၄၂
၁ တူၺ်းၶႃႈၵဝ် ဢၼ်ၵဝ်ၵမ်ႉဝႆႉထွၵ်ႈဝႆႉၵေႃႉဢၼ်ၵဝ်လိူၵ်ႈၵဵပ်းဢဝ်ဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၼၼ်ႉတႃႉ။ၵဝ်တၵ်းႁႂ်ႈဝိၺိၺ်ႇၵဝ်တႄႇယူႇၵႃႈတီႈၼိူဝ်မၼ်းဢေႃႈ။မၼ်းၼၼ်ႉ တၵ်းပၼ်တြႃးတီႈၵူၼ်းၵူႈၸိူဝ်ႉၵူႈမဵဝ်းတင်းလၢႆ ဢေႃႈ။
၂ မၼ်းတၵ်းဢမ်ႇတွပ်ႇဢမ်ႇထဵင်။တၵ်းဢမ်ႇႁွင်ႉဢမ်ႇသႅၼ်ႇ။ ၽူႈ လႂ်တၵ်းဢမ်ႇလႆႈငိၼ်းသဵင်မၼ်းၵႃႈ တီႈၼႂ်းသဵၼ်ႈတၢင်းတင်းလၢႆ။
၃ မႆႉဢေႃႈဢၼ်ယဵပ်ႇတူပ်ႉၼၼ်ႉၸိုင်မၼ်းတၵ်းဢမ်ႇႁၵ်း။တဵၼ်းၵႃႈဢၼ်ၵွၼ်းၽႆးၼမ်ၼႃႇၼၼ်ႉၸိုင် မၼ်းတၵ်းဢမ်ႇမွတ်ႇ။မၼ်းတၵ်းၸွမ်းၼင်ႇသမ်ႇမႃႇတြႃးလႄႈ ၸီႇယၢင်ႇဢေႃႈ။
၄ ႁႅင်းမၼ်းတၵ်းဢမ်ႇဢူၼ်ႈၸႂ်မၼ်းတၵ်းဢမ်ႇလူႉတေႃႇထိုင်ႁွတ်ႈထၼ်ႈပေႃး ႁႂ်ႈတြႃးၸဝ်ႈတႄႇယူႇၵႃႈၼိူဝ်လိၼ်မိူင်းၼၼ်ႉဢေႃႈ။ ၵူၼ်းၼႂ်းၼမ်ႉတင်းလၢႆတၵ်းဢွၼ်ၵၼ်မုင်ႈမွင်းတြႃးမၼ်းယူႇဢေႃႈ။
၅ ထႃႇဝရႃႉၽြႃးၽြႃးပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၾႃႉၵၢင်ႁၢဝ်သေလႄႈ ဢဝ်ၶဵင်ႈဝႆႉဢၼ်သိူဝ်ႇလိူၼ်ႈလိၼ်မိူင်းဢိၵ်ႇတင်း ၵႃႈဢၼ်ဢွၵ်ႇပဵၼ်မႃးၵႃႈၼႂ်းမၼ်း ဢၼ်ပၼ်ဢသၢၵ်ႈတီႈၶဝ်ၸိူဝ်းဢၼ်မီးၵႃႈၼိူဝ်မၼ်း ဢိၵ်ႇတင်းဝိၺိၺ်ႇတီႈၶဝ်ၸိူဝ်းဢၼ်ယိပ်းၵမ်ၵႃႈၼိူဝ်မၼ်းၸိူဝ်းၼၼ်ႉမီးဢမိင်ႉဝႆႉၸမ်း၊-
