၃၇
၁ ယႃႇပေမႆႈၸႂ်ယၢပ်ႇၸႂ်လူၺ်ႈလွင်ႈၶဝ်ၸိူဝ်းဢၼ်ႁဵတ်းႁုၵ်းႁဵတ်းႁၢႆႉၼၼ်ႉ။ယႃႇပေသီႇၵေႉႁေႈတႃၶဝ်ၸိူဝ်း ဢၼ်ႁဵတ်းလွင်ႈတၢင်းဢၼ်ဢမ်ႇတြႃးၼၼ်ႉ။
၂ လွင်ႈမၼ်းၸမ်း ၶဝ်ၼၼ်ႉဢမ်ႇႁိုင်ဢမ်ႇၼၢၼ်း တၵ်းလႆႈၶၢမ်ႇတၢင်းဢၼ်ပၢတ်ႇထိူဝ် မိူၼ်ၸိူဝ်ႉၼင်ႇယိူဝ်ႈယႃႈလႄႈ ႁဵဝ်ႇၸွပ်ႈၵႂႃႇမိူၼ်ၸိူဝ်ႉၼင်ႇတူၼ်ႈဢၼ်ၶဵဝ်လီ ၼုမ်ႇလီၼၼ်ႉဢေႃႈ။
၃ ဢိင်ပိုင်ႈထႃႇဝရႃႉၽြႃးလႄႈၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်လီဢၼ်ငၢမ်းတႃႉ။ယူႇၼႂ်းမိူင်းၸဝ်ႈလႄႈ ၵိၼ်ယူႇၵႃႈၼႂ်းသႅတ်ႈၸႃႇ တြႃးတႃႉ။
၄ မီးတၢင်းဢၼ်မူၼ်ႈပျေႃႇၼႂ်းထႃႇဝရႃႉၽြႃးတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းၸဝ်ႈတၵ်းပၼ်ဢၶႂၢင်ႉ ႁႂ်ႈဢလူဝ်ႇႁူဝ်ၸႂ်မႂ်းလႆႈတဵမ်ထူၼ်ႈဢေႃႈ။
၅ ဢၢပ်ႈပၼ်သဵၼ်ႈတၢင်းဢၼ်မႂ်းၵႂႃႇၼၼ်ႉ တီႈထႃႇဝရႃႉၽြႃးတႃႉ။ဢိင်ပိုင်ႈမၼ်းၸဝ်ႈယူႇတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းၸဝ်ႈတၵ်းၶိုင်ပွင်ဢေႃႈ။
၆ မၼ်းၸဝ်ႈတၵ်းႁႂ်ႈ လွင်ႈတၢင်းဢၼ်မႂ်းသိုဝ်ႈတေႃႇၼၼ်ႉ ပေႃႇဢွၵ်ႇမိူၼ်ၸိူဝ်ႉၼင်ႇဢၼ်လႅင်းလႄႈ ႁႂ်ႈတၢင်းဢၼ်မႂ်းႁဵတ်းၸွမ်းတြႃးၼၼ်ႉပေႃႇဢွၵ်ႇ မိူၼ် ၸိူဝ်ႉၼင်ႇသၢႆဢရွင်ႇၵၢင်ဝၼ်းတဵင်ၼၼ်ႉဢေႃႈ။
၇ ယူႇတဵတ်ႇတဵတ်ႇယဵၼ်ယဵၼ်ယူႇ ၵႃႈတီႈၽၢႆႇၼႃႈထႃႇဝရႃႉၽြႃးသေလႄႈပႂ်ႉထႃႈမၼ်းၸဝ်ႈယူႇတႃႉ။ယႃႇပေမႆႈၸႂ်ယၢပ်ႇၸႂ်လူၺ်ႈ လွင်ႈၵေႃႉဢၼ်ၸၢင်ႊပႄႉၼႅင်ႇဢမူႉမၼ်း ဢိၵ်ႇတင်းၵေႃႉဢၼ်ၸၢင်ႊႁႂ်ႈတၢင်းႁဵတ်းတၢင်းသၢင်ႈ ဢၼ်ဢမ်ႇလီဢမ်ႇငၢမ်းယဝ်ႉတူဝ်ၼၼ်ႉ။
၈ ယႃႇပေႁႂ်ႈတၢင်းၸႂ်မႆႈၶႂ်ႈၸႃႉလႆႈဢွၵ်ႇ။ၸုၼ်ႉပႅတ်ႈသေၸႂ်တေႃးသႃႉတႃႉ။ယႃႇပေႁႂ်ႈမီးၸႂ်ဢၼ်ၸၢင်ႊတိုၵ်းယူင်းၸူဝ်းဢဝ်တူဝ်ၸဝ်ႈၵဝ်ႇႁႂ်ႈလႆႈၽိတ်းလႆႈ ပိူင်ႈၼၼ်ႉ။
