၃၂
၁ ၵေႃႉဢၼ်ႁွတ်ႈထိုင် တၢင်းဢၼ်ပွႆႇလွတ်ႈဢပျႅတ်ႈဢိၵ်ႇတင်း တၢင်းဢၼ်သုမ်ႇႁူမ်ႇတူႉၸရိူၵ်ႈဢပျႅတ်ႈ ၼၼ်ႉမီးမင်ႇၵလႃႇဢေႃႈ။
၂ ၵေႃႉဢၼ်ၵၢင်းလွတ်ႈတင်း တၢင်းဢၼ်ထႃႇဝရႃႉၽြႃးတၢင်ႇဢပျႅတ်ႈလႄႈ ဢမ်ႇမီးၸႂ်သၽေႃးဢၼ်ၸၢင်ႊပႅတ်ႉၸၢင်ႊလႅၼ်ၼၼ်ႉ မီးမင်ႇၵလႃႇဢေႃႈ။
၃ ၼႂ်းမိူဝ်ႈဢၼ်ၵဝ်ဢမ်ႇတၵ်းသဵင်လူၺ်ႈလွင်ႈဢပျႅတ်ႈၶဝ်လႄႈယူႇၼၼ်ႉၸိုင် လုပ်ႇၵဝ်တင်းလၢႆႁွတ်ႈထိုင်တၢင်းဢၼ်ၽင်ႉဢူႉၵႂႃႇ ၵွပ်ႈပိူဝ်ႈတၢင်းဢၼ်ၵဝ် ၶင်းၶီၶင်းၽၢၼ်ယူႇ ၵူႈမိူဝ်ႉၵူႈဝၼ်း ၼၼ်ႉဢေႃႈ။
၄ မိုဝ်းၸဝ်ႈႁဝ်းၼၵ်းယူႇၵႃႈၼိူဝ်ၶႃႈၸဝ်ႈၵူႈဝၼ်းၵူႈၶိုၼ်းတႃႇသေႇဢမ်ႇထၢတ်ႇလႄႈ ၼမ်ႉႁိူဝ်ႇၶႃႈၸဝ်ႈၶၢႆႉပုတ်ႈၵႂႃႇပဵၼ်မိူၼ်ၸိူဝ်ႉၼင်ႇဢၼ်ႁႅင်ႈဢၼ်ႁွင် ၼႂ်းမိူဝ်ႈၶိင်ႇမႆႈၶိင်ႇႁွၼ်ႉၼၼ်ႉတီႈၶႃႈဢေႃႈ။ၸေႇလႃႇ။
၅ ၶႃႈၸဝ်ႈဢဝ်ဢပျႅတ်ႈၶႃႈၸဝ်ႈၶျႃးဝႆႉၵႃႈတီႈၽၢႆႇၼႃႈၸဝ်ႈႁဝ်းလႄႈၶႃႈၸဝ်ႈဢမ်ႇသိူင်ႇဢမ်ႇမႅပ်းတူႉၸရိူၵ်ႈဢပျႅတ်ႈၶႃႈၸဝ်ႈဝႆႉ တီႈၶႃႈ။ၶႃႈၸဝ်ႈတၵ်းၽုၺ်ႇဢွၵ်ႇၼႄပျႃးတွင်းပၢၼ်ႇ လွင်ႈတၢင်းဢၼ်ၶႃႈၸဝ်ႈပူၼ်ႉလိူဝ်ၼၼ်ႉ တီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆလႄႈ ၸဝ်ႈႁဝ်းပွႆႇလွတ်ႈဢပျႅတ်ႈတၢင်းဢၼ် ၶႃႈၸဝ်ႈၽိတ်းပိူင်ႈၼၼ်ႉတီႈၶႃႈဢေႃႈ။
