၅၉
ယိုၼ်ဢပျႅတ်ႈလႄႈလႆႈတၢင်းၵႄႇၶျွတ်ႈ
၁ တူၺ်းလူ။မိုဝ်းထႃႇဝရႃႉၽြႃးပွတ်းထၼ်ႈပေႃးဢမ်ႇၵႄႇသႄႇၶျွတ်ႈဢဝ်လႆႈဢမ်ႇၸႂ်ႈ။ႁူမၼ်းၸဝ်ႈၼၵ်းထၼ်ႈပေႃးဢမ်ႇငိၼ်းလႆႈဢမ်ႇၸႂ်ႈ။
၂ တူႉၸရိူၵ်ႈသူတၵ်းႁႂ်ႈသူၽၢတ်ႇယၢၼ်ၵၼ်တင်း ၽြႃးပဵၼ်ၸဝ်ႈသူယဝ်ႉ။ဢပျႅတ်ႈသူၸိူဝ်းၼၼ်ႉ ႁႂ်ႈၼႃႈမၼ်းၸဝ်ႈဝၢႆႇပႅတ်ႈသူ။
၃ ႁႂ်ႈမၼ်းၸဝ်ႈဢမ်ႇလႆႈငိၼ်းသူယဝ်ႉ။မိုဝ်းသူၸိူဝ်းၼၼ်ႉၵူဝ်ႈၵိူၵ်ႇဝႆႉတင်းလိူတ်ႈလႄႈၼိဝ်ႉမိုဝ်းသူၸိူဝ်းၼၼ်ႉၵူဝ်ႈၵိူၵ်ႇဝႆႉတင်းတူႉၸရိူၵ်ႈဢေႃႈ။ သီႇသူပ်းသူၼၼ်ႉၸၢင်ႊမွၵ်ႇၸၢင်ႊလၢတ်ႈၵႂၢမ်းမူႉသႃႇလႄႈ လိၼ်ႉသူၼၼ်ႉၸၢင်ႊၶႆႊၸၢင်ႊလၢတ်ႈၵႂၢမ်း ဢႃႉထမ်ႇမႃႉဢေႃႈ။
၄ ၽူႈ လႂ်ဢမ်ႇႁဵတ်းဢမူႉ ၸွမ်းၼင်ႇတြႃးသေၵေႃႉသေၵူၼ်း။ၽူႈ လႂ်ဢမ်ႇပႂ်ႉၸွမ်းၼင်ႇသႅတ်ႉၸႃႇသေၵေႃႉသေၵူၼ်း။ ၶဝ်ၸၢင်ႈဢိင်ပိုင်ႈဢၼတ်ႉတႃႉလႄႈလၢတ်ႈၵႂၢမ်းမူႉသႃႇဢေႃႈ။ၶဝ်ပႃးပတိၵ်ႉသၼ်ႇထေႇတၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းလႄႈ ၵိူတ်ႇလဵင်ႉဢမူႉ ဢႃႉထမ်ႇမႃႉမႃးဢေႃႈ။
၅ ၶဝ်ငွမ်းၶႆႇငူးႁၢႆႉလႄႈႁႂ်ႈတႅၵ်ႇဢွၵ်ႇမႃးယဝ်ႉ။ယႂ်းၵူင်ႈၵၢဝ်ၵေႃႈၶဝ်တေႃးႁဵတ်းဢေႃႈ။ၵေႃႉဢၼ်ၵိၼ်ၶႆႇၶဝ်ၼၼ်ႉၸၢင်ႊတၢႆလႄႈ တၢင်းဢၼ်ၽႃႇၶႆႇၶဝ်တႅၵ်ႈၼၼ်ႉ ၸၢင်ႊဢွၵ်ႇပဵၼ်ငူးႁၢႆႉမႃး ဢေႃႈ။
