၈၉
၁ ၶႃႈၸဝ်ႈတၵ်းႁဵတ်းၵႂၢမ်း ၵရူႉၼႃႇထႃႇဝရႃႉၽြႃးယူႇတႃႇသေႇဢမ်ႇထၢတ်ႇလႄႈ ၶႃႈၸဝ်ႈတၵ်းဢဝ်သႅတ်ႈၸႃႇၸဝ်ႈႁဝ်း ဢွၵ်ႇသူပ်းမွၵ်ႇလၢတ်ႈတီႈမဵဝ်းၵူၼ်း သိုပ်ႇသိုပ်ႇတၢမ်ႈတၢမ်ႈတီႈၶႃႈဢေႃႈ။
၂ ၶႃႈၸဝ်ႈလႆႈလၢတ်ႈလႄႈဝႃႈ၊-ၵရူႉၼႃႇၸဝ်ႈႁဝ်းလႆႈတႄႇယူႇသေႇသေႇလႄႈ ၸဝ်ႈႁဝ်းႁႂ်ႈသႅတ်ႈၸႃႇၸဝ်ႈႁဝ်း မၼ်ႈၶိူင်ႇ ယူႇၵႃႈတီႈၼိူဝ်ၵၢင်ႁၢဝ်တီႈၶႃႈယဝ်ႉ၊ ဝႃႈၼင်ႇၼႆတီႈၶႃႈဢေႃႈ။
၃ ၸဝ်ႈႁဝ်းမီးဢမိင်ႉၸမ်းၵဝ်ႁဵတ်းပတိၺိၺ်ႇလူၺ်ႈၵၼ်တင်းၵေႃႉဢၼ်ၵဝ်လိူၵ်ႈၵဵပ်းဢဝ်ၼၼ်ႉလႄႈ ႁဵတ်းတၢင်းဢၼ်တိူင်ႇဝႃႈၵိၼ်ႇဝႃႈတီႈၶႃႈၵဝ် တႃႇဝိတ်ႉၼၼ်ႉလႄႈဝႃႈ၊-
၄ ၵဝ်တၵ်းႁႂ်ႈၸိူဝ်ႉၶိူဝ်းမႂ်းမၼ်ႈၶိူင်ႇယူႇတႃႇသေႇဢမ်ႇထၢတ်ႇလႄႈ တၵ်းႁႂ်ႈပလၢင်ႇမႂ်းတႄႇယူႇၵႃႈတီႈမဵဝ်းၵူၼ်း သိုပ်ႇသိုပ်ႇတၢမ်ႈတၢမ်ႈဢေႃႈ၊ ဝႃႈၼင်ႇၼႆဝႆႉတီႈၶႃႈယဝ်ႉ။ၸေႇလႃႇ။
၅ ထႃႇဝရႃႉၽြႃးတီႈၶႃႈ၊ ၽႃႉၵၢင်ႁၢဝ်တၵ်းယွင်ႈယေႃးလွင်ႈတၢင်းဢၼ်လီဢၢမ်းၸဝ်ႈႁဝ်းတင်းလၢႆ ဢိၵ်ႇတင်းသႅတ်ႈၸႃႇၸဝ်ႈႁဝ်း ၵႃႈၼႂ်းၵၢင်ပရိၵ်ႈသၢတ်ႈ ၵူၼ်းမူတ်းၸၢင်ႇၸိူဝ်းၼၼ်ႉတီႈၶႃႈဢေႃႈ။
၆ လွင်ႈမၼ်းၸမ်းၵႃႈၼႂ်းၽႃႉၵၢင်ႁၢဝ်ၼၼ်ႉ ၽူႈ လႂ်တၵ်းၶၢမ်ႇတၢင်းဢၼ်ၶႄႉၵၼ်တႅၵ်ႈၵၼ်တင်းထႃႇဝရႃႉၽြႃးလႆႈ။ၼႂ်းလုၵ်ႈၸၢႆးၽြႃးၸိူဝ်းၼၼ်ႉ ၽူႈ လႂ်တၵ်းမိူၼ်ၵၼ်တင်း ထႃႇဝရႃႉၽြႃးလႆႈ။
၇ ၽြႃးပဵၼ်ၸဝ်ႈပဵၼ်တီႈဢၼ်ထူၵ်ႇလီရူဝ်ႇသေႇၵူဝ်ယၢမ်ၼႃႇလူင်လၢင်၊ၵႃႈၼႂ်းပရိၵ်ႈသၢတ်ႈၶဝ်ၸိူဝ်းဢၼ်မူတ်းၸၢင်ႇၼၼ်ႉလႄႈ ပဵၼ်တီႈဢၼ်လီရူဝ်ႇသေႇၵူဝ်ယမ်ၼႃႇသေ ၶဝ်ၸိူဝ်းဢၼ်ယူႇလဵပ်ႈႁွပ်ႈမၼ်းၸဝ်ႈ တင်းသဵင်ႈတင်းလူင်ၼၼ်ႉဢေႃႈ။