၆ ပိူဝ်ႈၼႆလႄႈႁႂ်ႈၶဝ်ၸိူဝ်းဢၼ်ႁၵ်ႉပႅင်းၸဝ်ႈႁဝ်း တင်းသဵင်ႈတင်းလူင်လဝ်ႈယွၼ်းၵႃႈတီႈၽၢႆႇၼႃႈၸဝ်ႈႁဝ်း ၼႂ်းၶိင်ႇမိူဝ်ႈဢၼ်ထုၵ်ႇလီထူပ်းၸဝ်ႈႁဝ်းၼၼ်ႉသေၵမ်းတီႈၶႃႈ။ၼႂ်းမိူဝ်ႈဢၼ်ၼမ်ႉယႂ်ႇၼမ်ႉလူင်ထုမ်ႈႁူမ်ႇၼၼ်ႉ တၵ်းဢမ်ႇလႆႈၵၢႆမႃး ၵႃႈတီႈႁိမ်းမၼ်းဢမၢၼ်ႇၶၼ်ပဵၼ်တီႈ ၶႃႈ။
၇ ၸဝ်ႈႁဝ်းပဵၼ်တီႈဢၼ်တဵတ်ႇဢၼ်လပ်ႉၶႃႈၸဝ်ႈလႄႈႁႄႉၵင်ႈၸွႆႈထႅမ်ယူႇ ႁႂ်ႈၶႃႈၸဝ်ႈလႆႈၵၢင်းလွတ်ႈတင်းၽေးတီႈၶႃႈဢေႃႈ။ၸဝ်ႈႁဝ်းဢဝ်တင်းတၢင်းဢၼ်ႁဵတ်းၵႂၢမ်း လူၺ်ႈလွင်ႈဢၼ်ၵႄႇသႄႇၼုၵ်ႈဢဝ် ၼၼ်ႉလွမ်ႉႁွပ်ႈၶႃႈၸဝ်ႈယူႇတီႈၶႃႈဢေႃႈ။
၈ ၵဝ်တၵ်းသင်ႇသွၼ်မႂ်းလႄႈ ၼႄပျႃးသဵၼ်ႈတင်းဢၼ်မႂ်းတၵ်းလႆႈၵႂႃႇၼၼ်ႉတီႈမႂ်းဢေႃႈ။ၵဝ်တၵ်းဢဝ်တင်းမၢၵ်ႇတႃ ၵဝ်လူႈတူၺ်းလုမ်းလႃးမႂ်းဢေႃႈ။
၉ ယႃႇပပေဵၼ်ၸိူဝ်ႉၼင်ႇမႃႉတၢင်ႇလေႃႉလႃး ဢၼ်ဢမ်ႇမီးၺၢၼ်ႇပိင်ႇၺႃႇၼၼ်ႉ။ၶဝ်ၼၼ်ႉပိူဝ်ႈဢၼ်ဢမ်ႇမႃးၸူးတီႈမႂ်းလႄႈ တၢင်းဢၼ်ႁၢင်ႈၶိူင်ႈၶဝ်လႆႈပဵၼ်ၵၵ်ႉဢၼ်သႂ်ႇတီႈသူပ်း ဢိၵ်ႇတင်း သၢႆၵၵ်ႉပုၼ်ႈဢၼ်တိုတ်ႉၸၼ် ၼၼ်ႉဢေႃႈ။
၁၀ ၵေႃႉဢၼ်ဢမ်ႇတြႃးၼၼ်ႉလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇလႄႈၵေႃႉဢၼ်ဢိင်ပိုင်ႈထႃႇဝရႃႉၽြႃးၼၼ်ႉၸမ်းၵရူႉၼႃႇၸၢင်ႊလွမ်ႉႁွပ်ႈ မၼ်းဝႆႉယူႇဢေႃႈ။
၁၁ ၵူၼ်းဢၼ်သိုဝ်ႈတေႃႇၶဝ်ဢိူၺ်း၊ဢွၼ်ၵၼ်ၸူမ်းသိူဝ်းမူၼ်ႈပျေႃႇတီႈ ထႃႇဝရႃႉၽြႃးတႃႉ။ၵူၼ်းဢၼ်ၸႂ်သၽေႃးသိုဝ်ႈယူဝ်းၶဝ်ဢိူၺ်း၊ဢွၼ် ၵၼ်ႁဵတ်းၵႂၢမ်းဢၼ်သႂၢင်ႇဢၼ်သိူဝ်းတႃႉ။