၉ ၶဝ်ၸိူဝ်းဢၼ်ၽိတ်းပိူင်ႈၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈဢေႃႈ။ၶဝ်ၸိူဝ်းဢၼ်မုင်ထႃႈမွင်းထႃႈထႃႇဝရႃႉၽြႃးယူႇၼၼ်ႉၸမ်း တၵ်းလႆႈ ၶၢမ်ႇဢမူၺ်ႇမိူင်းၸဝ်ႈဢေႃႈ။
၁၀ ႁိုင်ၵမ်းဢွၼ်ႇၼိုင်ႈသေယဝ်ႉၵေႃႉဢၼ်ဢမ်ႇတြႃးၼၼ်ႉတၵ်းဢမ်ႇလႆႈမီး။မႂ်းႁႃတီႈယူႇတီႈသဝ်းမၼ်းၼႆၵေႃႈ တၵ်းဢမ်ႇလႆႈထူပ်း လႆႈႁၼ်။
၁၁ ၶဝ်ၸိူဝ်းဢၼ်ၶျႃးတႅမ်ႇၼၼ်ႉၸမ်းတၵ်းလႆႈၶၢမ်ႇဢမူၺ်ႇမိူင်းၸဝ်ႈလႄႈမူၼ်ႈပျေႃႇၼႂ်းတၢင်းဢၼ်တဵမ်ဝႆႉတင်းတၢင်းဢၼ်ၼိမ်ဢၼ်လီၼၼ်ႉ ဢေႃႈ။
၁၂ ၵေႃႉဢၼ်ဢမ်ႇတြႃးၼၼ်ႉၸၢင်ႊၵျၢမ်ႇပွင်ယူႇၽၢႆႇၼိုင်ႈတင်းၵေႃႉဢၼ်သိုဝ်ႈတေႃႇၼၼ်ႉလႄႈ ၵတ်း ၶဵဝ်ႈၵတ်းၽၢၼ်ႈမၼ်းယူႇဢေႃႈ။
၁၃ ၸဝ်ႈၽြႃးႁူႉႁၼ်လွင်ႈဢၼ်ဝႃႈ မိူဝ်ႈဝၼ်းမၼ်းတၵ်းႁွတ်ႈထိုင်မႃးယူႇ ၼၼ်ႉလႄႈယုမ်ႉၶူဝ်မၼ်းယူႇဢေႃႈ။
၁၄ ၶဝ်ၸိူဝ်းဢၼ်ဢမ်ႇတြႃးၼၼ်ႉ ၸၢင်ႊထွတ်ႇလၢပ်ႇသေလႄႈ ဝူတ်ႈၵၢင်ႇယူႇ ႁႂ်ႈလႆႈဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလူမ်ႉတူၵ်း ဢိၵ်ႇတင်းႁႂ်ႈလႆႈဢဝ်ၶဝ်ၸိူဝ်းဢၼ်ႁူဝ်ၸႂ်သိုဝ်ႈလီယူဝ်းလီၼၼ်ႉတၢႆဢေႃႈ။
၁၅ လၢပ်ႇၶဝ်ၼၼ်ႉ တၵ်းလႆႈၶဝ်ႈၵႃႈၼႂ်းႁူဝ်ၸႂ်ၶဝ်လႄႈၵၢင်ႇၶဝ်ၼၼ်ႉၵေႃႈတၵ်းလႆႈၶၢမ်ႇတၢင်းဢၼ်ႁၵ်းပႅတ်ႈဢေႃႈ။
၁၆ ဢုၵ်ႉၸႃႇဢၼ်မီးၵေႇၼႃႇၵႃႈတီႈၵေႃႉဢၼ်သိုဝ်ႈတေႃႇၼၼ်ႉ ယဵင်ႈၶႅၼ်းလီၼႃႇသေဢုၵ်ႉၸႃႇၼမ်ၼႃႇဢၼ်မီးၵႃႈတီႈ ၶဝ်ၸိူဝ်းဢၼ်ဢမ်ႇ တြႃးၼၼ်ႉဢေႃႈ။
၁၇ လွင်ႈမၼ်းၸမ်းၶႅၼ်မိုဝ်းၶဝ်ၸိူဝ်းဢၼ်ဢမ်ႇတြႃးၼၼ်ႉ တၵ်းလႆႈၶၢမ်ႇတၢင်းဢၼ်ႁၵ်းပႅတ်ႈလႄႈ ၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်း ထႃႇ ဝရႃႉၽြႃးၸွႆႈထႅမ်မႃႉၸႃႉယူႇဢေႃႈ။
