၆၉
၁ ၽြႃးပဵၼ်ၸဝ်ႈတီႈၶႃႈ။ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ၼမ်ႉထုမ်ႈႁွတ်ႈထိုင်ၵႃႈ ၼိူဝ်ဝိၺိၺ်ႇၶႃႈၸဝ်ႈတီႈၶႃႈယဝ်ႉ။
၂ ၶႃႈၸဝ်ႈလူမ်ႉၶဝ်ႈၵႃႈၼႂ်းၵူမ်ႇၼႂ်းဢုင်ဢၼ်လိုၵ်ႉၼႃႇ၊ တီႈဢၼ်ဢမ်ႇမီးတီႈဢၼ်ယဵပ်ႇတမ်းတိၼ်ၼၼ်ႉတီႈၶႃႈယဝ်ႉ။ၶႃႈၸဝ်ႈႁွတ်ႈထိုင်ၵႃႈၼႂ်းၼမ်ႉဢၼ်လိုၵ်ႉၼႃႇ၊ တီႈဢၼ်လႅင်းၼမ်ႉပိူပ်ႇၼမ်ႉ ႁူမ်ႇသုမ်ႇၶႃႈၸဝ်ႈဝႆႉၼၼ်ႉတီႈၶႃႈယဝ်ႉ။
၃ ၶႃႈၸဝ်ႈႁွင်ႉသႅၼ်ႇလႄႈႁိူဝ်ႉၸႂ်ဢူၼ်ႈၸႂ်ၼႃႇလူင်လၢင်တီႈၶႃႈယဝ်ႉ။ၶေႃးၶႃႈၸဝ်ႈႁႅင်ႈႁွင်ၵႂႃႇတီႈၶႃႈယဝ်ႉ။ၼႂ်းမိူဝ်ႈဢၼ်ၶႃႈၸဝ်ႈမုင်ထႃႈမွင်းထႃႈၽြႃးပဵၼ်ၸဝ်ႈၵဝ်ၶႃႈယူႇၼၼ်ႉၸိုင်၊ မၢၵ်ႇတႃၶႃႈၸဝ်ႈလူႉၵႂႃႇတီႈၶႃႈယဝ်ႉ။ၶဝ်ၸိူဝ်းဢၼ်လွင်ႈမၼ်းယင်းဢမ်ႇမီးလႄႈ ၸင်းၶႃႈၸဝ်ႈၸိူဝ်းၼၼ်ႉမီးၼမ်ၼႃႇသေၶူၼ် ႁူဝ်ၶႃႈၸဝ်ႈတီႈၶႃႈဢေႃႈ။
၄ ၶဝ်ၸိူဝ်းဢၼ်ယင်းဢမ်ႇမီးလွင်ႈဢၼ်ၸိုဝ်ႈဢၼ်ၸႂ်ႈလႄႈ ႁဵတ်းရၢၼ်ႇသူႇသႂ်ႇၶႃႈၸဝ်ႈလႄႈယႃႉၶႃႈၸဝ်ႈပႅတ်ႈၼၼ်ႉ ႁႅင်းယႂ်ႇၼႃႇလူင်ႈလၢင်တီႈၶႃႈဢေႃႈ။မိူဝ်ႈၼၼ်ႉၶႃႈၸဝ်ႈလႆႈၶိုၼ်းတႅၼ်းပၼ်ဢုၵ်ႉၸႃႇဢၼ်ၶႃႈၸဝ်ႈဢမ်ႇလႆႈဢဝ်ၼၼ်ႉတီႈၶႃႈဢေႃႈ။
၅ ၽြႃးပဵၼ်ၸဝ်ႈတီႈၶႃႈ၊ ၸဝ်ႈႁဝ်းႁူႉလွင်ႈတၢင်းဢၼ်ၶႃႈၸဝ်ႈမိူၵ်ႈၼၼ်ႉယူႇတီႈၶႃႈဢေႃႈ။ဢပျႅတ်ႈၶႃႈၸဝ်ႈတင်းလၢႆ ဢမ်ႇမီးတၢင်းဢၼ်သိူင်ႇဝႆႉလပ်ႉဝႆႉၵႃႈ တီႈၸဝ်ႈႁဝ်းတီႈၶႃႈ။