၆ ယႂ်းဢၼ်ၶဝ်တေႃးႁဵတ်းၼၼ်ႉတၵ်းဢမ်ႇလႆႈပဵၼ်ၶူဝ်းၼုင်ႈၶူဝ်းမႆႊလႄႈ ၶဝ်ဢမ်ႇလႆႈဢဝ်တၢင်းၵမ်တၢင်းၵျၢင်ႉၶဝ်ၼၼ်ႉႁူမ်ႇဝႆႉတူဝ်ၶဝ်။လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉ ပဵၼ်လွင်ႈတၢင်းဢၼ်ႁၢႆႉဢၼ်မိူၵ်ႈလႄႈ ၵႃႈၼႂ်းမိုဝ်းၶဝ်ၼၼ်ႉမီးလွင်ႈတၢင်းဢၼ်ႁၢဝ်ႉ ၵျၢမ်းၼႃႇၼၼ်ႉဢေႃႈ။
၇ တိၼ်ၶဝ်ၼၼ်ႉၸၢင်ႊၶုၼ်ႇလႅၼ်ႈႁႂ်ႈလႆႈႁဵတ်း လွင်ႈတၢင်းဢၼ်ဢမ်ႇတြႃးလႄႈၶၼ်ၽႂ်းႁႂ်ႈလႆႈထွၵ်ႇလိူတ်ႈ ၵေႃႉဢၼ်ဢမ်ႇမီးဢပျႅတ်ႈၼၼ်ႉဢေႃႈ။တၢင်းၵျၢမ်ႇတၢင်းပွင်ၶဝ်ပဵၼ်တၢင်းၵျၢမ်ႇတၢင်းပွင်ဢၼ်ႁၢႆႉဢၼ်မိူၵ်ႈလႄႈၼႂ်းသဵၼ်ႈတၢင်းဢၼ်ၶဝ်ၵႂႃႇတင်းလၢႆၼၼ်ႉ မီးတၢင်းဢၼ်လူႉလႅဝ် ဢိၵ်ႇတင်းတုၵ်ႉၶႃႉတၢင်းၽၢၼ်ဢေႃႈ။
၈ သဵၼ်ႈတၢင်းဢၼ်ၵတ်းယဵၼ်ၶျၢမ်းသႃႇၸိုင် ၶဝ်ဢမ်ႁူႉဢမ်ႇၸႅင်ႈ။ၵႃႈၼႂ်းတင်းဢၼ်ၶဝ်ၵႂႃႇၸိူဝ်းၼၼ်ႉ ဢမ်ႇပႃးတြႃး။ၶဝ်ပွင်မႄးသဵၼ်ႈတၢင်းဢၼ်ၵူတ်ႉဝႆႉပုၼ်ႈဢၼ်ၶဝ်တၵ်းၵႂႃႇတၵ်းၸွမ်းယဝ်ႉ။ ၵေႃႉဢၼ်ၸွမ်းၵႂႃႇၼၼ်ႉၸမ်း၊ ဢမ်ႇလႆႈႁူႉၵတ်းယဵၼ်ၶျၢမ်းသႃႇလႃးလႃး။
၉ ပိူဝ်ႈၼႆလႄႈ တၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉၵႆၵၼ်တင်းႁဝ်းလႄႈတြႃးတၢင်းဢၼ်သိုဝ်ႈတေႃႇၼၼ်ႉဢမ်ႇၶိုတ်းဢမ်ႇထိုင်တီႈႁဝ်း။ပိၵ်ႉသမ်ႉႁဝ်းမုင်ႈမွင်းဢၼ်လႅင်းယူႇသေၵေႃႈ ပဵၼ်ဢၼ်လပ်းသိင်ႇလႄႈ ပိၵ်ႉသမ်ႉႁဝ်းမုင်ႈမွင်းသၢႆဢရွင်ႇယူႇသေၵေႃႈ လႆႈၵႂႃႇမႃးယူႇ ၵႃႈၼႂ်းတၢင်းဢၼ်ဢမ်ႇပၢင်ႇဢမ်ႇၸိုၼ်ႈ ဢေႃႈ။
