၇၁
၁ ထႃႇဝရႃႉၽြႃးတီႈၶႃႈ၊ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇတီႈၶႃႈဢေႃႈ။ၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈတင်းတၢင်းဢၼ်ဢူၵ်းဢၼ်ဢၢႆယူႇ တႃႇသေႇဢမ်ႇ ထၢတ်ႇသေၵမ်းတီႈၶႃႈ။
၂ ၶႅၼ်းတေႃႈၸွမ်းလူၺ်ႈတၢင်းသိုဝ်ႈတေႃႇၸဝ်ႈႁဝ်းၼၼ်ႉသေလႄႈ ၵႄႇသႄႇၼုၵ်ႈဢဝ်ၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈဝၢႆႇႁူၸဝ်ႈႁဝ်းမႃးၸူးၽၢႆႇၶႃႈၸဝ်ႈသေလႄႈ ၵႄႇသႄႇၶျွတ်ႈ ဢဝ်ၶႃႈၸဝ်ႈသေၵမ်းတီႈၶႃႈ။
၃ ၸဝ်ႈႁဝ်းၶႅၼ်းတေႃႈပဵၼ်မၢၵ်ႇႁိၼ်မၢၵ်ႇၽႃ ဢၼ်ၶႃႈၸဝ်ႈတူၵ်းတီႈယူႇတီႈသဝ်း၊ တီႈဢၼ်ၶႃႈၸဝ်ႈႁွတ်ႈထိုင်ယူႇတႃႇသေႇဢမ်ႇထၢတ်ႇၼၼ်ႉသေၵမ်းတီႈၶႃႈ။ၸဝ်ႈႁဝ်းမီးဢမိင်ႉႁႂ်ႈလႆႈၵႄႇသႄႇၶျွတ်ႈဢဝ်ၶႃႈၸဝ်ႈတီႈၶႃႈဢေႃႈ။လွင်ႈမၼ်းၸမ်း ၸဝ်ႈႁဝ်းပဵၼ်မၢၵ်ႇႁိၼ်မၢၵ်ႇၽႃၶႃႈၸဝ်ႈ ဢိၵ်ႇတင်းတိူၵ်ႈတီႈတိုၵ်းသိုၵ်းၶႃႈၸဝ်ႈ တီႈ ၶႃႈဢေႃႈ။
၄ ၽြႃးပဵၼ်ၸဝ်ႈတီႈၶႃႈ၊ၶႅၼ်းတေႃႈၵႄႇသႄႇဢဝ်ၶႃႈၸဝ်ႈ လွတ်ႈသေၵႃႈၼႂ်းမိုဝ်းၵေႃႉဢၼ်ႁၢႆႉဢၼ်မိူၵ်ႈ ဢိၵ်ႇတင်းၵႃႈၼႂ်းမိုဝ်းၵေႃႉဢၼ်ဢမ်ႇတြႃးတင်း ၵေႃႉဢၼ်ႁဝ်ႉၵျၢမ်းၼႃႇၼၼ်ႉသေၵမ်းတီႈၶႃႈ။
၅ ၸဝ်ႈၽြႃးထႃႇဝရႃႉတီႈၶႃႈ။ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈမုင်ထႃႈမွင်းထႃႈတီႈၶႃႈဢေႃႈ။ပဵၼ်တီႈဢၼ်ၶႃႈၸဝ်ႈဢိင်ပိုင်ႈယူႇ ၸဵမ်မိူဝ်ႈၶႃႈၸဝ်ႈယင်း လဵၵ်ႉယင်းဢွၼ်ႇၼၼ်ႉတီႈၶႃႈဢေႃႈ။