၁၈ ထႃႇဝရႃႉၽြႃးႁူႉၸႅင်ႈမၢတ်ႈတွင်း မိူဝ်ႈဝၼ်းၶဝ်ၸိူဝ်းဢၼ်ၸေးၸုမ်ႇၼၼ်ႉလႄႈ ဢုၵ်ႉၸႃႇဢမူၺ်ႇၶဝ်ၼၼ်ႉ တၵ်းတႄႇ ယူႇသေႇသေႇဢေႃႈ။
၁၉ ၶဝ်ၼၼ်ႉတၵ်းဢမ်ႇလႆႈဢူၵ်းလႆႈဢၢႆၼႂ်းမိူဝ်ႈဢၼ်ယၢပ်ႇၽိုတ်ႇၼၼ်ႉလႄႈ တၵ်းလႆႈၵိၼ်ဢိမ်ႇၵိၼ်တဵမ် ၼႂ်းမိူဝ်ႈဢၼ်တၢင်းၵိၼ်တၢင်း ၶူပ်းၵႃႊပႅင်းၼၼ်ႉဢေႃႈ။
၂၀ ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်း တၵ်းလႆႈႁွတ်ႈထိုင် တၢင်းဢၼ်လူႉဢၼ်လႅဝ်ဢေႃႈ။ရၢၼ်ႇသူႇထႃႇဝရႃႉၽြႃးတင်းလၢႆတၵ်းပဵၼ်ၸိူဝ်ႉၼင်ႇႁၢင်ႊၽၢင်ဢၼ်ႁၢင်ႊလီ တီႈၼႂ်းပၢင်ႇဢၼ်လူႉၵႂႃႇႁၢႆၵႂႃႇၼၼ်ႉဢေႃႈ။တၵ်းလူႉၵႂႃႇႁၢႆၵႂႃႇမိူၼ် ၸိူဝ်ႉၼင်ႇၵွၼ်းၽႆးဢေႃႈ။
၂၁ ၵေႃႉဢၼ်ဢမ်ႇတြႃးၼၼ်ႉၸၢင်ႊၵူႈဢဝ်ယိမ်ဢဝ်လႄႈ ဢမ်ႇၶိုၼ်းၽေႃႇၶိုၼ်းတႅၼ်း။ၵေႃႉဢၼ်သိုဝ်ႈတေႃႇၼၼ်ႉၸမ်းၸၢင်ႊမီးၸႂ် ဢၼ်ဢိတ်းလူလႄႈပၼ်ဢေႃႈ။
၂၂ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်မၼ်းၸဝ်ႈပၼ်တၢင်းလီၼၼ်ႉ တၵ်းလႆႈၶၢမ်ႇဢဝ်ဢမူၺ်ႇမိူင်းၸဝ်ႈလႄႈ ၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်မၼ်းၸဝ်ႈၵိၼ်ႇဝႃႈၼၼ်ႉၸမ်း တၵ်းလႆႈႁွတ်ႈထိုင် တၢင်းဢၼ်မၼ်းၸဝ်ႈပႄႇပႅတ်ႈ ဢေႃႈ။
၂၃ တၢင်းၵႂႃႇတၢင်းပႆၵူၼ်း ပဵၼ်တၢင်းဢၼ်ထႃႇဝရႃႉၽြႃးၸီႇယၢင်ႇဝႆႉလႄႈ မၼ်းၸဝ်ႈထုၵ်ႇၸႂ်ၵျိူၵ်ႈၸႂ် လူၺ်ႈလွင်ႈ သဵၼ်ႈတၢင်းဢၼ်မၼ်းၵႂႃႇၼၼ်ႉ ဢေႃႈ။
၂၄ ၵေႃႉၼၼ်ႉပဵၵ်ႉသမ်ႉလူမ်ႉသေၵေႃႈဢမ်ႇလႆႈထိုင်တီႈဢူပ်ႇပူပ်ႇ။လွင်ႈမၼ်းၸမ်းထႃႇဝရႃႉၽြႃးယိပ်းၵမ် မိုဝ်းမၼ်းယူႇဢေႃႈ။
