၄၉
ၶႃႈၽြႃးပဵၼ်ၸဝ်ႈ
၁ ၵူၼ်းၼႂ်းၼမ်ႉၶဝ်ဢိူၺ်း။ဢွၼ်ၵၼ်ငိၼ်းၵႂၢမ်းၵဝ်တႃႉ။မဵဝ်းၵူၼ်း ဢၼ်ယူႇၵႃႈတီႈဢၼ်ၵႆၼႃႇတင်းလၢႆၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။ထႃႇဝရႃႉၽြႃးႁွင်ႉဢဝ်ၵဝ် ၸဵမ်မိူဝ်ႈဢၼ်ၵဝ်ၸႃႉၵိူတ်ႇလဵင်ႉမႃးၼၼ်ႉလႄႈမၼ်းၸဝ်ႈမၢတ်ႈမၢႆၼႃႇမႃႉၸိုဝ်သဵင်ၵဝ်ဝႆႉ ၸႃႉၸဵမ်မိူဝ်ႈ ၵႃႈၼႂ်းတွင်ႉမေႈၵဝ်ၼၼ်ႉဢေႃႈ။
၂ မၼ်းၸဝ်ႈႁႂ်ႈသူပ်းၵဝ်ပဵၼ်ၸိူဝ်ႉၼင်ႇလၢပ်ႇဢၼ်ၽၢႆၼၼ်ႉသေလႄႈ ဢဝ်ၵဝ်သိူင်ႇလပ်ႉဝႆႉ ၵႃႈၼႂ်းႁူမ်ႈၵွင်ႉငဝ်းမိုဝ်းမၼ်းၸဝ်ႈဢေႃႈ။မၼ်းၸဝ်ႈႁႂ်ႈၵဝ်ပဵၼ်ပၢႆပိုၼ်ၵၢင်ႇဢၼ်လပ်ႉသူၺ်းမိုၼ်ႈလီၼၼ်ႉလႄႈ ဢဝ်ၵဝ်သိူင်ႇမႅပ်းဝႆႉၵႃႈၼႂ်းမူၵ်ႇပိုၼ် မၼ်းၸဝ်ႈဢေႃႈ။
၃ မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊- ဢိသရေႇလဢိူၺ်း။မႂ်းပဵၼ်ၶႃႈၵဝ်ဢေႃႈ။မူၼ်ႈၽုင်းၵဝ်တၵ်းထၢင်ႇသႃးၵွပ်ႈပိူဝ်ႈမႂ်းဢေႃႈ၊ဝႃႈၼင်ႇၼႆယဝ်ႉ။
၄ ၵဝ်ၵေႃႈလၢတ်ႈလႄႈဝႃႈ၊-ယင်းဢမ်ႇမီးဢၵျူဝ်းလႄႈၵဝ်လႆႈသၢင်ႈႁဵတ်းယဝ်ႉ။ ႁႅင်းၵဝ်လႆႈသဵင်ႈလၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ယဝ်ႉ။ၵူၺ်းၵႃႈဢမူႉၵဝ်ၼႆႉမီးယူႇတီႈထႃႇဝရႃႉၽြႃးလႄႈ ၵႃႈၶၼ်ဢၼ်ၵဝ်လႆႈၶၢမ်ႇၵေႃႈ မီးယူႇၵႃႈၼႂ်းမိုဝ်းၽြႃးပဵၼ် ၸဝ်ႈၵဝ်ဢေႃႈ၊ဝႃႈၼင်ႇၼႆဢေႃႈ။
၅ ထႃႇဝရႃႉၽြႃးဢၼ်ႁဵတ်းၵဝ်ပဵၼ်မႃး ၸႃႉၸဵမ်မိူဝ်ႈၵႃႈၼႂ်းတွင်ႉမေႈႁႂ်ႈလႆႈပဵၼ်ၶႃႈမၼ်းၸဝ်ႈ ပုၼ်ႈလွင်ႈၼင်ႇႁိုဝ်တၵ်းလႆႈဢဝ်မဵဝ်းယႃႇၵုပ်ႉ သမ်ႉၶိုၼ်းမႃးၸူးတီႈမၼ်းၸဝ်ႈႁႂ်ႈမဵဝ်းဢိသရေႇလ မီးတၢင်းဢၼ်ၸူႉၵၼ်တုမ်ၵၼ်တီႈမၼ်းၸဝ်ႈဢိၵ်ႇတင်း လွင်ႈၼင်ႇႁိုဝ်ၵဝ်တၵ်းမီးသရေႇသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၽြႃးပဵၼ်ၸဝ်ႈၵဝ်တၵ်းပဵၼ်ႁႅင်းတၼ်းၶူဝ်းၵဝ်ၼၼ်ႉ မီးဢမိင်ႉဝႆႉၸမ်း
