၄၁
ၽူႈဢၼ်ၸွႆႈထႅမ်ၵူၼ်းမဵဝ်းဢိသရေႇလ
၁ ၵူၼ်းၼႂ်းၼမ်ႉၶဝ်ဢိူၺ်း။ ဢွၼ်ၵၼ်ယူႇတဵတ်ႇတဵတ်ႇၼိမ်ၼိမ်ၵႃႈတီႈၽၢႆႇၼႃႈၵဝ်တႃႉ။မဵဝ်းၵူၼ်းတင်းလၢႆၶဝ်ဢိူၺ်း။ဢွၼ်ၵၼ်ႁွမ်ႁႅင်းယူႇတႃႉ။ဢွၼ်ၵၼ်သုတ်ႉၸပ်းသုတ်ႉၸူးသေလႄႈလၢတ်ႈတႃႉ။ၼင်ႇၵၼ်ၵၼ်ထူပ်းတြႃးတီႈၵၼ်တႃႉႁဝ်း။
၂ ၽူႈ လႂ်ႁႂ်ႈမၼ်းပေႃႇဢွၵ်ႇသေ ၵႃႈတီႈမိူင်းဝၼ်းဢွၵ်ႇပုၼ်ႉမႃး။တၢင်းဢၼ်သိုဝ်ႈတေႃႇၼၼ်ႉတၵ်းႁွင်ႉမၼ်းၸွမ်းဢေႃႈ။မၼ်းၸဝ်ႈဢိၵ်ႇတင်းၵူၼ်းၵူႈၸိူဝ်ႉၵူႈမဵဝ်းဢၢပ်ႈတီႈမၼ်းလႄႈ ႁႂ်ႈမၼ်းဢုပ်ႉပိူင်ႇၵႃႈၼိူဝ်ၶုၼ် ႁေႃၶမ်းတင်းလၢႆဢေႃႈ။
၃ မၼ်းတၵ်းႁႂ်ႈၶဝ်ပဵၼ်ၸိူဝ်ႉၼင်ႇမုၼ်ႈလိၼ် ၵႃႈတီႈၽၢႆႇၼႃႈလၢပ်ႇမၼ်းဢိၵ်ႇတင်းၸိူဝ်ႉၼင်ႇ ၵႅပ်ႇဢၼ်ပိဝ်ၵႂႃႇၼၼ်ႉၵႃႈတီႈၽၢႆႇၼႃႈၵၢင်ႇမၼ်းဢေႃႈ။မၼ်းတၵ်းလိုပ်ႈၸွမ်းလမ်းၸွမ်းၶဝ်လႄႈ ၸွမ်းသဵၼ်ႈတၢင်း ဢၼ်တိၼ်မၼ်းဢမ်ႇယၢမ်ႈ ယဵပ်ႇၶၢမ်ႈၼၼ်ႉပူၼ်ႉၵႂႃႇ လွတ်ႈၽေးလွတ်ႈ ရၢၼ်ႇဢေႃႈ။
၄ ၵေႃႉဢၼ်ၸီႇယၢင်ႇႁဵတ်းပဵၼ်ဢမူႉၼၼ်ႉသေလႄႈၵွႆႈႁႂ်ႈယဝ်ႉႁႂ်ႈတူဝ်လႄႈ ႁွင်ႉဢဝ်မဵဝ်းၵူၼ်းသိုပ်ႇသိုပ်ႇတၢမ်းတၢမ်း ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉပဵၼ်ၽူႈ လႂ်ဝႃႈၼင်ႇၼႆၸမ်း ပဵၼ်ၵဝ်ထႃႇဝရႃႉၽြႃးဢၼ်ပဵၼ်ၵေႃႉဢွၼ်တၢင်းသုတ်းလႄႈ မီးယူႇလူၺ်ႈၵၼ်တင်းၵေႃႉဢၼ်လိုၼ်းလင်သုတ်းၼၼ်ႉဢေႃႈ။
၅ ၵူၼ်းၼႂ်းၼမ်ႉၸိူဝ်းၼၼ်ႉႁၼ်လႄႈ ဢွၼ်ၵၼ်ၵူဝ်ႁႄဢေႃႈ။တီႈသုတ်းလႅၼ်လိၼ်မိူင်းတင်းလၢႆမီးတၢင်းဢၼ်သၼ်ႇဢၼ်ဝႆသေလႄႈ ဢွၼ်ၵၼ်သုတ်ႉၸပ်း သုတ်ႉၸူးလႄႈၸူႉၵၼ်တုမ်ၵၼ်ဢေႃႈ။
