၄၀
တၢင်းဢၼ်ပၼ်ၸႂ်ၼိမ်တီႈၵူၼ်းၸဝ်ႈၽြႃး
၁ ၽြႃးပဵၼ်ၸဝ်ႈသူမီးဢမိင်ႉဝႆႉၸမ်း၊- သူဢွၼ်ၵၼ်ႁႂ်ႈၵူၼ်းၵဝ်တင်းလၢႆပျေႇၸႂ်ၼိမ်ၸႂ်တႃႉ။ႁႂ်ႈပျေႇၸႂ်ၼိမ်ၸႂ်တႃႉ။ ဢွၼ်ၵၼ်လၢတ်ႈၵႂၢမ်းဢၼ်ႁႂ်ႈပျေႇၸႂ်ၼိမ်ၸႂ်ၼၼ်ႉတီႈယေႇရုသလႅမ်ႇ လႄႈႁွင်ႉသႅၼ်ႇတီႈမၼ်းလူၺ်ႈလွင်ႈဢၼ် ၶိင်ႇဢၼ်မၼ်းလႆႈႁပ်ႉဢမူႉသိုၵ်းသဵင်ႈယဝ်ႉလႄႈဢပျႅတ်ႈမၼ်းၵေႃႈပျေႇမူတ်းယဝ်ႉ ၼၼ်ႉတႃႉ။
၂ လွင်ႈမၼ်းၸမ်းဢပျႅတ်ႈမၼ်းၵႃႈမီးၼၼ်ႉမၼ်းလႆႈၶၢမ်ႇဢဝ်သွင်ပုၼ်ႈ တီႈမိုဝ်းထႃႇဝရႃႉၽြႃး ယဝ်ႉ။
၃ သဵင်ၵေႃႉဢၼ်ႁွင်ႉသႅၼ်ႇၵႃႈတီႈၼႂ်းထိူၼ်ႇလႄႈဝႃႈ၊- မႄးသဵၼ်ႈတၢင်းထႃႇဝရႃႉၽြႃးတႃႉ။ႁႂ်ႈတၢင်း ၽြႃးပဵၼ်ၸဝ်ႈသိုဝ်ႈၵႃႈတီႈပၢင်ႇပဵင်းၼၼ်ႉတႃႉ။
၄ တီႈဢၼ်ၶူင်ႈဢၼ်ဢၼ်ယၢၼ်းၵႃႈမီးၸိုင် တၵ်းလႆႈထိူမ်ဢေႃႈ။လွႆလူင်လွႆဢွၼ်ႇၵႃႈမီးၸိုင်တၵ်းလႆႈၵိူၼ်ႇႁႂ်ႈတဵမ်ဢေႃႈ။
သဵၼ်ႈတၢင်းဢၼ်ၵူတ်ႉဢၼ်ငွၵ်းတင်းလၢႆၸိုင်တၵ်းလႆႈႁႂ်ႈသိုဝ်ႈဢေႃႈ။တၢင်းဢၼ်ႁူၵ်ႉႁၢၵ်ႉၶူၵ်ႉၶီႉၶူၵ်ႉၶၢၵ်ႉတင်းလၢႆၵေႃႈတၵ်းလႆႈၽဵဝ်ႈႁႂ်ႈလိူမ်ႈဢေႃႈ။
၅ မူၼ်ႈၽုင်းထႃႇဝရႃႉၽြႃး တၵ်းထၢင်ႇသႃးပေႃႇမႃးလႄႈ ၵူၼ်းတင်းသဵင်ႈတင်းလူင်တၵ်းလႆႈႁၼ်ၼင်ႇၵၼ်ဢေႃႈ၊ ဝႃႈၼင်ႇၼႆလႄႈသူပ်းထႃႇဝရႃႉၽြႃး မီးဢမိင်ႉဢေႃႈ။
၆ လၢႆးသမ်ႉသဵင်ၵေႃႉၼိုင်ႈလၢတ်ႈလႄႈဝႃႈ၊-ႁွင်ႉပၢဝ်ႇႁွင်ႉသေႃႇတႃႉ၊ ဝႃႈၼင်ႇၼႆလႄႈ ၵေႃႉၼိုင်ႈထၢမ်လႄႈဝႃႈ၊-ၵဝ်တၵ်းလႆႈဢဝ်လွင်ႈၵႃႈသင်ႁွင်ႉပၢဝ်ႇႁွင်ႉသေႃႇ၊မိူဝ်ႈဢၼ်ဝႃႈၼင်ႇၼႆၸိုင်မၼ်းလၢတ်ႈလႄႈဝႃႈ၊-ၼိူဝ်ႉၵူၼ်းလိူတ်ႈၵူၼ်းၵႃႈမီး ပဵၼ်တူၼ်ႈယိူဝ်ႈယႃႈလႄႈမူၼ်ႈၽုင်းမၼ်းၵႃႈမီး ပဵၼ်ၸိူဝ်ႉၼင်ႇမွၵ်ႇၵႃႈၼႂ်း ထိူၼ်ႇၼၼ်ႉဢေႃႈ။
