၉
၁ ၶႃႈၸဝ်ႈ တၵ်းပႃးတင်းႁူဝ်ၸႂ်သဵင်ႈသဵင်ႈ သေလႄႈယွင်ႈယေႃးထႃႇဝရႃႉၽြႃးတီႈၶႃႈဢေႃႈ။ၶႃႈၸဝ်ႈတၵ်းၽုၺ်ႇဢွၵ်ႇၼႄပျႃး လွင်ႈတၢင်းဢၼ်လီဢၢမ်းၸဝ်ႈႁဝ်း ၵႃႈမီးတင်းသဵင်ႈတင်းလူင်ၼၼ်ႉ တီႈၶႃႈ ဢေႃႈ။
၂ ၶႃႈၸဝ်ႈတၵ်းၸူမ်းသိူဝ်းလႄႈသႂၢင်ႇၸႂ်သိူဝ်းၸႂ်ၼႂ်းၸဝ်ႈႁဝ်းတီႈၶႃႈဢေႃႈ။ၶႃႈၸဝ်ႈတၵ်းႁဵတ်းၵႂၢမ်းထေႃးပၼႃႇ တီႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။ၽြႃးဢၼ်သုင်မျၢတ်ႈၼႃႇသေပိူၼ်ႈတီႈ ၶႃႈ။
၃ လွင်ႈမၼ်းၸမ်းရၢၼ်ႇသူႇၶႃႈၸဝ်ႈၸိူဝ်းၼၼ်ႉသုတ်ႈယိုတ်းၶိုၼ်းၵႂႃႇလႄႈ ပိၼ်ႈလူမ်ႉလူႉလႅဝ်ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ၸဝ်ႈႁဝ်းယူႇၽၢႆႇ ၶႃႈၸဝ်ႈသေလႄႈတႅပ်းတတ်းတြႃးတီႈၶႃႈယဝ်ႉ။
၄ ၸဝ်ႈႁဝ်း ၼင်ႈယူႇၵႃႈၼိူဝ်ပလၢင်ႇသေလႄႈ ပဵၼ်ၸဝ်ႈဢၼ်ၸီႇယၢင်ႇၸွမ်းၼင်ႇ တၢင်းဢၼ်သိုဝ်ႈဢၼ် တေႃႇၼၼ်ႉတီႈၶႃႈဢေႃႈ။
၅ ၸဝ်ႈႁဝ်းသင်ႇသွၼ်သုင်းမႃႉ ၵူၼ်းတၢင်ႇၸိူဝ်ႉ တၢင်ႇၶိူဝ်းတင်းလၢႆတီႈၶႃႈယဝ်ႉ။ၸဝ်ႈႁဝ်းယႃႉ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉပႅတ်ႈလႄႈ မွတ်ႇၼႃႇမႃႉၸိုဝ်ႈသဵင်ၶဝ်ပႅတ်ႈၶိင်ႇၵႃႇလႃႉသိုပ်ႇ သိုပ်ႇတၢမ်ႈတၢမ်ႈတီႈၶႃႈဢေႃႈ။
၆ ရၢၼ်ႇသူႇတင်းလၢႆႁွတ်ႈထိုင်တၢင်းလူႉတၢင်းလႅဝ်လႄႈ ပဵၼ်ဢၼ်သိတ်ႇဢၼ်ယဵၼ်ယူႇသေႇသေႇတီႈၶႃႈယဝ်ႉ။ၸဝ်ႈႁဝ်းၵိူၼ်ႇယႃႉဝဵင်းတင်းလၢႆပႅတ်ႈလႄႈ တီႈမၢတ်ႈတီႈတွင်းၶဝ်ႁၢႆလၢႆၵႂႃႇထၼ်ႈပေႃး ဢမ်ႇလႆႈမီးလႃးလႃးတီႈၶႃႈ ယဝ်ႉ။
၇ ထႃႇဝရႃႉၽြႃးၸမ်းတႄႇယူႇၶိင်ႇၵႃႇလႃႉသိုပ်ႇသိုပ်ႇတၢမ်ႈတၢမ်ႈလႄႈ မၼ်းၸဝ်ႈမႄးဝႆႉႁႅၼ်းဝႆႉပလၢင်ႇ ၸဝ်ႈပုၼ်ႈဢၼ်တၵ်းၸီႇယၢင်ႇတြႃးဢေႃႈ။