၈ ထႃႇဝရႃႉၽြႃးၽြႃးပဵၼ်ၸဝ်ႈ၊ ၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၽူႈ လႂ်တၵ်းႁႅင်းယႂ်ႇၼႃႇမိူၼ်ၸိူဝ်ႉၼင်ႇၸဝ်ႈႁဝ်းၼၼ်ႉတီႈၶႃႈ။ထႃႇဝရႃႉၽြႃးတီႈၶႃႈ၊သႅတ်ႈၸႃႇၸဝ်ႈႁဝ်းၵေႃႈ မီးတၢင်းဢၼ်ဝႅင်းႁွပ်ႈၸဝ်ႈႁဝ်းယူႇတီႈၶႃႈဢေႃႈ။
၉ ၸဝ်ႈႁဝ်းလႆႈဢုပ်ႉပိူင်ႇ တၢင်းဢၼ်မႃႇၼႃႉၸႂ်သုင်ၼမ်ႉသမ်ႇမုၵ်ႉတြႃႇၼၼ်ႉလႄႈ မိူဝ်ႈဢၼ်လႅင်းၼမ်ႉပိူပ်ႇၼမ်ႉလုၵ်ႉၶိုၼ်ႈၼၼ်ႉၸိုင် ၸဝ်ႈႁဝ်းႁႂ်ႈထၢတ်ႇၵႂႃႇယဵၼ်ၵႂႃႇ တီႈၶႃႈဢေႃႈ။
၁၀ ၸဝ်ႈႁဝ်းယႃႉႁၵ်းရႃႇၶပ်ႉပႅတ်ႈ၊ မိူၼ်ၸိူဝ်ႉၼင်ႇ ၵေႃႉဢၼ်လႆႈၶၢမ်ႇ တၢင်းဢၼ်ဢဝ်တၢႆၼၼ်ႉလႄႈ ဢဝ်တင်းၶႅၼ်မိုဝ်းၸဝ်ႈႁဝ်း ဢၼ်ႁႅင်းယႂ်ႇၼႃႇၼၼ်ႉ ႁႂ်ႈရၢၼ်ႇသူႇတင်းလၢႆၽုင်ႉပိဝ်ၵႂႃႇတီႈၶႃႈ ဢေႃႈ။
၁၁ ၽႃႉၵၢင်ႁၢဝ်ပဵၼ်ဢုၵ်ႉၸႃႇၸဝ်ႈႁဝ်းတီႈၶႃႈဢေႃႈ။လိၼ်မိူင်းၵေႃႈပဵၼ်ဢုၵ်ႉၸႃႇၸဝ်ႈႁဝ်းတီႈၶႃႈဢေႃႈ။လေႃးၵထၢတ်ႈဢိၵ်ႇတင်းတၢင်းဢၼ်တဵမ်ဝႆႉၵႃႈၼႂ်းမၼ်းၼၼ်ႉၵေႃႈ ၸဝ်ႈႁဝ်းဢဝ်တႄႇဝႆႉတီႈၶႃႈ ယဝ်ႉ။
၁၂ ၼႃႈတၢင်းႁွင်ႇဢိၵ်ႇတင်းၼႃႈတၢင်းၸၢၼ်းၵေႃႈ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ဝႆႉတီႈၶႃႈယဝ်ႉ။လွႆတႃႇယေႃႇဢိၵ်ႇတင်းလွႆႁေႇရမူၼ်ႇ၊ ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ႁဵတ်းၵႂၢမ်းဢၼ်သႂၢင်ႇ ဢၼ်သိူဝ်းတီႈၶႃႈဢေႃႈ။
