၅၉
၁ ၽြႃးၵဝ်ၶႃႈတီႈၶႃႈ၊ ၶႅၼ်းတေႃႈၵႄႇသႄႇၼုၵ်ႈဢဝ်ၶႃႈၸဝ်ႈ ဢွၵ်ႇသေ ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈတင်းလၢႆလႄႈ ဢဝ်ၶႃႈၸဝ်ႈယုၵ်ႉယွင်ႈဝႆႉၵႃႈၼိူဝ်ၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၶႃႈ ၸဝ်ႈၼၼ်ႉသေၵမ်းတီႈၶႃႈ။
၂ ၶႅၼ်းတေႃႈၵႄႇသႄႇၼုၵ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ်ႁဵတ်းတူႉၸရိူၵ်ႈၼၼ်ႉလႄႈၵႄႇသႄႇၶျွတ်ႈဢဝ်ၶႃႈၸဝ်ႈသေ ၵႃႈၼႂ်းမိုဝ်းၶဝ်ၸိူဝ်း ဢၼ်ထွၵ်ႇလိူတ်ႈၵူၼ်းၼၼ်ႉသေၵမ်းတီႈၶႃႈ။
၃ တူၺ်းတီႈၶႃႈလူႊ။ၶဝ်ဢွၼ်ၵၼ်လွမ်ႁႃဢသၢၵ်ႈၶႃႈၸဝ်ႈလႄႈ ၶဝ်ၸိူဝ်းဢၼ်ႁႅင်းယႂ်ႇၼႃႇၼၼ်ႉ ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းၶႃႈၸဝ်ႈတီႈၶႃႈဢေႃႈ။ထႃႇဝရႃႉၽြႃးတီႈၶႃႈ၊ ပဵၼ်ၵွပ်ႈပိူဝ်ႈဢၼ်ၶႃႈၸဝ်ႈၽိတ်းပိူင်ႈၼၼ်ႉဢမ်ႇၸႂ်ႈတီႈၶႃႈ။ပဵၼ်ၵွပ်ႈပိူဝ်ႈဢပျႅတ်ႈၶႃႈ ၸဝ်ႈၵေႃႈဢမ်ႇၸႂ်ႈတီႈၶႃႈ။
၄ ၶႃႈၸဝ်ႈယင်းဢမ်ႇမီးဢပျႅတ်ႈၵႃႈသင်လႄႈ ၶဝ်ၼၼ်ႉဢွၼ်ၵၼ်ၶုၼ်ႇလႅၼ်ႈမႃးလႄႈမႄးၶိုင်မႄးႁႅၼ်းတူဝ်ၶဝ်ဝႆႉတီႈၶႃႈယဝ်ႉ။ၶႅၼ်းတေႃႈတိုၼ်ႇမႃး ႁႂ်ႈလႆႈၸွႆႈထႅမ်မႃႉၸႃႉၶႃႈၸဝ်ႈလႄႈ လူႈတူၺ်းသေၵမ်းတီႈၶႃႈ။
၅ ထႃႇဝရႃႉၽြႃးၽြႃးပဵၼ်ၸဝ်ႈပူဝ်ႇပႃႇၵၢင်ႁၢဝ် ၽြႃးပဵၼ်ၸဝ်ႈမဵဝ်း ဢိသရေႇလတီႈၶႃႈ၊ ၶႅၼ်းတေႃႈတိုၼ်ႇမႃးႁႂ်ႈလႆႈသင်ႇသွၼ်သုင်းမႃႉ ၵူၼ်းတၢင်ႇၸိူဝ်ႉတၢင်ႇၶိူဝ်းၵႃႈမီးၼၼ်ႉသေၵမ်းတီႈၶႃႈ။ယႃႇပေဢိတ်းလူၶဝ်ၸိူဝ်းဢၼ်ၵႂႃႇမႃးၼႂ်းတူႉၸရိူၵ်ႈၼၼ်ႉသေၵေႃႉသေၵူၼ်းၶႃႈ။ၸေႇလႃႇ။