၈ မၼ်းၸဝ်ႈၸီႇယၢင်ႇၵူၼ်းလိၼ်မိူင်းတင်းလၢႆ ၸွမ်းၼင်ႇတြႃးလႄႈ မၼ်းၸဝ်ႈႁဵတ်းတၢင်းဢၼ်တႅပ်းတတ်းတီႈၵူၼ်းမဵဝ်းတင်းလၢႆ ၸွမ်းၼင်ႇတၢင်းဢၼ်သိုဝ်ႈ ဢၼ်တေႃႇၼၼ်ႉတီႈၶႃႈဢေႃႈ။
၉ ထႃႇဝရႃႉၽြႃးပဵၼ်တီႈသွၼ်ႈတီႈပိုင်ႈၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉလႄႈ ပဵၼ်တီႈသွၼ်ႈတီႈပိုင်ႈၼႂ်းၶိင်ႇၵႃႇလႃႉမိူဝ်ႈဢၼ်ၽေးဢၢၼ်ႇတရႄႇ ႁွတ်ႈထိုင်ၼၼ်ႉဢေႃႈ။
၁၀ ၶဝ်ၸိူဝ်းဢၼ်ႁူႉၸၵ်းၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉ ယုမ်ႇမၢတ်ႈၸဝ်ႈႁဝ်းတီႈၶႃႈဢေႃႈ။လွင်ႈမၼ်းၸမ်းထႃႇဝရႃႉၽြႃးတီႈၶႃႈ၊ ၸဝ်ႈႁဝ်းဢမ်ႇၸုၼ်ႉပႅတ်ႈ ၶဝ်ၸိူဝ်းဢၼ်ႁႃၸဝ်ႈႁဝ်းၼၼ်ႉ တီႈၶႃႈ။
၁၁ ႁဵတ်းၵႂၢမ်းထေႃးပၼႃႇတီႈထႃႇဝရႃႉၽြႃးဢၼ်ၵိင်းဝၢပ်ႈယူႇၵႃႈၼႂ်း ဝဵင်းၸိဢုၼ်ႇ ၼၼ်ႉတႃႉ။မွၵ်ႇလၢတ်ႈလွင်ႈတၢင်း ဢၼ်မၼ်းၸဝ်ႈႁဵတ်းၸိူဝ်း ၼၼ်ႉတီႈၵူၼ်းတင်းလၢႆတႃႉ။
၁၂ ၸဝ်ႈဢၼ်ၸႅတ်ႈထၢမ်ၸႅတ်ႈတူၺ်း ဢမူႉတၢင်းဢၼ်ထွၵ်ႇလိူတ်ႈၼၼ်ႉ ၶုၵ်းၸႂ်လႆႈၶႆႈၸႂ်ထူပ်းၶဝ်ယူႇဢေႃႈ။မၼ်းၸဝ်ႈဢမ်ႇၸၢင်ႊလူင်ၸၢင်ႊလိုမ်းသဵင်ႁွင်ႉသႅၼ်ႇၶဝ်ၸိူဝ်းဢၼ်ၶၢမ်ႇတုၵ်ႉၶႃႉတၢင်းၽၢၼ်ၼၼ်ႉ။
၁၃ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈ ဢိတ်းလူၵႄႇသႄႇဢဝ်ၶႃႈၸဝ်ႈ သေၵမ်းတီႈၶႃႈ။ၶႅၼ်းတေႃႈလူႈတူၺ်း ဢမူႉတၢင်းဢၼ်ၵူၼ်း ဢၼ်ၸင်းၶႃႈၸဝ်ႈၸိူဝ်းၼၼ်ႉ ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉသေၵမ်းတီႈၶႃႈ။ၶႅၼ်းတေႃႈၼုၵ်ႈဢဝ်ၶႃႈၸဝ်ႈဢွၵ်ႇသေ ၵႃႈၼႂ်းၽၵ်းတူတင်းတၢႆၼၼ်ႉသေၵမ်းတီႈၶႃႈ။
