၈၀
၁ ၸဝ်ႈဢၼ်လဵင်ႉထိင်းသူဝ်းဢၼ်ပဵၼ်ဢိသရေႇလ၊ဢၼ်ဢဝ်မဵဝ်းယုဝ်းသႅပ်ႉ သူင်ႇမိူၼ်ၸိူဝ်ႉၼင်ႇၽုင်သူဝ်းၼၼ်ႉတီႈၶႃႈ၊ ၶႅၼ်းတေႃႈဝၢႆႇႁူၸဝ်ႈႁဝ်းသေၵမ်းတီႈၶႃႈ။ၸဝ်ႈဢၼ်ၵိင်းဝၢပ်ႈယူႇၵႃႈၼိူဝ် ၶေႇရူႉၽိမ်ႇၼၼ်ႉတီႈၶႃႈ၊ ၶႅၼ်းတေႃႈပွႆႇသၢႆဢရွင်ႇၸဝ်ႈႁဝ်းသေၵမ်း တီႈၶႃႈ။
၂ ၶႅၼ်းတေႃႈတိုၵ်းယူင်းတၼ်းၶူဝ်းၸဝ်ႈႁဝ်းၵႃႈတီႈၽၢႆႇၼႃႈ မဵဝ်းဢေႇၽရိမ်ႇ၊ မဵဝ်းပိၼ်ႇယႃႇမိၼ်ႇ၊မဵဝ်းမၼႃႇသေႇ ၼၼ်ႉလႄႈ မႃးႁႂ်ႈလႆႈၵႄႇသႄႇၶျွတ်ႈ ဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။
၃ ၽြႃးပဵၼ်ၸဝ်ႈတီႈၶႃႈ၊ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ် ၶၢႆႉပုတ်ႈလႄႈၼႄပျႃးဢၼ်လႅင်းၼႃႈၸဝ်ႈႁဝ်း သေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ် တီႈၶႃႈဢေႃႈ။
၄ထႃႇဝရႃႉၽြႃး ၽြႃးပဵၼ်ၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ တၢင်းၸႂ်မႆႈၶႂ်ႈၸႃႉၸဝ်ႈႁဝ်းတၵ်းဢွၵ်ႇယူႇတီႈၵႂၢမ်းပထၼႃႇ ဢၼ်ၵူၼ်းၸဝ်ႈႁဝ်းတင်းလၢႆႁဵတ်း ၼၼ်ႉယူႇၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။
၅ ၸဝ်ႈႁဝ်းဢဝ်ၶဝ်ႈမုၼ်းၼမ်ႉတႃလဵင်ႉပၼ်ၶဝ်လႄႈ ဢဝ်ၼမ်ႉတႃတိုၵ်းပၼ်ၶဝ်ၵိၼ်ဢိမ်ႇတဵမ်ၼႃႇလူင်လၢင် တီႈ ၶႃႈဢေႃႈ။
၆ ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ပဵၼ်တီႈဢၼ်ၵူၼ်းႁိူၼ်းၸမ်ၵၼ်တင်းၶႃႈႁဝ်း ၶဝ်ၸိူဝ်းၼၼ်ႉတွပ်ႇထဵင်တီႈၶႃႈဢေႃႈ။ရၢၼ်ႇသူႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်ၶႃႈၸဝ်ႈႁဝ်းၶဝ် တီႈၶႃႈဢေႃႈ။
၇ ၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်ၶၢႆႉပုတ်ႈလႄႈၼႄပျႃးဢၼ်လႅင်းၼႃႈၸဝ်ႈႁဝ်း သေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁွတ်ႈထိုင် တၢင်းဢၼ်ၵႄႇသႄႇၶျွတ်ႈဢဝ် တီႈၶႃႈ ဢေႃႈ။
၈ ၸဝ်ႈႁဝ်းဢဝ်တူၼ်ႈၶိူဝ်းမၢၵ်ႇၸပိတ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးလႄႈ ႁေႃႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢွၵ်ႇပႅတ်ႈသေယဝ်ႉ ဢဝ်ၽုၵ်ႇ သွမ်ႈဝႆႉတီႈၶႃႈဢေႃႈ။
၉ ၸဝ်ႈႁဝ်းမႄးႁဵတ်းမႄးႁႅၼ်းတီႈယူႇမၼ်းပၼ်လႄႈ ႁႂ်ႈႁၢၵ်ႈမၼ်းလိုၵ်ႉၸွတ်ႇတူဝ်ႈၵႂႃႇ တင်းမိူင်းတီႈၶႃႈဢေႃႈ။
၁၀ ႁူမ်ႊမၼ်းႁူမ်ႇသုမ်ႇလွႆတင်းလၢႆလႄႈ ၵိင်ႇမၼ်းၶႃႊမၼ်းတင်းလၢႆပဵၼ်မိူၼ်ၸိူဝ်ႉၼင်ႇတူၼ်ႈဢႃႇရိတ်ႉ ၽြႃးပဵၼ်ၸဝ်ႈၸိူဝ်းၼၼ်ႉတီႈၶႃႈ ဢေႃႈ။
