၇
လၢၵ်ႈၶၼႃႇသၢၵ်ႈသေႇဢေႇမႃႇၼူၺ်ႇလ
၁ ၼႂ်းၸူဝ်ႈပၢၼ်ၶုၼ် ဢႃႇၶတ်ႉ လုၵ်ႈၸၢႆးယုဝ်ႇထမ်ႇဢၼ်ပဵၼ်လုၵ်ႈၸၢႆးဢုဝ်ႇၸိယ ၶုၼ်ႁေႃၶမ်းယုတၼၼ်ႉရေႇၸိၼ်ႇၶုၼ်ႁေႃၶမ်းသုရိ ၶုၼ်ပေႇၵႃႇ လုၵ်ႈၸၢႆးၶုၼ်ရေႇမလိ ၶုၼ်ႁေႃၶမ်းဢိသရေႇလၸိူဝ်းၼၼ်ႉဢွၼ်ၵၼ်ၶီႇသိုၵ်းမႃးႁႂ်ႈလႆႈတိုၵ်းတေႃးဝဵင်း ယေႇရုသလႅမ်ႇဢေႃႈ။ၼႂ်းဝႃႈၼၼ်သေၵေႃႈတၢင်းၵျၢမ်ႇတၢင်း ပွင်ၶဝ်ဢမ်ႇပဵၼ်လႆႈ။
၂ ပိူၼ်ႈလၢတ်ႈတီႈမဵဝ်းၸိူဝ်ႉၶိူဝ်းတႃႇဝိတ်ႉလႄႈဝႃႈ၊-မိူင်းသုရိဢိင်ႇပိုင်ႈမိူင်းဢေႇၽရိမ်ႇယူႇဢေႃႈ၊ ဝႃႈၼင်ႇလႄႈႁူဝ်ၸႂ်ၶုၼ်လူင်ဢိၵ်ႇတင်းႁူဝ်ၸႂ်ၵူၼ်းဝၢၼ်ႈၵူၼ်းမိူင်းမၼ်းတင်းလၢႆ မီးတၢင်းဢၼ်သၼ်ႇဝႆယူႇ မိူၼ်ၸိူဝ်ႉၼင်ႇဢၼ်တူၼ်ႈမႆႉၵႃႈၼႂ်းထိူၼ်ႇတင်းလၢႆ သၼ်ႇဝႆယူႇၵွပ်ႈပိူဝ်ႈလူမ်းၼၼ်ႉဢေႃႈ။
၃ မိူဝ်ႈၼၼ်ႉ ထႃႇဝရႃႉၽြႃးမီးဢမိင်ႉဝႆႉတီႈ ဢိသႃႇယၸမ်း၊-မႂ်းဢိၵ်ႇလူၺ်ႈၵၼ်တင်းလုၵ်ႈၸၢႆးမႂ်းသႃႇၽႃႇသုပ်ႉၼၼ်ႉဢွၼ်ၵၼ်ၵႂႃႇလႄႈ ႁပ်ႉႁူဝ်တၢင်းၶုၼ်ဢႃႇၶတ်ႉ ၵႃႈတီႈပၢၵ်ႇတေႃႇၼမ်ႉၼွင်လုၵ်ႉၵႃႈၼိူဝ်ၵႃႈတီႈသဵၼ်ႈတၢင်းၵႂၢၵ်ႈလိၼ်ၵူၼ်းသၵ်ႉၶူဝ်းၼၼ်ႉလႄႈတၵ်းလႆႈသင်ႇလၢတ်ႈ တီႈမၼ်းၼၼ်ႉလႄႈဝႃႈၸမ်း၊-
၄ ႁဵတ်းသတိလႄႈယူႇၼိမ်ၼိမ်လီလီတႃႉ။ယႃႇပေမႆႈၸႂ်။ယႃႇပေၸႂ်လူႉ ၵွပ်ႈပိူဝ်ႈပွတ်းလိုၼ်ႈၽိုၼ်းသွင်လိုၼ်ႈဢၼ်ၵွၼ်းၽႆးဢွၵ်ႇယူႇဢၼ်ဝႃႈ တၢင်းဢၼ် ရေႇၸိၼ်ႇ ၶုၼ်သုရိဢိၵ်ႇတင်းလုၵ်ႈၸၢႆးရေႇမလိၸိူဝ်း ၼၼ်ႉၸႂ်မႆႈၶႆႈၸႃႉႁႅင်းၼႃႇလူင်လၢင်ၼၼ်ႉ။
၅ ပိၵ်ႉသမ်ႉမိူင်းသုရိ၊မိူင်းဢေႇၽရိမ်ႇ ဢိၵ်ႇတင်းလုၵ်ႈၸၢႆးရေႇမလိၼၼ်ႉ ၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီဢမ်ႇငၢမ်းယူႇၽၢႆႇၼိုင်ႈတင်းမႂ်းလႄႈလၢတ်ႈဝႃႈ၊-
