင်းဢဝ်ပထၼႃႇ ၶဝ်ၸိူဝ်းဢၼ်ၽၢၼ်ဢၼ်ၵႅၼ်း ၼၼ်ႉလႄႈဢမ်ႇႁဵတ်းတၢင်းဢၼ်ႁဵတ်း ဢမ်ႇပေႃးၼင်ႇႁိုဝ်တီႈ ပထၼႃႇၶဝ်ၼၼ်ႉ။
၁၈ လွင်ႈမၼ်းတၢင်းမၼ်းၼၼ်ႉၸိုင်တၵ်းတႅမ်ႈဝႆႉမၢႆဝႆႉပုၼ်ႈၸိူဝ်ႉၶိူဝ်းဢၼ်တၵ်းမႃးၵမ်းလိုၼ်းၼၼ်ႉလႄႈႁႂ်ႈၵူၼ်းဢၼ်မၼ်းၸဝ်ႈ တၵ်းၽၢၼ်ႇသၢင်း ႁဵတ်းပဵၼ်မႃးၸိူဝ်းၼၼ်ႉ ဢွၼ်ၵၼ် ယွင်ႈယေႃးထႃႇဝရႃႉၽြႃးဢေႃႈ။
၁၉ ထႃႇဝရႃႉၽြႃး ယူႇၵႃႈၼိူဝ်ပၢႆၸိၵ်းပၢႆၸွမ်ထႃႇၼႃႉမၼ်းၸဝ်ႈ ဢၼ်မူတ်းၸၢင်ႇၼိူဝ်ၵၢင်ႁၢဝ်ၼၼ်ႉလႄႈ မုင်တူၺ်းႁၼ်လိၼ်မိူင်း ဢေႃႈ။
၂၀ ႁႂ်ႈလႆႈထွမ်ႇဢဝ်သဵင်ဢၼ်ၶင်းၶီၶင်းၽၢၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶျူၵ်ႈဝႆႉ ဢိၵ်ႇတင်းႁႂ်ႈလႆႈပွႆႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶၢၼ်းဝႆႉ
၂၁ ပုၼ်ႈဢၼ်တၵ်းလႆႈတၢႆၼၼ်ႉလွတ်ႈ ပုၼ်ႈလွင်ႈၼင်ႇႁိုဝ် ၵူၼ်းတင်းလၢႆ တၵ်းဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃး ၽုၺ်ႇဢွၵ်ႇၼႄပျႃးၵႃႈၼိူဝ်လွႆၸိဢုၼ်ႇဢိၵ်ႇတင်း ဢဝ်ၵုင်ႇၵျေးၸူးမၼ်းၸဝ်ႈ
၂၂ ၽုၺ်ႇဢွၵ်ႇ ၼႄပျႃးၵႃႈၼႂ်း ဝဵင်းယေႇရုသလႅမ်ႇၼႂ်းမိူဝ်ႈဢၼ်ၵူၼ်းၵူႈၸိူဝ်ႉၵူႈမဵဝ်းဢိၵ်ႇတင်း သိုင်ႇမိူင်းၵူႈသိုင်ႇၵူႈမိူင်းၸူႉၵၼ်တုမ်ၵၼ်ႁႂ်ႈလႆႈႁဵတ်းဝၢတ်ႈ ထႃႇဝရႃႉၽြႃးၼၼ်ႉ ဢေႃႈ။
၂၃ မၼ်းၸဝ်ႈႁႂ်ႈႁႅင်းၵဝ်သုတ်ႉၵႂႃႇယွမ်းၵႂႃႇၼႂ်းသဵၼ်ႈတၢင်းၵဝ်လႄႈ ႁႂ်ႈမိူဝ်ႉဝၼ်းၵဝ်ၵေႇၵႂႃႇပွတ်းၵႂႃႇ ဢေႃႈ။
၂၄ ၵဝ်လဝ်ႈလၢတ်ႈဝႆႉလႄႈဝႃႈၸမ်း- ၽြႃးၵဝ်ၶႃႈတီႈၶႃႈ။ယႃႇပေၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းၶိုင်ႈၵၢင်မိူဝ်ႉဝၼ်းၸူဝ်ႈတႃႇဢသၢၵ်ႈၶႃႈၸဝ်ႈၼၼ်ႉသေၵမ်းတီႈၶႃႈ။ၶူပ်ႇၼီႈပီႊမိူင်းၸဝ်ႈႁဝ်းၸိူဝ်းၼၼ်ႉတႄႇယူႇၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်ႈတၢမ်ႈ တီႈၶႃႈဢေႃႈ။
၂၅ မိူဝ်ႈၵွၼ်ႇမိူဝ်ႈမိုၼ်ႉၼၼ်ႉ ၸဝ်ႈႁဝ်းတႄႇလိၼ်မိူင်းဝႆႉတီႈၶႃႈယဝ်ႉ။ၽႃႉၵၢင်ႁၢဝ်ၵေႃႈပဵၼ်လွင်ႈတၢင်းဢၼ် ၸဝ်ႈႁဝ်းဢဝ်တင်းမိုဝ်းၸဝ်ႈႁဝ်းၽၢၼ်ႇ သၢင်းႁဵတ်းပဵၼ်တီႈၶႃႈဢေႃႈ။
၂၆ ပဵၵ်ႉသမ်ႉလွင်ႈတၢင်းၸိူဝ်းၼၼ်ႉ တၵ်းႁွတ်ႈထိုင်တၢင်းလူႉတၢင်းလႅဝ်သေၵေႃႈ ၸဝ်ႈႁဝ်းတႄႇယူႇသေႇသေႇတီႈၶႃႈဢေႃႈ။
၂၇ ပဵၵ်ႉသမ်ႉလွင်ႈတၢင်းၵႃႈမီးၸိူဝ်းၼၼ်ႉ ႁွတ်ႈထိုင်တၢင်းဢၼ်ၵဝ်ႇၵႂႃႇမွင်ၵႂႃႇ ၸိူဝ်ႉၼင်ႇ ၶူဝ်းၼင်လႅင်ႊၼၼ်ႉလႄႈၸဝ်ႈႁဝ်းလႅၵ်ႈလၢႆၶဝ်မိူၼ်ၸိူဝ်ႉၼင်ႇထႆႇၶူဝ်းၼုင်ႈၼၼ်ႉလႄႈ ၶဝ်မီးတၢင်းဢၼ်ၶၢႆႉပုတ်ႈၵႂႃႇ သေၵေႃႈ ၸဝ်ႈႁဝ်းဢမ်ႇၶၢႆႉဢမ်ႇပုတ်ႈတီႈၶႃႈ။
၂၈ ၶူပ်ႇၼီႈပီႊမိူင်းၸဝ်ႈႁဝ်းၼၼ်ႉၵေႃႈ ဢမ်ႇသုတ်းဢမ်ႇသဵင်ႈလႆႈတီႈၶႃႈ။လုၵ်ႈလၢၼ်ၶႃႈၸဝ်ႈႁဝ်းၸိူဝ်းၼၼ်ႉတၵ်းတႄႇယူႇလႄႈၸိူဝ်ႉၶိူဝ်းၶဝ်ၵေႃႈတၵ်းမၼ်ႈၶိူင်ႇယူႇ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။