၁၁ မၼ်းႁႂ်ႈၵိင်ႇမၼ်းၶႃႊမၼ်းယွတ်ႈမၼ်းတင်းလၢႆတႅၵ်ႇၵႂႃႇၽႄၵႂႃႇတေႃႇထိုင်ႁွတ်ႈပၢင်ႇလၢႆႇ ဢိၵ်ႇ တင်းၼမ်ႉႁွင်ႊလူင်တီႈၶႃႈဢေႃႈ။
၁၂ တေႃႈလဵဝ်ၼႆႉၸမ်းၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁၵ်းယႃႉႁူဝ်ႉဝၢင်းမၼ်းပႅတ်ႈသေယဝ်ႉ၊ ႁႂ်ႈၶဝ်ၸိူဝ်းဢၼ်ပႆတၢင်းၵၢႆၵႂႃႇၵႃႈႁိမ်းမၼ်းတင်းသဵင်ႈတင်းလူင်ၼၼ်ႉ လႆႈပိတ်းဢဝ် မၢၵ်ႇၸပိတ်ႉမၼ်းတီႈၶႃႈ။
၁၃ မူထိူၼ်ႇၶူပ်းမၼ်းၶၢတ်ႇ လႄႈတူဝ်ထိူၼ်ႇႁၢႆႉဢဝ်မၼ်းၵိၼ်တီႈၶႃႈဢေႃႈ။
၁၄ ၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၸဝ်ႈႁဝ်းၶႅၼ်းတေႃႈသမ်ႉၶိုၼ်းမႃးထႅင်ႈသေၵမ်းတီႈၶႃႈ။ၶႃႈၸဝ်ႈ ႁဝ်းၶဝ်တွင်းပၢၼ်ႇတီႈၶႃႈဢေႃႈ။
၁၅ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈ လူႈတူၺ်းသေၵမ်းတီႈၶႃႈ။ၶႅၼ်းတေႃႈမႃးလူႈမႃးတူၺ်းတူၼ်ႈၶိူဝ်းမၢၵ်ႇၸပိတ်ႉၼႆႉ၊ ဢၼ်ပဵၼ်တူၼ်ႈဢၼ်ၸဝ်ႈႁဝ်းဢဝ်တင်းမိုဝ်းၶွၼ်ၶႂႃၸဝ်ႈႁဝ်းၽုၵ်ႇသွမ်ႈဝႆႉဢၼ်ဝႃႈ၊ လုၵ်ႈၸၢႆးဢၼ်ၸဝ်ႈႁဝ်းႁႂ်ႈတဵမ်ထူၼ်ႈဝႆႉတင်း တၢင်းႁဵတ်းပုၼ်ႈ ၸဝ်ႈႁဝ်းၼၼ်ႉသေၵမ်းတီႈၶႃႈ။
၁၆ လႆႈၶၢမ်ႇတၢင်းဢၼ်ဢဝ်တုတ်ႇၽႆးတီႈၶႃႈယဝ်ႉ။လႆႈၶၢမ်ႇတၢင်းဢၼ်ပမ်ႈလူမ်ႉပႅတ်ႈတီႈၶႃႈယဝ်ႉ။ၵွပ်ႈပိူဝ်ႈတၢင်းဢၼ်ၼႃႈၸဝ်ႈႁဝ်းသင်ႇသွၼ်ၼၼ်ႉလႄႈၶဝ်ႁွတ်ႈထိုင်တၢင်းလူႉ တၢင်းလႅဝ်တီႈၶႃႈဢေႃႈ။
၁၇ ႁႂ်ႈၸဝ်ႈႁဝ်းဢဝ်မိုဝ်းၸဝ်ႈႁဝ်းတၢင်ႇသႂ်ႇၵႃႈၼိူဝ် ၵေႃႉဢၼ်ၸၢပ်ႈသႅင်ႇၵၼ်တင်းမိုဝ်းၶွၼ်ၶႂႃၸဝ်ႈႁဝ်း၊ လုၵ်ႈၵူၼ်းဢၼ်ၸဝ်ႈႁဝ်းႁႂ်ႈတဵမ်ထူၼ်ႈဝႆႉတင်းႁႅင်းပုၼ်ႈၸဝ်ႈႁဝ်းၼၼ်ႉ သေၵမ်းလူၺ်ႈ တီႈၶႃႈ။
၁၈ ပေႃးႁဵတ်းၸိူဝ်ႉၼင်ႇၼၼ်ၸိုင်ၶႃႈၸဝ်ႈႁဝ်းၶဝ်တၵ်းဢမ်ႇလႆႈသုတ်ႈၶိုၼ်းယိုတ်းၶိုၼ်းသေ ၵႃႈတီႈၸဝ်ႈႁဝ်းတီႈၶႃႈ။ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်ဢသၢၵ်ႈလိပ်းယူႇသေၵမ်းတီႈၶႃႈ။တၵ်းဢွၼ်ၵၼ်ႁဵတ်းပထၼႃႇ တီႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈ ဢေႃႈ။
၁၉ ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်ၶၢႆႉပုတ်ႈလႄႈ ၼႄပျႃးဢၼ်လႅင်းၼႃႈၸဝ်ႈႁဝ်းသေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်ၶႃႈၸဝ်ႈႁဝ်းၶဝ်တၵ်းႁွတ်ႈထိုင် တၢင်းဢၼ်ၵႄႇသႄႇၶျွတ်ႈဢဝ်တီႈၶႃႈဢေႃႈ။