၇ တူၼ်ႈယိူဝ်ႈယႃႈၼၼ်ႉၸၢင်ႊႁဵဝ်ႇၸွပ်ႈႁႅင်ႈၵႂႃႇလႄႈ မွၵ်ႇမၼ်းၵေႃႈၸၢင်ႊႁူင်ႈၵႂႃႇၼႂ်းမိူဝ်ႈဢၼ်လူမ်းထႃႇဝရႃႉၽြႃးထူဝ်းၼၼ်ႉဢေႃႈ။ၵူၼ်းတင်းလၢႆပဵၼ်တူၼ်ႈယိူဝ်ႈတူၼ်ႈယႃႈ ဢမၢၼ်ႇၶၼ် ပဵၼ်ဢေႃႈ။
၈ တူၼ်ႈယိူဝ်ႈတူၼ်ႈယႃႈၼၼ်ႉၸၢင်ႊႁဵဝ်ႇၸွပ်ႈယူတ်းႁႅင်ႈၵႂႃႇလႄႈ မွၵ်ႇမၼ်းၵေႃႈၸၢင်ႊႁူင်ႈၵႂႃႇဢေႃႈ။ၼုၵ်ႈၵပၢတ်ႈထႃႇဝရႃႉၽြႃးၸမ်းတႄႇယူႇၵူႈၶိင်ႇၵူႈၶႃႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇ ၼႆဢေႃႈ။
၉ ၵေႃႉဢၼ်မွၵ်ႇလၢတ်ႈသတၢင်းသိူဝ်းပျေႃႇတီႈလွႆၸိဢုၼ်ႇဢိူၺ်း။ ၶိုၼ်ႈၵႃႈၼိူဝ်လွႆဢၼ်သုင်တႃႉ။ၵေႃႉဢၼ်မွၵ်ႇလၢတ်ႈသတၢင်းသိူဝ်းပျေႃႇတီႈဝဵင်းယေႇရုသလႅမ်ႇဢိူၺ်း။ဢဝ်တင်းႁႅင်းသေလႄႈသႅၼ်ႇသဵင်ၵိဝ်သဵင်တႃႉ။လၢတ်ႈတီႈဝၢၼ်ႈတီႈဝဵင်းယုတ တင်းလၢႆလႄႈဝႃႈ၊- ဢွၼ်ၵၼ်တူၺ်းၽြႃးပဵၼ်ၸဝ်ႈသူ တႃႉ၊ဝႃႈၼင်ႇၼႆတႃႉ။
၁၀ တူၺ်းလူ။ၸဝ်ႈထႃႇဝရႃႉၽြႃးၼၼ်ႉတၵ်းပႃးတင်းတၼ်းၶူဝ်းဢၼ်ယႂ်ႇၼႃႇမႃးလႄႈ ဢဝ်ၶဵၼ်မိုဝ်းမၼ်းၸဝ်ႈဢုပ်ႉပိူင်ႇပုၼ်ႈမၼ်းၸဝ်ႈ ဢေႃႈ။
၁၁ တူၺ်းလူ။ၵႃႈၶၼ်ဢၼ်မၼ်းၸဝ်ႈထိူၵ်ႈၶၢမ်ႇဢဝ်ၼၼ်ႉပႃးတီႈမၼ်းၸဝ်ႈယူႇလႄႈ သူးလၢပ်ႈမၼ်းၸဝ်ႈၸိူဝ်းၼၼ်ႉ မီးယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။မၼ်းၸဝ်ႈ တၵ်းလဵင်ႉလူၽုင်သူဝ်းမၼ်းၸဝ်ႈယူႇမိူၼ်ၸိူဝ်ႉၼင်ႇၵူၼ်းဢၼ်လဵင်ႉသူဝ်းထိင်းသူဝ်းၼၼ်ႉလႄႈ ႁွပ်ႇဢဝ်သူဝ်းဢွၼ်ႇတင်းလၢႆဝႆႉၵႃႈၼႂ်းၶႅၼ်ၼႂ်းမိုဝ်း မၼ်းၸဝ်ႈသေလႄႈၵွတ်ႇဢဝ်ဢုမ်ႈဢဝ်ဝႆႉၵႃႈၼႂ်းဝၢင်ႈႁူဝ်ဢူၵ်းမၼ်းၸဝ်ႈဢေႃႈ။သူဝ်းမေႈဢၼ်မီးလုၵ်ႈဢွၼ်ႇ ဢၼ်ၵိၼ်ၼူမ်းၸိူဝ်းၼၼ်ႉၵေႃႈမၼ်းၸဝ်ႈ တၵ်းၵွႆႈတဵင်ႇဢဝ်သူင်ႇၵႂႃႇထိူင်းထိူင်းလွႆးလွႆး ဢေႃႈ။
၁၂ ၵေႃႉဢၼ်ဢဝ်ဢူင်ႈမိုဝ်းတုင်းတူၺ်းၼမ်ႉ၊ ဢဝ်မိုဝ်းၶိုပ်ႈတူၺ်းတႅၵ်ႈတူၺ်း ၾႃႉၵၢင်ႁၢဝ်၊ ဢဝ်ၵွၵ်းတၢင်ၵွၵ်းၶႂၢႆးၼပ်ႉတူၺ်းတူင်တူၺ်းမုၼ်ႈလိၼ်၊ ဢဝ်ယႃႇၸူႇ ၸင်ႈတူၺ်းႁိဝ်ႈတူၺ်းလွႆလူင်တင်းလၢႆလႄႈဢဝ်ယွႆးၸင်ႈတူၺ်းႁိဝ်ႈတူၺ်း လွႆဢွၼ်ႇတင်းလၢႆ ၼၼ်ႉၸမ်း၊ပဵၼ်ၽူႈ လႂ်။
၁၃ ၽူႈ လႂ်ၸႅတ်ႈတူၺ်းထၢမ်တူၺ်းဝိၺိၺ်ႇထႃႇဝရႃႉၽြႃး။ၽူႈ လႂ်တိူင်ႇပၢင်ႇၵၼ်တင်းမၼ်းၸဝ်ႈသေလႄႈ ပၼ်တၢင်းၵျၢမ်ႇတၢင်းပွင်။
၁၄ မၼ်းၸဝ်ႈတိူင်ႇပၢင်ႇႁူမ်ႈလူၺ်ႈၵၼ်တင်းၽူႈ လႂ်။ၽူႈ လႂ်သင်ႇသွၼ်ႇပၼ်မၼ်းၸဝ်ႈလႄႈၼႄပျုႉသဵၼ်ႈတၢင်းတြႃးတီႈမၼ်းၸဝ်ႈ။ၽူႈ လႂ်ၽုၺ်ႇဢွၵ်ႇၼႄပၼ်ပိင်ႇၺႃႇတီႈမၼ်းၸဝ်ႈလႄႈ ၸီႉၼႄသဵၼ်ႈတၢင်းၺၢၼ်ႇတီႈမၼ်းၸဝ်ႈ။
၁၅ ၵူၼ်းၵူႈၸိူဝ်ႉၵူႈမဵဝ်းပဵၼ်ၸိူဝ်ႉၼင်ႇယွတ်ႇၼမ်ႉဢၼ်တူၵ်းသေ ၵႃႈတီႈပုင်းၼမ်ႉၼၼ်ႉလႄႈ လႆႈၶၢမ်ႇတၢင်းဢၼ်မၢတ်ႈပဵၼ်ၸိူဝ်ႉၼင်ႇမုၼ်ႈဢွၼ်ႇဢၼ်ၸပ်းတီႈယႃႇၸူႇၼၼ်ႉဢေႃႈ။ တူၺ်းလူ။ မၼ်းၸဝ်ႈယိပ်းၵမ်ဢဝ်ၵူၼ်းၼႂ်းၼမ်ႉတင်းလၢႆယုၵ်ႉၶိုၼ်ႈ မိူၼ်ၸိူဝ်ႉၼင်ႇမုၼ်ႈဢွၼ်ႇၽွင်ဢွၼ်ႇဢၼ် လဵၵ်ႉၼႃႇသေပိူၼ်ႈၼၼ်ႉဢေႃႈ။