၆ ၶဝ်ၼၼ်ႉ ဢွၼ်ၵၼ်ၶိုၼ်းမႃးၶိင်ႇႁူဝ်ၶမ်ႈလႄႈႁဝ်ႇႁွၼ်မိူၼ်ၸိူဝ်ႉၼင်ႇမႃၼၼ်ႉယူႇလႄႈ လဵပ်ႈဝဵင်းၵႂႃႇယူႇတီႈ ၶႃႈဢေႃႈ။
၇ ၶဝ်ဢဝ်သူပ်းၶဝ်လၢတ်ႈၵႂၢမ်းဢၼ်ၸွၵ်ႇၵႃးသေလႄႈ ပႃးယူႇလၢပ်ႇလႅဝ်းၵႃႈၼႂ်းသီႇသူပ်းၶဝ်ၼၼ်ႉဢေႃႈ။ၶဝ်ၸၢင်ႊထၢမ်လႄႈဝႃႈ၊-ၽူႈ လႂ်တၵ်းငိၼ်း၊ ဝႃႈၼင်ႇၼႆတီႈၶႃႈဢေႃႈ။
၈ ၵူၺ်းၵႃႈထႃႇဝရႃႉၽြႃးတီႈၶႃႈ၊ၸဝ်ႈႁဝ်းတၵ်းယုမ်ႉၶူဝ်ၶဝ်သေလႄႈ သေႉသွမ်းၵူၼ်းတၢင်ႇၸိူဝ်ႉတၢင်ႇၶိူဝ်းၵႃႈမီးၼၼ်ႉ တီႈၶႃႈဢေႃႈ။
၉ ႁႅင်းတၼ်းၶူဝ်းၵဝ်ၶႃႈတီႈၶႃႈ၊ ၶႃႈၸဝ်ႈတၵ်းမုင်ထႃႈမွင်းထႃႈၸဝ်ႈႁဝ်းတီႈၶႃႈဢေႃႈ။ၽြႃးပဵၼ်ၸဝ်ႈပဵၼ် တီႈဢၼ်မၼ်ႈၶိူင်ႇၶႃႈၸဝ်ႈတီႈၶႃႈဢေႃႈ။
၁၀ ၽြႃးပဵၼ်ၸဝ်ႈၵဝ်ၶႃႈ တၵ်းဢဝ်ၵရူႉၼႃႇမႃးႁပ်ႉႁူဝ်တၢင်းၶႃႈၸဝ်ႈလႄႈ ၽြႃးပဵၼ်ၸဝ်ႈတၵ်းႁႂ်ႈၶႃႈၸဝ်ႈမီးဢၶႂၢင်ႉဢၼ်လႆႈႁၼ်ၸွမ်း ၵႃႈၼင်ႇဢၼ်ဢလူဝ်ႇၶႃႈၸဝ်ႈမီးၼၼ်ႉ ၵႃႈၼိူဝ်ရၢၼ်ႇသူႇၶႃႈၸဝ်ႈတင်းလၢႆၼၼ်ႉ တီႈၶႃႈဢေႃႈ။
၁၁ ယႃႇပေဢဝ်ၶဝ်တၢႆသေၵမ်းတီႈၶႃႈ။ၵူဝ်ၵူၼ်းၶႃႈၸဝ်ႈတင်းလၢႆ တၵ်းဢမ်ႇလႆႈသတိတီႈၶႃႈဢေႃႈ။ၸဝ်ႈၽြႃးဢၼ်ပဵၼ်ၶိူင်ႈႁႄႉလၢၵ်ႈၼၢၵ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈ၊ ဢဝ်တင်းတၼ်းၶူဝ်းၸဝ်ႈႁဝ်းသေလႄႈ ႁႂ်ႈၶဝ်လႆႈလႄႇၵႂႃႇလႄႇမႃးၵူႈတီႈၵူႈလႅၼ်လႄႈ ၶျႃးၶဝ်တူၵ်းတီႈတႅမ်ႇသေၵမ်းတီႈၶႃႈ။