၁၀ ႁဝ်းလႆႈၵူမ်းၵီႈၵူမ်းၵမ်းၸွမ်းႁူဝ်ႉၸွမ်းၽႃယူႇမိူၼ်ၸိူဝ်ႉၼင်ႇၵေႃႉဢၼ်ဢမ်ႇႁၼ်လႆႈၼၼ်ႉလႄႈ လႆႈတၢဝ်ႈတီႈတၢဝ်းတိဝ်းယူႇ မိူၼ်ၸိူဝ်ႉၼင်ႇၵေႃႉဢၼ်ဢမ်ႇမီးမၢၵ်ႇတႃၼၼ်ႉဢေႃႈ။ႁဝ်းတိူဝ်ႉမႅၼ်ႈလႄႈလူမ်ႉၶိင်ႇၵၢင်ဝၼ်းတဵင်ႈၼၼ်ႉ မိူၼ်ၸိူဝ်ႉၼင်ႇၶိင်ႇၵၢင်ၶမ်ႈၼၼ်ႉလႄႈႁဝ်းပဵၼ်ၸိူဝ်ႉၼင်ႇ ၶဝ်ၸိူဝ်းဢၼ်တၢႆၵႂႃႇယဝ်ႉၼၼ်ႉ ၼႂ်းတီႈဢၼ်ၶွၼ်ႇၼမ်ႉမၼ်းလိၼ်လီၸိူဝ်း ၼၼ်ႉဢေႃႈ။
၁၁ ႁဝ်းၵႃႈမီးလႆႈဢွၼ်ၵၼ်ပွင်ႉၶၢင်းယူႇၸိူဝ်ႉၼင်ႇမီၼၼ်ႉလႄႈ လႆႈဢိုတ်ႇႁွင်ႉယူႇမိူၼ်ၸိူဝ်ႉၼင်ႇၼူၵ်ႉတူႈၼၼ်ႉဢေႃႈ။ႁဝ်းမုင်ႈမွင်းတၢင်းဢၼ်ၸီႇယၢင်ႇၸွမ်းၼင်ႇတြႃးလႄႈဢမ်ႇလႆႈ။ႁဝ်းမုင်ႈမွင်းၵျေးၸူးတၢင်းဢၼ်ၵႄႇသႄႇၶျွတ်ႈဢဝ်သေၵေႃႈ ၵႆၵၼ် တင်းႁဝ်းၼႃႇလူင်လၢင်ဢေႃႈ။
၁၂ ဢပျႅတ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉၼမ်ၼႃႇလူင်လၢင် ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။တူႉၸရိူၵ်ႈႁဝ်းၸိူဝ်းၼၼ်ႉၶၢမ်ႇ သၢၵ်ႈသေႇယူႇၽၢႆႇၼိုင်ႈတင်းႁဝ်းဢေႃႈ။
၁၃ ဢပျႅတ်ႈႁဝ်းၸိူဝ်းၼၼ်ႉၸပ်းယူႇတီႈႁဝ်းလႄႈႁဝ်းႁူႉတူႉၸရိူၵ်ႈဢၼ်ႁဝ်းႁဵတ်းမႅၼ်ႈဢၼ်ဝႃႈ တၢင်းဢၼ်ၽိတ်းပိူင်ႈ၊တၢင်းဢၼ်ထဵင်ပႅတ်ႈထႃႇဝရႃႉၽြႃးလႄႈ ၸုၼ်ႉပႅတ်ႈၽြႃးပဵၼ်ၸဝ်ႈႁဝ်း၊ တၢင်းဢၼ်လၢတ်ႈၵႂၢမ်းၼိၵ်ႈၸၢၵ်ႈငႅၼ်းသေးဢိၵ်ႇတင်းၵႂၢမ်းတၢင်းဢၼ်လုၵ်ႉၽိုၼ်ႉ၊ တၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈလႄႈ ဝႃႈဢွၵ်ႇၵႃႈၼႂ်းႁူဝ်ၸႂ်ၼၼ်ႉ ၸိူဝ်းၼၼ်ႉယူႇဢေႃႈ။