၁၄ ပေႃးႁဵတ်းၸိူဝ်ႉၼင်ႇၼၼ်ၸိုင် ၶႃႈၸဝ်ႈတၵ်းၽုၺ်ႇဢွၵ်ႇၼႄပျႃး ၵုင်ႇၵျေးၸူးၸဝ်ႈႁဝ်းတင်းသဵင်ႈတင်းမူတ်းၵႃႈၼႂ်းႁူးၽၵ်းတူလုၵ်ႈယိင်းသၢဝ်ၸိဢုၼ်ႇ ၼၼ်ႉတီႈၶႃႈဢေႃႈ။ၶႃႈၸဝ်ႈတၵ်းသႂၢင်ႇသိူဝ်းၵႃႈၼႂ်းၵျေးၸူးတၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ တီႈ ၶႃႈဢေႃႈ။
၁၅ ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢွၼ်ၵၼ်တူၵ်းၵႃႈၼႂ်းၶုမ်ၼႂ်းလုၵ်းဢၼ်ၶဝ်ၶုတ်ႉၼၼ်ႉလႄႈ တိၼ်ၶဝ်ထုၵ်ႇမႅၼ်ႈၵႃႈၼႂ်းတူင်ႇႁဵဝ်ႉတူင်ႇၶိုမ်း ဢၼ်ၶဝ်ၵၢင်ဝႆႉၼၼ်ႉဢေႃႈ။
၁၆ ထႃႇဝရႃႉၽြႃးႁႂ်ႈတူဝ်မၼ်းၸဝ်ႈထၢင်ႇသႃး ၼႂ်းလွင်ႈတၢင်းဢၼ်မၼ်းၸဝ်ႈၸီႇယၢင်ႇတႅပ်းတတ်းတြႃးၼၼ်ႉလႄႈၵေႃႉဢၼ်ဢမ်ႇတြႃးၼၼ်ႉ လႆႈၶၢမ်ႇတၢင်းဢၼ်ထုၵ်ႇၶမ်မႅၼ်ႈၵႃႈၼႂ်းတၢင်းႁဵတ်း ဢၼ်မိုဝ်းမၼ်းႁဵတ်းၼၼ်ႉဢေႃႈ။ၸေႇလႃႇ။
၁၇ ၶဝ်ၸိူဝ်းဢၼ်ဢမ်ႇတြႃး၊ ဢၼ်ဝႃႈ၊ ၵူၼ်းမဵဝ်းဢၼ်လူင်ႈဢၼ်လိုမ်းၽြႃးပဵၼ်ၸဝ်ႈၼၼ်ႉ တၵ်းလႆႈၶၢမ်ႇတၢင်းဢၼ်ႁေႃႈၵႂႃႇၸူးၵႃႈၼႂ်း မိူင်းမႃႇရ ၼႃႉဢေႃႈ။
၁၈ ၶဝ်ၸိူဝ်း ဢၼ်ၸုတ်ႈဢၼ်လုတ်ႈၼၼ်ႉ ဢမ်ႇလႆႈၶၢမ်ႇတၢင်းဢၼ်မၼ်းၸဝ်ႈ လူင်ႈလိုမ်းယူႇသေႇသေႇလႄႈ တၢင်းမုင်ထႃႈမွင်းထႃႈၶဝ်ၸိူဝ်းဢၼ်ႁူဝ်ၸႂ်ၶျႃး တႅမ်ႇၼၼ်ႉဢမ်ႇလႆႈလူႉလႆႈသုမ်းယူႇသေႇသေႇ။
၁၉ ထႃႇဝရႃႉၽြႃးတီႈၶႃႈ၊ၶႅၼ်းတေႃႈလုၵ်ႉသေၵမ်းတီႈၶႃႈ။ယႃႇပေႁႂ်ႈၵူၼ်းလႆႈပႄႉလႆႈၼႅင်ႇသေၵမ်းတီႈၶႃႈ။ၶႅၼ်းတေႃႈ ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်း ၵႃႈတီႈ ၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။
၂၀ ထႃႇဝရႃႉၽြႃးတီႈၶႃႈ၊ၶႅၼ်းတေႃႈလွၵ်ႇငိူတ်ႈၶဝ်ၸိူဝ်းၼၼ်ႉ သေၵမ်းတီႈၶႃႈ။ၶႅၼ်းတေႃႈ ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈႁူႉလွင်ႈဢၼ်ဝႃႈ ၶဝ်ပဵၼ်ၵူၼ်းၵူၺ်းဢၼ်ဝႃႈၼၼ်ႉသေၵမ်းတီႈၶႃႈ။ၸေႇလႃႇ။