၁၃ ၸဝ်ႈႁဝ်းတဵမ်ဝႆႉတင်းၶႅၼ်မိုဝ်းဢၼ်မီးတၼ်းၶူဝ်းၼၼ်ႉတီႈၶႃႈဢေႃႈ။မိုဝ်းၸဝ်ႈႁဝ်းႁႅင်းယႂ်ႇၼႃႇလႄႈ မိုဝ်းၶွၼ်ၶႂႃၸဝ်ႈႁဝ်းသုင်ၼႃႇ တီႈၶႃႈဢေႃႈ။
၁၄ တၢင်းဢၼ်သိုဝ်ႈတေႃႇ ဢိၵ်ႇတင်းတၢင်းဢၼ်ၸီႇယၢင်ႇၸွမ်းၼင်ႇတြႃးၸိူဝ်းၼၼ်ႉပဵၼ်ငဝ်ႈႁၢၵ်ႈပလၢင်ႇၸဝ်ႈႁဝ်းလႄႈ ၵရူႉၼႃႇဢိၵ်ႇတင်းသႅတ်ႈၸႃႇ ၵႂႃႇပႃႈၼႃႈၸဝ်ႈႁဝ်းတီႈၶႃႈဢေႃႈ။
၁၅ ၵူၼ်းမဵဝ်းဢၼ်ႁူႉငိၼ်းသဵင်တၢင်းဢၼ်ၸူမ်းသိူဝ်းၼၼ်ႉမီးမင်ႇၵလႃႇဢေႃႈ။ထႃႇဝရႃႉၽြႃးတီႈၶႃႈ၊ ၶဝ်ၼၼ်ႉလႆႈၵႂႃႇမႃး ၵႃႈၼႂ်းဢၼ်လႅင်းၽၢႆႇၼႃႈၸဝ်ႈ ႁဝ်းတီႈၶႃႈဢေႃႈ။
၁၆ ၶဝ်လႆႈသိူဝ်းပျေႃႇၼႂ်းၼႃႇမႃႉၸိုဝ်ႈသဵင်ၸဝ်ႈႁဝ်းယူႇ တင်းဝၼ်းတင်းဝၼ်းဢမ်ႇထၢတ်ႇလႄႈ ၶဝ်လႆႈႁွတ်ႈထိုင်တၢင်းဢၼ်ယုၵ်ႉယွင်ႈ ၵွပ်ႈပိူဝ်ႈတြႃးတၢင်းသိုဝ်ႈတေႃႇၸဝ်ႈႁဝ်းၼၼ်ႉ တီႈၶႃႈဢေႃႈ။
၁၇ ၸဝ်ႈႁဝ်းပဵၼ်မုၼ်ၽုင်းႁႅင်းၶဝ်ၼၼ်ႉလႄႈ ၵွပ်ႈပိူဝ်ႈၵျေးၸူးၸဝ်ႈႁဝ်းလႄႈၸဝ်ႈႁဝ်းယုၵ်ႉယွင်ႈၶဝ်လႅမ်ၶႃႈ ၸဝ်ႈႁဝ်းၶဝ်တီႈၶႃႈဢေႃႈ။
၁၈ ၶိူင်ႈႁႄႉလၢၵ်ႈၼၢၵ်ႈၶႃႈၸဝ်ႈႁဝ်းၶဝ်ၼၼ်ႉပဵၼ်ၶွင်ထႃႇဝရႃႉၽြႃးလႄႈ ၶုၼ်ႁေႃၶမ်းၶႃႈၸဝ်ႈႁဝ်းၶဝ်ၼၼ်ႉပဵၼ်ၶွင်ၽြႃးဢၼ်မူတ်းၸၢင်ႇမဵဝ်းၵူၼ်းဢိသရေႇလ ၼၼ်ႉတီႈၶႃႈဢေႃႈ။
၁၉ မိူဝ်ႈၼၼ်ႉ ၸဝ်ႈႁဝ်း ဢဝ်တင်းရူႇပႃႇရူင်ႇဝႃႈဢွၵ်ႇသူပ်း တီႈၶဝ်ၸိူဝ်းဢၼ်မူတ်းၸၢင်ႇၸဝ်ႈႁဝ်းၼၼ်ႉလႄႈလၢတ်ႈဝႃႈၸမ်း- ၵဝ်ဢဝ်တၢင်းဢၼ်ၸွႆႈထႅမ်မႃႉၸႃႉဢၢပ်ႈပၼ်ဝႆႉတီႈ ၵေႃႉဢၼ်ႁႅင်းယႂ်ႇၼၼ်ႉလႄႈၵဝ်ဢဝ်ၵူၼ်းဢၼ်လိူၵ်ႈၵဵပ်းဢဝ် ၵႃႈၼႂ်းၵူၼ်းတင်း လၢႆၼၼ်ႉၵေႃႉၼိုင်ႈယုၵ်ႉယွင်ႈဝႆႉယဝ်ႉ။