၆ ထႃႇဝရႃႉၽြႃးၸဝ်ႈပူဝ်ႇပႃႇၵၢင်ႁၢဝ်တီႈၶႃႈ။ယႃႇပေႁႂ်ႈၶဝ်ၸိူဝ်းဢၼ်မုင်ထႃႈမွင်းထႃႈၸဝ်ႈႁဝ်းၼၼ်ႉ ႁွတ်ႈထိုင်တၢင်းဢၼ်ဢူၵ်းဢၼ်ဢၢႆၵွပ်ႈပိူဝ်ႈၶႃႈၸဝ်ႈသေၵမ်းတီႈၶႃႈ။ၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။ယႃႇပေႁႂ်ႈၶဝ်ၸိူဝ်းဢၼ်ႁႃၸဝ်ႈႁဝ်းၼၼ်ႉ ႁွတ်ႈထိုင်တၢင်းဢၼ်သုၵ်ႉၸႂ်ၵႂင်ၸႂ်ၵွပ်ႈပိူဝ်ႈ ၶႃႈၸဝ်ႈသေၵမ်းတီႈၶႃႈ။
၇ ၶႃႈၸဝ်ႈလႆႈၶၢမ်ႇတၢင်းဢၼ်သေႉသွမ်းၵွပ်ႈပိူဝ်ႈၸဝ်ႈႁဝ်းလႄႈ တၢင်းဢၼ် သုၵ်ႉၸႂ်ၵႂင်ၸႂ်ႁူမ်ႇသုမ်ႇၶႃႈၸဝ်ႈဝႆႉတီႈၶႃႈဢေႃႈ။
၈ ၶႃႈၸဝ်ႈပဵၼ်ၵူၼ်းလိပ်းၵူၼ်းလႅင် ၵႃႈၼႂ်းပီႈၼွင်ႉၶႃႈၸဝ်ႈတင်းလၢႆၼၼ်ႉၵႂႃႇလႄႈ ပဵၼ်ၵူၼ်းတၢင်ႇဝၢၼ်ႈတၢင်ႇမိူင်း ၵႃႈၼႂ်းလုၵ်ႈလၢင်းမေႈၶႃႈၸဝ်ႈၼၼ်ႉၵႂႃႇ တီႈ ၶႃႈယဝ်ႉ။
၉ ၸႂ်ဢၼ်ၸပ်းဢၼ်ၸွႆးယၢပ်ႇၸႂ်လူၺ်ႈလွင်ႈႁိူၼ်းၸဝ်ႈႁဝ်းၼႆႉၵိၼ်ၶႃႈၸဝ်ႈတီႈၶႃႈယဝ်ႉ။ၵႂၢမ်းသေႉသွမ်းၶဝ်ၸိူဝ်းဢၼ်သေႉသွမ်းၸဝ်ႈႁဝ်းၼၼ်ႉ လႆႈႁွတ်ႈ ထိုင်ၵႃႈၼိူဝ်ၶႃႈၸဝ်ႈတီႈၶႃႈဢေႃႈ။
၁၀ မိူဝ်ႈဢၼ်ၶႃႈၸဝ်ႈႁႆႈႁွင်ႉလႄႈ ပႃးတင်းႁူဝ်ၸႂ်ၵမ်တၢင်းၵိၼ်ၼၼ်ႉၸိုင်လွင်ႈတၢင်းၼၼ်ႉ ပဵၼ်တီႈဢၼ်သေႉဢၼ်သွမ်း ၶႃႈၸဝ်ႈတီႈၶႃႈဢေႃႈ။
၁၁ မိူဝ်ႈဢၼ်ၶႃႈၸဝ်ႈၼုင်ႈၶူဝ်းၼင်ပေႃယူၼၼ်ႉ ၶႃႈၸဝ်ႈပဵၼ်ပုၼ်ႈဢၼ်ၶဝ်ႁဵတ်း ပုင်ႇတႅၵ်ႈတီႈၶႃႈဢေႃႈ။
၁၂ ၶဝ်ၸိူဝ်းဢၼ်ၼင်ႈယူႇၵႃႈၼႂ်းၽၵ်းတူဝဵင်းၼၼ်ႉ မွၵ်ႇလၢတ်ႈလွင်ႈၶႃႈၸဝ်ႈလႄႈၶဝ်ၸိူဝ်းဢၼ်ၵိၼ်လဝ်ႈမဝ်းၵမ်ၼၼ်ႉ ၸၢင်ႊဢဝ်လွင်ႈ ၶႃႈၸဝ်ႈႁဵတ်းၵႂၢမ်းတီႈၶႃႈဢေႃႈ။
၁၃ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈၸမ်းသူးတွင်းတီႈၸဝ်ႈႁဝ်း ၼႂ်းၶိင်ႇဢၼ်ထုၵ်ႇဢၼ်လီၼၼ်ႉတီႈၶႃႈဢေႃႈ။ၽြႃးပဵၼ်ၸဝ်ႈတီႈၶႃႈ၊ ၶႅၼ်းတေႃႈၸွမ်းလူၺ်ႈတၢင်းဢၼ်ၵရူႉၼႃႇၸဝ်ႈႁဝ်းလိူင်ႇၸႂ်တဵမ်ထူၼ်ႈၼၼ်ႉသေလႄႈ ၶိုၼ်းဢိူဝ်ႈၶႃႈၸဝ်ႈၸွမ်းၵႃႈၼင်ႇသႅတ်ႈၸႃႇ တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ သေၵမ်းတီႈၶႃႈ။
၁၄ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းၵူမ်ႇၼႂ်းဢုင်သေၵမ်းတီႈၶႃႈ။ယႃႇပေႁႂ်ႈလႆႈၸူမ်သေၵမ်းတီႈၶႃႈ။ၶႅၼ်းတေႃႈႁႂ်ႈၶႃႈၸဝ်ႈလႆႈၶၢမ်ႇတၢင်းဢၼ်ၵႄႇသႄႇၶျွတ်ႈဢဝ်ဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉဢိၵ်ႇတင်းၵႃႈၼႂ်းၼမ်ႉဢၼ်လိုၵ်ႉဢၼ်လမ်ႇၼႃႇၼၼ်ႉသေၵမ်းတီႈ ၶႃႈ။
၁၅ ယႃႇပေႁႂ်ႈၼမ်ႉလုၵ်ႉလႄႈထုမ်ႈၶႃႈၸဝ်ႈပႅတ်ႈသေၵမ်းတီႈၶႃႈ။ယႃႇပေႁႂ်ႈတီႈဢၼ်လိုၵ်ႉဢၼ်လမ်ႇဢိုၼ်ၶႃႈၸဝ်ႈပႅတ်ႈသေၵမ်းတီႈၶႃႈ။ယႃႇပေႁႂ်ႈၶုမ်ႁူးဢိုတ်းႁပ်းပၢၵ်ႇမၼ်းၵႃႈၼိူဝ်ၶႃႈၸဝ်ႈ သေၵမ်းတီႈၶႃႈ။
၁၆ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈဢိူဝ်ႈၶႃႈၸဝ်ႈၵွပ်ႈပိူဝ်ႈဢၼ်ၸေႇတၼႃႇ တၢင်းဢၼ်ၸဝ်ႈႁဝ်းၶႂ်ႈႁဵတ်းၵျေးၸူးၼၼ်ႉ ပဵၼ်ဢၼ်လီဢၼ်ငၢမ်းၼၼ်ႉ သေၵမ်းတီႈၶႃႈ။ၶႅၼ်းတေႃႈဝၢႆႇၼႃႈၸူးၶႃႈၸဝ်ႈၸွမ်းၵႃႈၼင်ႇဢၼ်ၵရူႉၼႃႇတၢင်းဢၼ်ၸဝ်ႈႁဝ်းႁၵ်ႉပႅင်းၼၼ်ႉမီးၼမ်ၼႃႇလူင်လၢင်ၼၼ်ႉသေၵမ်းတီႈၶႃႈ။