၆ ဢွၼ်ၵၼ်ၶီႇသိုၵ်းၵႂႃႇၸူးၵႃႈတီႈမိူင်းယုတ လႄႈယႃႉယူၵ်ႉမၼ်းတႃႉႁဝ်း။ဢွၼ်ၵၼ်ၶုတ်းမူင်ႇလမ်းဝဵင်းၶဝ်ၵႂႃႇလႄႈဢဝ်လုၵ်ႈၸၢႆးတပေႇလ ၶၢၼ်းဝႆႉၼႂ်းဢရႃႇၶုၼ်ႁေႃၶမ်းၵႃႈၼႂ်းမၼ်းၼၼ်ႉတႃႉႁဝ်း၊ဝႃႈၼင်ႇၼႆသေ ၵေႃႈ၊ၸဝ်ႈထႃႇဝရႃႉၽြႃးမီးဢမိင်ႉလႄႈဝႃႈ၊-
၇ တၢင်းၵျၢမ်ႇတၢင်းပွင်ၼၼ်ႉဢမ်ႇလႆႈတႄႇဢမ်ႇလႆႈပဵၼ် ၸိူဝ်ႉၼင်ႇၼၼ်။
၈ ႁူဝ်မိူင်းသုရိၸမ်းလႆႈပဵၼ်ဝဵင်းထမ်ႇမသိတ်ႉ ႁူဝ်ဝဵင်းထမ်ႇမသိတ်ႉၸမ်းလႆႈပဵၼ်ၶုၼ်ရေႇၸိၼ်ႇဢေႃႈ။ၵူၺ်းၵႃႈၼႂ်းၸူဝ်ႈႁူၵ်းသိပ်းပၢႆႁႃႈပီႊၼၼ်ႉမိူင်းဢေႇၽရိမ်ႇၼၼ်ႉ တၵ်းလႆႈၶၢမ်ႇတၢင်းဢၼ်ႁၵ်းႁိၵ်း လူႉလႅဝ်လႄႈဢမ်ႇပဵၼ်ဝၢၼ်ႈပဵၼ်မိူင်း။
၉ ႁူဝ်ဢေႇၽရိမ်ႇၸမ်းလႆႈပဵၼ်ဝဵင်းသမႃႇရိ၊ႁူဝ်ဝဵင်းသမႃႇရိၸမ်း လႆႈပဵၼ်လုၵ်ႈၸၢႆးရေႇမလိဢေႃႈ။ပေႃးသူႇဢမ်ႇယုမ်ႇၸိုင်သူဢမ်ႇလႆႈတႄႇဝႃႈၼင်ႇၼႆဢေႃႈ။
၁၀ ထႃႇဝရႃႉၽြႃးသမ်ႉ ၶိုၼ်းမီးဢမိင်ႉတီႈၶုၼ်ဢႃႇၶတ်ႉလႄႈဝႃႈ၊-
၁၁ တွင်းပၢၼ်ႇယွၼ်းဢဝ်ၼီႈမိၵ်ႈလၢၵ်ႈၶၼႃႇတီႈထႃႇဝရႃႉၽြႃးၽြႃးပဵၼ်ၸဝ်ႈမႂ်းတႃႉ။ပဵၼ်ၵႃႈတီႈဢၼ်လိုၵ်ႉဢၼ်လမ်ႇသေဢမ်ႇဝႃႈ ပဵၼ်ၵႃႈတီႈဢၼ်ၼိူဝ်ဢၼ်သုင်သေဢမ်ႇဝႃႈ တွင်းပၢၼ်ႇယွၼ်းဢဝ်တႃႉ၊ဝႃႈၼင်ႇၼႆသေယဝ်ႉ၊ ၶုၼ်ဢႃႇၶတ်ႉၶိုၼ်းလဝ်ႈ လၢတ်ႈလႄႈဝႃႈ၊-
၁၂ ၶႃႈၸဝ်ႈဢမ်ႇတွင်းပၢၼ်ႇယွၼ်းဢဝ်တီႈၶႃႈ။ၶႃႈၸဝ်ႈဢမ်ႇၸၢမ်းတူၺ်းထႃႇဝရႃႉ ၽြႃးတီႈၶႃႈ၊ဝႃႈၼင်ႇၼႆဢေႃႈ။
၁၃ မိူဝ်ႈၼၼ်ႉဢိသႃႇယႁေႃးလၢတ်ႈလႄႈဝႃႈ၊- ၵူၼ်းမဵဝ်းၸိူဝ်ႉၶိူဝ်းတႃႇဝိတ်ႉၶဝ်ဢိူၺ်း။ ဢွၼ်ၵၼ်ထွမ်ႇငိၼ်းတႃႉ။သူၼႆႉႁႂ်ႈၵူၼ်းၸၢၼ်ႈၵူၺ်းဢမ်ႇၵႃး တၵ်းႁႂ်ႈၽြႃးပဵၼ်ၸဝ်ႈၼၼ်ႉ ၸၢၼ်ႈႁိုဝ်။