၁၆ ထိူၼ်ႇလေႇပၼုၼ်ႇၼၼ်ႉ ဢမ်ႇပေႃးဢမ်ႇၵုမ်ႇ ပုၼ်ႈဢၼ်တၵ်းသႂ်ႇၽႆးၸပ်းၽႆး။တရိၵ်ႈသၢၼ်ႇဢၼ်မီးၵႃႈၼႂ်းထိူၼ်ႇၸိူဝ်းၼၼ်ႉၵေႃႈ ဢမ်ႇပေႃးဢမ်ႇၵုမ်ႇပုၼ်ႈဢၼ်တၵ်းႁဵတ်း ယိၸ်ႉဢၼ်တုတ်ႇၽႆး။
၁၇ ၵူၼ်းၵူႈၸိူဝ်ႉၵူႈမဵဝ်းပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်လႃးလႃး ၵႃႈတီႈၽၢႆႇၼႃႈမၼ်းၸဝ်ႈလႄႈ မၼ်းၸဝ်ႈမၢတ်ႈပဵၼ်ၸိူဝ်ႉၼင်ႇဢၼ်ယိင်ႈၶႅၼ်းလဵၵ်ႉၼႃႇသေ လွင်ႈတၢင်းဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉ ဢိၵ်ႇတင်းၸိူဝ်ႉၼင်ႇဢၼတ်ႉတႃႉၼၼ်ႉဢေႃႈ။
၁၈ ပိူဝ်ႈၼႆလႄႈ သူတၵ်းဢွၼ်ၵၼ်ဢဝ်ၽြႃးပဵၼ်ၸဝ်ႈတႅၵ်ႈတူၺ်းပုင်ႇႁၢင်ႊၵႃႈသင်။တၵ်းလႆႈဢဝ်ပုင်ႇႁၢင်ႊၽၢင်ၵႃႈသင် တႅၵ်ႈၵၼ်တိူင်းၵၼ်တင်း ၽြႃးပဵၼ်ၸဝ်ႈ။ၵူၼ်းဢၼ်မေႃတွင်ႈမေႃၶႅၵ်းၼၼ်ႉလေႃႇႁဵတ်းသွၼ်းႁဵတ်းရုၵ်ႉထူႉသေယဝ်ႉ ၸၢင်ႊၶမ်းဢဝ်ၶမ်းဢုမ်ႇ ႁေႃႇလႄႈၸင်ႇႁဵတ်းမႆငိုၼ်းတင်းလၢႆသႂ်ႇဢေႃႈ။
၁၉ ၵေႃႉဢၼ်ဢမ်ႇလူႇဢမ်ႇတၢၼ်း တၢင်းလူႇတၢင်းတၢၼ်းဢၼ်ထိူၵ်ႈၵႃႈထိူၵ်ႈၶၼ်ၼၼ်ႉ ၸင်ႇလိူၵ်ႈၵဵပ်းဢဝ် တူၼ်ႈမႆႉ ဢၼ်ဢမ်ႇၸၢင်ႊၽင်ႉၸၢင်ႊဢူႉၼၼ်ႉသေလႄႈ
၂၀ ၸင်ႇႁႃဢဝ်လၢၵ်ႈသမႃးဢၼ်လၵ်းလႅမ်ၼၼ်ႉႁႂ်ႈလႆႈႁဵတ်းရုၵ်ႉထူႉ ဢၼ်တမ်းဝႆႉမၼ်ႈမၼ်ႈၶိူင်ႇၶိူင်ႇ ၼၼ်ႉဢေႃႈ။သူဢမ်ႇႁူႉႁိုဝ်။
၂၁ သူဢမ်ႇငိၼ်းႁိုဝ်။ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉလႄႈ ဢမ်ႇၽုၺ်ႇဢွၵ်ႇၼႄပျႃႉတီႈသူႁိုဝ်။ၸႃႉၸဵမ်မိူဝ်ႈဢၼ်တႄႇႁဵတ်းလိၼ်မိူင်း ဝႆႉၼၼ်ႉလႄႈသူဢမ်ႇႁူႉဢမ်ႇၸႅင်ႈႁိုဝ်။