၂၀ ၵဝ်ထူပ်းႁၼ်ၶႃႈၵဝ် တႃႇဝိတ်ႉ လႄႈဢဝ်တင်းၼမ်ႉမၼ်းဢၼ်မူတ်း ၸၢင်ႇပၼ်ၽိၵ်ႉသိၵ်ႈတီႈမၼ်းဝႆႉယဝ်ႉ။
၂၁ မိုဝ်းၵဝ်တၵ်းတႄႇယူႇၽၢႆႇမၼ်းလႄႈၶႅၼ်ၵဝ်တၵ်းႁႂ်ႈမၼ်းမၼ်ႈၶိူင်ႇ ဢေႃႈ။
၂၂ ရၢၼ်ႇသူႇဢမ်ႇလႆႈႁဵတ်းပႄႉႁဵတ်းၼႅင်ႇဢဝ်ၶွင်မၼ်း။ၵူၼ်းဢၼ်ဢမ်ႇတြႃးၼၼ်ႉဢမ်ႇလႆႈၼိၵ်ႈ ၸၢၵ်ႈငႅၼ်းသေးမၼ်း။
၂၃ ၵဝ်တၵ်းပေႃႉထုပ်ႉရၢၼ်ႇသူႇမၼ်းတင်းလၢႆၵႃႈတီႈၽၢႆႇၼႃႈမၼ်းလႄႈ ပၼ်တၢမ်ႇ တီႈၶဝ်ၸိူဝ်းဢၼ်ၸင်းမၼ်းၼၼ်ႉဢေႃႈ။
၂၄ သႅတ်ႈၸႃႇဢိၵ်ႇတင်းၵရူႉၼႃႇၵဝ် တၵ်းယူႇလူၺ်ႈၵၼ်တင်းမၼ်းလႄႈ ၶဝ်လႅမ်မၼ်းတၵ်းမီးတၢင်းဢၼ်ယုၵ်ႉယွင်ႈယူႇ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ဢေႃႈ။
၂၅ ၵဝ်တၵ်းဢဝ်မိုဝ်းမၼ်းတၢင်ႇဝႆႉၵႃႈၼိူဝ်ပၢင်ႇလၢႆလႄႈ ဢဝ်မိုဝ်းၶွၼ်ၶႂႃမၼ်းတၢင်ႇဝႆႉ ၵႃႈၼိူဝ်ၼမ်ႉႁွင်ႊၼမ်ႉၵႄးတင်းလၢႆ ဢေႃႈ။
၂၆ မၼ်းတၵ်းႁွင်ႉသႅၼ်ႇတီႈၵဝ်လႄႈဝႃႈ၊-ၸဝ်ႈႁဝ်းပဵၼ်ပေႃႈၵဝ်ၶႃႈ၊ ၽြႃးပဵၼ်ၸဝ်ႈၵဝ်ၶႃႈ၊ မၢၵ်ႇႁိၼ်ဢၼ်ၵႄႇသႄႇၶျွတ်ႈဢဝ်ၵဝ်ၶႃႈတီႈၶႃႈဢေႃႈ၊ ဝႃႈ ၼင်ႇၼႆဢေႃႈ။
၂၇ ၵဝ်တၵ်းဢဝ်မၼ်းၶၢၼ်းဝႆႉၼႂ်းဢရႃႇလုၵ်ႈၸၢႆးတူၼ်ႈလႄႈ ယုၵ်ႉယွင်ႈမၼ်းဝႆႉၵႃႈၼိူဝ်ၶုၼ် ႁေႃၶမ်းလေႃးၵီႇတင်းလၢႆဢေႃႈ။
၂၈ ၵဝ်တၵ်းပႂ်ႉၵရူႉၼႃႇၵဝ်မီးပုၼ်ႈမၼ်းယူႇတႃႇသေႇဢမ်ႇထၢတ်ႇလႄႈ ပတိ ၺိၺ်ႇတြႃးၵဝ်တၵ်းမၼ်ႈၶိုင်ႇယူႇတီႈမၼ်းဢေႃႈ။
၂၉ ၵဝ်တၵ်းႁႂ်ႈၸိူဝ်ႉၶိူဝ်းမၼ်း တႄႇယူႇတႃႇသေႇဢမ်ႇထၢတ်ႇလႄႈ ပလၢင်ႇမၼ်းတၵ်းပဵၼ်ၼိၵ်ႉၸႃႉထႃႇဝရႃႉယူႇမိူၼ်ၸိူဝ်ႉၼင်ႇမိူဝ်ႉဝၼ်းၵၢင်ႁၢဝ်ၼၼ်ႉဢေႃႈ။
