၄၄
၁ ၽြႃးပဵၼ်ၸဝ်ႈတီႈၶႃႈ၊ၶႃႈၸဝ်ႈႁဝ်းၶဝ်လႆႈဢဝ်ႁူငိၼ်း ၵႃႈတီႈပူႇမွၼ်ႇၶႃႈၸဝ်ႈႁဝ်းၶဝ် လၢတ်ႈၼႄလွင်ႈတၢင်းဢၼ်ၸဝ်ႈႁဝ်းႁဵတ်း ၼႂ်းၸူဝ်ႈပၢၼ်ၶဝ်ဢၼ်ဝႃႈ ၶိင်ႇၵႃႇလႃႉမိူဝ်ႈၵွၼ်ႇဢွၼ်ၼႆႉၼၼ်ႉ တီႈ ၶႃႈယဝ်ႉ။
၂ ၸဝ်ႈႁဝ်းဢဝ်မိုဝ်းၸဝ်ႈႁဝ်း ႁေႃႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢွၵ်ႇပႅတ်ႈသေလႄႈၶျႃးတီႈယူႇပၼ်တီႈၶဝ်ၼၼ်ႉတီႈၶႃႈဢေႃႈ။ၸဝ်ႈႁဝ်းၶိုတ်ႈမဵဝ်းၵူၼ်းတင်းလၢႆလႄႈ ႁႂ်ႈပူႇမွၼ်ႇႁဝ်းၶဝ်ၽႄႈမႃး တိူၼ်းမႃးတီႈၶႃႈဢေႃႈ။
၃ ၶဝ်ဢဝ်တင်းလၢပ်ႇၶဝ်သေလႄႈဢုပ်ႉပိူင်ႇလိၼ်မိူင်းၼၼ်ႉဢမ်ႇၸႂ်ႈတီႈၶႃႈ။ၶဝ်ဢဝ်တင်းၶႅၼ်မိုဝ်းၶဝ်သေလႄႈ ၵႄႇသႄႇၶျွတ်ႈဢဝ်တူဝ်ၶဝ်ဢမ်ႇၸႂ်ႈတီႈၶႃႈ။ၵွပ်ႈပိူဝ်ႈတၢင်းႁၵ်ႉမႅတ်ႈတႃႇၸဝ်ႈႁဝ်းမီးတီႈၶဝ်ၼၼ်ႉလႄႈ ၸဝ်ႈႁဝ်းဢဝ်မိုဝ်းၶွၼ်ၶႂႃၸဝ်ႈႁဝ်းဢိၵ်ႇတင်း ၶႅၼ်မိုဝ်းၸဝ်ႈႁဝ်းတင်းဢၼ်လႅင်းၼႃႈၸဝ်ႈႁဝ်းၼၼ်ႉသေလႄႈ ၵႄႇသႄႇၶျွတ်ႈ ဢဝ်ၶဝ်တီႈၶႃႈဢေႃႈ။
၄ ၽြႃးပဵၼ်ၸဝ်ႈတီႈၶႃႈ၊ၸဝ်ႈႁဝ်းပဵၼ်ၶုၼ်ႁေႃၶမ်းၶႃႈၸဝ်ႈ တီႈၶႃႈဢေႃႈ။ၶႅၼ်းတေႃႈၸီႇယၢင်ႇလွင်ႈတၢင်းဢၼ်ၵႄႇသႄႇၶျွတ်ႈဢဝ်ၵူၼ်းမဵဝ်းယႃႇၵုပ်ႉၼၼ်ႉသေၵမ်းတီႈၶႃႈ။ၶႃႈၸဝ်ႈႁဝ်းၶဝ်တၵ်းဢိင်ပိုင်ႈၸဝ်ႈႁဝ်းသေလႄႈ ဢီးရၢၼ်ႇသူႇၶႃႈၸဝ်ႈႁဝ်းၶဝ်တင်းလၢႆ တူၵ်းပႅတ်ႈ တီႈၶႃႈဢေႃႈ။
၅ ၶႃႈၸဝ်ႈႁဝ်းၶဝ် တၵ်းဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ တဵၵ်းယဵပ်ႇၶဝ်ၸိူဝ်းဢၼ်ႁဵတ်းရၢၼ်ႇ သူႇတီႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။