၁၇ ယႃႇပေႁူမ်ႇၼႃႈၸဝ်ႈႁဝ်းဝႆႉ သေၵႃႈတီႈၶႃႈၸဝ်ႈသေၵမ်းတီႈၶႃႈ။ၽေးႁွတ်ႈထိုင်ၵႃႈတီႈၶႃႈၸဝ်ႈတီႈၶႃႈယဝ်ႉ။ၶႅၼ်းတေႃႈဢိူဝ်ႈၶႃႈၸဝ်ႈ ၶၼ်ၶၼ်ၽႂ်းၽႂ်းသေ ၵမ်းတီႈၶႃႈ။
၁၈ ၶႅၼ်းတေႃႈသုတ်ႉၸပ်းသုတ်ႉၸူးၵႃႈတီႈၸႂ်ဝိၺိၺ်ႇၶႃႈၸဝ်ႈလႄႈထူတ်ႇၼုၵ်ႈဢဝ် သေၵမ်းတီႈၶႃႈ။ၶႅၼ်းတေႃႈထွၵ်ႈလူၺ်ႈလွင်ႈဢၼ်ရၢၼ်ႇသူႇၶႃႈၸဝ်ႈ မီးၼမ်ၼႃႇၼၼ်ႉသေလႄႈပွႆႇၶႃႈၸဝ်ႈ လွတ်ႈသေၵမ်းတီႈၶႃႈ။
၁၉ ၸဝ်ႈႁဝ်းႁူႉတၢင်းဢၼ်သေႉဢၼ်သွၼ်း၊ တၢင်းဢၼ်ဢူၵ်းဢၼ်ဢၢႆတၢင်းဢၼ်သုၵ်ႉၸႂ်ၵႂင်ၸႂ် ဢၼ်ၶႃႈၸဝ်ႈလႆႈၶၢမ်ႇၸိူဝ်းၼၼ်ႉယူႇတီႈၶႃႈဢေႃႈ။ရၢၼ်ႇသူႇၶႃႈၸဝ်ႈတင်းသဵင်ႈတင်းလူင်မီးယူႇသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ။
၂၀ တၢင်းဢၼ်သေႉဢၼ်သွမ်းၼၼ်ႉ ႁႂ်ႈႁူဝ်ၸႂ်ၶႃႈၸဝ်ႈတႅၵ်ႇၵႂႃႇလႅဝ်ၵႂႃႇလႄႈ ၶႃႈၸဝ်ႈမီးတၢင်းဢၼ်မႆႈၸႂ်ႁွၼ်ႉၸႂ်ထၼ်ႈပေႃးတၵ်းတၢႆတီႈၶႃႈဢေႃႈ။ၶႃႈၸဝ်ႈမုင်ထႃႈမွင်းထႃႈတၢင်းဢၼ်ပိူၼ်ႈတၵ်းဢိတ်းလူၼၼ်ႉၵေႃႈဢမ်ႇႁၼ်လႃးလႃး။ၶႃႈၸဝ်ႈႁႃၶဝ်ၸိူဝ်းဢၼ်ႁႂ်ႈသၢၵ်ႈသႃႇၼၼ်ႉၵေႃႈ ဢမ်ႇထူပ်းဢမ်ႇႁၼ် သေၵေႃႉၶႃႈ။
၂၁ ၶဝ်ဢဝ်ယႃႈၶူမ်လဵင်ႉပၼ်ပုၼ်ႈဢၼ်ၶႃႈၸဝ်ႈတၵ်းၵိၼ်ၼၼ်ႉတီႈၶႃႈဢေႃႈ။ၶဝ်ဢဝ်ၼမ်ႉပုင်းယေႇတိုၵ်းပၼ် မိူဝ်ႈဢၼ်ၶႃႈၸဝ်ႈယၢၵ်ႇၼမ်ႉၼၼ်ႉ တီႈၶႃႈဢေႃႈ။
၂၂ ႁႂ်ႈၶူင်ႇတီႈၵိၼ်ၶဝ်ၵႃႈတီႈၽၢႆႇၼႃႈၶဝ်ၼၼ်ႉပဵၼ်တူင်ႇႁဵဝ်ႉတူင်ႇၶိုမ်းလႄႈႁႂ်ႈပဵၼ်တီႈၵၢင်ဢဝ်တီႉဢဝ်လႆႈၶဝ် မိူဝ်ႈဢၼ်ၶဝ်ယူႇၼိမ်ၼိမ်လီလီ ယူႇၼၼ်ႉသေၵမ်းလူၺ်ႈ။
