၄၀
၁ ၵဝ်မုင်မွင်းထႃႇဝရႃႉၽြႃးယူႇလႄႈ မၼ်းၸဝ်ႈဝၢႆႇၼႃႈၸူးၵဝ်သေယဝ်ႉထွမ်ႇငိၼ်းသဵင်ဢၼ်ၵဝ်ႁွင်ႉသႅၼ်ႇ ၼၼ်ႉဢေႃႈ။
၂ မၼ်းၸဝ်ႈၵႄႇသႄႇၼုၵ်ႈဢဝ်ၵဝ်ဢွၵ်ႇသေၵႃႈၼႂ်းလုၵ်းၼႂ်းၶုမ်တၢင်းဢၼ်လူႉဢၼ်လႅဝ်ဢိၵ်ႇတင်းၵႃႈၼႂ်းၵူမ်ႇၼႂ်းဢုင်ၼၼ်ႉသေလႄႈ ဢဝ်တိၼ်ၵဝ်တၢင်ႇသႂ်ႇၵႃႈၼိူဝ်မၢၵ်ႇႁိၼ်မၢၵ်ႇၽႃလႄႈ ႁႂ်ႈ ႁွႆးတိၼ်ၵဝ်တႄႇယူႇဢေႃႈ။
၃ မၼ်းၸဝ်ႈဢဝ်တၢင်းဢၼ်ႁဵတ်းၵႂၢမ်းဢၼ်မႂ်ႇဢၼ်ဝႃႈ တၢင်းဢၼ်ယွင်ႈယေႃးၽြႃးပဵၼ်ၸဝ်ႈ ႁဝ်းၼၼ်ႉသႂ်ႇပၼ်ၵႃႈၼႂ်းသူပ်းၵဝ်ဢေႃႈ။ၵူၼ်းၼမ်ၼႃႇတၵ်းႁူႉႁၼ်လႄႈမီးတင်းၸႂ်ဢၼ်ရူဝ်ႇသေႇၵူဝ်ယမ်သေလႄႈ ဢိင်ပိုင်ႈထႃႇဝရႃႉ ၽြႃးဢေႃႈ။
၄ ၵေႃႉဢၼ်ဢိင်ပိုင်ႈထႃႇဝရႃႉၽြႃးလႄႈဢမ်ႇဝႄႉၶဝ်ႈဝႄႉၸူးၶဝ်ၸိူဝ်းဢၼ်မႃႇၼႃႉသုင် ဢိၵ်ႇတင်းၶဝ်ၸိူဝ်းဢၼ်ပိူင်ႈၵႂႃႇၸူးၵႃႈတီႈ မိၵ်ႉသႃႇတြႃး ၼၼ်ႉမီးမင်ႇၵလႃႇဢေႃႈ။
၅ ထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ လွင်ႈတၢင်းဢၼ်လီဢၢမ်းဢၼ်ၸဝ်ႈႁဝ်းႁဵတ်း ဢိၵ်ႇတင်း တၢင်းၵျၢမ်ႇတၢင်းပွင်ဢၼ်ၸဝ်ႈႁဝ်းၵျၢမ်ႇပွင် ပုၼ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉၼမ်ၼႃႇလူင်လၢင်တီႈၶႃႈဢေႃႈ။ၵႃႈဢၼ်ၶိုင်ပွင်ၸႅၼ်ႇတမ်းၵၼ်ဝႆႉၸိူဝ်းၼၼ်ႉၵေႃႈဢဝ်သူပ်းလဝ်ႈလၢတ်ႈၵႃႈတီႈၽၢႆႇၼႃႈၸဝ်ႈႁဝ်းလႄႈ ဢမ်ႇသုတ်းဢမ်ႇသဵင်ႈလႆႈတီႈၶႃႈ။ပေႃးၶႃႈၸဝ်ႈဝႃႈတၵ်းလႆႈဢဝ်ဢွၵ်ႇလႄႈမွၵ်ႇလၢတ်ႈၸိုင် ပဵၼ်ဢၼ်လီဢၢမ်းၼႃႇလူင်လၢင်ထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈ တီႈၶႃႈဢေႃႈ။
၆ ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈယိၸ်ႉဢိၵ်ႇတင်း ၶိူင်ႈပုၵ်ႉၸေႃႇတင်းလၢႆလႄႈ ၸဝ်ႈႁဝ်းၽုၺ်ႇႁူၶႃႈၸဝ်ႈတီႈၶႃႈယဝ်ႉ။ယိၸ်ႉတၢင်းဢၼ်တုတ်ႇၽႆးဢိၵ်ႇတင်း ယိၸ်ႉဢၼ်ၽေႇဢပျႅတ်ႈတင်း လၢႆၵေႃႈၸဝ်ႈႁဝ်းဢမ်ႇယွၼ်းဢဝ်တီႈၶႃႈ။