၆ လွင်ႈတၢင်းဢၼ်မႂ်းပဵၼ်ၶႃႈၵဝ်ႁႂ်ႈလႆႈ ယုၵ်ႉယွင်ႈမဵဝ်းယႃႇၵုပ်ႉၵူႈမဵဝ်းလႄႈႁႂ်ႈမဵဝ်းဢိသရေႇလ ဢၼ်လွတ်ႈၽေးရၢၼ်ႇ လႆႈပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉၸိုင်ပဵၼ်လွင်ႈတၢင်းဢၼ်လဵၵ်ႉဢၼ်ဢွၼ်ႇဢေႃႈ။လိူဝ်တွၼ်းသေ လွင်ႈတၢင်းၼၼ်ႉဢမ်ႇၵႃးၵဝ်ၶၢၼ်းမႂ်းဝႆႉပုၼ်ႈဢၼ်တၵ်းပဵၼ်ဢၼ်လႅင်းလီ တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ႁႂ်ႈမႂ်းလႆႈႁဵတ်းတၢင်းဢၼ်ၵႄႇသႄႇၶျွတ်ႈဢဝ်ၵဝ်တေႃႇထိုင်ႁွတ်ႈတီႈလႅၼ်သုတ်းလိၼ်မိူင်းယဝ်ႉ၊ဝႃႈၼင်ႇၼႆဢေႃႈ။
၇ ထႃႇဝရႃႉၽြႃး ၸဝ်ႈဢၼ်ထုတ်ႇဢဝ်မဵဝ်းဢိသရေႇလၸဝ်ႈဢၼ်မူတ်းၸၢင်ႇမဵဝ်းၶဝ်ၼၼ်ႉ မီးဢမိင်ႉဝႆႉတီႈၵေႃႉဢၼ်ၵူၼ်းတင်းလၢႆႁဵတ်းဢမ်ႇပေႃးၼင်ႇႁိုဝ်၊ဢၼ်ပဵၼ်တီႈဢၼ်မိူင်းတၢင်ႇမိူင်းလီႁင်ႈဢဵတ်ႇသဵတ်ႇ ဢၼ်လႆႈၶၢမ်ႇႁဵတ်းၶႃႈတီႈၶုၼ်တင်းလၢႆၼၼ်ႉၸမ်းၵွပ်ႈပိူဝ်ႈထႃႇဝရႃႉၽြႃးဢၼ်မီးသႅတ်ႉၸႃႇ၊ ၽြႃးဢၼ်မူတ်းၸၢင်ႇမဵဝ်းဢိသရေႇလ ဢၼ်လိူၵ်ႈၵဵပ်းဢဝ်မႂ်းၼၼ်ႉလႄႈ ၶုၼ်ႁေႃၶမ်းတင်းလၢႆတၵ်းႁၼ်လႄႈဢွၼ်ၵၼ်လုၵ်ႉဢေႃႈ။ ၶုၼ်တင်းလၢႆၵေႃႈတၵ်းႁၼ်လႄႈ ဢွၼ်ၵၼ်ၶိုၼ်းၸူႉတုမ်ၵူၼ်းမဵဝ်းဢိသရေႇလၵူဝ်းၵႂၢႆႇၼၼ်ႉဢေႃႈ။
၈ ထႃႇဝရႃႉၽြႃးမီးဢမိင်ႉဝႆႉၸမ်း၊-ၵဝ်ထွမ်ႇဢဝ်ၵႂၢမ်းမႂ်း ၼႂ်းၶိင်ႇၵႃႇလႃႉဢၼ်လီထုၵ်ႇၸႂ်ၵျိူၵ်ႈၸႂ်ၼၼ်ႉလႄႈ ၵဝ်ၸွႆႈထႅမ်မႂ်းယူႇၼႂ်းမိူဝ်ႉဝၼ်းတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉယဝ်ႉ။ၵဝ်တၵ်းပႂ်ႉလူပႂ်ႉတူၺ်းမႂ်းလႄႈၶၢၼ်းမႂ်းဝႆႉပုၼ်ႈဢၼ်တၵ်းႁဵတ်းပတိၺိၼ်ႇတြႃး တီႈၵူၼ်းတင်းလၢႆႁႂ်ႈမႂ်းလႆႈပွင်ႁဵတ်း