၁၄ တၢင်းဢၼ်ၸီႇယၢင်ႇၸွမ်းၼင်ႇသုတ်ႈယိုတ်းၵႂႃႇလႄႈ တြႃးတၢင်းဢၼ်သိုဝ်ႈတေႃႇၼၼ်ႉၸုၵ်းသဝ်းယူႇၵႃႈတီႈဢၼ်ၵႆဢေႃႈ။သႅတ်ႉၸႃႇလူမ်ႉယူႇၵႃႈၼႂ်းသဵၼ်ႈတင်းလႄႈ ၸႂ်သၽေႃး ဢၼ်သိုဝ်ႈရူဝ်းၼၼ်ႉဢမ်ႇၶဝ်ႈမႃးလႆႈ။
၁၅ သႅတ်ႉၸႃႇဢမ်ႇမီးလႃးလႃးလႄႈ ၵေႃႉဢၼ်ဝႄႈပႅတ်ႈတူႉၸရိူၵ်ႈၼၼ်ႉလႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်ဢေႃႈ။ထႃႇဝရႃႉၽြႃးႁၼ်လွင်ႈတၢင်းၼၼ်ႉလႄႈ ၶၢၼ်ႉႁၼ်ၵွပ်ႈပိူဝ်ႈဢၼ်ဢမ်ႇမီးတၢင်းဢၼ်ၸီႇယၢင်ႇ ၸွမ်းၼင်ႇတြႃး ၼၼ်ႉဢေႃႈ။
၁၆ မၼ်းၸဝ်ႈႁၼ်လွင်ႈတၢင်းဢၼ်ဢမ်ႇမီးၵူၼ်းသေၵေႃႉသေၵူၼ်းၼၼ်ႉလႄႈ မၼ်းၸဝ်ႈဢၢမ်းၼႃႇလူင်လၢင်လွင်ႈဢၼ်ဢမ်ႇမီးၵေႃႉဢၼ်တွင်းပၢၼ်ႇသေၵေႃႉသေၵူၼ်းၼၼ်ႉဢေႃႈ။ပိူဝ်ႈၼႆလႄႈၶႅၼ်မိုဝ်းမၼ်းၸဝ်ႈ ႁဵတ်းတၢင်းဢၼ်ၵႄႇသႄႇၶျွတ်ႈဢဝ်ပုၼ်ႈမၼ်းၸဝ်ႈလႄႈ တြႃးတၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉထွၵ်ႈၵမ်ႉမၼ်းၸဝ်ႈယူႇဢေႃႈ။
၁၇ မၼ်းၸဝ်ႈ ဢဝ်ၶိူင်ႈပိူင်ဢၼ်ႁႄႉၵင်ႈႁူဝ်ဢူၵ်းဢၼ်ဝႃႈတြႃးတၢင်းဢၼ်သိုဝ်ႈတေႃၼၼ်ႉ ၼုင်ႈမႆႊလႄႈတိုဝ်းမွၵ်ႇႁူဝ်လဵၵ်ႈဢၼ်ဝႃႈတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉဢေႃႈ။မၼ်းၸဝ်ႈဢဝ်ၶူဝ်းၼုင်ႈတၢင်းဢၼ်ပၼ်ဢပျႅတ်ႈၼၼ်ႉၼုင်ႈမႆလႄႈ ဢဝ်သိူဝ်းယၢဝ်းတၢင်းဢၼ်ၸႂ်ႁႅင်းယႂ်ႇၼႃႇၼၼ်ႉၼုင်ႈႁၢင်ႈၶိူင်ႈ ဢေႃႈ။