၃၀ ပေႃးလုၵ်ႈမၼ်းလၢၼ်မၼ်း ၸုၼ်ႉပႅတ်ႈတြႃးၵဝ်လႄႈဢမ်ႇၵႂႃႇဢမ်ႇမႃး ၼႂ်းလွင်ႈတၢင်းဢၼ်ၵဝ်ၸီႇယၢင်ႇ ဝႆႉၸိူဝ်းၼၼ်ႉ
၃၁ ပေႃးၶဝ်ႁဵတ်း ဢမ်ႇပေႃးၼင်ႇႁိုဝ်တီႈထုင်းၾိင်ႈတြႃးၵဝ်တင်းလၢႆလႄႈ ယင်းဢမ်ႇပႂ်ႉပိင်း ၺၢပ်ႈၵဝ်ၸိုင်
၃၂ ၵဝ်တၵ်းဢဝ်ၶွၼ်ႉဝၢႆသင်ႇသွၼ်သုင်းမႃႉတၢင်းဢၼ်ၶဝ်ၽိတ်းပိူင်ႈၼၼ်ႉလႄႈ ဢဝ်ႁွႆးတၢမ်ႇတင်းလၢႆသင်ႇသွၼ်သုင်းမႃႉတူႉ ၸရိူၵ်ႈဢပျႅတ်ႈၶဝ် ဢေႃႈ။
၃၃ ၼႂ်းဝႃႈၼၼ်သေၵေႃႈၵဝ်တၵ်းဢမ်ႇၼုၵ်ႈဢဝ်ထွၼ်ဢဝ် ၵရူႉၼႃႇၵဝ် သေၵႃႈတီႈမၼ်းလႃးလႃး လႄႈဢမ်ႇယႃႉဢမ်ႇလိတ်ႈသႅတ်ႈၸႃႇၵဝ်။
၃၄ ၵဝ်တၵ်းဢမ်ႇႁဵတ်း တၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈပတိၺိၺ်ႇတြႃးၵဝ်ၼၼ်ႉလႄႈ ဢမ်ႇလႅၵ်ႈဢမ်ႇလၢႆႈၵႂၢမ်းဢၼ်ၵဝ်မီးဢမိင်ႉ ဢွၵ်ႇသူပ်းဢွၵ်ႇပၢၵ်ႇယဝ်ႉ ၼၼ်ႉ။
၃၅ ၵဝ်ဢဝ်ပႃႇရမီႇတၢင်းဢၼ်မူတ်းၸၢင်ႇၵဝ်တိူင်ႇဝႃႈလႄႈဝႃႈ၊-ၵဝ်တၵ်းဢမ်ပႅတ်ႉဢမ်ႇလႅၼ်တႃႇဝိတ်ႉ ၵူၺ်း၊ဝႃႈၼင်ႇၼႆယဝ်ႉ။
၃၆ ၸိူဝ်ႉၶိူဝ်းမၼ်းတၵ်းလႆႈတႄႇယူႇတႃႇသေႇဢမ်ႇထၢတ်ႇလႄႈ ပလၢင်ႇမၼ်းၵေႃႈတၵ်းလႆႈပဵၼ်ၸိူဝ်ႉၼင်ႇၵၢင်ဝၼ်း ၵႃႈတီႈၽၢႆႇၼႃႈၵဝ် ဢေႃႈ။
၃၇ မၼ်းတၵ်းလႆႈမၼ်ႈၶိူင်ႇယူႇတႃႇသေႇမိူၼ်ၸိူဝ်ႉၼင်ႇလိူၼ်ၼၼ်ႉ ဢိၵ်ႇတင်းမိူၼ်ၸိူဝ်ႉၼင်ႇသၢၵ်ႈသေႇဢၼ်ပႂ်ႉသႅတ်ႈၸႃႇၵႃႈၼိူဝ်ၵၢင်ႁၢဝ်ၼၼ်ႉဢေႃႈ၊ ဝႃႈၼင်ႇၼႆတီႈၶႃႈယဝ်ႉ။ၸေႇလႃႇ။
၃၈ ၵူၺ်းၵႃႈၸဝ်ႈႁဝ်းၸုၼ်ႉပႅတ်ႈလႄႈလီႁင်ႈတီႈၶႃႈယဝ်ႉ။တၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇၸူးတီႈၵေႃႉဢၼ်ၶၢမ်ႇၽိၵ်ႉသိၵ်ႈတီႈၸဝ်ႈႁဝ်းၼၼ်ႉ တီႈၶႃႈယဝ်ႉ။