ပွင်မႄးမိူင်းၸဝ်ႈယူႇသေလႄႈ ႁႂ်ႈၶဝ်လႆႈၶၢမ်ႇဢဝ်ဢမူၺ်ႇတီႈၶဝ် ဢမူၺ်ႇဢၼ်သိတ်ႇဢၼ်ယဵၼ်ၸိူဝ်းၼၼ်ႉ၊ ဢိၵ်ႇတင်းႁႂ်ႈလႆႈလၢတ်ႈတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉလႄႈဝႃႈ၊-ဢွၵ်ႇမႃးတႃႉ၊ဝႃႈၼင်ႇၼႆလႄႈ လၢတ်ႈတီႈၶဝ်ၸိူဝ်းဢၼ်ယူႇၼႂ်းဢၼ်လပ်းသိင်ႇၼၼ်ႉလႄႈဝႃႈ၊-ဢဝ်ႁႂ်ႈတူဝ်သူပေႃႇ မႃးတႃႉ၊ဝႃႈၼင်ႇၼႆဢေႃႈ။
၉ ပိူဝ်ႈၼႆလႄႈၶဝ်ၼၼ်ႉတၵ်းလႆႈၵိၼ်ၸွမ်းတႃႈၸွမ်းတၢင်းလႄႈ ထူပ်းတီႈၵိၼ်ၵႃႈၼိူဝ်တီႈဢၼ်သုင် ဢၼ်ႁႅင်ႈဢၼ်ႁွင်တင်းသဵင်ႈတင်းလူင်ဢေႃႈ။
၁၀ ၶဝ်ၼၼ်ႉဢမ်ႇလႆႈဢိုပ်းတၢင်းၵိၼ်တၢင်းၶူပ်း။ဢမ်ႇလႆႈယၢၵ်ႈၼမ်ႉယၢၵ်ႈၼၢႆး။ဢမ်ႇလႆႈၶၢမ်ႇဢၼ်မႆႈဢၼ်ႁွၼ်ႉ။ ဢရွင်ႇသၢႆဝၼ်းဢမ်ႇလႆႈတိူဝ်ႉလႆႈထုၵ်ႇ။ လွင်ႈမၼ်းၸမ်းၸဝ်ႈဢၼ်ဢိတ်းလူၶဝ်ၼၼ်ႉတၵ်းဢဝ်ၶဝ်သူင်ႇၵႂႃႇလႄႈၼႄပၼ်သဵၼ်ႈ တၢင်းၵႃႈတီႈႁိမ်းၼမ်ႉဢွၵ်ႇႁူးတင်းလၢႆဢေႃႈ။
၁၁ ၵဝ်တၵ်းႁႂ်ႈလွႆၵဝ်ၵႃႈမီး ပဵၼ်သဵၼ်ႈတၢင်းဢၼ်တၵ်းၵႂႃႇလႄႈ တႅၼ်ႊလိၼ်ၵဝ်တင်းလၢႆၵေႃႈ တၵ်းလႆႈသုင် ဢေႃႈ။
၁၂ တူၺ်းလူ။ၶဝ်ၸိူဝ်းၼႆႉတၵ်းလုၵ်ႉသေၵႃႈတီႈဢၼ်ၵႆပုၼ်ႉမႃးဢေႃႈ။တူၺ်းလူ။ၶဝ်ၸိူဝ်းၼၼ်ႉတၵ်းလုၵ်ႉသေၵႃႈတီႈၼႃႈတၢင်းႁွင်ႇဢိၵ်ႇတင်းၵႃႈတီႈၼႃႈဝၼ်းတူၵ်းမႃးဢေႃႈ။ၶဝ်ၸိူဝ်းၼၼ်ႉၵေႃႈတၵ်းလုၵ်ႉသေၵႃႈတီႈမိူင်းသိၼိမ်ႇ မႃးဢေႃႈ၊ဝႃႈၼင်ႇၼႆဢေႃႈ။