၆ ၵဝ်ထႃႇဝရႃႉၽြႃး ႁွင်ႉမႂ်းဝႆႉၸွမ်းၼင်ႇတြႃးတၢင်းဢၼ်သိုဝ်ႈတေႃႇလႄႈ တၵ်းၸုင်ဢဝ်မိူဝ်းယူႇသေလႄႈ ၵမ်ႉထွၵ်ႈယူႇလႄႈ ဢဝ်မႂ်းၶၢၼ်းဝႆႉပုၼ်ႈတၢင်းဢၼ်တၵ်းႁဵတ်းပတိၺိၼ်ႇလူၺ်ႈၵၼ်တင်း ၵူၼ်းတင်းလၢႆပုၼ်ႈတၢင်းဢၼ်ႁိူဝ်ႈလႅင်း တီႈၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆ
၇ ႁႂ်ႈမႂ်းလႆႈၽုၺ်ႇမၢၵ်ႇတႃဢၼ်မွတ်ႇတင်းလၢႆဢိၵ်ႇတင်း ႁႂ်ႈလႆႈပွႆႇၶဝ်ၸိူဝ်းဢၼ်ၶျုၵ်ႈဝႆႉၼၼ်ႉလွတ်ႈဢွၵ်ႇသေ ၵႃႈၼႂ်းထွင်ႇတင်းႁႂ်ႈလႆႈၼုၵ်ႈဢဝ်ၶဝ်ၸိူဝ်းဢၼ်ယူႇၵႃႈၼႂ်းလပ်းသိင်ႇၼၼ်ႉ ဢွၵ်ႇသေၵႃႈၼႂ်းႁိူၼ်းထွင်ႇဢေႃႈ။
၈ ၵဝ်ပဵၼ်ထႃႇဝရႃႉၽြႃးဢေႃႈ။ဢၼ်ၼႆႉၸမ်းပဵၼ်ၼႃႇမႃႉၸိုဝ်ႈသဵင်ၵဝ်ယဝ်ႉ။ၵဝ်တၵ်းဢမ်ႇဢဝ်မူၼ်ႈၽုင်းၵဝ်ပၼ်တီႈပိူၼ်ႈလႄႈ ဢဝ်သရေႇၵဝ်ပၼ်တီႈရုၵ်ႉထူႉသၢင်း ထူႉတင်းလၢႆ။
၉ တူၺ်းလူ။လွင်ႈတၢင်းဢၼ်မိူဝ်ႈဢွၼ်တၢင်းၸိူဝ်းၼၼ်ႉလႆႈပဵၼ်မႃးယဝ်ႉ။လွင်ႈတၢင်းဢၼ်မႂ်းတၵ်းလႆႈၵေႃႈမွၵ်ႇလၢတ်ႈဢေႃႈ။ၸူဝ်ႈဢၼ်ၶဝ်ၼၼ်ႉဢမ်ႇပႆႇပေႃႇမႃးၼၼ်ႉၸိုင် ၵဝ်ဢဝ်လွင်ႈၶဝ်ၼၼ်ႉႁႂ်ႈ သူလႆႈငိၼ်းဢေႃႈ။
၁၀ ၸႃႉၸဵမ်ၶဝ်ၸိူဝ်းဢၼ်ၶၢမ်ႈပၢင်ႇလၢႆ ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၼၼ်ႉလႄႈၵူၼ်းၼႂ်းၼမ်ႉတင်းလၢႆဢိၵ်ႇတင်း ၶဝ်ၸိူဝ်းဢၼ်ယူႇၵႃႈတီႈၸိူဝ်းၼၼ်ႉၶဝ်ဢိူၺ်း။ ဢွၼ်ၵၼ်ႁဵတ်းၵႂၢမ်းဢၼ်မႂ်ႇတီႈထႃႇဝရႃႉၽြႃးတႃႉ။ၸႃႉၸဵမ်ၵႃႈတီႈလႅၼ်သုတ်းလိၼ်မိူင်းပုၼ်ႉလႄႈ ဢွၼ်ၵၼ်ယွင်ႈယေႃးမၼ်း ၸဝ်ႈတႃႉ။