၆ ၵူၼ်းႁိူၼ်းၸမ်ၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းၸွႆႈထႅမ်မႃႉၸႃႉၵၼ်လႄႈပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းလၢတ်ႈတီႈၵၼ်လႄႈဝႃႈ၊-မီးႁႅင်းတႃႉ၊ဝႃၼင်ႇၼႆဢေႃႈ။
၇ ၼင်ႇၼၼ်လႄႈၵူၼ်းဢၼ်မေႃတွင်ႈမေႃၶႅၵ်းၶဝ်ၼၼ်ႉပၼ်ႁႅင်းတီႈၸၢင်ႊၶမ်းလႄႈ ၵေႃႉဢၼ်ဢဝ်ၶွၼ်ႉလဵၵ်းႁဵတ်းႁႂ်ႈၶျေႃးၼၼ်ႉ ပၼ်တီႈၵေႃႉဢၼ်ပေႃႉထုပ်ႉၵႃႈၼိူဝ်တၢင်းၼၼ်ႉသေလႄႈၸင်ႇလၢတ်ႈလူၺ်ႈလွင်ႈယိူဝ်ႇၸိူၵ်ႈလႄႈဝႃႈ၊-ပဵၼ်ဢၼ်လီယဝ်ႉဝႃႈၼင်ႇၼႆဢေႃႈ။ မၼ်းၸင်ႇဢဝ်တင်းလဵၵ်းလႅမ်တွၵ်ႇသႂ်ႇ ဝႆႉႁႂ်ႈရုၵ်ႉထူႉဢမ်ႇလႆႈၼိုင်လႆႈၶွၼ်းဢေႃႈ။
၈ မႂ်းဢိသရေႇလဢၼ်ပဵၼ်ၶႃႈၵဝ်၊ ယႃႇၵုပ်ႉႉဢၼ်ၵဝ်လိူၵ်ႈၵဵပ်းဢဝ်၊ၸိူဝ်ႉၶိူဝ်းၵေႃႉသေႈၵဝ်ဢႃႇပႁမ်၊ ၵေႃႉဢၼ်ၵဝ်တိုတ်ႉၸၼ်ဢဝ်သေၵႃႈတီႈသုတ်းလႅၼ်လိၼ်မိူင်းလႄႈ ႁွင်ႉဢဝ်သေ ၵႃႈတီႈႁိမ်းၸဵင်ႇႁိမ်းလႅၼ်ၼၼ်ႉသေလႄႈ လၢတ်ႈလႄႈဝႃႈ၊-
၉ မႂ်းပဵၼ်ၶႃႈၵဝ်ဢေႃႈ။ၵဝ်လိူၵ်ႈၵဵပ်းဢဝ်မႂ်းယဝ်ႉ။ၵဝ်ဢမ်ႇပႄႇဢမ်ႇပႅတ်ႈမႂ်းၵူၺ်း၊ဝႃႈၼင်ႇ ၼၼ်ၼႆႉဢိူၺ်း။
၁၀ ယႃႇပေၵူဝ်ပေႁႄ။ၵဝ်မီးယူႇလူၺ်ႈၵၼ်တင်းမႂ်းဢေႃႈ။ယႃႇပေတူၵ်းၸႂ်တိုၼ်ႇ။ၵဝ်ပဵၼ်ၽြႃးပဵၼ်ၸဝ်ႈမႂ်းလႄႈ တၵ်းႁႂ်ႈမႂ်းမၼ်ႈၶိူင်ႇဢေႃႈ။ၵဝ်တၵ်းပႂ်ႉၸွႆႈပႂ်ႉထႅမ်မႂ်းယူႇလႄႈ ဢဝ်တင်းမိုဝ်းၶွၼ်ၶႂႃ သႅတ်ႉၸႃႇၵဝ်ၵမ်ႉထွၵ်ႈမႂ်းယူႇဢေႃႈ။