၁၃ ၾႃႉၵၢင်ႁၢဝ်ဢိူၺ်း။ႁဵတ်းၵႂၢမ်းတႃႉ။လိၼ်မိူင်းဢိူၺ်း။မီးတၢင်းဢၼ်ၸူမ်းသိူဝ်းတႃႉ။လွႆတင်းလၢႆၶဝ်ဢိူၺ်း။ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇသိူဝ်းတႃႉ။လွင်ႈမၼ်းၸမ်းထႃႇဝရႃႉၽြႃး ႁႂ်ႈၵူၼ်းမၼ်းၸဝ်ႈတင်းလၢႆသၢၵ်ႈသႃႇလႄႈ တၵ်းဢိတ်းလူၵူၼ်းမၼ်းၸဝ်ႈတင်းလၢႆ ဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၸိူဝ်းၼၼ်ႉဢေႃႈ။
၁၄ ၸိဢုၼ်ႇလၢတ်ႈလႄႈဝႃႈ၊-ထႃႇဝရႃႉၽြႃးၸုၼ်ႉပႅတ်ႈၵဝ်ယဝ်ႉ။ၸဝ်ႈၽြႃးလူင်လိုမ်းၵဝ်ယဝ်ႉ၊ဝႃႈၼင်ၼႆဢေႃႈ။
၁၅ မေႈယိင်းတၵ်းလူင်လိုမ်းလုၵ်ႈဢွၼ်ႇၵိၼ်ၼူမ်းမၼ်းယူႇတေႃႇထိုင်ႁွတ်ႈထၼ်ႈပေႃး ဢမ်ႇဢိတ်းလူလုၵ်ႈလၢင်း ဢၼ်မၼ်းၵိူတ်ႇလဵင်ႉမႃးၼၼ်ႉလႆႈႁိုဝ်။ၸႂ်ႈယဝ်ႉ။မၼ်းလူင်လိုမ်းလႆႈယူႇဢမၢၼ်ႇၶၢၼ်ပဵၼ် ဢေႃႈ။
၁၆ ၵူၺ်းၵႃႈၵဝ်တၵ်းဢမ်ႇလူင်လိုမ်းမႂ်း။တူၺ်းလူ။ၵဝ်ဢဝ်မႂ်းသမ်းသႂ်ႇဝႆႉ ၵႃႈၼႂ်းၽႃႇမိုဝ်းၵဝ်ယဝ်ႉယဝ်ႉ။လမ်းဝဵင်းမႂ်းၼၼ်ႉမီးယူႇၵႃႈတီႈၽၢႆႇၼႃႈၵဝ်တႃႇ သေႇဢေႃႈ။
၁၇ လုၵ်ႈလၢင်းမႂ်းၸိူဝ်းၼၼ်ႉတၵ်းဢွၼ်ၵၼ်ႁဵတ်းၶၼ်ၶၼ်ၽႂ်းၽႂ်းလႄႈ ၶဝ်ၸိူဝ်းဢၼ်ယႃႉပႅတ်ႈမႂ်း ၶဝ်ၸိူဝ်းဢၼ်ႁိမ်ဢဝ်ႁူင်ႇဢဝ်မႂ်းၸိူဝ်းၼၼ်ႉ တၵ်းဢွၼ်ၵၼ်ဢွၵ်ႇသေၵႃႈတီႈမႂ်းၵႂႃႇဢေႃႈ။
၁၈ ႁႅၼ်မၢၵ်ႇတႃမႂ်းၸူးၵူႈတီႈၵူႈလႅၼ်လႄႈ တူၺ်းတႃႉ။ၶဝ်တင်းသဵင်ႈတင်းလူင်ၸိူဝ်းၼႆႉ ၸူႉၵၼ်တုမ်ၵၼ်လႄႈမႃးၵႃႈတီႈမႂ်းဢေႃႈ။ထႃႇဝရႃႉၽြႃးမီးဢမိင်ႉဝႆႉၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ မႂ်းတၵ်းဢဝ်ၶဝ်ၼုင်ႈမႆႊမိူၼ်ၸိူဝ်ႉၼင်ႇဢၼ် ဢဝ်ၶူဝ်းၼုင်ႈဢၼ်ႁၢင်ႈလီၼၼ်ႉၼုင်ႈမႆႊၼၼ်ႉလႄႈ ဢဝ်ၶဝ်ႁၢင်ႈၶိူင်ႈမိူၼ်ၸိူဝ်ႉၼင်ႇ လုၵ်ႈယိင်းဢၼ်သွင်ႇမၢင်ႇၵလႃႇ ႁဵတ်းၼၼ်ႉဢေႃႈ။