၆ ၶႃႈၸဝ်ႈဢမ်ႇဢိင်ပိုင်ႈၵၢင်ႇ ဢၼ်ပႃးယူႇတီႈတူဝ်ၶႃႈၸဝ်ႈၼႆႉလႄႈ လၢပ်ႇၶႃႈၸဝ်ႈ ဢမ်ႇၵႄႇသႄႇၶျွတ်ႈဢဝ်ၶႃႈ ၸဝ်ႈလႆႈတီႈၶႃႈ။
၇ ၸဝ်ႈႁဝ်းၵူၺ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်သေ ၵႃႈၼႂ်းမိုဝ်းရၢၼ်ႇသူႇတင်းလၢႆတီႈၶႃႈဢေႃႈ။ၶဝ်ၸိူဝ်းဢၼ်ၸင်းၶႃႈၸဝ်ႈႁဝ်းၶဝ်တင်းလၢႆၼၼ်ႉၵေႃႈ ၸဝ်ႈႁဝ်းႁႂ်ႈဢူၵ်းႁႂ်ႈဢၢႆ တီႈၶႃႈ ဢေႃႈ။
၈ ၶႃႈၸဝ်ႈႁဝ်းၶဝ် ဢုပ်ႇဝၢဝ်းၵႃႈၼႂ်းၽြႃးပဵၼ်ၸဝ်ႈယူႇတင်းဝၼ်းတင်းဝၼ်းလႄႈ ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းယူႇသေႇသေႇတီႈၶႃႈဢေႃႈ။ၸေႇလႃႇ။
၉ ၵူၺ်းၵႃႈ ၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈႁဝ်းၶဝ်သေလႄႈႁႂ်ႈဢူၵ်းႁႂ်ႈဢၢႆတီႈၶႃႈယဝ်ႉ။ၸဝ်ႈႁဝ်းဢမ်ႇဢွၵ်ႇၵႂႃႇလူၺ်ႈၵၼ်တင်းပူဝ်ႇပႃႇၶႃႈၸဝ်ႈႁဝ်းၶဝ်ၸိူဝ်း ၼၼ်ႉတီႈၶႃႈ။
၁၀ ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်လႆႈဝၢႆႇၶိုၼ်းသုတ်ႈၶိုၼ်းသေ ၵႃႈတီႈၽၢႆႇၼႃႈရၢၼ်ႇသူႇၶႃႈၸဝ်ႈႁဝ်းၶဝ်ၼၼ်ႉလႄႈ ၶဝ်ၸိူဝ်းဢၼ်ၸင်းၶႃႈၸဝ်ႈႁဝ်းၶဝ်ၼၼ်ႉ လႆႈႁိမ်ႁူင်ႇဢဝ်ၸွမ်းၵႃႈၼင်ႇဢၼ်ၸႂ်ၶဝ်မီး ၼၼ်ႉတီႈၶႃႈဢေႃႈ။
၁၁ ၸဝ်ႈႁဝ်းဢဝ်ၶႃႈၸဝ်ႈႁဝ်းၶဝ်ဢၢပ်ႈပၼ်ၸိူဝ်ႉၼင်ႇသူဝ်းဢၼ်ၶၢၼ်းဝႆႉ ပုၼ်ႈဢၼ်တၵ်းပဵၼ်ၼိူဝ်ႉၵိၼ်ၼၼ်ႉလႄႈ ႁႂ်ႈၽၢတ်ႇၽႄၵၼ်ၵႂႃႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆတီႈၶႃႈ ဢေႃႈ။
၁၂ ၸဝ်ႈႁဝ်းယင်းဢမ်ႇဢဝ်ၵႃႊမၼ်းၶၼ်မၼ်းလႄႈၶၢႆၵူၼ်းၸဝ်ႈႁဝ်းတင်းလၢႆပႅတ်ႈသေလႄႈ ႁႂ်ႈၸီးပွႃးၸဝ်ႈႁဝ်းယႂ်ႇၽႄၼမ်မႃးဢမ်ႇၸႂ်ႈတီႈၶႃႈ။