၆ ၶႃႈၸဝ်ႈလႆႈဢိင်ၸဝ်ႈႁဝ်းယူႇၸဵမ်မိူဝ်ႈၸႃႉၵိူတ်ႇလဵင်ႉမႃးၼၼ်ႉလႄႈ ၸဝ်ႈႁဝ်းပဵၼ်ၸဝ်ႈဢၼ်ႁဵတ်းၵျေးၸူးတီႈၶႃႈၸဝ်ႈၸဵမ်မိူဝ်ႈၼႂ်းတွင်ႉမေႈၼၼ်ႉတီႈၶႃႈဢေႃႈ။တၢင်းဢၼ်ၶႃႈၸဝ်ႈယွင်ႈယေႃးၼၼ်ႉၸၢပ်ႈသႅင်ႇၵၼ်တင်းၸဝ်ႈႁဝ်းယူႇတႃႇသေႇဢမ်ႇထၢတ်ႇတီႈၶႃႈ ဢေႃႈ။
၇ ပဵၵ်ႉသမ်ႉၶႃႈၸဝ်ႈပဵၼ်ၸိူဝ်ႉၼင်ႇလွင်ႈတၢင်းဢၼ်လီဢၢမ်းၼၼ်ႉတီႈၵူၼ်းၼမ်ၼႃႇသေၵေႃႈၸဝ်ႈႁဝ်းပဵၼ်တီႈသွၼ်ႈတီႈပိုင်ႈ ဢၼ်မၼ်ႈၶိူင်ႇတီႈ ၶႃႈၸဝ်ႈယူႇတီႈၶႃႈဢေႃႈ။
၈ သူပ်းၶႃႈၸဝ်ႈတဵမ်ဝႆႉတင်းတၢင်းဢၼ်ႁဵတ်းထေႃးပၼႃႇ တီႈၸဝ်ႈႁဝ်း ဢိၵ်ႇတင်းမုၼ်ၽုင်းၸဝ်ႈႁဝ်းယူႇ တင်းဝၼ်းတင်းဝၼ်း တီႈၶႃႈဢေႃႈ။
၉ မိူဝ်ႈဢၼ်ၶႃႈၸဝ်ႈထဝ်ႈၵႄႇယဝ်ႉၼၼ်ႉၸိုင်၊ ယႃႇပေပႅတ်ႈၶႃႈၸဝ်ႈသေၵမ်းတီႈၶႃႈ။မိူဝ်ႈဢၼ်ႁႅင်းၶႃႈၸဝ်ႈဢူၼ်ႈၵႂႃႇ ယွမ်းၵႂႃႇယဝ်ႉၼၼ်ႉၸိုင်ယႃႇပေၸုၼ်ႉပႅတ်ႈၶႃႈၸဝ်ႈသေၵမ်းတီႈၶႃႈ။
၁၀ ရၢၼ်ႇသူႇၶႃႈၸဝ်ႈတင်းလၢႆ ဢွၼ်ၵၼ်ယူႇၽၢႆႇၼိုင်ႈတင်းၶႃႈၸဝ်ႈလႄႈလၢတ်ႈဝႃႈယူႇတီႈၶႃႈဢေႃႈ။ၶဝ်ၸိူဝ်းဢၼ် လွမ်ႁႃဢသၢၵ်ႈ ၶႃႈၸဝ်ႈယူႇၼၼ်ႉ တိူင်ႇပၢင်ႇလၢတ်ႈၸႃၵၼ်လႄႈဝႃႈ၊-
၁၁ ၽြႃးပဵၼ်ၸဝ်ႈၸုၼ်ႉပႅတ်ႈမၼ်းယဝ်ႉ။လိုပ်ႈၸွမ်းလမ်းၸွမ်းလႄႈတီႉဢဝ်မၼ်းတႃႉ။ဢမ်ႇမဵးၵေႃႉဢၼ်တၵ်းၵႄႇသႄႇၼုၵ်ႈဢဝ်မၼ်းလႃးလႃး၊ ဝႃႈၼင်ႇၼႆယူႇတီႈၶႃႈဢေႃႈ။
၁၂ ၽြႃးပဵၼ်ၸဝ်ႈတီႈၶႃႈ၊ ယႃႇပေယူႇတီႈဢၼ်ၵႆၵၼ်တင်းၶႃႈၸဝ်ႈသေၵမ်းတီႈၶႃႈ။ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈႁိပ်ႈၼႅတ်ႈႁႂ်ႈလႆႈၸွႆႈထႅမ်မႃႉၸႃႉၶႃႈ ၸဝ်ႈသေၵမ်းတီႈၶႃႈ။
