၅၈
၁ သူယင်းဢမ်ႇတၵ်းသဵင်တၵ်းပၢၵ်ႇလႄႈ လၢတ်ႈၸွမ်းတၢင်းဢၼ်သိုဝ်ႈတေႃႇၼၼ်ႉ ဢမၢၼ်ႇၶၼ်ပဵၼ်ႁိုဝ်။လုၵ်ႈၵူၼ်းၶဝ်ဢိူၺ်း၊ သူၸီႇယၢင်ႇၸွမ်းလူၺ်ႈတြႃး ႁိုဝ်။
၂ သူၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီၵႃႈၼႂ်းႁူဝ်ၸႂ်သူလႄႈ ဢဝ်တင်းမိုဝ်းသူႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသေး ၵႃႈၼိူဝ်လိၼ်မိူင်းၼႆႉဢေႃႈ။
၃ ၶဝ်ၸိူဝ်းဢၼ်ဢမ်ႇတြႃးၼၼ်ႉ မီးၸႂ်သၽေႃးဢၼ်မိူၵ်ႈလိူင်းၸႃႉၸဵမ်မိူဝ်ႈၼႂ်းတွင်ႉမေႈၶဝ်ၼၼ်ႉလႄႈၸၢင်ႊလၢတ်ႈၵႂၢမ်းမူႉသႃႇသေလႄႈ ပိူင်ႈတၢင်းၵႂႃႇၸႃႉ ၸဵမ်မိူဝ်ႈၵိူတ်ႇလဵင်ႉမႃးၼၼ်ႉဢေႃႈ။
၄ ၵွင်ႉၶဝ်ၼၼ်ႉမိူၼ်ၸိူဝ်ႉၼင်ႇၵွင်ႉငူးဢေႃႈ။ၶဝ်ပဵၼ်ၸိူဝ်ႉၼင်ႇငူးႁၢႆႉဢၼ်ႁူၼူၵ်ႇဢၼ်ဢိုတ်းႁူတူဝ်ၸဝ်ႈၵဝ်ႇယူႇလႄႈ ဢမ်ႇထွမ်ႇ ဢဝ်တုင်းဢဝ်သဵင်ၵႂၢမ်း
၅ ဢၼ်ဢွၵ်ႇသူပ်းၶဝ်ၸိူဝ်းဢၼ်ဢဝ်မၢၼ်းတရႃးဢလမ်ႇပႄႇ ဢၼ်လၵ်းလႅမ် ၼႃႇလူင်လၢင်ၼၼ်ႉ။
၆ ၽြႃးပဵၼ်ၸဝ်ႈတီႈၶႃႈ၊ ႁၵ်းႁိၵ်းၶဵဝ်ႈၵႃႈၼႂ်းသူပ်းၶဝ်ၼၼ်ႉပႅတ်ႈသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ၊ ဢဝ်ငႃးသၢင်ႇသီႈၼုမ်ႇၸိူဝ်း ၼၼ်ႉသွၼ်ႇဢွၵ်ႇပႅတ်ႈသေၵမ်းတီႈၶႃႈ။
၇ ႁႂ်ႈၶဝ်ၼၼ်ႉလပ်ႉႁၢႆၵႂႃႇ မိူၼ်ၸိူဝ်ႉၼင်ႇၼမ်ႉဢၼ်လႆၵႂႃႇၼၼ်ႉ သေၵမ်းလူၺ်ႈ။မိူဝ်ႈဢၼ်မၼ်းပိုတ်းယိုဝ်းပိုၼ်မၼ်းၼၼ်ႉၸိုင် ႁႂ်ႈပဵၼ်ၸိူဝ်ႉၼင်ႇဢၼ်ႁၵ်းပႅတ်ႈယဝ်ႉၼၼ်ႉသေ ၵမ်းလူၺ်ႈ။
၈ ႁႂ်ႈၶဝ်ပဵၼ်ၸိူဝ်ႉၼင်ႇတၢၵ်ႇတၢၼ်ဢၼ်သုတ်ႉယွမ်ၼႂ်းမိူဝ်ႈဢၼ် မၼ်းယင်းတိုၵ်ႉၵႂႃႇယူႇၼၼ်ႉဢိၵ်ႇတင်း ၸိူဝ်ႉၼင်ႇလုၵ်ႈဢွၼ်ႇဢၼ်လူႉၼႂ်းတွင်ႉမေႈလႄႈ ဢမ်ႇလႆႈႁၼ် ငဝ်းဢရွင်ႇၵၢင်ဝၼ်းၼၼ်ႉ သေၵမ်းလူၺ်ႈ။
၉ ၸူဝ်ႈဢၼ်မေႃႈဢမ်ႇပႆႇတၼ်းလႆႈႁူႉတၢင်းမႆႈၼၢမ်ဢၼ်လိပ်းသေဢမ်ႇဝႃႈ ဢၼ်ႁႅင်ႈသေဢမ်ႇဝႃႈၼၼ်ႉ မၼ်းၸဝ်ႈတၵ်းဢဝ် လူမ်းၽိဝ်ႁူင် ထူဝ်းဢဝ်ၶဝ်ပိဝ်ၵႂႃႇပႅတ်ႈဢေႃႈ။
၁၀ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ မိူဝ်ႈဢၼ်ႁၼ်တၢင်းဢၼ်ပၼ်တၢမ်ႇၸိူဝ်ႉၼင်ႇၼၼ်ၼၼ်ႉၸိုင် တၵ်းဢွၼ်ၵၼ်ၸူမ်းသိူဝ်းလႄႈသုၵ်ႈတိၼ်ၶဝ်ၵႃႈၼႂ်းလိူတ်ႈ ၶဝ်ၸိူဝ်းဢၼ်ဢမ်ႇတြႃး ၼၼ်ႉဢေႃႈ။
၁၁ ၼင်ႇၼၼ်လႄႈပိူၼ်ႈတၵ်းဢွၼ်ၵၼ်လၢတ်ႈလႄႈဝႃႈ၊- မီးဢၵျူဝ်းပုၼ်ႈၵေႃႉဢၼ်သိုဝ်ႈတေႃႇၼၼ်ႉဢမၢၼ်ႇၶၼ်ပဵၼ်ဢေႃႈ။မီးၽြႃးပဵၼ်ၸဝ်ႈဢၼ်ၸီႇယၢင်ႇၸွမ်းၼင်ႇတြႃး ၵႃႈၼိူဝ်လိၼ်မိူင်းၼႆႉၼၼ်ႉဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။