၁၃ ၸဝ်ႈႁဝ်းၸီႇယၢင်ႇႁႂ်ႈၶႃႈၸဝ်ႈႁဝ်းၶဝ် ပဵၼ်တီႈဢၼ်ၵူၼ်းႁိမ်းႁိူၼ်းႁိမ်းယေးတင်းလၢႆသေႉသွမ်း တီႈဢၼ်ၵူၼ်းဢၼ်ယူႇလဵပ်ႈႁွပ်ႈႁိမ်းႁွမ်းၶႃႈၸဝ်ႈႁဝ်းၶဝ် ႁဵတ်းပျၢၵ်ႈႁဵတ်းၶူဝ်လႄႈလႆႈဢူၵ်းလႆႈဢၢႆၼၼ်ႉတီႈၶႃႈ ဢေႃႈ။
၁၄ ၸဝ်ႈႁဝ်းၸီႇယၢင်ႇႁႂ်ႈၶႃႈၸဝ်ႈႁဝ်းၶဝ်ပဵၼ်တီႈဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆႁဵတ်းဢူႉပမႃႇတႅၵ်ႈဢိၵ်ႇတင်း တီႈဢၼ်မုၵ်ႉၵူၼ်းၸိူဝ်းၵူၼ်းတင်း လၢႆလႆႈငွၵ်းႁူဝ်ၶွၼ်းႁူဝ်ၸူးတီႈၶႃႈဢေႃႈ။
၁၅ တၢင်းဢၼ်သရေႇၶႃႈၸဝ်ႈလူႉၼၼ်ႉ လႆႈမီးသိုဝ်ႈၼႃႈတႂ်ႈတႃၶႃႈၸဝ်ႈယူႇတင်းဝၼ်းတင်းဝၼ်းလႄႈ တၢင်းဢၼ်ၼႃႈၶႃႈၸဝ်ႈဢူၵ်းဢၢႆၼၼ်ႉ လႆႈသုမ်ႇႁူမ်ႇၶႃႈၸဝ်ႈယူႇ
၁၆ ၵွပ်ႈပိူဝ်ႈၵႂၢမ်းၵေႃႉဢၼ်ယႃႉသရေႇ ၵေႃႉဢၼ်သေႉသွမ်းဢိၵ်ႇတင်း ၵွပ်ႈပိူဝ်ႈၵေႃႉဢၼ်ႁဵတ်းရၢၼ်ႇသူႇၵေႃႉဢၼ် ၶိုၼ်းတွပ်ႇၼၼ်ႉတီႈၶႃႈဢေႃႈ။
၁၇ လႆႈၶၢမ်ႇထၼ်ႇၼၼ်ႉသေၵေႃႈ ၶႃႈၸဝ်ႈႁဝ်းၶဝ်ဢမ်ႇလူင်ႈဢမ်ႇလိုမ်းၸဝ်ႈ ႁဝ်းၶႃႈ။
၁၈ ဢမ်ႇယႃႉသႅတ်ႈၸႃႇပတိၺိၺ်ႇၸဝ်ႈႁဝ်းပႅတ်ႈၶႃႈ။ႁူဝ်ၸႂ်ၶႃႈၸဝ်ႈႁဝ်းၶဝ်ဢမ်ႇသုတ်ႈၶိုၼ်းတၢင်းလင်ၶႃႈ။ဢမ်ႇပိူင်ႈသဵၼ်ႈတၢင်းၸဝ်ႈႁဝ်းသေ လႄႈၵႂႃႇၶႃႈ။
၁၉ ၸဝ်ႈႁဝ်းၸမ်းႁၵ်းပႅတ်ႈသိၵ်ႇပႅတ်ႈၶႃႈၸဝ်ႈႁဝ်းၶဝ်ၵႃႈၼႂ်းတီႈယူႇမႃလိၼ်သေလႄႈ ဢဝ် တင်းႁူမ်ႊတၢင်းတၢႆသုမ်ႇငမ်းဝႆႉတီႈၶႃႈဢေႃႈ။
