၂၈
၁ ထႃႇဝရႃႉၽြႃး၊ ဢၼ်ပဵၼ်မၢၵ်ႇႁိၼ်မၢၵ်ႇၽႃၵဝ်ၶႃႈတီႈၶႃႈ၊ ၶႃႈၸဝ်ႈႁွင်ႉသႅၼ်ႇၸူးတီႈၸဝ်ႈႁဝ်းတီႈၶႃႈဢေႃႈ။ယင်းဢမ်ႇတၵ်းသဵင်လႄႈယႃႇပေယူႇသေၵမ်းတီႈၶႃႈ။ပေႃးယင်းဢမ်ႇတၵ်းသဵင်လႄႈယူႇၸိုင် ၶႃႈၸဝ်ႈတၵ်းလႆႈပဵၼ်ၸိူဝ်ႉၼင်ႇ ၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းၶုမ်ပႃႇႁဵဝ်ႈၼၼ်ႉတီႈၶႃႈဢေႃႈ။
၂ ၶႅၼ်းတေႃႈထွမ်ႇငိၼ်းသဵင်ဢၼ်ၶႃႈၸဝ်ႈလဝ်ႈယွၼ်း မိူဝ်ႈဢၼ်ၶႃႈၸဝ်ႈႁွင်ႉသႅၼ်ႇႁႃတီႈၸဝ်ႈႁဝ်းလႄႈ ယုၵ်ႉမိုဝ်းၸူးတီႈထႃႇၼႃႉ ပျႃႇတိၵ်ႈဢၼ်မူတ်းၸၢင်ႇၸဝ်ႈႁဝ်း ၼၼ်ႉသေၵမ်းတီႈၶႃႈ။
၃ ယႃႇပေၸူဝ်းဢဝ်ၶႃႈၸဝ်ႈၵႂႃႇလူၺ်ႈၵၼ်တင်း ၶဝ်ၸိူဝ်းဢၼ်ႁၢႆႉဢၼ်မိူၵ်ႈ ဢိၵ်ႇတင်း ၶဝ်ၸိူဝ်းဢၼ်ႁဵတ်းဢၼ်ဢမ်ႇတြႃးဢၼ်ပဵၼ်ၶဝ်ၸိူဝ်းဢၼ် လၢတ်ႈၵႂၢမ်းလေႃးၵဝတ်ႉ တီႈၵူၼ်းႁိူၼ်းၸမ်ၵၼ်တင်းၶဝ်ၼၼ်ႉၵူၺ်းလႄႈ မီးတၢင်းၵျၢမ်ႇတၢင်းပွင် ဢၼ်ဢမ်ႇလီၵႃႈၼႂ်းႁူဝ်ၸႂ်ၶဝ်ယူႇၼၼ်ႉ သေၵမ်းတီႈၶႃႈ။
၄ ၶႅၼ်းတေႃႈတွပ်ႇတႅၼ်းပၼ်ဢၵျူဝ်းဢပျႅတ်ႈ ၸွမ်းၵႃႈၼင်ႇဢၼ် တၢင်းၵမ်တၢင်းၵျၢင်ႉတၢင်းႁဵတ်းတၢင်းသၢင်ႈၶဝ်ႁၢႆႉယုတ်ႈၼၼ်ႉ သေၵမ်းတီႈၶႃႈ။ၶႅၼ်းတေႃႈတႅၼ်းပၼ်ၸွမ်းၵႃႈၼင်ႇတၢင်းႁဵတ်းတၢင်းပွင်မိုဝ်းၶဝ်ၼၼ်ႉလႄႈ ၸီႇယၢင်ႇၸွမ်းလူၺ်ႈ ဢပျႅတ်ႈၶဝ်ၼၼ်ႉသေၵမ်းတီႈၶႃႈ။
၅ လွင်ႈမၼ်းၸမ်း ပိူဝ်ႈဢၼ် ၶဝ်ဢမ်ႇမၢတ်ႈဢမ်ႇတွင်းလွင်ႈတၢင်းဢၼ်ထႃႇဝရႃႉၽြႃးပွင်ႁဵတ်းၼၼ်ႉ ဢိၵ်ႇတင်းႁွႆးမိုဝ်းမၼ်းၸဝ်ႈဢၼ်မၼ်းၸဝ်ႈသၢင်ႈႁဵတ်းၼၼ်ႉလႄႈ မၼ်းၸဝ်ႈတၵ်းဢမ်ႇတႄႇဢမ်ႇႁဵတ်းၶဝ်။တၵ်းၵိူၼ်ႇယႃႉၶဝ် ပႅတ်ႈဢေႃႈ။
၆ ႁႂ်ႈထႃႇဝရႃႉၽြႃးမီးမင်ႇၵလႃႇသေၵမ်းလူၺ်ႈ။မၼ်းၸဝ်ႈထွမ်ႇဢဝ်သဵင်တၢင်းဢၼ်ၵဝ်လဝ်ႈယွၼ်းၼၼ်ႉယဝ်ႉ။ထႃႇဝရႃႉၽြႃးပဵၼ်ႁႅင်းတၼ်းၶူဝ်း ၵဝ်ၶိူင်ႈႁႄႉလၢၵ်ႈၼၢၵ်ႈၵဝ်ဢေႃႈ။
၇ ႁူဝ်ၸႂ်ၵဝ် ဢိင်ပိုင်ႈမၼ်းၸဝ်ႈယူႇလႄႈ မၼ်းၸဝ်ႈပႂ်ႉၸွႆႈပႂ်ႉထႅမ်ၵဝ်ဢေႃႈ။
၈ ပိူဝ်ႈၼႆလႄႈႁူဝ်ၸႂ်ၵဝ်သႂၢင်ႇသိူဝ်းယူႇဢေႃႈ။ၵဝ်တၵ်းႁဵတ်းၵႂၢမ်းယူႇသေလႄႈ ယွင်ႈယေႃးမုၼ်မၼ်းၸဝ်ႈဢေႃႈ။ထႃႇဝရႃႉၽြႃးပဵၼ်ႁႅင်းတၼ်းၶူဝ်းဢေႃႈ။မၼ်းၸဝ်ႈပဵၼ် တီႈဢၼ်မၼ်ႈၶိူင်ႇဢၼ်ဝႃႈ တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ တီႈၵေႃႉဢၼ်ၶၢမ်ႇ ၽိၵ်ႉသိၵ်ႈမၼ်းၸဝ်ႈၼၼ်ႉဢေႃႈ။
၉ ၶႅၼ်းတေႃႈၵႄႇသႄႇၶျွတ်ႈဢဝ် ၵူၼ်းၸဝ်ႈႁဝ်းတင်းလၢႆလႄႈ ပၼ်တၢင်းလီမင်ႇၵလႃႇ တီႈဢမူၺ်ႇၸဝ်ႈႁဝ်းသေၵမ်းတီႈၶႃႈ။ၶႅၼ်းတေႃႈလဵင်ႉလူၶဝ်ၼၼ်ႉလႄႈႁႂ်ႈၶဝ်မီးတၢင်းဢၼ်ယုၵ်ႉယွင်ႈဝႆႉယူႇသေႇသေႇသေၵမ်းတီႈၶႃႈ။