၁၁ တူၺ်းလူ။ၶဝ်ၸိူဝ်းဢၼ် တၢင်းၸႂ်မႆႈၶႆႈၸႃႉဢွၵ်ႇတီႈမႂ်းၼၼ်ႉ တၵ်းမီးတၢင်းဢၼ်ဢူၵ်းဢၼ်ဢၢႆ ဢိၵ်ႇတင်းတၢင်းဢၼ်ၼႃႈလူႉလႄႈ ၶဝ်ၸိူဝ်းဢၼ်ႁဵတ်းတၢင်းၽိတ်းတီႈမႂ်းၼၼ်ႉတၵ်းပဵၼ်ၸိူဝ်ႉၼင်ႇဢမ်ႇၸႂ်ႈၵႃႈသင်ၼၼ်ႉသေလႄႈႁွတ်ႈထိုင်တၢင်းလူႉတၢင်းလႅဝ်ဢေႃႈ။
၁၂ မႂ်းတၵ်းႁႃဢဝ် ၶဝ်ၸိူဝ်းဢၼ်ႁဵတ်းၶတ်းၵၼ်တင်းမႂ်းၼၼ်ႉၵေုႈဢမ်ႇလႆႈထူပ်းလႆႈႁၼ်။ၶဝ်ၸိူဝ်းဢၼ်တိုၵ်းသိုၵ်းၵၼ်တင်းမႂ်းၼၼ်ႉဢိၵ်ႇတင်း ၸိူဝ်ႉၼင်ႇဢၼတ်ႈတႃႉဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉဢေႃႈ။
၁၃ လွင်ႈမၼ်းၸမ်းၵဝ်ထႃႇဝရႃႉၽြႃးၽြႃးပဵၼ်ၸဝ်ႈမႂ်း တၵ်းယိပ်းၵမ်ဢဝ်မိုဝ်းၶွၼ်ၶႂႃမႂ်းသေလႄႈ သင်ႇလၢတ်ႈဝႆႉတီႈမႂ်းလႄႈဝႃႈ၊-ယႃႇပေၵူဝ်ပေႁႄ။ၵဝ်တၵ်း ၸွႆႈထႅမ်မႃႉၸႃႉမႂ်းဢေႃႈ၊ဝႃႈၼင်ၼႆဢေႃႈ။
၁၄ ယႃႇၵုပ်ႉဢၼ်ပဵၼ်တိူၵ်ႇလိူၼ်ဢိူၺ်း။ ၵူၼ်းမဵဝ်းဢိသရေႇလတင်းလၢႆၶဝ်ဢိူၺ်း။ ယႃႇပေၵူဝ်ပေႁႄ။ၵဝ်ပဵၼ်ၵေႃႉဢၼ်ၸွႆႈထႅမ်မႃႉၸႃႉမႂ်းလႄႈ ပဵၼ်ၵေႃႉဢၼ်ထုတ်ႇဢဝ်မႂ်း၊ ၽြႃးဢၼ်မူတ်းၸၢင်ႇမဵဝ်းဢိသရေႇလဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၅ ၵဝ်တၵ်းႁႂ်ႈမႂ်းပဵၼ်ၸၢၵ်ႈဢၼ်ၼူတ်ႈၶဝ်ႈပိူၵ်ႇ ဢၼ်ၽၢႆၼႃႇဢၼ်မႂ်ႇမႂ်ႇဢၼ်မီးသိၵ်ႈၶဵဝ်ႈၼၼ်ႉဢေႃႈ။မႂ်းတၵ်းၼူတ်ႈလွႆလူင်တင်းလၢႆႁႂ်ႈလႅဝ်ပဵၼ်မုၼ်ႈၵႂႃႇလႄႈ ႁႂ်ႈလွႆဢွၼ်ႇတင်းလၢႆပဵၼ်ၸိူဝ်ႉၼင်ႇၵႅပ်ႇၼၼ်ႉၵႂႃႇဢေႃႈ။