၂၀ ပေႃးၶႃႈၸဝ်ႈႁဝ်းၶဝ်လႆႈလူင်ႈလိုမ်း ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈႁဝ်းၶႃႈသေလႄႈ ယဵတ်ႇမိုဝ်းယုၵ်ႉမိုဝ်းၸူးတီႈ ၽြႃးၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉၸိုင် ၽြႃးပဵၼ်ၸဝ်ႈယင်းဢမ်ႇၸႅတ်ႈဢမ်ႇထၢမ်ဢမူႉၼၼ်ႉလႄႈတၵ်းယူႇတီႈၶႃႈႁိုဝ်။
၂၁ လွင်ႈမၼ်းၸမ်း မၼ်းၸဝ်ႈႁူႉႁၼ်လွင်ႈတၢင်းဢၼ်သိူင်ႇလပ်ႉဝႆႉ ၵႃႈၼႂ်းႁူဝ်ၸႂ်တင်း လၢႆၼၼ်ႉတီႈၶႃႈဢေႃႈ။
၂၂ ၵွပ်ႈပိူဝ်ႈပုၼ်ႈၸဝ်ႈႁဝ်းလႄႈၶႃႈၸဝ်ႈႁဝ်းၶဝ် လႆႈၶၢမ်ႇတၢင်းဢၼ်ဢဝ်တၢႆတႃႇသေႇဢမ်ႇထၢတ်ႇ ဢမၢၼ်ႇၶၼ်ပဵၼ်တီႈၶႃႈဢေႃႈ။ပိူၼ်ႈၸၢင်ႊမၢတ်ႈၶႃႈၸဝ်ႈႁဝ်းၶဝ် ပဵၼ်ၸိူဝ်ႉၼင်ႇသူဝ်းဢၼ်ၶၢၼ်းဝႆႉ ပုၼ်ႈဢၼ်တၵ်းလႆႈဢဝ်တၢႆၼၼ်ႉတီႈ ၶႃႈဢေႃႈ။
၂၃ ၸဝ်ႈၽြႃးတီႈၶႃႈ၊တိုၼ်ႇမႃးသေၵမ်းတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၵိင်းၼွၼ်းယူႇတီႈၶႃႈ။လုၵ်ႉသေၵမ်းတီႈၶႃႈ။ယႃႇပေၸုၼ်ႉပႅတ်ႈ ၶႃႈၸဝ်ႈႁဝ်းၶဝ်သေႇသေႇၶႃႈ။
၂၄ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဝၢႆႇၼႃႈပႅတ်ႈၶႃႈၸဝ်ႈႁဝ်းၶဝ်လႄႈလူင်ႈလိုမ်းတၢင်းဢၼ်ၶႃႈၸဝ်ႈႁဝ်းၶဝ် လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉၼင်ႇႁိုဝ်တီႈၶႃႈ။
၂၅ ဝိၺိၺ်ႇၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ၶျႃးတႅမ်ႇႁွတ်ႈထိုင်မုၼ်ႈလိၼ်လႄႈတူဝ်ၵႃႇယႃႉၵေႃႈ ယင်းတိုၵ်ႉၸပ်းယူႇၵႃႈတီႈလိၼ်တီႈၶႃႈဢေႃႈ။
၂၆ ၶႅၼ်းတေႃႈလုၵ်ႉႁႂ်ႈလႆႈၸွႆႈထႅမ်မႃႉၸႃႉၶႃႈၸဝ်ႈႁဝ်းၶဝ် သေၵမ်းတီႈၶႃႈ။ၶႅၼ်းတေႃႈထူတ်ႇၼုၵ်ႈဢဝ်ၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ် မႅၼ်ႈၵၼ်တင်းၵရူႉၼႃႇၸဝ်ႈႁဝ်းၼၼ်ႉသေၵမ်းတီႈၶႃႈ။