၁၉ တီႈဢၼ်ႁၢမ်းမႂ်း၊တီႈဢၼ်သိတ်ႇၵူၼ်းယဵၼ်ၵူၼ်းမႂ်း၊ မိူင်းဢၼ်လူႉလႅဝ်မႂ်းၸိူဝ်းၼၼ်ႉၸမ်း မႂ်းတၵ်းမီးတၢင်းဢၼ်ၵိတ်ႇဢၼ်ၵႅပ်ႈၵွပ်ႈပိူဝ်ႈၵေႃႉဢၼ်ယူႇမီးၼမ်ၼႃႇၼၼ်ႉဢေႃႈ။ၶဝ်ၸိူဝ်းဢၼ်ဢိုၼ်ၵိၼ်မႂ်းပႅတ်ႈၼၼ်ႉၵေႃႈတၵ်းမီးတီႈဢၼ်ၵႆ ဢေႃႈ။
၂၀ လုၵ်ႈလၢင်းမႂ်းဢၼ်ဢမ်ႇပႆႇမီးလုၵ်ႈလၢင်းၼၼ်ႉၸိူဝ်းၼၼ်ႉ တၵ်းလၢတ်ႈထိုင်ႁူမႂ်းလႄႈဝႃႈ၊-တီႈယူႇတီႈသဝ်း ပဵၼ်ဢၼ်ၵိတ်ႇဢၼ်ၵႅပ်ႈၶႃႈဢေႃႈ။ၶႅၼ်းတေႃႈပၼ်တီႈဢၼ်တၵ်းယူႇတၵ်းသဝ်းသေၵမ်းၶႃႈ၊ဝႃႈၼင်ႇၼႆလူးၵွၼ်ႇဢေႃႈ။မိူဝ်ႈၼၼ်ႉမႂ်းတၵ်းထၢင်ႇၼႂ်းၸႂ်မႂ်းလႄႈဝႃႈ၊- ၽူႈ လႂ်ႁႂ်ႈၶဝ်ၼႆႉပဵၼ်မႃး တီႈၵဝ်။
၂၁ ၵဝ်ပဵၼ်ၵေႃႉဢၼ်ၽၢၼ်လုၵ်ႈၽၢၼ်လၢင်း၊ၵေႃႉဢၼ်လႆႈယူႇတူဝ်လဵဝ်ၶိင်းလဵဝ်ၵူၺ်း၊ ၵေႃႉဢၼ်လႆႈယူႇတၢင်ႇသိုင်ႇတၢင်ႇမိူင်း၊ၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈယူႇလႄႈ ၽူႈ လႂ်ႁႂ်ႈၶဝ်ၼႆႉပဵၼ်မႃး။တူၺ်းလူ။ၵဝ်ၼႆႉယူႇၵေႃႉလဵဝ်ၵူၺ်းလႄႈၶဝ်ၼႆႉလုၵ်ႉၵႃႈတီႈ လႂ်မႃး၊ဝႃႈၼင်ႇၼႆဢေႃႈ။
၂၂ ၸဝ်ႈထႃႇဝရႃႉၽြႃးမီးဢမိင်ႉဝႆႉၸမ်း၊-တူၺ်းလူ။ၵဝ်တၵ်းယုၵ်ႉမိုဝ်းၵဝ်ၸူးတီႈ ၵူၼ်းၵူႈသိုင်ႇၵူႈမိူင်းလႄႈပူၵ်းလၢမ်ႇၵဝ်တီႈၵူၼ်းၵူႈၸိူဝ်ႉၵူႈမဵဝ်းဢေႃႈ။ၶဝ်ၼၼ်ႉတၵ်းႁွပ်ႇဢဝ်ဢုမ်ႈဢဝ်လုၵ်ႈၸၢႆးမႂ်းတင်းလၢႆ ဝႆႉၵႃႈၼႂ်းဝၢင်ႈႁူဝ်ဢူၵ်းၶဝ်ယူႇ၊ ဢဝ်လုၵ်ႈယိင်းမႂ်းတင်းလၢႆတၢင်ႇသႂ်ႇၵႃႈၼိူဝ်ႁူဝ်မႃႇၶဝ်ယူႇသေလႄႈ တၵ်းဢွၼ် ၵၼ်ဢဝ်မႃးဢေႃႈ။