၁၂ ဢပျႅတ်ႈသူပ်းၶဝ်ၼၼ်ႉ ပဵၼ်ၵႂၢမ်း ဢၼ်ၶဝ်လၢတ်ႈမႅၼ်ႈၼၼ်ႉလႄႈ ႁႂ်ႈၶဝ်ထုၵ်ႇၶႅၼ်ႇမႅၼ်ႈၼႂ်းမႃႇၼႃႉၶဝ်ၵွပ်ႈပိူဝ်ႈတၢင်းဢၼ်သေႉသွမ်း ဢိၵ်ႇတင်းၵႂၢမ်းမူႉသႃႇ ဢၼ်ၶဝ်လၢတ်ႈၼၼ်ႉသေၵမ်းတီႈၶႃႈ။
၁၃ ၶႅၼ်းတေႃႈပႃးတင်းၸႂ်မႆႈၶႂ်ႈၸႃႉၸဝ်ႈႁဝ်းသေလႄႈ ႁႂ်ႈၶဝ်လူႉႁၢႆပႅတ်ႈသေၵမ်းတီႈၶႃႈ။ႁႂ်ႈၶဝ်လူႉႁၢႆပႅတ်ႈတင်းသဵင်ႈတင်းမူတ်းသေၵမ်းတီႈၶႃႈ။ႁႂ်ႈၶဝ်ႁူႉလွင်ႈဢၼ်ၽြႃးပဵၼ်ၸဝ်ႈဢုပ်ႉပိူင်ႇၸႃႉၸဵမ်မဵဝ်းယႃႇၵုပ်ႉ တေႃႇထိုင်ႁွတ်ႈ တီႈသုတ်းလိၼ်မိူင်းၼၼ်ႉသေၵမ်းတီႈၶႃႈ။
၁၄ ႁႂ်ႈၶဝ်ၶိုၼ်းမႃးၶိင်ႇႁူဝ်ၶမ်ႈလႄႈ ႁဝ်ႇႁွၼ်မိူၼ်ၸိူဝ်ႉၼင်ႇမႃၼၼ်ႉ လႄႈလဵပ်ႈဝဵင်းၵႂႃႇယူႇသေၵမ်းတီႈၶႃႈ။
၁၅ ၶဝ်တၵ်းလႄႇၵႂႃႇလႄႇမႃးယူႇ ႁႂ်ႈလႆႈႁႃတၢင်းၵိၼ်တၢင်းၶူပ်းလႄႈယင်းဢမ်ႇဢိမ်ႇတဵမ်လႄႈယူႇတင်းၶိုၼ်းတီႈၶႃႈ ဢေႃႈ။
၁၆ ၶႃႈၸဝ်ႈၸမ်းတၵ်းႁဵတ်းၵႂၢမ်းလူၺ်ႈလွင်ႈတၼ်းၶူဝ်းၸဝ်ႈႁဝ်းလႄႈ ၶိင်ႇႁူဝ်ၼႂ်တၵ်းႁဵတ်းၵႂၢမ်းသႂၢင်ႇသိူဝ်းၼႃႇလူင်လၢင် လူၺ်ႈလွင်ႈၵရူႉၼႃႇၸဝ်ႈႁဝ်းၼၼ်ႉတီႈၶႃႈဢေႃႈ။လွင်ႈမၼ်းၸမ်းၸဝ်ႈႁဝ်းပဵၼ်တီႈဢၼ်မၼ်ႈၶိူင်ႇၶႃႈၸဝ်ႈ တီႈဢၼ်ၶႃႈၸဝ်ႈၵၢင်းလွတ်ႈၽေး ၼႂ်းမိူဝ်ႈဢၼ်မီးၽေးၼၼ်ႉတီႈၶႃႈ ဢေႃႈ။
၁၇ ႁႅင်းတၼ်းၶူဝ်းၵဝ်ၶႃႈတီႈၶႃႈ၊ ၶႃႈၸဝ်ႈတၵ်းႁဵတ်းၵႂၢမ်းတီႈၸဝ်ႈႁဝ်းတီႈၶႃႈဢေႃႈ။ၸဝ်ႈႁဝ်းၶႃႈပဵၼ်ၽြႃးပဵၼ်ၸဝ်ႈတီႈဢၼ်မၼ်ႈၶိူင်ႇၶႃႈၸဝ်ႈ ၽြႃးၵရူႉၼႃႇၶႃႈၸဝ်ႈတီႈၶႃႈဢေႃႈ။