၁၄ ပိူဝ်ႈၼႆလႄႈထႃႇဝရႃႉၽြႃးၼၼ်ႉတူဝ်မၼ်းၸဝ်ႈ တၵ်းပၼ်ၼီႈမိၵ်ႈလၵ်ႈၶၼႃႇ တီႈသူဢေႃႈ။တူၺ်းလူ။ၵၢၼ်ႇၺႃႇလုၵ်ႈယိင်းသၢဝ်တၵ်းပႃးပတိၵ်ႉသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးမႃးဢေႃႈ။လုၵ်ႈၸၢႆးၼၼ်ႉၸိုင် တၵ်းလႆႈႁွင်ႉႁိၵ်ႈၸိုဝ်ႈဢေႇမႃႇၼူၺ်ႇ လဢေႃႈ။
၁၅ မၼ်းၼၼ်ႉတၵ်းလႆႈၵိၼ်ၼမ်ႉၼူမ်းၵၢမ်ႈတင်းၼမ်ႉၽိုင်ႈ တေႃႇထိုင်ႁွတ်ႈမၼ်းႁူႉလွင်ႈဢၼ်ထုၵ်ႇလီပႄႇပႅတ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ ထုၵ်ႇလီလိူၵ်ႈၵဵပ်းဢဝ်လွင်ႈတၢင်းဢၼ်လီ ဢၼ်ငၢမ်းၼၼ်ႉဢေႃႈ။
၁၆ ၸူဝ်ႈဢၼ်လုၵ်ႈဢွၼ်ၼၼ်ႉဢမ်ႇပႆႇႁူႉ လွင်ႈဢၼ်ထုၵ်ႇလီပႄႇပႅတ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ ထုၵ်ႇလီလိူၵ်ႈၵဵပ်းဢဝ်လွင်ႈတၢင်းဢၼ်လီဢၼ်ငၢမ်းၼၼ်ႉၸိုင် မိူင်းဢၼ်ၶုၼ်ႁေႃၶမ်း ဢၼ်မႂ်းၵူဝ်ႁႄသွင်ပႃး ဢုပ်ႉပိူင်ႇၼၼ်ႉတၵ်းပဵၼ်တီႈဢၼ်ၸုၼ်ႉပႅတ်ႈဢေႃႈ။
၁၇ ထႃႇဝရႃႉၽြႃး တၵ်းႁႂ်ႈမိူဝ်ႉဝၼ်းၶိင်ႇၵႃႇလႃႉဢၼ်ဢမ်ႇတွၼ်ႉပဵၼ် ၸႃႉၸဵမ်မိူဝ်ႉဝၼ်းဢၼ်မဵဝ်း ဢေႇၽရိမ်ႇၽၢတ်ႇယၢၼ်ၵၼ်တင်းမဵဝ်းယုတ ၵႂႃႇၼၼ်ႉဢၼ်ဝႃႈၶုၼ်ႁေႃၶမ်းဢႃႇသုရိၼၼ်ႉႁွတ်ႈထိုင်ၵႃႈၼိူဝ်မႂ်း၊ ၵူၼ်းမဵဝ်းမႂ်းတင်းလၢႆဢိၵ်ႇတင်း ၸိူဝ်ႉၶိူဝ်းပေႃႈမႂ်းတင်းလၢႆ ၼၼ်ႉဢေႃႈ။
၁၈ ၼႂ်းမိူဝ်ႉဝၼ်းၶိင်ႇၵႃႇလႃႉဢၼ်ထႃႇဝရႃႉၽြႃးတၵ်းႁဵတ်း သီႉသီႉသေႃႉသေႃႉ ႁွင်ႉဢဝ်မႅင်းမူၼ်းဢၼ်မီးၵႃႈတီႈၸႃႉၸဵမ်ႁူဝ်သုတ်း ၼမ်ႉႁွင်ႊဢေႇၵႅပ်ႉတုၼၼ်ႉဢိၵ်ႇတင်း ၵႃႈတီႈမေႈၽိုင်ႈဢၼ်မီးၵႃႈတီႈ မိူင်းဢႃႇသုရိၼၼ်ႉလႄႈ