၂၃ ႁႂ်ႈမၢၵ်ႇတႃၶဝ်လပ်းၵႂႃႇထၼ်ႈပေႃးဢမ်ႇႁၼ်လႆႈလႄႈ ႁႂ်ႈဢႅဝ်ၶဝ်သၼ်ႇဝႆယူႇ တႃႇသေႇသေၵမ်းလူၺ်ႈ။
၂၄ ဢဝ်တင်းတၢင်းဢၼ်ၸႂ်လမ်ၶႂ်ႈၸႃႉၸဝ်ႈႁဝ်း ႁိုဝ်ႈထွၵ်ႇသႂ်ႇၵႃႈၼိူဝ်ၶဝ်လႄႈႁႂ်ႈဢႁူင်ႇတၢင်းဢၼ် ၸႂ်မႆႈၸႂ်လိူတ်ႇၸဝ်ႈႁဝ်းၶိုတ်း ထိုင်ၶဝ်သေၵမ်းလူၺ်ႈ။
၂၅ ႁႂ်ႈတီႈဢၼ်ၶဝ်ယူႇၼၼ်ႉပဵၼ်တီႈဢၼ်ၵူၼ်းသိတ်ႇၵူၼ်းယဵၼ်ၼၼ်ႉ သေၵမ်းလူၺ်ႈ။ယႃႇပေႁႂ်ႈမီးၵေႃႉဢၼ်ယူႇ ၵႃႈၼႂ်းသုမ်ႉထဵင်ၶဝ်ၼၼ်ႉ။
၂၆ လွင်ႈမၼ်းၸမ်း ၶဝ်ၼိၵ်ႈၸၢၵ်ႈငႅၼ်းသေး ၶဝ်ၸိူဝ်းဢၼ်ၸဝ်ႈႁဝ်းႁႂ်ႈမၢတ်ႇၼၼ်ႉလႄႈ ၶဝ်မွၵ်ႇလၢတ်ႈလွင်ႈတၢင်းဢၼ်ၶူပ်းဢၼ်ၶိုၼ်ႈ ၶဝ်ၸိူဝ်းဢၼ်ၸဝ်ႈ ႁဝ်းႁႂ်ႈၸဵပ်းႁႂ်ႈသႅပ်ႇၼၼ်ႉတီႈၶႃႈဢေႃႈ။
၂၇ ၶႅၼ်းတေႃႈဢဝ်ဢပျႅတ်ႈ ထၢပ်ႈသႂ်ႇၵႃႈတီႈဢပျႅတ်ႈၶဝ်ၼၼ်ႉထႅင်ႈသေၵမ်းတီႈၶႃႈ။ယႃႇပေႁႂ်ႈၶဝ်လႆႈၶဝ်ႈၵႃႈၼႂ်းတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉသေၵမ်းတီႈၶႃႈ။
၂၈ ႁႂ်ႈၶဝ်လႆႈၶၢမ်ႇတၢင်းဢၼ်မွတ်ႇပႅတ်ႈသေၵႃႈၼႂ်းၸရၢင်း ၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉလႄႈယႃႇပေႁႂ်ႈ ၶဝ်မီးတၢင်းဢၼ်တႅမ်ႈမၢႆဝႆႉ လူၺ်ႈၵၼ်တင်းၶဝ်ၸိူဝ်းဢၼ်သိုဝ်ႈတေႃႇၼၼ်ႉ သေၵမ်းတီႈၶႃႈ။
၂၉ ၶႃႈၸဝ်ႈၸမ်းယၢၵ်ႈၽၢၼ်လႄႈ မီးတၢင်းဢၼ်ၶူပ်းၶိုၼ်ႈယူႇတီႈၶႃႈဢေႃႈ။ၽြႃးပဵၼ်ၸဝ်ႈတီႈၶႃႈ၊ ၵျေးၸူးတၢင်းဢၼ် ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ တၵ်းယုၵ်ႉယွင်ႈၶႃႈၸဝ်ႈတီႈၶႃႈဢေႃႈ။
