၆၂
ၸိုဝ်သဵင်ဢၼ်မႂ်ႇဝဵင်းၸိဢုၼ်ႇ
၁ ၸူဝ်ႈဢၼ်တၢင်းဢၼ်သိုဝ်ႈတေႃႇမၼ်း ဢမ်ႇပႆႇထၢင်ႇသႃးမႃးမိူၼ်ၸိူဝ်ႉၼင်ႇသၢႆဢရွင်ႇၼၼ်ႉ ဢိၵ်ႇတင်းၸူဝ်ႈဢၼ်တၢင်းဢၼ်ၵႄႇသႄႇၶျွတ်ႈဢဝ်မၼ်း ဢမ်ႇပႆႇထၢင်ႇသႃးမႃးမိူၼ်ၸိူဝ်ႉၼင်ႇဝၢၼ်ႇၽႆးတဵၼ်းဢၼ်လုၵ်ႉႁိူဝ်ႈၼၼ်ႉ ၵဝ်တၵ်းဢမ်ႇယူႇတဵတ်ႇယဵၼ်သိတ်ႇယဵၼ်ၵွပ်ႈပိူဝ်ႈဝဵင်းၸိဢုၼ်ႇလႄႈ ၵဝ်တၵ်းဢမ်ႇယူႇၼိမ်ၼိမ်လီလီၵွပ်ႈပိူဝ်ႈ ဝဵင်းယေႇရုသလႅမ်ႇ ၼၼ်ႉ။
၂ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းလႆႈဢွၼ်ၵၼ်ႁၼ် တၢင်းဢၼ်သိုဝ်ႈတေႃႇမႂ်းလႄႈၶုၼ်ႁေႃၶမ်းတင်းသဵင်ႈတင်းလူင် တၵ်းလႆႈဢွၼ်ၵၼ်ႁၼ်မူၼ်ႈၽုင်းသရေႇမႂ်းဢေႃႈ။ မႂ်းတၵ်းလႆႈၶၢမ်ႇတၢင်းဢၼ်ဢဝ်ၼႃႇမႃႉၸိုဝ်သဵင်ဢၼ်မႂ်ႇ ဢၼ်ဢွၵ်ႇသူပ်း ထႃႇဝရႃႉၽြႃးၼၼ်ႉႁွင်ႉႁိၵ်ႈဢေႃႈ။
၃ မႂ်းတၵ်းပဵၼ်ပၢၼ်းၵုမ်းဢၼ်ႁၢင်ႈလီႁၢင်ႈငၢမ်း ၵႃႈၼႂ်းမိုဝ်းထႃႇဝရႃႉၽြႃးဢိၵ်ႇတင်း သရၽူႇဢၼ်ၶုၼ်တိုဝ်းၵႃႈၼႂ်းမိုဝ်းၽြႃးပဵၼ်ၸဝ်ႈမႂ်းဢေႃႈ။
၄ ၵမ်းလိုၼ်းမႂ်းဢမ်ႇလႆႈၶၢမ်ႇတၢင်းဢၼ်ႁွင်ႉႁိၵ်ႈလႄႈဝႃႈ ၵေႃႉဢၼ်ၸုၼ်ႉပႅတ်ႈဝႃႈၼင်ႇၼႆလႄႈ မိူင်းမႂ်းဢမ်ႇလႆႈၶၢမ်ႇတၢင်းဢၼ်ႁွင်ႉႁိၵ်ႈဝႃႈလိၼ်ဢၼ်သိတ်ႇၵူၼ်းယဵၼ်ႈၵူၼ်း ဝႃႈၼင်ႇၼႆၼၼ်ႉ။ၵူၺ်းၵႃႈ မႂ်းတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈဝႃႈ ၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၵဝ်ဝႃႈၼင်ႇၼႆလႄႈ မိူင်းဢၼ်သွင်ႇမၢင်ႇၵလႃႇမီးၽူဝ်ယဝ်ႉဝႃႈၼင်ႇၼႆဢေႃႈ။လွင်ႈမၼ်းၸမ်း ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်မႂ်းလႄႈလိၼ်မႂ်းၵေႃႈ တၵ်းလႆႈသွင်ႇမၢင်ႇၵလႃႇဢဝ်ၽူဝ် ဢေႃႈ။
၅ ၸိူဝ်ႉၼင်ႇဢၼ်ၽူႈမၢဝ်ႇသွင်ႇမၢင်ႇၵလႃႇဢဝ်ၵၼ်တင်းၽူႈသၢဝ်ၵၢၼ်ႇၺႃႇၼၼ်ႉလုၵ်ႈၸၢႆးမႂ်း တင်းလၢႆတၵ်းသွင်ႇမၢင်ႇၵလႃႇဢဝ်ၵၼ်တင်းမႂ်းလႄႈ ၸိူဝ်ႉၼင်ႇဢၼ်ၵူၼ်းသွင်ႇမၢင်ႇၵလႃႇ ၸူမ်းသိူဝ်းလူၺ်ႈလွင်ႈလုၵ်ႈယိင်းသၢဝ် ဢၼ်သွင်ႇမၢင်ႇၵလႃႇၼၼ်ႉၽြႃးပဵၼ်ၸဝ်ႈမႂ်းတၵ်းၸူမ်းသိူဝ်းလူၺ်ႈလွင်ႈမႂ်းဢေႃႈ။
၆ ဝဵင်းယေႇရုသလႅမ်ႇဢိူၺ်း။ ၵဝ်ဝႆႉၶဝ်ၸိူဝ်းဢၼ်ပႂ်ႉၵႃႈၼိူဝ်လမ်းဝဵင်းမႂ်းယဝ်ႉ။ၶဝ်ၼၼ်ႉတၵ်းဢမ်ႇလႆႈယူႇတဵတ်ႇတဵတ်ႇယဵၼ်ယဵၼ်ယူႇ ဝၼ်းဝၼ်းၶိုၼ်းၶိုၼ်းတႃႇသေႇ။သူၸိူဝ်းဢၼ်ႁႂ်ႈထႃႇဝရႃႉၽြႃးၶုၵ်းၸႂ်လႆႈ ၶႆႈၸႂ်ထူပ်းၼႆႉဢိူၺ်း။
၇ ယႃႇပေယူႇတဵတ်ႇတဵတ်ႇယဵၼ်ယဵၼ်။ ယႃႇပေႁႂ်ႈမၼ်းၸဝ်ႈတဵတ်ႇယဵၼ်ယူႇတေႃႇထိုင်ႁွတ်ႈမၼ်းၸဝ်ႈပေႃးႁႂ်ႈ ဝဵင်းယေႇရုသလႅမ်ႇတႄႇယူႇမၼ်ႈမၼ်ႈၶိူင်ႇၶိူင်ႇလႄႈ မၼ်းၸဝ်ႈႁႂ်ႈဝဵင်းၼၼ်ႉပဵၼ်လွင်လီယွင်ႈယေႃးၵႃႈၼိူဝ်လိၼ်မိူင်းၼႆႉ။
၈ ထႃႇဝရႃႉၽြႃး ဢဝ်မိုဝ်းၶွၼ်ၶႂႃမၼ်းၸဝ်ႈဢိၵ်ႇတင်းၶႅၼ်မၼ်းၸဝ်ႈ ဢၼ်တၼ်းၶူဝ်းယႂ်ႇၼၼ်ႉတိူင်ႇလႄႈၵိၼ်ႇဝႃႈၸမ်းၵမ်းလိုၼ်း ၵဝ်တၵ်းဢမ်ႇဢဝ်ၶဝ်ႈပိူၵ်ႇမႂ်းလဵင်ႉပၼ်တီႈရၢၼ်ႇသူႇမႂ်းတင်းလၢႆ။ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢမ်ႇလႆႈသူတ်ႉလႆႈၵိၼ်ၼမ်ႉၸ ပိတ်ႉဢၼ်မႂ်းၶတ်းၸႂ်လႄႈႁဵတ်းၼၼ်ႉ။