၁၉ ၶဝ်ၼၼ်ႉတၵ်းဢွၼ်ၵၼ်မႃးလႄႈ တင်းသဵင်ႈတင်းလူင်တၵ်းဢွၼ်ၵၼ်ၸပ်းယူႇၵႃႈၼႂ်းၶူင်ႈႁူၺ်ႈဢၼ်သိတ်ႇၵူၼ်းယဵၼ်ၵူၼ်းၵႃႈၼႂ်းၶူင်ႈႁူၺ်ႈမၢၵ်ႇႁိၼ်မၢၵ်ႇၽႃ ၵႃႈၼိူဝ်တူၼ်ႈၼၢမ်ယုမ်းၼၢမ် ၵႃႈတီႈဢၼ်ယၢမ်ႈၵိၼ်ယူႇၵူႈတီႈၵူႈလႅၼ်ၼၼ်ႉဢေႃႈ။
၂၀ ၼႂ်းမိူဝ်ႉဝၼ်းၶိင်ႇၵႃႇလႃႉ ဢၼ်ထႃႇဝရႃႉၽြႃးတၵ်းဢဝ်မိတ်ႈႁူၼ်ဢၼ်ယိမ်ဢဝ်သေ ၵႃႈတီႈၵေႃႉဢၼ်ယူႇၽၢႆႇပုၼ်ႉၼမ်ႉႁွင်ႊလူင်ဢၼ်ဝႃႈ ၶုၼ်ႁေႃၶမ်းဢႃႇသုရိ ၼၼ်ႉလႄႈ ထႃႇၶူၼ်ႁူဝ်ဢိၵ်ႇတင်းၶူၼ်တိၼ်မႂ်းဢေႃႈ။ၼူတ်ႇၵၢင်းမႂ်းၵေႃႈမၼ်းတၵ်းထႃပႅတ်ႈ ဢေႃႈ။
၂၁ ၼႂ်းမိူဝ်ႉဝၼ်းၶိင်ႇၵႃႇလႃႉၼၼ်ႉၵူၼ်းၵေႃႉၼိုင်ႈတၵ်းလဵင်ႉဝူဝ်းမေႈဢွၼ်ႇတူဝ်ၼိုင်ႈ သူဝ်းသွင်တူဝ်လႄႈလႆႈၼမ်ႉၼူမ်းၼမ်ၼႃႇတီႈၶဝ်သေယဝ်ႉ တၵ်းၵိၼ်ၼမ်ႉ ၼူမ်းၵၢမ်ႈဢေႃႈ။
၂၂ ၵူၼ်းၵႃႈဢၼ်ၵိုတ်းဢၼ်ၵျၢၼ်ႇၵႃႈၼႂ်းမိူင်းၼၼ်ႉတၵ်းၵိၼ်ၼမ်ႉမၼ်းၵၢမ်ႈ ဢိၵ်ႇတင်းၼမ်ႉ ၽိုင်ႈဢေႃႈ။
၂၃ ၼႂ်းမိူဝ်ႉဝၼ်းၶိင်ႇၵႃႇလႃႉၼၼ်ႉသူၼ်ဢူးယဵၼ်ႇ ဢၼ်မီးတူၼ်ႈၶိူဝ်းမၢၵ်ႇၸပိတ်ႉႁဵင်ၼိုင်ႈလႄႈထိူၵ်ႈၵႃႈထိူၵ်ႈၶၼ် ငိုၼ်းႁဵင်ၼိုင်ႈၼၼ်ႉတၵ်းလႆႈပဵၼ် မဵဝ်းတူၼ်ႈၼၢမ်ၵႂႃႇၵူၺ်းၵူၺ်းၵူႈသူၼ်ဢေႃႈ။
၂၄ ၵူၼ်းတၵ်းလႆႈပႃးဢဝ်ၵၢင်ႇတင်းပိုၼ်သေလႄႈ ၵႂႃႇၵႃႈတီႈၼၼ်ႉၵွပ်ႈပိူဝ်ႈဢၼ် ၼႃႈလိၼ်တင်းသဵင်ႈတင်းမူတ်း လႆႈပဵၼ်မဵဝ်းတူၼ်ႈၼၢမ်ၵူၺ်းၵူၺ်းၼၼ်ႉဢေႃႈ။
၂၅ ၵုင်းဢၼ်ပဵၼ်တီႈဢၼ်သဵမ်ဝဵၵ်ႉၵႃႈမီးၼၼ်ႉၸမ်း ၽူႈ လႂ်ဢမ်ႇႁတ်းၵႂႃႇၵႂ်ႈၵႂႃႇၵၢႆ ၵွပ်ႈပိူဝ်ႈမဵဝ်းတူၼ်ႈၼၢမ်လႄႈတၵ်းလႆႈပဵၼ်တီႈဢၼ်ပွႆႇဝူဝ်းၵိၼ်၊ တီႈဢၼ်သူဝ်းပႄႉတင်းလၢႆယဵပ်ႇၶၢမ်ႈၵူၺ်းဢေႃႈ၊ဝႃႈၼင်ႇၼႆဢေႃႈ။