၃၀ ၵဝ်တၵ်းႁဵတ်းၵႂၢမ်းထေႃးပၼႃႇ တီႈၼႃႇမႃႉၸိုဝ်ႈသဵင် ၽြႃးပဵၼ်ၸဝ်ႈလႄႈ တၵ်းၽုၺ်ႇဢွၵ်ႇၼႄပျႃးၵျေးၸူးမၼ်းၸဝ်ႈယူႇသေလႄႈယွင်ႈယေႃးမၼ်းၸဝ်ႈဢေႃႈ။
၃၁ တၢင်းဢၼ်ႁဵတ်း ၸိူဝ်ႉၼင်ႇၼၼ်ၼၼ်ႉ ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးၼႃႇသေဝူဝ်းငၢၼ်ဢၼ်တဵမ်ဝႆႉတင်းၶဝ်တင်းၵိပ်ႇၼၼ်ႉဢေႃႈ။
၃၂ ၶဝ်ၸိူဝ်းဢၼ်ယၢၵ်ႈၽၢၼ်ၼၼ်ႉတၵ်းႁၼ်လႄႈ ဢွၼ်ၵၼ်သိူဝ်းပျေႃႇဢေႃႈ။သူၸိူဝ်းဢၼ်ႁႃၽြႃးပဵၼ်ၸဝ်ႈၶဝ်ဢိူၺ်း၊ႁႂ်ႈႁူဝ်ၸႂ်သူႁွမ်ႁႅင်းယူႇသေၵမ်း။
၃၃ ထႃႇဝရႃႉၽြႃးထွမ်ႇဢဝ်ၵႂၢမ်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈ မၼ်းၸဝ်ႈဢမ်ႇႁဵတ်းဢမ်ႇပေႃးၼင်ႇႁိုဝ် တီႈၵူၼ်းမၼ်းၸဝ်ႈ ဢၼ်လႆႈၶၢမ်ႇ တၢင်းဢၼ်ၶျူၵ်ႈဝႆႉၶင်ဝႆႉၸိူဝ်းၼၼ်ႉ။
၃၄ ႁႂ်ႈၽႃႉၵၢင်ႁၢဝ်လိၼ်မိူင်းၼမ်ႉသမ်ႇမုၵ်ႉတြႃႇ ဢိၵ်ႇတင်းသတ်ႉတဝႃႇၵႃႈဢၼ်ၵႂႃႇမႃးယူႇၵႃႈၼႂ်းမၼ်းၸိူဝ်းၼၼ်ႉ ဢွၼ် ၵၼ်ယွင်ႈယေႃးၽြႃးပဵၼ်ၸဝ်ႈသေၵမ်းလူၺ်ႈ။
၃၅ ၽြႃးပဵၼ်ၸဝ်ႈ တၵ်းၵႄႇသႄႇၶျွတ်ႈဢဝ် ဝဵင်းၸိဢုၼ်ႇလႄႈ မႄးၵုမ်းမႄးႁဵတ်းဝဵင်းယုတ တင်းလၢႆဢေႃႈ။ၶဝ်တၵ်းလႆႈယူႇၵႃႈတီႈၼၼ်ႉလႄႈ ဢုပ်ႉပိူင်ႇဢေႃႈ။
၃၆ လုၵ်ႈလၢၼ်မဵဝ်းၶႃႈမၼ်းၸဝ်ႈၸိူဝ်းၼၼ်ႉ တၵ်းလႆႈၶၢမ်ႇဢမူၺ်ႇဝဵင်းၼၼ်ႉလႄႈ ၶဝ်ၸိူဝ်းဢၼ်ႁၵ်ႉၼႃႇမႃႉၸိုဝ်သဵင်မၼ်းၸဝ်ႈၼၼ်ႉ တၵ်းလႆႈတူၵ်းတီႈယူႇတီႈသဝ်းၵႃႈၼႂ်းမၼ်းဢေႃႈ။