၁၆ မႂ်းတၵ်းဢဝ်ၶဝ်လၢင်လႄႈ လူမ်းတၵ်းထူဝ်းဢဝ်ၶဝ်ၵႂႃႇပႅတ်ႈဢေႃႈ။လူမ်းလူင်တၵ်းဢဝ်ၶဝ်ပိဝ်သဵၼ်ၵႂႃႇဢေႃႈ။မႂ်းၸမ်းတၵ်းၸူမ်းသိူဝ်းယူႇၼႂ်းထႃႇဝရႃႉၽြႃးလႄႈတၵ်းဢုပ်ႇဝၢဝ်းယူႇၼႂ်း ၽြႃးဢၼ်မူတ်းၸၢင်ႇမဵဝ်း ဢိသရေႇလဢေႃႈ။
၁၇ ယၢမ်းမိူဝ်ႈဢၼ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ ႁႃဢဝ်ၼမ်ႉၵေုႈဢမ်ႇမီးလႃးလႃး။ၶဝ်ယၢၵ်ႈၼမ်ႉလႄႈ လိၼ်ႉၶဝ်ႁႅင်ႈႁွင်ၵႂႃႇၼၼ်ႉၵဝ်ထႃႇဝရႃႉၽြႃးတၵ်းထွမ်ႇဢဝ်ၵႂၢမ်းၶဝ်လႄႈ ၵဝ်ဢၼ်ပဵၼ်ၽြႃးပဵၼ်ၸဝ်ႈမဵဝ်းဢိသရေႇလ ၼႆႉတၵ်းဢမ်ႇၸုၼ်ႉ ပႅတ်ႈၶဝ်။
၁၈ ၵဝ်တၵ်းႁႂ်ႈၼမ်ႉႁွင်ႊၼမ်ႉၵႄးဢွၼ်ႇၵႃႈၼိူဝ်လွႆဢၼ်ဢူၼ်ႈဢၼ်ၵႅင်ႉတင်းလၢႆ ဢိၵ်ႇတင်း ၼမ်ႉဢွၵ်ႇႁူးၵႃႈၼႂ်းၶူင်ႈႁူၺ်ႈတင်းလၢႆလႄႈ တၵ်းႁႂ်ႈတီႈထိူၼ်ႇတီႈၶိူဝ်းပဵၼ်ၼမ်ႉၼွင်တင်းလၢႆ ဢိၵ်ႇတင်းႁႂ်ႈတီႈဢၼ်ႁႅင်ႈဢၼ်ႁွင် ပဵၼ်ၼမ်ႉဢွၵ်ႇႁူးတင်းလၢႆဢေႃႈ။
၁၉ ၵဝ်တၵ်းၽုၵ်ႇ တူၼ်ႈဢႃႇရိတ်ႉ၊ တူၼ်ႈဢၵႃႇသႃႉ၊တူၼ်ႈမုရတု၊တူၼ်ႈသၢၼ်ႇလုၼ်ႇ တင်းလၢႆၵႃႈတီႈထိူၼ်ႇလႄႈ တၵ်းဝႆႉ တူၼ်ႈပႅၵ်ႇ၊ တူၼ်ႈတတေႇရ၊တူၼ်ႈတႃႇသုရ တင်းလၢႆၵႃႈတီႈပၢင်ႇတီႈပဵင်းလူၺ်ႈ ၵၼ်၊ႁႂ်ႈၶဝ်လႆႈႁူႉႁၼ်လႄႈ
၂၀ ၶႆႈၸႂ်ႈဝူၼ်ႉၸႂ်ႁူႉၸႅင်ႈလွင်ႈဢၼ်မိုဝ်းထႃႇဝရႃႉၽြႃး ၸီႇယၢင်ႇႁဵတ်းလွင်ႈတၢင်းၼႆႉဝႆႉလႄႈ ၽြႃးဢၼ်မူတ်းၸၢင်ႇ မဵဝ်းဢိသရေႇလၽၢၼ်ႇသၢင်းဝႆႉၼၼ်ႉဢေႃႈ။
၂၁ ပႂ်ႉဢမူႉသူၼၼ်ႉယူႇတႃႉ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။ဢဝ်သၢၵ်ႈသေႇသူဢၼ်မၼ်ႈၶိူင်ႇၼၼ်ႉဢွၵ်ႇၼႄပျႃႉတႃႉဝႃႈၼင်ႇၼႆလႄႈ ၶုၼ်ႁေႃၶမ်းမဵဝ်းယႃႇၵုပ်ႉမီးဢမိင်ႉဢေႃႈ။