၂၂ ပဵၼ်ၸဝ်ႈဢၼ်ၼင်ႈယူႇၵႃႈၼိူဝ်ၸၢၵ်ႈလိၼ်မိူင်းလႄႈ မၢတ်ႈၵူၼ်း မိူင်းတင်းလၢႆပဵၼ်ၸိူဝ်ႉၼင်ႇၸၵ်းတႅၼ်ၵူၺ်း။
၂၃ ၸဝ်ႈဢၼ်ၶဵင်ႈမုငႃ်းႉၵၢင်ႁၢဝ် မိူၼ်ၸိူဝ်ႉၼင်ႇသုမ်ႇထဵင်ပုၼ်ႈဢၼ်တၵ်းယူႇၼၼ်ႉ ၸဝ်ႈဢၼ်ႁႂ်ႈၶုၼ်တင်းလၢႆပဵၼ်ဢၼ်ဢမ်ႇပွင်ႇလွင်ႈၵႃႈသင်လႄႈ ႁႂ်ႈၵူၼ်းလူင်ဢၼ်ၸီႇယၢင်ႇတြႃးလိၼ်မိူင်းတင်းလၢႆပဵၼ်ၸိူဝ်ႉ ၼင်ႇဢၼတ်ႈတႃႉၼၼ်ႉဢေႃႈ။
၂၄ ၸႂ်ႈယဝ်ႉ။ ၶဝ်ၼၼ်ႉဢမ်ႇလႆႈၶၢမ်ႇ တၢင်းဢၼ်ၽုၵ်ႇဢၼ်သွမ်ႈဢမၢၼ်ႇၶၢၼ်ပဵၼ်။ၸိူဝ်ႉၽၼ်းၶဝ်ဢမ်ႇလႆႈၶၢမ်ႇတၢင်းဢၼ်ဝၢၼ်ႇဢၼ်ပိုၼ်ဢမၢၼ်ႇၶၢၼ်ပဵၼ်။တူၼ်ႈၶဝ်ႈလမ်းၶဝ်ႈ ဢမ်ႇလႆႈယင်ႇႁၢၵ်ႈၵႃႈတီႈလိၼ်ဢမၢၼ်ႇၶၢၼ်ပဵၼ်။မၼ်းၸဝ်ႈပိဝ်သႂ်ႇၵႃၼိူဝ်ၶဝ်လႄႈၶဝ်ၼၼ်ႉႁဵဝ်ႇၸွပ်ႈယူတ်းႁႅင်ႈၵႂႃႇလႄႈ လူမ်းၽိဝ်ႁုင်ထူဝ်းဢဝ်ၶဝ်ၵႂႃႇပႅတ်ႈမိူၼ်ၸိူဝ်ႉၼင်ႇၵႅပ်ႇၼၼ်ႉဢေႃႈ။
၂၅ ပိူဝ်ႈၼႆလႄႈ သူတၵ်းဢဝ်ၵဝ်တႅၵ်ႈတူၺ်းပုင်ႇႁၢင်ႊၵႃႈသင်။ၵဝ်ႈၼႆႉတၵ်းလႆႈမိူၼ်ႈၸိူဝ်ႉၼင်ႇၽူႈ လႂ်၊ဝႃႈၼင်ႇၼႆလႄႈၽြႃးဢၼ်မူတ်းၸၢင်ႇထၢမ်ဢေႃႈ။
၂၆ ဢွၼ်ၵၼ်ဢဝ်တႃသူႁႅၼ်တူၺ်းၵႃႈၼိူဝ်တႃႉ။ ၽူႈ လႂ်ၽၢၼ်ႇသၢင်းႁဵတ်းပဵၼ်လွင်ႈတၢင်းၸိူဝ်းၼၼ်ႉ။ၽူႈ လႂ်ထုတ်ႇဢဝ်ၶဝ်ဢွၵ်ႇလႄႈ ၼပ်ႉဢၢၼ်ႇႁႂ်ႈပဵၼ်မူႇပဵၼ်ၽုင်။မၼ်းၸဝ်ႈ ဢဝ်ၸိုဝ်သဵင်ႁွင်ႉႁိၵ်ႈၶဝ်တင်းသဵင်ႈတင်းလူင်ဢေႃႈ။ ၵွပ်ႈပိူဝ်ႈဢၼ်ႁႅင်းမၼ်းၸဝ်ႈယႂ်ႇလႄႈမၼ်းၸဝ်ႈ တဵမ်ဝႆႉတင်းတၼ်းၶူဝ်းၼၼ်ႉလႄႈ ယင်းဢမ်ႇပေႃႇဢမ်ႇဢွၵ်ႇလႄႈ ဢမ်ႇလႆႈယူႇသေၸိူဝ်ႉသေပိူင်။