၇ မိူဝ်ႈၼၼ်ႉၶႃႈၸဝ်ႈႁပ်ႉတုင်းဢဝ် မႅၼ်ႈၼင်ႇဢၼ်ဢဝ်လွင်ႈၶႃႈၸဝ်ႈတႅမ်ႈဝႆႉ ၼႂ်းၵဵၼ်ႁမ်းၵျၢမ်းလိၵ်ႈၼၼ်ႉလႄႈဝႃႈ၊-ၶႃႈၸဝ်ႈတၵ်းၵႂႃႇတီႈၶႃႈဢေႃႈ၊ ဝႃႈၼင်ႇၼႆၼၼ်ႉ တီႈၶႃႈဢေႃႈ။
၈ ဢူဝ်း၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၼင်ႇႁိုဝ်တၵ်းလႆႈႁဵတ်းၸွမ်း ဢလူဝ်ႇၸဝ်ႈႁဝ်းၼၼ်ႉၸိုင်ၶႃႈၸဝ်ႈၸူမ်းသိူဝ်းတီႈၶႃႈဢေႃႈ။တြႃးၸဝ်ႈႁဝ်းၵေႃႈမီးယူႇၵႃႈၼႂ်းႁူဝ်ၸႂ်ၶႃႈၸဝ်ႈ တီႈၶႃႈဢေႃႈ။
၉ ၶႃႈၸဝ်ႈႁေႃးလၢတ်ႈတြႃးတၢင်းသိုဝ်ႈတေႃႇ ၵႃႈၼႂ်းၵၢင်ပရိၵ်ႈသၢတ်ႈလူင်ၼၼ်ႉတီႈၶႃႈယဝ်ႉ။ထႃႇဝရႃႉၽြႃးတီႈၶႃႈ၊ တူၺ်းတီႈၶႃႈလူႊ။ၸဝ်ႈႁဝ်းႁူႉလွင်ႈဢၼ်ၶႃႈၸဝ်ႈ ဢမ်ႇဢိုတ်းသူပ်းၶႃႈၸဝ်ႈဝႆႉလႆႈတီႈ ၶႃႈ။
၁၀ ၶႃႈၸဝ်ႈဢမ်ႇဢဝ်တြႃးတၢင်းသိုဝ်ႈတေႃႇၸဝ်ႈႁဝ်းၼၼ်ႉ သိူင်ႇဝႆႉမႅပ်းဝႆႉၵႃႈတီႈၼႂ်းႁူဝ်ၸႂ်ၶႃႈၸဝ်ႈတီႈၶႃႈ။ၶႃႈၸဝ်ႈဢဝ်တြႃးတၢင်းဢၼ်ၸဝ်ႈႁဝ်းပႂ်ႉသႅတ်ႈၸႃႇဢိၵ်ႇတင်း တြႃးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉႁေႃးလၢတ်ႈတီႈၶႃႈယဝ်ႉ။ၶႃႈၸဝ်ႈဢမ်ႇဢဝ်ၵရူႉၼႃႇၸဝ်ႈႁဝ်း ဢိၵ်ႇတင်းသႅတ်ႈၸႃႇၸဝ်ႈႁဝ်း သိူင်ႇဝႆႉမႅပ်းဝႆႉ ၵႃႈၼႂ်းၵၢင်ပရိၵ်ႈသၢတ်ႈလူင်ၼၼ်ႉတီႈၶႃႈ။
၁၁ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈယႃႇပေၶျူၵ်ႈၸႂ်တၢင်းဢၼ်ၸဝ်ႈႁဝ်း ဢိတ်းလူႁၵ်ႉပႅင်းၼၼ်ႉသေၵႃႈတီႈၶႃႈၸဝ်ႈသေၵမ်းတီႈၶႃႈ။ၶႅၼ်းတေႃႈႁႂ်ႈၵရူႉၼႃႇၸဝ်ႈႁဝ်း ဢိၵ်ႇတင်းသႅတ်ႈၸႃႇၸဝ်ႈႁဝ်းၼၼ်ႉ ပႂ်ႉလူႈ ပႂ်ႉတူၺ်းၶႃႈၸဝ်ႈယူႇသေႇသေႇသေၵမ်းတီႈၶႃႈ။