၁၈ ၸွမ်းၵႃႈၼင်ႇတၢင်းၵမ်တၢင်းၵျၢင်ႉၶဝ်ၼၼ်ႉလႄႈ မၼ်းၸဝ်ႈတၵ်းတွပ်ႇတႅၼ်းပၼ် ဢၵျူဝ်းဢပျႅတ်ႈဢၼ်ဝႃႈ တေႃးသႃႉတၢင်းၸႂ်မႆႈၼၼ်ႉတီႈၶဝ်ၸိူဝ်းဢၼ် ႁဵတ်းၶတ်းၵၼ်တင်း မၼ်းၸဝ်ႈၼၼ်ႉဢိၵ်ႇတင်းဢပျႅတ်ႈဢၼ်ၶဝ်ထိူၵ်ႈၶၢမ်ႇၼၼ်ႉတီႈရၢၼ်ႇသူႇမၼ်းၸဝ်ႈလၢႆၼၼ်ႉလႄႈ တီႈၵူၼ်းဢၼ်ယူႇၵႃႈတီႈၵူၼ်းၼႂ်းၼမ်ႉၸိူဝ်းၼၼ်ႉၵေႃႈ မၼ်းၸဝ်ႈ တၵ်းတွပ်ႇတႅၼ်းပၼ်ဢၵျူဝ်းဢပျႅတ်ႈဢေႃႈ။
၁၉ ၼင်ႇၼၼ်လႄႈ ၵူၼ်းၼႃႈတၢင်းတူၵ်းတင်းလၢႆတၵ်းရူဝ်ႇသေႇၵူဝ်ယမ် ၼႃႇမႃႉၸိုဝ်သဵင်ထႃႇဝရႃႉၽြႃးလႄႈၵူၼ်းၼႃႈတၢင်းဝၼ်ႈဢွၵ်ႇၼၼ်ႉတင်းလၢႆ တၵ်းရူဝ်ႇသေႇၵူဝ်ယမ်မူၼ်ႈၽုင်းမၼ်းၸဝ်ႈဢေႃႈ။မိူဝ်ႈဢၼ်ရၢၼ်ႇသူႇၶဝ်မႃး မိူၼ်ၸိူဝ်ႉၼင်ႇၼမ်ႉထူမ်ႈႁူမ်ႇၼၼ်ႉၸိုင်ဝိၺိၺ်ႇထႃႇဝရႃႉၽြႃး တၵ်းပူၵ်းလၢမ်ႇသေလႄႈႁႄႉၶႅၼ်ယူႇဢေႃႈ။
၂၀ ထႃႇဝရႃႉၽြႃးမီးဢမိင်ႉဝႆႉၸမ်း၊-ၸဝ်ႈဢၼ်ထုတ်ႇဢဝ်ၼၼ်ႉတၵ်းမႃးၵႃႈတီႈလွႆၸိဢုၼ်ႇ ဢိၵ်ႇတင်းၵႃႈတီႈဢၼ်ၵူၼ်း မဵဝ်းယႃႇၵုပ်ႉ ဢၼ်ဝႄႈပိူင်ႈသေၵႃႈတီႈလွင်ႈတၢင်းဢၼ်ဢမ်ႇတြႃးမီးၼၼ်ႉဢေႃႈ။
၂၁ ပတိၺိၼ်ႇတြႃး ဢၼ်ၵဝ်ႁဵတ်းလူၺ်ႈၵၼ်တင်းၶဝ်ၸမ်းဝိၺိၺ်ႇၵဝ် ဢၼ်ၵိင်းဝပ်ႈယူႇၵႃႈၼိူဝ်မႂ်းဢိၵ်ႇတင်းၵႂၢမ်းဢၼ်ၵဝ်သႂ်ႇဝႆႉၵႃႈၼႂ်းသူပ်းမႂ်းၼၼ်ႉ တၵ်းဢမ်ႇလႆႈဢွၵ်ႇလႆႈႁၢႆသေ ၵႃႈၼႂ်းသူပ်းမႂ်းၵႃႈၼႂ်းသူပ်းမဵဝ်းၸိူဝ်ႉၶိူဝ်းမႂ်း၊ ၵႃႈၼႂ်းသူပ်းမဵဝ်းၸိူဝ်ႉၶိူဝ်းဢၼ်ပဵၼ်မႃးတီႈမဵဝ်းၸိူဝ်ႉၶိူဝ်းမႂ်းၼၼ်ႉ ၸႃႉၸဵမ်မိူဝ်ႈလဵဝ်ၼႆႉၸူဝ်ႈၵူႈပၢၼ်သိုပ်ႇသိုပ်ႇတၢမ်ႈတၢမ်ႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။