၂၇ မဵဝ်းယႃႇၵုပ်ႉဢိူၺ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလၢတ်ႈ။ဢိသရေႇလဢိူၺ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဝႃႈ၊ သဵၼ်ႈတၢင်းၵဝ်မီးတၢင်းဢၼ်သိူင်ႇမႅပ်းဝႆႉသေၵႃႈတီႈထႃႇဝရႃႉၽြႃးလႄႈ ဢမူႉသုမ်းၸွမ်းပႅတ်ႈသေၵႃႈတီႈၽြႃးပဵၼ်ၸဝ်ႈၵဝ်ၼၼ်ႉယဝ်ႉ ဝႃႈၼင်ႇၼႆ ၼင်ႇႁိုဝ်။
၂၈ မႂ်းဢမ်ႇယၢမ်ႈႁူႉႁိုဝ်။မႂ်းဢမ်ႇယၢမ်ႈငိၼ်းႁိုဝ်။ၽြႃးပဵၼ်ၸဝ်ႈ ဢၼ်တႄႇယူႇတႃႇသေႇဢမ်ႇထၢတ်ႇထႃႇဝရႃႉၽြႃးၸဝ်ႈ ဢၼ်ၽၢၼ်ႇသၢင်းႁဵတ်းပဵၼ်တေႃႇထိုင်ႁွတ်ႈတီႈ သုတ်းလိၼ်မိူင်းၼၼ်ႉယင်းဢမ်ႇမီးတၢင်းဢၼ်ႁိူၼ်ႉဢၼ်ၼုၼ်း၊ တၢင်းဢၼ်ယၢပ်ႇၸႂ်ၶၢၼ်ၸႂ်။ဢမ်ႇၸႅတ်ႈဢမ်ႇထၢမ်တူၺ်းၺၢၼ်ႇမၼ်း ၸဝ်ႈတင်းလၢႆလႃးလႃး။
၂၉ မၼ်းၸဝ်ႈပၼ်ႁႅင်းတီႈၵေႃႉဢၼ်ႁိူဝ်ႉဢၼ်ၼူၼ်းၼၼ်ႉလႄႈ ပၼ်ဢၶႂၢင်ႉဢၼ်တဵမ်ဝႆႉတင်းတၢင်းၵတ်ႉတၢင်းၶၼ်ၼၼ်ႉ တီႈၵေႃႉဢၼ် ႁိူဝ်ႉၸႂ်ဢူၼ်ႈၸႂ်ၼၼ်ႉဢေႃႈ။
၃၀ ၵူၼ်းၼုမ်ႇၵူၼ်းၵမ်တင်းလၢႆတၵ်းႁွတ်ႈထိုင် တၢင်းဢၼ်ႁိူဝ်ႉဢၼ်ၼူၼ်းလႄႈယၢပ်ႇၸႂ်ၶၢၼ်ၸႂ်ဢေႃႈ။ၵူၼ်းဢွၼ်ႇဢၼ်လိူၵ်ႈၵဵပ်းဢဝ်တင်းလၢႆၼၼ်ႉၵေႃႈတၵ်းတိူဝ်ႉမႅၼ်ႈလႄႈလူမ်ႉ ဢေႃႈ။
၃၁ ၶဝ်ၸိူဝ်းဢၼ်မုင်ႈမွင်းထႃႇဝရႃႉၽြႃးယူႇၼၼ်ႉၸမ်းတၵ်းၶိုၼ်းမီးဢဵၼ်မီးႁႅင်းလႄႈ တၵ်းယုၵ်ႉပိၵ်ႇၵီႈပိၵ်ႇယူႇမိူၼ်ၸိူဝ်ႉၼင်ႇႁူင်ႉၶမ်းဢေႃႈ။ ၶဝ်တၵ်းၶုၼ်ႇလႅၼ်ႈၵႂႃႇလႄႈဢမ်ႇလႆႈမီးတၢင်းဢၼ်ယၢၵ်ႈၸႂ်ၶၢၼ်ၸႂ်။ၶဝ်တၵ်းၵႂႃႇတၢင်းပႆတၢင်းလႄႈဢမ်ႇလႆႈမီးတၢင်းဢၼ်ႁိူဝ်ႉဢၼ်ၼူၼ်း။