၂၃ ၶုၼ်ႁေႃၶမ်းတင်းလၢႆတၵ်းပဵၼ်ပေႃႈလဵင်ႉပေႃႈထိင်းမႂ်း၊ ၼၢင်းႁေႃၶမ်းၶဝ်တင်းလၢႆတၵ်းပဵၼ်မေႈဢၼ်ၵဵပ်းမႂ်းလဵင်ႉဝႆႉဢေႃႈ။ၶဝ်ၼၼ်ႉတၵ်းဢွၼ်ၵၼ်ၵူမ်ႈႁူဝ်ၶုပ်ႉမူပ်ႇဢဝ်ၼႃႈၶဝ် ငူပ်ႉလိၼ်ၵႃႈတီႈၽၢႆႇၼႃႈမႂ်းလႄႈ လေးၵိၼ်မုၼ်ႈလိၼ်ၵႃႈတီႈတိၼ်မႂ်းဢေႃႈ။ မႂ်းတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢိၵ်ႇတင်း လွင်ႈဢၼ်ၶဝ်ၸိူဝ်းဢၼ်မုင်ႈမွင်းၵဝ်ယူႇၼၼ်ႉ ဢမ်ႇလႆႈမီး တၢင်းဢၼ်ဢူၵ်းဢၼ်ဢၢႆ ၼၼ်ႉဢေႃႈ။
၂၄ တၵ်းလႆႈဢဝ်ၶွင်ၶူဝ်းဢၼ်ႁိမ်ဢဝ်လႆႈၼၼ်ႉဢွၵ်ႇသေၵႃႈၼႂ်း မိုဝ်းၵေႃႉဢၼ်ႁႅင်းယႂ်ႇၼၼ်ႉႁိုဝ်။တၵ်းလႆႈၼုၵ်ႈဢဝ်ၶဝ်ၸိူဝ်းဢၼ်ဢမ်ႇတြႃးသိမ်း ဢဝ်ၵႂႃႇၼၼ်ႉႁိုဝ်။
၂၅ ထႃႇဝရႃႉၽြႃးမီးဢမိင်ႉဝႆႉၸမ်း၊-ၶဝ်ၸိူဝ်းဢၼ်ႁႅင်းယႂ်ႇသိမ်းဢဝ်ၵႂႃႇၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်လွတ်ႈဢမၢၼ်ႇၶၢၼ်ပဵၼ်လႄႈ ၶွင်ၶူဝ်းၵေႃႉဢၼ်လီၵူဝ်လီႁႄႁိမ်ဢဝ်ၵွုႇၼၼ်ႉ တၵ်းလႆႈၶၢမ်ႇတၢင်းဢၼ်ၼုၵ်ႈဢဝ်ဢွၵ်ႇဢေႃႈ။ၵဝ်တၵ်းၽိတ်းၵၼ်တင်း ၵေႃႉဢၼ်ၽိ်တ်းၵၼ်တင်းမႂ်းၼၼ်ႉလႄႈၵႄႇသႄႇၶျွတ်ႈဢဝ်လုၵ်ႈမႂ်းလၢင်းမႂ်းဢေႃႈ။
၂၆ ၵဝ်တၵ်းဢဝ် ၼိူဝ်ႉၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးမႂ်းၼၼ်ႉၶိုၼ်းလဵင်ႉပၼ်ၶဝ်လႄႈၶဝ်ၼၼ်ႉတၵ်းလႆႈမဝ်းလူၺ်ႈလိူတ်ႈတူဝ်ၸဝ်ႈၵဝ်ႇ မိူၼ်ၸိူဝ်ႉၼင်ႇဢၼ်မဝ်းလူၺ်ႈၼမ်ႉၸပိတ်ႉဢၼ်ဝၢၼ်ၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ၵူၼ်းသတ်ႉတဝႃႇတင်းသဵင်ႈတင်းလူင်တၵ်းလႆႈႁူႉ လွင်ႈဢၼ် ထႃႇဝရႃႉၽြႃးၼႆႉပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်မႂ်း၊ ၸဝ်ႈဢၼ်ထုတ်ႇဢဝ်မႂ်း၊ၽြႃးဢၼ်တၼ်းၶူဝ်းယႂ်ႇတီႈမဵဝ်းယႃႇၵုပ်ႉ ၼၼ်ႉဢေႃႈ၊ဝႃႈၼင်ႇၼႆဢေႃႈ။