၉ ၶဝ်ၸိူဝ်းဢၼ်ပၢတ်ႇၶဝ်ႈၼၼ်ႉ တၵ်းလႆႈဢွၼ်ၵၼ်ၵိၼ်လႄႈ ယွင်ႈယေႃးထႃႇဝရႃႉၽြႃးဢေႃႈ။ ၶဝ်ၸိူဝ်းဢၼ်ၵဵပ်းဢဝ်သိမ်းဢဝ်မၢၵ်ႇၸပိတ်ႉၼၼ်ႉ တၵ်းလႆႈဢွၼ်ၵၼ်သူတ်ႉၵိၼ်ၼမ်ႉၸပိတ်ႉ ၵႃႈၼႂ်းတမ်ႇတိူင်းထႃႇၼႃႉတီႈမူတ်းၸၢင်ႇၵဝ်ဢေႃႈ၊ ဝႃႈၼင်ႇၼႆယဝ်ႉ။
၁၀ ဢွၼ်ၵၼ်ဢွၵ်ႇသေၵႃႈၼႂ်းၽၵ်းတူဝဵင်းတႃႉ။ ဢွၼ်ၵၼ်ဢွၵ်ႇတႃႉ။ဢွၼ်ၵၼ်မႄးသဵၼ်တၢင်းပုၼ်ႈၵူၼ်းတင်းလၢႆတႃႉ။ဢွၼ်ၵၼ်ထူမ်သဵၼ်ႈတၢင်းဢၼ်ၵႂႃႇၼၼ်ႉတႃႉ။ဢွၼ်ၵၼ်ထူမ်တႃႉ။ဢွၼ်ၵၼ်ၽဵဝ်ႈမၢၵ်ႇႁိၼ်တင်းလၢႆပႅတ်ႈလႄႈပူၵ်းလၢမ်ႇပုၼ်ႈမဵဝ်းၵူၼ်းတင်းလၢႆတႃႉ။
၁၁ တူၺ်းလူ။ထႃႇဝရႃႉၽြႃးမီးဢမိင်ႉတေႃႇထိုင်ႁွတ်ႈတီႈသုတ်းတီႈၵွႆလိၼ်မိူင်းၸမ်း၊-ဢွၼ်ၵၼ်လၢတ်ႈတီႈလုၵ်ႈယိင်းၸိဢုၼ်ႇလႄႈဝႃႈ၊-တူၺ်းလူ။ၸဝ်ႈဢၼ်ၵႄႇသႄႇၶျွတ်ႈဢဝ်မႂ်းၼၼ်ႉမႃးယဝ်ႉ။ တူၺ်းလူ။ ၵႃႈၶၼ်ဢၼ်မၼ်းၸဝ်ႈထိူၵ်ႈၶၢမ်ႇဢဝ်ၼၼ်ႉပႃးတီႈမၼ်းၸဝ်ႈယူႇသေလႄႈ သူးလၢပ်ႈမၼ်းၸဝ်ႈၼၼ်ႉ မီးယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။
၁၂ ပိူၼ်ႈတၵ်းလႆႈႁွင်ႉႁိၵ်ႈၶဝ်ၼၼ်ႉလႄႈဝႃႈ ၵူၼ်းဢၼ်မူတ်းၸၢင်ႇတင်းလၢႆ၊ ၶဝ်ၸိူဝ်းဢၼ်ထႃႇဝရႃႉၽြႃးထုတ်ႇဢဝ်၊ဝႃႈၼင်ႇၼႆလႄႈ မႂ်းတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈလႄႈဝႃႈ ဝဵင်းဢၼ်ပိူၼ်ႈႁႃဢဝ်၊ ဝဵင်းဢၼ်ပိူၼ်ႈဢမ်ႇၸုၼ်ႉဢမ်ႇပႅတ်ႈ ဝႃႈၼင်ႇၼႆဢေႃႈ။