၂၂ ႁႂ်ႈၶဝ်ဢဝ်လွင်ႈတၢင်းဢၼႃႇၵၢတ်ႉတိၸိူဝ်းၼၼ်ႉဢွၵ်ႇလႄႈ ၼႄပျုႉသေၵမ်းလူၺ်ႈ။ႁႂ်ႈၶဝ်ဢဝ် လွင်ႈတၢင်းဢၼ်ယၢမ်ႈပဵၼ်မႃးယဝ်ႉမိူဝ်ႈဢွၼ်တၢင်းၼၼ်ႉၸိူဝ်းၼၼ်ႉ ပဵၼ်ၸိူဝ်ႉၼင်ႇႁိုဝ်ၼၼ်ႉၽုၺ်ႇဢွၵ်ႇၼႄပျုႉႁႂ်ႈႁဝ်းလႆႈၶႆႈၸႂ်ဝူၼ်ႉၸႂ်လႄႈ ႁူႉတီႈသုတ်းလွင်ႈတၢင်းၸိူဝ်းၼၼ်ႉသေၵမ်းလူၺ်ႈ။ ဢမ်ႇၼၼ် ႁႂ်ႈၶဝ်ဢဝ်လွင်ႈတၢင်းဢၼ်ပဵၼ်မႃးၸိူဝ်းၼၼ်ႉ မွၵ်ႇလၢတ်ႈတီႈႁဝ်းသေၵမ်းလူၺ်ႈ။
၂၃ ဢဝ်လွင်ႈတၢင်းဢၼ်တၵ်းလႆႈပဵၼ်မႃးၸိူဝ်းၼၼ်ႉ ၽုၺ်ႇဢွၵ်ႇၼႄပျုႉႁႂ်ႈႁဝ်းလႆႈႁူႉလွင်ႈဢၼ်သူပဵၼ်ၽြႃးၼၼ်ႉတႃႉ။ဢွၼ်ၵၼ်ႁဵတ်းဢမူႉဢၼ်လီ ဢမူႉဢၼ်ၸႃႉသေၸိူဝ်ႉသေပိူင်ႁႂ်ႈႁဝ်းၵေႃႉၼိုင်ႈလႄႈၵေႃႉၼိုင်ႈ ၼင်ႈၵၼ်ၵၼ်လူတူၺ်း ၵၼ်လႄႈထူပ်းႁၼ်တႃႉ။
၂၄ တူၺ်းလူ။ သူယိင်ႈၶႅၼ်းယုတ်ႈမိူၵ်ႈ လိူဝ်တွၼ်းၼႃႇသေ လွင်ႈတၢင်းဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉလႄႈ လွင်ႈတၢင်းဢၼ်သူႁဵတ်းၵေႃႈ ယိင်ႈၶႅၼ်းယုတ်ႈမိူၵ်ႈလိူဝ်တွၼ်းၼႃႇသေ လွင်ႈတၢင်းဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉဢေႃႈ။ ၵေႃႉဢၼ်လိူၵ်ႈၵဵပ်းဢဝ်သူၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။