၁၃ ႁႂ်ႈၶဝ်ၸိူဝ်းဢၼ်ႁဵတ်းတၢင်းၽိတ်းသႂ်ႇတီႈဢသၢၵ်ႈၶႃႈၸဝ်ႈၼၼ်ႉ ႁွတ်ႈထိုင်တၢင်းဢၼ်လီ်ဢူၵ်းလီဢၢႆ ဢိၵ်ႇတင်း တၢင်းဢၼ်သုၵ်ႉၸႂ်ၵႂင်ၸႂ်ၼၼ်ႉသေၵမ်းလူၺ်ႈ။ႁႂ်ႈၶဝ်ၸိူဝ်းဢၼ်ႁႃဢၶႂၢင်ႉ တၢင်းဢၼ်ႁဵတ်းဢပျႅတ်ႈသႂ်ႇတီႈၶႃႈၸဝ်ႈၼၼ်ႉ လႆႈၶၢမ်ႇတၢင်းဢၼ် ၸူမ်ယူႇၵႃႈၼႂ်းတၢင်းဢၼ်သေႉသွမ်းဢိၵ်ႇတင်း တၢင်းဢၼ်သုၵ်ႉၸႂ်ၵႂင်ၸႂ် ၼၼ်ႉသေၵမ်းလူၺ်ႈ။
၁၄ ၶႃႈၸဝ်ႈၸမ်းတၵ်းမုင်ထႃႈမွင်းထႃႈယူႇသေႇသေႇလႄႈ ယဵင်ႈၶႅၼ်းတၵ်းယွင်ႈယေႃးၸဝ်ႈႁဝ်းၼႃႇသေၵေႃႉဢၼ်ယွင်ႈယေႃးၼၼ်ႉ တီႈၶႃႈ ဢေႃႈ။
၁၅ သူပ်းၶႃႈၸဝ်ႈတၵ်းဢဝ်တင်းတၢင်းဢၼ်ၸဝ်ႈႁဝ်းသိုဝ်ႈတေႃႇ ဢိၵ်ႇတင်း တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ မွၵ်ႇလၢတ်ႈယူႇတင်းဝၼ်းတင်းဝၼ်းတီႈၶႃႈဢေႃႈ။ၼပ်ႉဢၢၼ်ႇၸိူဝ်းၼၼ်ႉ လႄႈဢမ်ႇသဵင်ႈလႆႈတီႈၶႃႈ။
၁၆ ၶႃႈၸဝ်ႈတၵ်းပႃးဢဝ်တင်း တၼ်းၶူဝ်းၸဝ်ႈၽြႃးထႃႇဝရႃႉ တင်းလၢႆမႃးလႄႈ မွၵ်ႇလၢတ်ႈတြႃးတၢင်းသိုဝ်ႈတေႃႇ ၸဝ်ႈႁဝ်း ၼၼ်ႉၵူၺ်းတီႈၶႃႈဢေႃႈ။
၁၇ ၽြႃးပဵၼ်ၸဝ်ႈတီႈၶႃႈၸဝ်ႈႁဝ်းသင်ႇသွၼ်ပၼ်ၶႃႈၸဝ်ႈ ၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉတီႈၶႃႈယဝ်ႉ။ၶႃႈၸဝ်ႈဢဝ်လွင်ႈတၢင်းဢၼ်လီဢၢမ်း ၸဝ်ႈႁဝ်းၸိူဝ်းၼၼ်ႉၼႄပျႃးယူႇ ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉတီႈၶႃႈယဝ်ႉ။
၁၈ ၽြႃးပဵၼ်ၸဝ်ႈတီႈၶႃႈ၊ လၢႆးသမ်ႉထၼ်ႈပေႃးတေႃႇထိုင်ႁွတ်ႈ ၶိင်ႇမိူဝ်ႈဢၼ်ဢသၢၵ်ႈၶႃႈၸဝ်ႈယႂ်ႇလႄႈၶူၼ်ႁူဝ်ႁွၵ်ႇၵႂႃႇၼၼ်ႉ ယႃႇပေၸုၼ်ႉပႅတ်ႈၶႃႈၸဝ်ႈၼႂ်းၸူဝ်ႈဢၼ်ၶႃႈၸဝ်ႈဢမ်ႇပႆႇၼႄပျႃး ၶႅၼ်ၸဝ်ႈႁဝ်းတီႈၵူၼ်းတေႃႈလဵဝ်ၼႆႉၸိူဝ်းၼၼ်ႉ ဢိၵ်ႇတင်း တၼ်းၶူဝ်းၸဝ်ႈႁဝ်းတီႈၶဝ်ၸိူဝ်းဢၼ်တၵ်းပဵၼ်မႃးၵမ်းလိုၼ်းတင်းသဵင်ႈတင်းလူင်ၼၼ်ႉသေၵမ်းတီႈၶႃႈ။