၃၉ ၸဝ်ႈႁဝ်းယႃႉပတိၺိၺ်ႇ ဢၼ်ႁဵတ်းဝႆႉတင်းၶႃႈၸဝ်ႈႁဝ်းၼၼ်ႉပႅတ်ႈလႄႈ ဢဝ်သရၽူႇမၼ်းၶျႃးတူၵ်းတီႈ တႅမ်ႇတေႃႇထိုင်ႁွတ်ႈတီႈလိၼ်တီႈၶႃႈယဝ်ႉ။
၄၀ ၸဝ်ႈႁဝ်းႁၵ်းႁူဝ်ႉဝၢင်းမၼ်းၵႃႈမီးပႅတ်ႈလႄႈ ၵိူၼ်ႇယႃႉတိူၵ်ႈတီႈ တိုၵ်းသိုၵ်းမၼ်းတင်းလၢႆပႅတ်ႈတီႈၶႃႈယဝ်ႉ။
၄၁ ၶဝ်ၸိူဝ်းဢၼ်ၵႂႃႇတၢင်းပႆ တၢင်းတင်းသဵင်ႈတင်းလူင်ၼၼ်ႉႁိမ်ႁူင်ႇဢဝ်မၼ်းလႄႈမၼ်းပဵၼ်တီႈဢၼ်လီသေႉသွမ်းတီႈၵူၼ်းႁိူၼ်း ၸမ်ၵၼ်တင်းလၢႆတီႈၶႃႈဢေႃႈ။
၄၂ ၸဝ်ႈႁဝ်းယုၵ်ႉယွင်ႈ မိုဝ်းၶွၼ်ၶႂႃရၢၼ်ႇသူႇမၼ်းတင်းလၢႆလႄႈ ႁႂ်ႈၶဝ်ၸိူဝ်းဢၼ်ႁဵတ်းၶတ်းၵၼ်တင်းမၼ်းတင်းသဵင်ႈတင်းလူင်ၼၼ်ႉ ၸူမ်းသိူဝ်းတီႈၶႃႈဢေႃႈ။
၄၃ ၸဝ်ႈႁဝ်း ႁႂ်ႈၶူမ်းလၢပ်ႇၶူမ်းလႅဝ်းမၼ်း မၢင်ႈၵႂႃႇသေလႄႈ ဢမ်ႇပၼ်ႁႂ်ႈမၼ်းၸုၵ်းၶၢမ်ႇလႆႈၵႃႈၼႂ်းပွႆးတိုၵ်းသိုၵ်းၼၼ်ႉတီႈၶႃႈ။
၄၄ ၸဝ်ႈႁဝ်းႁႂ်ႈသၢႆဢရွင်ႇမၼ်းလပ်ႉႁၢႆၵႂႃႇသေလႄႈ ဢဝ်ရႃႇၸႃႉပလၢင်ႇမၼ်း ၶျႃးတူၵ်း တေႃႇထိုင်ႁွတ်ႈၼိူဝ်လိၼ်တီႈၶႃႈယဝ်ႉ။
၄၅ ၸဝ်ႈႁဝ်းႁႂ်ႈဢသၢၵ်ႈဢရွႆႇမၼ်း ဢၼ်ယင်းၼုမ်ႇယင်းၵမ်ၼၼ်ႉပွတ်းလႄႈ ဢဝ်တင်းတၢင်းဢၼ်ဢူၵ်းဢၼ်ဢၢႆႁူမ်ႇသုမ်ႇမၼ်းဝႆႉတီႈၶႃႈယဝ်ႉ။
၄၆ ထႃႇဝရႃႉၽြႃးတီႈၶႃႈ၊ၸဝ်ႈႁဝ်းယင်းဢမ်ႇထၢင်ႇသႃးလႃးလႃးလႄႈ တၵ်းတဵတ်ႇယူႇၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။တၢင်းၸႂ်မႆႈၶႂ်ႈၸႃႉၸဝ်ႈႁဝ်းၼၼ်ႉတၵ်းမႆႈယူႇၸိူဝ်ႉၼင်ႇၽႆးၼၼ်ႉ ၶိင်ႇၵႃႇလႃႉႁိုင်ၵႃႈႁိုဝ်တီႈ ၶႃႈ။