၂၅ ၵဝ်ႁႂ်ႈၵူၼ်းၵေႃႉၼိုင်ႈပေႃႇဢွၵ်ႇၵႃႈတီႈၼႃႈတၢင်းႁွင်ႇလႄႈမၼ်းၼၼ်ႉမႃးဢေႃႈ။ မၼ်းတၵ်းလုၵ်ႉသေၵႃႈတီႈၼႃႈတၢင်းဝၼ်းဢွၵ်ႇပုၼ်ႉမႃးလႄႈ ႁဵတ်းပထၼႃႇတီႈၼႃႇမႃႉၸိုဝ်သဵင်ၵဝ်ဢေႃႈ။မၼ်းၼၼ်ႉတၵ်းယဵပ်ႇၶၢမ်ႈၶုၼ်တင်းလၢႆမိူၼ်ၸိူဝ်ႉၼင်ႇလိၼ်မေႃႈၼၼ်ႉဢိၵ်ႇတင်း ၸိူဝ်ႉၼင်ႇဢၼ်ၸဝ်ႈမေႃႈယဵပ်ႇၶၢမ်ႈ လိၼ်မေႃႈၼၼ်ႉဢေႃႈ။
၂၆ ၽူႈ လႂ်မွၵ်ႇလၢတ်ႈၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉႁႂ်ႈႁဝ်းလႆႈႁူႉလႆႈၸႅင်ႈ။ၽူႈ လႂ်မွၵ်ႇလၢတ်ႈမိူဝ်ႈဢွၼ်တၢင်းၼၼ်ႉ ႁႂ်ႈႁဝ်းလႆႈလၢတ်ႈလႄႈဝႃႈ၊-ၸႂ်ႈတႄႉတႄႉဢေႃႈ၊ဝႃႈၼင်ႇၼႆၼၼ်ႉ။ဢမ်ႇမီးၵေႃႉဢၼ်ၽုၺ်ႇဢွၵ်ႇၼႄပျုႉသေၵေႃႉသေၵူၼ်း။ဢမ်ႇမီးၵေႃႉဢၼ်မွၵ်ႇလၢတ်ႈသေၵေႃႉသေၵူၼ်း။ဢမ်ႇမီးၵေႃႉ ဢၼ်လႆႈငိၼ်းၵႂၢမ်းသူသေၵေႃႉသေၵူၼ်း။
၂၇ ၵဝ်လၢတ်ႈတီႈဝဵင်းၸိဢုၼ်ႇဝႆႉဢွၼ်တၢင်းသုတ်းပိူၼ်ႈလႄႈဝႃႈ၊-တူၺ်းလွင်ႈတၢင်းဢၼ်ၸိူဝ်ႉၼင်ႇၼႆၸိူဝ်းၼၼ်ႉတႃႉဝႃႈၼင်ႇၼႆဢေႃႈ။ၵဝ်တၵ်းပွႆႇၸႂ်ႉတမၢၼ်ႇဢၼ်တၵ်းဢဝ်သတၢင်းသိူဝ်းပျေႃႇ မွၵ်ႇလၢတ်ႈၼၼ်ႉၸူး ၵႃႈတီႈဝဵင်းယေႇရုသလႅမ်ႇဢေႃႈ။
၂၈ မိူဝ်ႈဢၼ်ၵဝ်လူတူၺ်းၼၼ်ႉဢမ်ႇမီးသေၵေႃႉသေၵူၼ်း။ၼႂ်းၶဝ်ၼၼ်ႉဢမ်ႇမီးၵေႃႉဢၼ်ပၼ်သတိသေၵေႃႉသေၵူၼ်း။ၵဝ်တွင်ႈထၢမ်ၶဝ်လႄႈ ၶဝ်ဢမ်ႇၶိုၼ်းလၢတ်ႈၵႂၢမ်းသေ ၶေႃႈသေၵမ်းလႆႈ။
၂၉ တူၺ်းလူ။ၶဝ်တင်းသဵင်ႈတင်းမူတ်းပဵၼ်ဢၼတ်ႈတႃႉဢေႃႈ။လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉဢမ်ႇၸႂ်ႈၵႃႈသင်လႃးလႃး။ရုၵ်ႉထူႉဢၼ်ၶဝ်သွၼ်းႁဵတ်းလေႃႇႁဵတ်းၸိူဝ်းၼၼ်ႉၵေႃႈ ပဵၼ်လူမ်းလၢႆလၢႆၵူၺ်းလႄႈ ဢမ်ႇပွင်ႇလွင်ႈၵႃႈသင်လႃးလႃး။