၂၅ ၸႃႉၸဵမ်မိူဝ်ႈဢၼ်ၵဝ်ဢသၢၵ်ႈယင်းၼုမ်ႇ တေႃႇထိုင်ႁွတ်ႈထၼ်ႈပေႃးထဝ်ႈၼႆႉၵဝ်ဢမ်ႇတွၼ်ႉလႆႈႁၼ်ၵူၼ်းသိုဝ်ႈတေႃႇ ဢၼ်လႆႈၶၢမ်ႇတၢင်းဢၼ်ၸုၼ်ႉပႅတ်ႈလႄႈ လုၵ်ႈမၼ်းလၢၼ်မၼ်း ပေႃးလႆႈၶေႃၵိၼ်ယွၼ်းၵိၼ်ၼၼ်ႉ။
၂၆ မၼ်းၼၼ်ႉၸၢင်ႊမီးၸႂ်ဢၼ်ဢိတ်းလူယူႇ တင်းဝၼ်းတင်းဝၼ်းသေလႄႈပၼ်ပိူၼ်ႈၵူႈပိူၼ်ႈယိမ်လႄႈ လုၵ်ႈမၼ်းလၢၼ်မၼ်းၵေႃႈ တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ။
၂၇ ပႄႇပႅတ်ႈတူႉၸရိူၵ်ႈသေလႄႈႁဵတ်းသူႉၸရိူၵ်ႈတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင် တၵ်းလႆႈယူႇမၼ်ႈၶိုင်ႇ တႃႇသေႇဢေႃႈ။
၂၈ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်တၢင်းဢၼ်ၸီႇယၢင်ႇ ၸွမ်းၼင်ႇတြႃးၼၼ်ႉလႄႈ ဢမ်ႇၸုၼ်ႉဢမ်ႇပႅတ်ႈၶဝ်ၸိူဝ်းဢၼ်မၼ်းၸဝ်ႈႁၵ်ႉပႅင်းၼၼ်ႉ။ၶဝ်ၼၼ်ႉလႆႈၶၢမ်ႇတၢင်းဢၼ်မၼ်းၸဝ်ႈပႂ်ႉလူႈပႂ်ႉတူၺ်းယူႇတႃႇသေႇဢမ်ႇထၢတ်ႇလႄႈ လုၵ်ႈလၢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်း တၵ်းလႆႈၶၢမ်ႇ တၢင်းဢၼ်ပႄႇပႅတ်ႈဢေႃႈ။
၂၉ ၶဝ်ၸိူဝ်းဢၼ်သိုဝ်ႈတေႃႇၼၼ်ႉတၵ်းလႆႈၶၢမ်ႇဢမူၺ်ႇမိူင်းၸဝ်ႈလႄႈ ယူႇၵႃႈ ၼႂ်းၼၼ်ႉတႃႇသေႇဢမ်ႇထၢတ်ႇဢေႃႈ။
၃၀ သူပ်းၵေႃႉဢၼ်သိုဝ်ႈတေႃႇၼၼ်ႉ ၸၢင်ႊမွၵ်ႇလၢတ်ႈပိင်ႇၺႃႇလႄႈလိၼ်ႉမၼ်းၵေႃႈ ၸၢင်ႊလၢတ်ႈၸၢင်ႊဝႃႈၵႂၢမ်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉဢေႃႈ။
၃၁ တြႃးထႃႇဝရႃႉၽြႃး တႄႇယူႇၵႃႈၼႂ်းႁူဝ်ၸႂ်မၼ်းလႄႈတၢင်းဢၼ်မၼ်းယၢင်တိၼ်ၼၼ်ႉ ဢမ်ႇလႆႈပၢတ်ႈလႆႈလူမ်ႉ။
၃၂ ၵေႃႉဢၼ်ဢမ်ႇတြႃးၼၼ်ႉၸၢင်ႊပႂ်ႉလွမ်ၵေႃႉဢၼ်သိုဝ်ႈတေႃႇၼၼ်ႉလႄႈ ၵျၢမ်ႇႁႃႁႂ်ႈလႆႈဢဝ်မၼ်း တၢႆဢေႃႈ။