၄၇ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၸူဝ်ႈတႃႇဢသၢၵ်ႈၶႃႈၸဝ်ႈပွတ်းၵႃႈႁိုဝ် ဢိၵ်ႇတင်းလွင်ႈဢၼ်ၸဝ်ႈႁဝ်းၽၢၼ်ႇသၢင်းႁဵတ်းပဵၼ်လုၵ်ႈၵူၼ်းတင်းသဵင်ႈတင်းလူင်ပုၼ်ႈဢၼ်ၶဝ်တၵ်းဢမ်ႇပွင်ႇလွင်ႈၵႃႈသင်ၵႃႈႁိုဝ်လႃးလႃးၼၼ်ႉ သေၵမ်းတီႈၶႃႈ။
၄၈ ၵေႃႉဢၼ် ဢသၢၵ်ႈလိပ်းယူႇသေလႄႈ ယင်းဢမ်ႇထူပ်းဢမ်ႇႁၼ်တၢင်းတၢႆလႄႈ ၵႄႇသႄႇၼုၵ်ႈဢဝ်ဝိၺိၺ်ႇမၼ်းသေ ၵႃႈၼႂ်းမိုဝ်းမိူင်းမႃႇရၼႃႉၼၼ်ႉၸမ်းပဵၼ်ၽူႈ လႂ်။ၸေႇလႃႇ။
၄၉ ၸဝ်ႈၽြႃးတီႈၶႃႈ၊ ၵရူႉၼႃႇမိူဝ်ႈဢွၼ်ၼႆႉဢၼ်ၸဝ်ႈႁဝ်းပႃးတင်းသႅတ်ႈၸႃႇသေလႄႈ တိူင်ႇဝႃႈဝႆႉတီႈၶႃႈၸဝ်ႈႁဝ်း တႃႇဝိတ်ႉ ၼၼ်ႉ မီးၵႃႈ လႂ်တီႈၶႃႈ။
၅၀ ၸဝ်ႈၽြႃးတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းတၢင်းဢၼ်သေႉဢၼ်သွမ်း ဢၼ်ၶႃႈၸဝ်ႈႁဝ်းၶဝ်လႆႈၶၢမ်ႇၼၼ်ႉသေၵမ်းတီႈၶႃႈ။ၶႃႈၸဝ်ႈလႆႈဢဝ်ဢမူႉၵူၼ်းတင်းသဵင်ႈတင်းလူင် ၵူႈသမ်ႇၵူႈပိူင်ၼၼ်ႉပႃးသႂ်ႇ ၵႃႈၼႂ်းႁူဝ်ဢူၵ်းၶႃႈၸဝ်ႈၵႂႃႇတီႈၶႃႈဢေႃႈ။
၅၁ လွင်ႈမၼ်းၸမ်းထႃႇဝရႃႉၽြႃးတီႈၶႃႈ၊ ရၢၼ်ႇသူႇၸဝ်ႈႁဝ်းၸိူဝ်းၼၼ်ႉ ၸၢင်ႊသေႉၸၢင်ႊသွမ်းၸဝ်ႈႁဝ်းတီႈၶႃႈဢေႃႈ။ၶဝ်ဢွၼ်ၵၼ်သေႉသွမ်းႁွႆးတိၼ် ၵေႃႉဢၼ်ၶၢမ်ႇၽိၵ်ႉသိၵ်ႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။
၅၂ ႁႂ်ႈထႃႇဝရႃႉၽြႃး မီးမင်ႇၵလႃႇ ၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈ။
ဢႃႈမိၼ်ႈတင်းဢႃႈမိၼ်ႈ။