၁၁ ထိူၼ်ႇဢိၵ်ႇတင်းဝၢၼ်ႈဢၼ်မီးၵႃႈတီႈၼၼ်ႉတင်းလၢႆ တပ်ႉၵူၼ်းတီႈဢၼ်ၵေႇတႃႇယူႇၸိူဝ်းၼၼ်ႉတၵ်းဢွၼ်ၵၼ်ပဝ်ႇသေႃႇလႄႈ ၶဝ်ၸိူဝ်းဢၼ်ယူႇၵႃႈတီႈမၢၵ်ႇႁိၼ်မၢၵ်ႇၽႃၼၼ်ႉ တၵ်းဢွၼ်ၵၼ်ၵိဝ်သဵင်ဢေႃႈ။ ၶဝ်တၵ်းဢွၼ်ၵၼ်ႁွင်ႉသႅၼ်ႇယူႇၵႃႈ တီႈၼိူဝ်ပၢႆလွႆၸိၵ်းလွႆတင်းလၢႆဢေႃႈ။
၁၂ ၶဝ်တၵ်းဢွၼ်ၵၼ်ယုၵ်ႉယွင်ႈထႃႇဝရႃႉၽြႃးလႄႈ ယွင်ႈယေႃးမူၼ်ႈၽုင်းမၼ်းၸဝ်ႈၵႃႈတီႈ ၵူၼ်းၼႂ်းၼမ်ႉတင်းလၢႆထၢင်ႇထၢင်ႇသႃးသႃးဢေႃႈ။
၁၃ ထႃႇဝရႃႉၽြႃး တၵ်းဢွၵ်ႇမိူၼ်ၸိူဝ်ႉၼင်ႇပူဝ်ႇႁူဝ်ႁၢၼ်ၼၼ်ႉလႄႈ တိုၵ်းယူင်းၸႂ်မၼ်းၸဝ်ႈမိူၼ်ၸိူဝ်ႉၼင်ႇပူဝ်ႇသိုၵ်းၼၼ်ႉဢေႃႈ။မၼ်းၸဝ်ႈႁွင်ႉသႅၼ်သေလႄႈပၢဝ်ႇသေႃႇလႄႈ ႁဵတ်းတၢင်းဢၼ်ၵႆႉၶတ်းၸႂ်ယူႇၽၢႆႇၼိုင်ႈ တင်းရၢၼ်ႇသူႇမၼ်းၸဝ်ႈတင်းလၢႆဢေႃႈ။
၁၄ ၵဝ်လႆႈယူႇတဵတ်ႇတဵတ်ႇယဵၼ်ယဵၼ်ယူႇႁိုင်ၼႃႇယဝ်ႉ။ၵဝ်လႆႈၵိုတ်းယူႇၼိမ်ယူႇလႄႈယိူၼ်ႉၸႂ်ၵၼ်ႈၸႂ်ယူႇဢေႃႈ။မိူဝ်ႈလဵဝ်ၼႆႉၵဝ်တၵ်းႁွင်ႉသႅၼ်ႇ မိူၼ်ၸိူဝ်ႉၼင်ႇမေႈယိင်းဢၼ်လႆႈၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈၼၼ်ႉဢေႃႈ။ၵဝ်တၵ်းထူၺ်ႈၸႂ်လူင်ထူၺ်ႈၸႂ်ႁႅင်းၵမ်း လဵဝ်ဢေႃႈ။
၁၅ ၵဝ်တၵ်းႁႂ်ႈလွႆလူင်လွႆဢွၼ်ႇတင်းလၢႆပဝ်ႇလၢပ်ႈႁၢမ်းၵႂႃႇလႄႈ ႁႂ်ႈတူၼ်ႈလဵၵ်ႉတူၼ်ႈဢွၼ်ႇၶဝ်ၵႃႈမီးၼၼ်ႉႁႅင်ႈႁွင်ဢေႃႈ။ၵဝ်တၵ်းႁႂ်ႈၼမ်ႉႁွင်ႊၼမ်ႉၵႄးတင်းလၢႆပဵၼ်ၵုင်းၵႂႃႇလႄႈ ႁႂ်ႈၼမ်ႉၼွင်တင်းလၢႆႁႅင်ႈႁွင်ၵႂႃႇဢေႃႈ။