၁၉ ၽြႃးပဵၼ်ၸဝ်ႈတီႈၶႃႈတၢင်းဢၼ်ၸဝ်ႈႁဝ်းသိုဝ်ႈတေႃႇၼၼ်ႉ ပဵၼ်ဢၼ်သုင်ၼႃႇလူင်လၢင်လႄႈ ၸဝ်ႈႁဝ်းႁဵတ်းလွင်ႈတၢင်းဢၼ်ယႂ်ႇၼႃႇ တီႈၶႃႈဢေႃႈ။ၽြႃးပဵၼ်ၸဝ်ႈတီႈၶႃႈ၊ ၽူႈ လႂ်တၵ်းမိူၼ်ၵၼ်တင်းၸဝ်ႈႁဝ်းလႆႈတီႈၶႃႈ။
၂၀ ၸဝ်ႈႁဝ်းၼႄပျႃးၽေးဢၢၼ်ႇတရႄႇဢၼ်ႁၢဝ်ႈၵျၢမ်းၼႃႇတီႈၶႃႈၸဝ်ႈ ၼမ်ၼႃႇၼၼ်ႉလႄႈ သမ်ႉတၵ်းပၼ်ဢသၢၵ်ႈၵတ်းယဵၼ်ၶျၢမ်းသႃႇတီႈၶႃႈၸဝ်ႈလႄႈ သမ်ႉႁႂ်ႈၶႃႈၸဝ်ႈလုၵ်ႉဢွၵ်ႇသေၵႃႈၼႂ်းတီႈလိုၵ်ႉတီႈလမ်ႇလိၼ်မိူင်းၼႆႉမႃး တီႈၶႃႈဢေႃႈ။
၂၁ ၸဝ်ႈႁဝ်း တၵ်းႁႂ်ႈၸေးၸိမ်ႇၶႃႈၸဝ်ႈ ယႂ်ႇၼမ်မႃးလႄႈ သမ်ႉဝၢႆႇၶိုၼ်းၸူးသေလႄႈ ႁႂ်ႈၶႃႈၸဝ်ႈသၢၵ်ႈ သႃႇတီႈၶႃႈဢေႃႈ။
၂၂ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႃႈၸဝ်ႈတၵ်းသေႇတရေႃးသေလႄႈ ယွင်ႈယေႃးၸဝ်ႈႁဝ်း ဢိၵ်ႇတင်းသႅတ်ႈၸႃႇၸဝ်ႈႁဝ်းတီႈၶႃႈဢေႃႈ။ၽြႃးဢၼ်မူတ်းၸၢင်ႇမဵဝ်းၵူၼ်းဢိသရေႇလ တီႈၶႃႈ၊ၶႃႈၸဝ်ႈတၵ်းလဵတ်းတိင်ႇသေလႄႈ ႁဵတ်းၵႂၢမ်းတီႈ ၸဝ်ႈႁဝ်းတီႈၶႃႈဢေႃႈ။
၂၃ မိူဝ်ႈဢၼ်ၶႃႈၸဝ်ႈႁဵတ်းၵႂၢမ်းတီႈၸဝ်ႈႁဝ်းၼၼ်ႉၸိုင် သူပ်းၶႃႈၸဝ်ႈတၵ်းႁွင်ႉသႂၢင်ႇႁွင်ႉသိူဝ်းတီႈၸဝ်ႈႁဝ်းဢေႃႈ။ဝိၺိၺ်ႇၶႃႈၸဝ်ႈဢၼ်ၸဝ်ႈႁဝ်းထူတ်ႇဢဝ်ၼၼ်ႉ တၵ်းႁွင်ႉသႂၢင်ႇႁွင်ႉသိူဝ်းတီႈ ၶႃႈဢေႃႈ။
၂၄ လိၼ်ႉၶႃႈၸဝ်ႈၵေႃႈတၵ်းဢဝ်လွင်ႈတၢင်းဢၼ်ၸဝ်ႈႁဝ်းသိုဝ်ႈတေႃႇၼၼ်ႉ မွၵ်ႇလၢတ်ႈယူႇတင်းဝၼ်းတင်းဝၼ်း တီႈၶႃႈဢေႃႈ။လွင်ႈမၼ်းၸမ်းၶဝ်ၸိူဝ်းဢၼ်ႁႃဢၶႂၢင်ႉ ႁႂ်ႈလႆႈႁဵတ်းဢပျႅတ်ႈသႂ်ႇတီႈၶႃႈၸဝ်ႈၼၼ်ႉ ဢွၼ်ၵၼ်ႁွတ်ႈထိုင် တၢင်းဢၼ်လီဢူၵ်းလီဢၢႆလႄႈ ၼႃႈလူႉတီႈၶႃႈဢေႃႈ။