၃၃ ထႃႇဝရႃႉၽြႃးတၵ်းၸုၼ်ႉမၼ်းပႅတ်ႈဝႆႉၵႃႈၼႂ်းမိုဝ်းၵေႃႉၼၼ်ႉဢမ်ႇၸႂ်ႈ။တၵ်းၸီႇယၢင်ႇဢပျႅတ်ႈမၼ်း မိူဝ်ႈဢၼ်ၶၢမ်ႇတၢင်းဢၼ်ၸႅတ်ႈထၢမ်ၸႅတ်ႈတူၺ်းၼၼ်ႉဢမ်ႇၸႂ်ႈ။
၃၄ မုင်ထႃႈမွင်းထႃႈထႃႇဝရႃႉၽြႃးလႄႈ ၸွမ်းၵႂႃႇၸွမ်းပႆၵႃႈၼႂ်းသဵၼ်ႈတၢင်းမၼ်းၸဝ်ႈတႃႉ။မၼ်းၸဝ်ႈတၵ်းယုၵ်ႉယွင်ႈမႂ်းႁႂ်ႈမႂ်းလႆႈၶၢမ်ႇဢမူၺ်ႇမိူင်းၸဝ်ႈလႄႈ မႂ်းတၵ်းလႆႈထူပ်းလႆႈႁၼ်တၢင်းဢၼ်ၶဝ်ၸိူဝ်းဢၼ် ဢမ်ႇတြႃးၼၼ်ႉလႆႈလူႉသုမ်းၼၼ်ႉဢေႃႈ။
၃၅ ပဵၵ်ႉသမ်ႉၵဝ်လႆႈႁၼ်ၵေႃႉဢၼ်ဢမ်ႇတြႃးၼၼ်ႉ ဢႃႇၵႃႇၼႃႇလူင်လၢင်လႄႈ ႁဵတ်းႁႂ်ႈတူဝ်ၸဝ်ႈၵဝ်ႇၽႄမႃးတိူၼ်းမႃးမိူၼ်ၸိူဝ်ႉၼင်ႇတူၼ်ႈမႆႉဢၼ်ၼုမ်ႇလီမူႈလီ ၼႂ်းတီႈဢၼ်မၼ်းဢွၵ်ႇမႃးၼၼ်ႉသေၵေႃႈ လိုၼ်းၼၼ်ႉမၼ်း ၶၢႆႉပုတ်ႈၵႂႃႇသေလႄႈႁၢႆလၢႆၵႂႃႇဢေႃႈ။
၃၆ ၵဝ်ႁႃမၼ်းသေ ၵေႃႈဢမ်ႇလႆႈထူပ်းလႆႈႁၼ်။
၃၇ ၶႆႈၸႂ်တူၺ်းၵေႃႉဢၼ်မီးတၢင်းဢၼ်ၸေးၸုမ်ႇၼၼ်ႉလႄႈလူႈတူၺ်းၵေႃႉဢၼ်သိုဝ်ႈတေႃႇၼၼ်ႉတႃႉ။ၸူဝ်ႈၼႃႈၸၢတ်ႈၼႃႈၵေႃႉၼၼ်ႉ တၵ်းပဵၼ်တၢင်းဢၼ်ၼိမ်ဢၼ်လီဢေႃႈ။
၃၈ ၶဝ်ၸိူဝ်းဢၼ်ၽိတ်းပိူင်ႈၼၼ်ႉ တၵ်းလႆႈႁွတ်ႈထိုင်တၢင်းဢၼ်လူႉဢၼ်လႅဝ်လႄႈၸူဝ်ႈၼႃႈၸၢတ်ႈၼႃႈ ၶဝ်ၸိူဝ်းဢၼ်ဢမ်ႇတြႃးၼၼ်ႉ တၵ်းလႆႈၶၢမ်ႇ တၢင်းဢၼ်ပႄႇပႅတ်ႈဢေႃႈ။
၃၉ တၢင်းဢၼ်ၵႄႇသႄႇၶျွတ်ႈဢဝ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉ ဢွၵ်ႇသေၵႃႈတီႈထႃႇဝရႃႉၽြႃးမႃးလႄႈ မၼ်းၸဝ်ႈပဵၼ်တီႈဢၼ်ၶဝ်သွၼ်ႈပိုင်ႈယူႇ ၼႂ်းမိူဝ်ႈဢၼ်ၽေးႁွတ်ႈထိုင် ၼၼ်ႉဢေႃႈ။
၄၀ ထႃႇဝရႃႉၽြႃးတၵ်းၸွႆႈထႅမ်မႃႉၸႃႉၶဝ်လႄႈၵႄႇသႄႇဢဝ်ၶဝ်လွတ်ႈဢေႃႈ။မၼ်းၸဝ်ႈတၵ်းၵႄႇသႄႇဢဝ်ၶဝ်လွတ်ႈသေၵႃႈၼႂ်းမိုဝ်း ၶဝ်ၸိူဝ်းဢၼ်ဢမ်ႇတြႃးၼၼ်ႉ ၵွပ်ႈပိူဝ်ႈဢၼ်ၶဝ်ဢိင်ပိုင်ႈမၼ်းၸဝ်ႈၼၼ်ႉဢေႃႈ။