၁၆ ၵဝ်တၵ်းဢဝ်ၶဝ်ၸိူဝ်းဢၼ်တႃမွတ်ႇၼၼ်ႉၵႂႃႇၵႃႈၼႂ်းသဵၼ်ႈတၢင်းဢၼ်ၶဝ်ဢမ်ႇႁူႉၼၼ်ႉလႄႈႁႂ်ႈၵႂႃႇၵႃႈၼႂ်းႁွႆးတၢင်းဢၼ်ၶဝ်ဢမ်ႇႁူႉၸၵ်းၼၼ်ႉဢေႃႈ။ၵဝ်တၵ်းႁႂ်ႈလပ်းသိင်ႇပဵၼ်ဢၼ်လႅင်းၵႃႈတီႈၽၢႆႇၼႃႈၶဝ်ၼၼ်ႉလႄႈ ႁႂ်ႈတၢင်းဢၼ်ၵူတ်ႉၸိူဝ်းၼၼ်ႉသိုဝ်ႈဢေႃႈ။ၵဝ်တၵ်းႁဵတ်းလွင်ႈတၢင်းၸိူဝ်းၼၼ်ႉလႄႈဢမ်ႇၸုၼ်ႉဢမ်ႇပႅတ်ႈၶဝ်။
၁၇ ၶဝ်ၸိူဝ်းဢၼ်သွၼ်ႈပိုင်ႈ ရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်းလႄႈ လၢတ်ႈတီႈရုၵ်ႉထူႉဢၼ်လေႃႇႁဵတ်းသွၼ်းႁဵတ်းၼၼ်ႉလႄႈဝႃႈ၊-ၸဝ်ႈႁဝ်းပဵၼ်ၽြႃးတီႈၶႃႈဢေႃႈ၊ ဝႃႈၼင်ႇၼႆၼၼ်ႉလႆႈၶၢမ်ႇတၢင်းဢၼ်ပႅၼ်ၶိုၼ်ႈၵႂႃႇတၢင်းလင်လႄႈ တၵ်းႁွတ်ႈထိုင်တၢင်းဢၼ်ဢူၵ်းဢၼ်ဢၢႆၼႃႇလူင်လၢင်ဢေႃႈ။
၁၈ ၵူၼ်းဢၼ်ႁူၼူၵ်ႇၶဝ်ဢိူၺ်း။ ဢွၼ်ၵၼ်ထွမ်ႇငိၼ်းတႃႉ။ၵူၼ်းဢၼ်တႃမွတ်ႇၶဝ်ဢိူၺ်း။ ဢွၼ်ၵၼ်လူတူၺ်းႁႂ်ႈသူလႆႈႁၼ်တႃႉ။ လိူဝ်သေၶႃႈၵဝ်ၼၼ်ႉၽူႈလႂ်တႃမွတ်ႇ။
၁၉ ၽူႈ လႂ်ႁူၼူၵ်ႇမိူၼ်ၸိူဝ်ႉၼင်ႇတမၢၼ်ႇဢၼ်ၵဝ်ပွႆႇၸႂ်ႉၼၼ်ႉ။ၽူႈ လႂ်တႃမွတ်ႇမိူၼ်ၸိူဝ်ႉၼင်ႇၵေႃႉသေႈၵဝ်ၼၼ်ႉ။ၽူႈ လႂ်တႃမွတ်ႇမိူၼ်ၸိူဝ်ႉၼင်ႇၶႃႈ ထႃႇဝရႃႉၽြႃးၼၼ်ႉ။
၂၀ မႂ်းၼႆႉပိၵ်ႉသမ်ႉႁၼ်လွင်ႈတၢင်းၼမ်ၼႃႇသေၵေႃႈမႂ်းဢမ်ႇၸၢင်ႊဢဝ်သႂ်ႇၸႂ်သႂၢင်းၸႂ်။ပိၵ်ႉသမ်ႉႁူမၼ်းၽုၺ်ႇဝႆႉသေၵေႃႈ မၼ်းဢမ်ႇၸၢင်ႊငိၼ်း။
၂၁ ထႃႇဝရႃႉၽြႃး ထုၵ်ႇၸႂ်ၵျိူၵ်ႈၸႂ် တၢင်းဢၼ်ႁဵၼ်းတၢင်းဢၼ်ယုၵ်ႉယွင်ႈတြႃးလႄႈ ႁႂ်ႈတဵမ်ဝႆႉတင်းၵုင်ႇသရေႇၵွပ်ႈပိူဝ်ႈ တၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉ ဢေႃႈ။