၁၂ လွင်ႈမၼ်းၸမ်း ၽေးဢူးပၢတ်ႈၼမ်ၼႃႇဢၼ်ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ ဢွၼ်ၵၼ်လွမ်ႉႁွပ်ႈၶႃႈၸဝ်ႈဝႆႉယူႇတီႈၶႃႈယဝ်ႉ။ဢပျႅတ်ႈဢၼ်ၶႃႈၸဝ်ႈလႆႈၶၢမ်ႇၼႃႇထၼ်ႈပေႃးဢမ်ႇႁႅၼ်ဢမ်ႇတူၺ်းလႆႈၸိူဝ်းၼၼ်ႉၸွမ်းၶိုတ်းၶႃႈၸဝ်ႈတီႈၶႃႈယဝ်ႉ။ၶဝ်ၼၼ်ႉၼမ်ၼႃႇသေၶူၼ်ႁူဝ်ၶႃႈၸဝ်ႈလႄႈ ႁူဝ်ၸႂ်ၶႃႈၸဝ်ႈႁႅင်းဢူၼ်ႈၵႂႃႇတီႈၶႃႈယဝ်ႉ။
၁၃ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈမီးဢလူဝ်ႇၶႂ်ႈၵႄႇသႄႇၼုၵ်ႈဢဝ်ၶႃႈၸဝ်ႈသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ၊ ၶႅၼ်းတေႃႈႁိပ်ႈၼႅတ်ႈႁႂ်ႈလႆႈၸွႆႈထႅမ်မႃႉ ၸႃႉၶႃႈၸဝ်ႈသေၵမ်းတီႈၶႃႈ။
၁၄ ႁႂ်ႈၶဝ်ၸိူဝ်းဢၼ်ၵျၢမ်ႇႁႃႁႂ်ႈလႆႈဢဝ်ဢသၢၵ်ႈၵဝ်တၢႆ ၸိူဝ်းၼၼ်ႉဢူၵ်းဢၢႆလႄႈၼႃႈလူႉသေၵမ်းလူၺ်ႈ။ႁႂ်ႈၶဝ်ၸိူဝ်းဢၼ်မီးဢလူဝ်ႇ ၶႂ်ႈႁဵတ်းၽေးဢၢၼ်ႇတရႄႇ သႂ်ႇတီႈၵဝ်ၼၼ်ႉ လႆႈၶၢမ်ႇတၢင်းဢၼ်တူၵ်းၸႂ်လႄႈ ႁွတ်ႈထိုင်တၢင်း ဢၼ်လီဢူၵ်းလီဢၢႆသေၵမ်းလူၺ်ႈ။
၁၅ ႁႂ်ႈၶဝ်ၸိူဝ်းဢၼ်လၢတ်ႈတီႈၵဝ်လႄႈဝႃႈ၊- ဢေႇႁေႇ၊ ဢေႇႁေႇ၊ ဝႃႈၼင်ႇၼႆၼၼ်ႉလႆႈမိုင်ငဝ်ယူႇ ၵွပ်ႈပိူဝ်ႈတၢင်းဢၼ်ၶဝ် ဢူၵ်းဢၢႆၼၼ်ႉသေၵမ်းလူၺ်ႈ။
၁၆ ႁႂ်ႈၶဝ်ၸိူဝ်းဢၼ်ႁႃၸဝ်ႈႁဝ်းတင်းသဵင်ႈတင်းလူင်ၼၼ်ႉ လႆႈၸူမ်းသိူဝ်းလႄႈ သႂၢင်ႇၸႂ်ယူႇၵႃႈတီႈၸဝ်ႈႁဝ်းသေၵမ်းလူၺ်ႈ။ႁႂ်ႈၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ် ၵျေးၸူးတၢင်းဢၼ်ၸဝ်ႈႁဝ်း ၵႄႇသႄႇၶျွတ်ႈဢဝ်ၼၼ်ႉဢွၼ်ၵၼ်လၢတ်ႈလႄႈဝႃႈ၊-ထႃႇဝရႃႉၽြႃးမုၼ်ၽုင်းယႂ်ႇၼႃႇဢေႃႈ၊ဝႃႈၼင်ႇၼႆယူႇ တႃႇသေႇဢမ်ႇထၢတ်ႇသေၵမ်းလူၺ်ႈ။
၁၇ ၵဝ်ၸမ်း ပဵၵ်ႉသမ်ႉပဵၼ်ဢၼ်ယၢၵ်ႈဢၼ်ၽၢၼ်ဢၼ်ၸုတ်ႈဢၼ်လုတ်ႈသေၵေႃႈ ၸဝ်ႈၽြႃးတၵ်းၶုၵ်းၸႂ်လႆႈၶႆႈၸႂ်ထူပ်းၵဝ်ယူႇဢေႃႈ။ၸဝ်ႈႁဝ်းပဵၼ်ၸဝ်ႈဢၼ်ၸွႆႈထႅမ်မႃႉၸႃႉၶႃႈၸဝ်ႈ ၸဝ်ႈဢၼ်ၵႄႇသႄႇဢဝ်ၶႃႈၸဝ်ႈလွတ်ႈတီႈၶႃႈဢေႃႈ။ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ယႃႇပေၵိုတ်းသဝ်းယူႇသေၵမ်းတီႈၶႃႈ။