၂၂ ၵူၼ်းမဵဝ်းၼႆႉပဵၼ်မဵဝ်းဢၼ်လႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်သေလႄႈ ယႃႉပႅတ်ႈၼၼ်ႉလႄႈၶဝ်ႈၵႃႈမီးၼၼ်ႉ လႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈၼႂ်းၶုမ်ၼႂ်းလုၵ်းလႄႈ လႆႈတဵတ်ႇယူႇလပ်ႉယူႇၵႃႈၼႂ်းထွင်ႇဢေႃႈ။ၶဝ်ပဵၼ်တီႈဢၼ်ႁိမ်ဢဝ်ႁူင်ႇဢဝ်လႄႈ ၽူႈ လႂ်သေၵေႃႉသေၵူၼ်း ဢမ်ႇၼုၵ်ႈဢဝ်၊ၶဝ်ပဵၼ်တီႈဢၼ်ယႃႉပႅတ်ႈလႄႈ ၽူႈ လႂ်သေၵေႃႉသေၵူၼ်းဢမ်ႇလၢတ်ႈ လႄႈဝႃႈ၊-
၂၃ ၶိုၼ်းပၼ်သေ၊ဝႃႈၼင်ႇၼႆၼၼ်ႉ။ ၼႂ်းသူၽူႈ လႂ်တၵ်းထွမ်ႇဢဝ်ၵႂၢမ်းၼႆႉ ၽူႈ လႂ်တၵ်းငိၼ်းလႄႈ မၢတ်ႈတွင်းဝႆႉပုၼ်ႈၶိင်ႇၵႃႇလႃႉၵမ်းလိုၼ်း။
၂၄ ၽူႈ လႂ်ဢဝ်ယႃႇၵုပ်ႉဢၢပ်ႈပၼ် ႁႂ်ႈပဵၼ်တီႈဢၼ်ႁိမ်ဢဝ်ႁူင်ႇဢဝ်လႄႈႁႂ်ႈဢိသရေႇလ ႁွတ်ႈထိုင်ၵႃႈၼႂ်းမိုဝ်းၸူၼ်ၼၼ်ႉ။ထႃႇဝရႃႉၽြႃး ဢၼ်ႁဝ်းၽိတ်းပိူင်ႈဢၼ်ၶဝ်ဢမ်ႇမီးဢလူဝ် ၶႆႈၸွမ်းသဵၼ်ႈတၢင်းမၼ်းၸဝ်ႈလႄႈ ယင်းဢမ်ႇထွမ်ႇဢမ်ႇဢဝ်ႇတြႃးမၼ်းၸဝ်ႈလႄႈ ယူႇၼၼ်ႉဢၢပ်ႈပၼ်ဢမ်ႇၸႂ်ႈႁိုဝ်။
၂၅ ပိူဝ်ႈၼႆလႄႈမၼ်ၸဝ်ႈဢဝ်တေႃးသႃႉတၢင်းၸႂ်မႆႈၶႆႈၸႃႉမၼ်းၸဝ်ႈ ဢၼ်ႁႅင်းယႂ်ႇၼႃႇလူင်လၢင်ဢိၵ်ႇတင်းတၢင်းဢၼ်တိုၵ်းသိုၵ်းဢၼ်ႁၢဝ်ႈၵျၢမ်းၼႃႇလူင်လၢင် သွၼ်းလေႃႇၵႃႈၼိူဝ်မၼ်းသေလႄႈတုတ်ႇၽႆးလဵပ်ႈႁွပ်ႈမၼ်းဢေႃႈ။ၵူၺ်းၵႃႈမၼ်းဢမ်ႇႁူႉ။ ပိၵ်ႉသမ်ႉၽႆးမႆႈမၼ်းသေၵေႃႈမၼ်းယင်းဢမ်ႇဝႆႉသတိလႄႈယူႇဢေႃႈ။